Կիրիենկոյին «հաղթողներին» ու Կիրիենկոյից զանգ սպասող ընդդիմությանը բարի բախտ մաղթենք, թող մի բարձի ծերանան։

Գրել է պատմական գիտությունների թեկնածու Միհրան Հակոբյանը.

«Նիկոլի քարոզչամեքենան ու հարակից խմբակը (պսևդոարևմտամետ սարգսյանարամներ ու բաբաջանյանարմաններ) փրփուրը բերաններին փորձում են քարոզչական արդյունք ստանալ, թե Սամվել Կարապետյանին կալանավորելով ու Հայ Եկեղեցու վրա հարձակվելով՝ Վլադիմիր Պուտինի աշխատակազմի ղեկավարի տեղակալ, ՌԴ նախկին վարչապետ Սերգեյ Կիրիենկոյին են հաղթում:

Ավելին՝ «Կիրիենկոն ցանկանում է վերացնել Հայաստանի ինքնիշխանությունը, բայց Նիկոլը մաքառում և ատամներով պահում է ինքնիշխանությունը»: Իբր թե Կիրենկոն է զբաղվում Հայաստանով, իրենք էլ Կիրիենկոյին «հաղթում են»:

Հետաքրքիր է, որ Կիրիենկոյին են «հաղթում», ոչ թե Պուտինին: Հավանաբար դժվար է մարդկանց համոզելը, որ Պուտինը, բան ու գործը թողած, Նիկոլի ու սարգսյանարամների դեմ «շաշկի է խաղում» ու պարտվում է: Եվ, հետո. Պուտինի անունը տալը երևի վտանգավոր է, իսկ ահա Կիրիենկոյինը՝ ոչ այնքան, նույնիսկ որոշակի էկզոտիկա կա այս ամենում:

Անշուշտ, շատ չեն, բայց դեռ կան միամիտներ, որ հավատում են, թե Պուտինի աշխատակազմը Հայաստանով զբաղվում է, իսկ Կիրիենկոն ծրագրավորել է Հայաստանում իշխանափոխություն: Ու չի էլ քննարկվում հարցը, թե ինչու՞ պետք է Ռուսաստանը փոխի Նիկոլին. ուկրաինական պատերազմի «նեղ մաջալին» և Թուրքիայի հետ ունեցած ծնկած հարաբերությունների ֆոնին ավելի լավ փալաս է գտնելու՞ Հայաստանի կառավարիչի աթոռի համար, որը արևմտամետի շղարշի ներքո կետ առ կետ կանի այն, ինչ իրար մեջ պայմանավորվել են աշխարհաքաղաքական կենտրոնները:

Երկու կոպեկի խելք ունեցողների համար նույնիսկ կասկած չկա, որ աջուձախին «Մոսկվայի ագենտ», «գուբերնիստ», «ԿԳԲ գործակալ» և նման այլ էպիտետներ շնորհող պսևդոարևմտամետները, որոնց արդեն 7 տարի է Հայաստանի իշխանություն ու Հայաստանի ինքնիշխանության «պահապաններ են» կարգել, ուղիղ կամ միջնորդավորված այն են, ինչում ուրիշներին են փորձում մեղադրել: Հիշու՞մ եք չէ՝ գողն ամենից բարձն է գոռում՝ բռնեք գողին: Ի դեպ, սրանց մի մասը գործում է գիտակցված՝ «պագոնի տակ», մյուս մասը՝ այդքան ուղեղ չունի, որ հասկանա, թե իրականում ում համար է աշխատում:

Եվ, քանի որ ուղեղ չունի, չի էլ հասկանում, թե ինչ «փոթորիկ է մոտենում»: Կիրիենկոյին «հաղթողների» գլխին արժի սառը ջուր լցնել, որովհետև իրականում ոչ Կիրիենկոն, ոչ էլ ռուսական որևէ այլ «գրասենյակ» իրենցով չի զբաղվում, ոչ մի ձևով չի զբաղվում: Եղածը թուլափայի մակարդակի ռուսական տեղեկատվական ծխածածկույթ է՝ վերջում «թղթերով մաքուր» լինելու համար:

Իմպերիան այլ ձև չի լինում: Իսկ զբաղվելու փորձ Ռուսաստանն ունի՝ սկսած 1988-ից: Դրա մասին հայկական էլիտա ասվածը գիտի, բայց չի բարձրաձայնում՝ հավանաբար շահերի ու պոլիտկոռեկտության դրդապատճառներով:

