ՀՀ արտգործնախարարությունը «Ժողովուրդ» օրաթերթից պահանջում է հերքում տարածել հուլիսի 5-ին հրապարակված նյութում տեղ գտած պնդումների վերաբերյալ։

Թերթը գրել էր, որ ՀՀ արտգործնախարար Արարատ Միրզոյանը Նաիրի համայնքում (Եղվարդ) ձեռք է բերել 112 մլն դրամ արժողությամբ առանձնատուն հայտարարագրում չբացահայտված միջոցներով։

«Ուշադրություն հրավիրենք այն հանգամանքին, որ հենց վերոնշյալ նյութում նշվում է, որ «Արարատ Միրզոյանն ու կինը՝ Գոհար Աբաջյանը, առանձնատունը 112 մլն դրամով գնել են 2022-ի դեկտեմբերին Նաիրի համայնքում»։ Համապատասխանաբար, գնված առանձնատան գումարի աղբյուրը «բացահայտելու» համար բավարար կլիներ ծանոթանալ նախարար Միրզոյանի կնոջ՝ զուգահեռաբար հրապարակված տարեկան հայտարարագրին, որում ներկայացված է առանձնատան գնման նպատակով Գ. Աբաջյանի անունով ձևակերպված վարկը»,– ֆեյսբուքյան էջում գրել է ԱԳՆ խոսնակ Անի Բադալյանը։

Նա հորդորել է պաշտոնյայի եկամուտների մասին լուսաբանելիս ցուցաբերել աչալրջություն և զերծ մնալ մանիպուլյացիաներից: