Իրանի Սեմնան նահանգի դատական իշխանության ղեկավարը հայտնել է Բոստամում երկու կանանց բռնաբարության համար դատապարտված տղամարդու մահապատժի հրապարակային իրականացման մասին, գրում է ISNA-ն։

Մահապատիժն ի կատար է ածվել այսօր առավոտյան նույն դատական շրջանում։ 

Ինչպես պարզաբանել է նահանգի դատական իշխանության մամուլի ծառայությունը, հոջաթոլիսլամ Մոհամմադ Սադեկ Աքբարին ներկայացրել է գործի մանրամասները։ Այն քննության էր ընդունվել դեռևս 2022 թվականին՝ ոստիկանության դիմումից և Բոստամի շրջանի դատարանի միջամտությունից հետո։ 

Հետաքննության ընթացքում պարզվել է, որ մեղադրյալը տարբեր պատրվակներով մոլորեցրել է երկու կանանց և, առաջնորդվելով հանցավոր մտադրություններով, նրանց նկատմամբ կատարել է սեռական բռնության գործողություններ։ Բացի այդ, նա ահաբեկել է տուժածներին և սպառնացել նրանց՝ ստեղծելով վախի և պատվի ու հեղինակության համար մտահոգության մթնոլորտ։ 

Լիարժեք և փաստաթղթավորված քննությունից հետո Սեմնան նահանգի առաջին ատյանի քրեական դատարանը, որը գտնվում է Շահրուդ քաղաքում, մեղավոր է ճանաչել տղամարդուն և դատապարտել մահապատժի։ Որոշումը մանրակրկիտ ուսումնասիրվել և հաստատվել է Գերագույն դատարանի կողմից։

Աքբարին ընդգծել է, որ մահապատիժը կատարվել է օրենքով նախատեսված բոլոր ընթացակարգերի անցումից հետո և կրոնական ու իրավական նորմերի պահպանմամբ։ Դատավճիռը հրապարակային կերպով ի կատար է ածվել այսօր առավոտյան՝ Բոստամի դատական շրջանում։