«Արտատարածաշրջանային խաղացողների միանալը պետք է նպաստի խաղաղ օրակարգի ամրապնդմանը և լրացուցիչ դժվարություններ ու բաժանարար գծեր չստեղծի։ Լավ կլինի, որ Մերձավոր Արևելքի հակամարտությունների կարգավորման գործում արևմտյան աջակցության տխուր փորձը չկրկնվի», - նշել է դիվանագետը

Զախարովան ընդգծել է, որ Մոսկվան կվերլուծի վաշինգտոնյան հանդիպման ժամանակ ԱՄՆ-ի հնչեցրած հայտարարությունները, որոնք վերաբերում են տարածաշրջանային հաղորդակցությունների ապաշրջափակմանը։

«Ռուսաստանի մասնակցությամբ եռակողմ պայմանավորվածությունները, որոնցից չի հրաժարվել կողմերից որևէ մեկը, շարունակում են արդիական մնալ։ Կարևոր է հաշվի առնել նաև Հայաստանի` ԵԱՏՄ միասնական մաքսային տարածքին անդամակցելու գործոնը, մասնավորապես հանրապետության տարածքով տարանցիկ բեռնափոխադրումների կազմակերպման հարցում», - ասվում է մեկնաբանության մեջ։

Նա հիշեցրել է, որ հայ-ադրբեջանական կարգավորման ներկա փուլը մեկնարկել է Ռուսաստանի անմիջական աջակցությամբ և գլխավոր դերակատարմամբ, երբ 2020 թվականի նոյեմբերի 9-ին բարձր մակարդակի եռակողմ հայտարարություն ընդունվեց:

«Տեղին է հիշեցնել, որ հայ-ադրբեջանական կարգավորման ներկա փուլը մեկնարկել է 2020 թվականի նոյեմբերի 9-ին Լեռնային Ղարաբաղի հակամարտության գոտում կրակի և բոլոր մարտական գործողությունների դադարեցման մասին բարձր մակարդակով եռակողմ հայտարարության ընդունմամբ: Տարածաշրջանում տեղակայվեց ռուսական խաղաղապահ զորախումբ, որն անփոխարինելի ներդրում ունեցավ իրավիճակի կայունացման գործում։ Միշտ կհիշենք մեր խաղաղապահներին, որոնք զոհվեցին ծառայողական պարտքը կատարելիս», - ընդգծել Է դիվանագետը։

ԱԳՆ ներկայացուցիչը նշել է, որ հարավկովկասյան երկու հանրապետությունների միջև խաղաղություն հաստատելու գործում կարևորագույն նշանակություն կունենա Ադրբեջանի և Հայաստանի միջև խաղաղության և միջպետական հարաբերությունների հաստատման մասին համաձայնագրի ստորագրումը և ուժի մեջ մտնելը:

«Երկու երկրների հաշտեցումը պետք է լինի տարածաշրջանային համատեքստում և հիմնված լինի շահերի հավասարակշռության և կողմերի ու հարևան պետությունների առաջնահերթությունների անվերապահ հարգանքի վրա», - եզրափակել է Զախարովան:

Հիշեցնենք` այս գիշեր Վաշինգտոնում ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը ստորագրել են յոթ կետից բաղկացած համատեղ հռչակագիր, որը ամրագրում է կողմերի խաղաղության ձգտումը` առանց մանրամասները ներկայացնելու։ Փաստաթղթի տակ ստորագրություն է դրել նաև ԱՄՆ նախագահ Դոնալդ Թրամփը։