Ասվածում նյարդ չկա, էմոցիա չկա, մեղադրանք չկա: Ասվածում կա իրողություն ու պատմական աքսիոմների արձանագրում: Եվ, ուրեմն՝ Կիրիենկոյին «հաղթողներին» ու Կիրիենկոյից զանգ սպասող ընդդիմությանը բարի բախտ մաղթենք, թող մի բարձի ծերանան: Իսկ երբ Ռուսաստանը կզբաղվի Կիրիենկոյին «հաղթող» նիկոլական խմբակով, դա իրենք կզգան իրենց մաշկի վրա:

Նիկոլի ու նրա ՔՊ-ի դեպքում այդ զբաղվելը կամ այսպես ասած՝ X օրը, չի լինելու այնպիսին, ինչպիսին եղել է 1998-ին կամ 2018-ին, նույնիսկ 2008-ի նման չի լինելու: X օրը նիկոլենց համար շատ-շատ դաժան է լինելու: Կրիմինալիստները գիտեն, թե ինչու: Բայց X օրը լինելու է, չի կարող չլինել, որովհետև բնության մեջ միշտ E = mc2»:

ԱՄՆ նախագահը դատապարտել է Իսրայելի դատախազներին՝ վարչապետ Բենյամին Նեթանյահուի դեմ կոռուպցիայի գործ բացելու համար, ընդգծելով, որ Վաշինգտոնը, միլիարդավոր դոլարների օգնություն տրամադրելով Իսրայելին, չի պատրաստվում հանդուրժել դա։

Նեթանյահուի դեմ 2019 թվականին երեք քրեական գործ է բացվել՝ կաշառակերության, խարդախության և վստահության չարաշահման մեղադրանքներով, որոնք նա հերքում է։ Դատավարությունը սկսվել է 2020 -ից։

«Խելագարություն է այն, ինչ դատախազներն անում են Բիբի Նեթանյահուի հետ», - արձագանքել է Թրամփը Truth Social-ում ՝ պնդելով, թե այդ դատական գործընթացը խոչընդոտելու է Նեթանյահուին բանակցել պաղեստինյան Համասի և Իրանի հետ։

Հավաքական անվտանգության պայմանագրի կազմակերպության (ՀԱՊԿ) գագաթնաժողովը տեղի կունենա 2025 թվականի աշնանը Ղրղզստանում։ Այս մասին կիրակի՝ հունիսի 29-ին, հայտնել է Ղրղզստանի արտաքին գործերի նախարար Ժեենբեկ Կուլուբաևը, հայտնում է «Комсомольская правда»-ն։

«Ակնկալում ենք ռուսաստանյան պետության ղեկավարի մասնակցությունը ՀԱՊԿ Հավաքական անվտանգության խորհրդի նիստին, որը տեղի կունենա այս տարվա աշնանը Ղրղզստանի Հանրապետությունում»,- ասել է քաղաքական գործիչը Ռուսաստանի ԱԳՆ ղեկավար Սերգեյ Լավրովի հետ հանդիպման արդյունքներով։

Ինչպես նշում է լրատվամիջոցը, հունիսի 28-ին Սերգեյ Լավրովին տեղափոխող ռուսաստանյան ինքնաթիռը ժամանել է Ղրղզստանի Չոլպոն-Աթա քաղաքի օդանավակայան։ Այս երկրում քաղաքական գործիչը նախատեսում է անցկացնել մի քանի աշխատանքային հանդիպում և բանակցություն։ Բացի այդ, ՌԴ ԱԳՆ ղեկավարը կմասնակցի ՀԱՊԿ անդամ պետությունների արտաքին գործերի նախարարների խորհրդի նիստին։

Նախագահ Դոնալդ Թրամփի հատուկ բանագնաց Սթիվ Ուիթքոֆն առաջիկա օրերին Իրանի հետ հնարավոր համաձայնագրի շուրջ բանակցություններ պետք է վարի, հայտնում է NBC News-ը։

Ըստ լրատվամիջոցի, բանակցությունների նպատակը պատժամիջոցների մեղմացման դիմաց ուրանի հարստացումը դադարեցնելու փորձն է։ 

Միևնույն ժամանակ, ամերիկյան և իսրայելական հետախուզական գործակալությունները «ուշադիր կհետևեն, թե ինչ է անում Իրանը կուլիսներում», գրում է NBC News-ը։

Ավելի վաղ Իրանի արտաքին գործերի նախարար Աբբաս Արաղչին հերքել էր ԱՄՆ-ի հետ բանակցությունները վերսկսելու որևէ ծրագիր։

«Բանակցությունները վերսկսելու շուրջ որևէ պայմանավորվածություն ձեռք չի բերվել։ Բանակցությունների մասին խոսք անգամ չի եղել։ Բանակցությունների առարկան ներկայումս չի քննարկվում»,- ասել է նա։

Արաղչին պարզաբանել է, որ Իրանը շարունակում է հավատարիմ մնալ դիվանագիտությանը, սակայն ԱՄՆ-ի հետ բանակցությունները վերսկսելու որոշումը գնահատման կարիք ունի։

