Լեհաստանի վարչապետ Դոնալդ Տուսկը X սոցցանցում գրել է, որ աճում է ռուսամետ տրամադրությունների և պատերազմող Ուկրաինայի նկատմամբ թշնամանքի ալիքը, որը կազմակերպվում է Կրեմլի կողմից՝ հիմնված իրական վախերի և հույզերի վրա։ 

«Քաղաքական գործիչների դերն այդ ալիքը կանգնեցնելն է, ոչ թե այն ղեկավարելը։ Սա հայրենասիրության և հասունության փորձություն է Լեհաստանի ամբողջ քաղաքական դասի համար», – նշել է նա։

Ավելի վաղ Լեհաստանում Ուկրաինայի դեսպան Վասիլ Բոդնարը հայտնել էր, որ անհայտ անձինք կտրել են խաչը Լեգնիցայի Սուրբ Աստվածածնի Վերափոխման ուկրաինական հունա-կաթոլիկ եկեղեցու գլխավոր գմբեթից։

Ըստ նրա, Լեհաստանում Ուկրաինայի դեսպանությունն արդեն շտապ կարգով նոտա է ուղարկել Լեհաստանի Արտաքին գործերի նախարարություն, իսկ Ուկրաինայի գլխավոր հյուպատոսությունը Վրոցլավում դիմել է տեղական իրավապահ մարմիններին՝ պահանջելով ձեռնարկել բոլոր անհրաժեշտ արձագանքման միջոցները և պատասխանատվության ենթարկել հանցագործներին։ 

Բոդնարը նաև դժգոհություն է հայտնել Լեհաստանում հակաուկրաինական միտումների կապակցությամբ։