Լատվիայի իշխանությունները որոշում են կայացրել ամբողջությամբ փակել օդային տարածքը երկրի արևելքում Ռուսաստանի և Բելառուսի հետ 50 կմ ձգվող օդային սահմանին։ Ինչպես հաղորդում է LSM լրատվականը, այս մասին հայտնել է Լատվիայի պաշտպանության նախարար Անդրիս Սպրուդսը՝ տեղեկացնելով, որ որոշումն ուժի մեջ է մտնելու սեպտեմբերի 11-ի ժամը 18։00-ից առնվազն մինչև սեպտեմբերի 18-ը։

Կա հավանականություն, որ ժամկետը կարող է հետաձգվել։

Սեպտեմբերի 11-ին հրավիրված մամուլի ասուլիսի ժամանակ Սպրուդսը նշել է, որ Լեհաստանում կատարվածը, որի ժամանակ ռուսական դրոնները բելառուսական տարածքով անցել էին լեհական տարածք, ՆԱՏՕ-ի օդային տարածքի կոպիտ խախտում է և Լատվիան պետք է համապատասխան քայլեր ձեռնարկի։ Նախարարը հաստատել է, որ այս պահի դրությամբ չկա ուղիղ սպառնալիք Լատվիայի նկատմամբ, սակայն կանխարգելող միջոցառումները անհրաժեշտություն են։