Գիշերը Ռուսաստանը զանգվածային հարձակում է իրականացրել Ուկրաինայի վրա՝ անօդաչու թռչող սարքերով, բալիստիկ և թևավոր հրթիռներով։

Գիշերային հարձակման ընթացքում Ուկրաինայի տարածք է արձակվել 60 հրթիռ, հայտնում է Ուկրաինայի ԶՈւ-ն։ Գրանցվել է նաև 477 անօդաչու թռչող սարքի արձակում, այդ թվում՝ ավելի քան 250 «Շահեդ»։

Ամենաինտենսիվ հարվածները գրանցվել են Լվովում, Զապորոժիեի մարզում, Չերկասիի մարզում, Կրեմենչուգում, Նիկոլաևում և Դոնբասում։

Զապորոժիեում և Կրեմենչուգում վնասվել են արդյունաբերական ձեռնարկություններ, Չերկասիում կա վեց զոհ։ի

Հայ Ազգային Կոնգրեսը խստորեն դատապարտում է Հայաստանի Հանրապետության իշխանությունների կողմից Հայ Առաքելական Եկեղեցու վեհարանի դեմ իրականացված աննախադեպ գրոհը: 2025 թվականի հունիսի 27-ին ոստիկանության և Ազգային անվտանգության ծառայության կողմից ձեռնարկված գործողությունները, որոնք ուղղված են Հայաստանի հոգևոր և ազգային ինքնության կարևորագույն խորհրդանիշի՝ Մայր Աթոռ Սուրբ Էջմիածնի դեմ, անընդունելի են և խաթարում են հայ ժողովրդի դարավոր արժեքներն ու միասնականությունը: 

Հայ Առաքելական Եկեղեցին ավելի քան 1700 տարի եղել է հայ ժողովրդի հոգևոր առաջնորդը, պետականության պահպանման հենասյունը և ազգային ինքնության կարևորագույն կրողը: Նման գործողությունները, որոնք իրականացվում են իշխանությունների կողմից, ոչ միայն խախտում են Հայաստանի Հանրապետության Սահմանադրությամբ երաշխավորված եկեղեցու և պետության անջատման սկզբունքը, այլև ուղղակի հարված են հասցնում մեր ժողովրդի միասնությանը՝ հատկապես այս ճգնաժամային ժաման 

Մենք խորապես մտահոգված ենք այն հանգամանքով, որ իշխանությունների կողմից նման քայլերը կարող են լինել ավելի լայնածավալ ծրագրի մաս, որն ուղղված է Հայ Եկեղեցու պատմական դերի նսեմացմանը և ազգային արժեքների խարխլմանը: Այս գործողությունները, որոնք իրականացվում են բռնի ուժի և ճնշումների միջոցով, հիշեցնում են մեր պատմության ամենածանր էջերը և անընդունելի են ժողովրդավարական պետությունում:

Հայ Ազգային Կոնգրեսը կոչ է անում.

Անհապաղ դադարեցնել Հայ Առաքելական Եկեղեցու դեմ ուղղված բոլոր գործողությունները:

Հարգել Հայաստանի Հանրապետության Սահմանադրությունը և եկեղեցու անկախությունը:

Զերծ մնալ ազգային սրբությունների և հոգևոր արժեքների դեմ ուղղված ցանկացած ոտնձգությունից:

Հայաստանի քաղաքացիներին, հոգևորականությանը և միջազգային հանրությանը՝ համախմբվել ի պաշտպանություն Հայ Առաքելական Եկեղեցու և նրա սրբավայրերի:

Հայ Ազգային Կոնգրեսը հայտարարում է, որ կանգնած է Հայ Առաքելական Եկեղեցու կողքին և վճռականորեն պաշտպանելու է մեր ազգային հոգևոր ժառանգությունը: Մենք կոչ ենք անում բոլոր հայրենակիցներին՝ միավորվել այս պայքարում՝ հանուն մեր ազգի արժանապատվության և միասնության:

Ռուսաստանի փոխվարչապետ Ալեքսեյ Օվերչուկի` հունիսի վերջին նախատեսված այցն Ադրբեջան չեղարկվել է։ Այս մասին հաղորդում է Trend-ը։

Հաղորդվում է, որ այցի չեղարկման պատճառը Եկատերինբուրգում տեղի ունեցած իրադարձություններն էին, որի ժամանակ ռուս իրավապահ մարմինների կողմից իրականացված գործողության արդյունքում սպանվել էին ադրբեջանցիներ։

Ինչպես նշում են գործակալության աղբյուրները, ստեղծված իրավիճակում ադրբեջանական կողմը չի տեսնում Օվերչուկի կամ որևէ այլ ռուս պաշտոնյայի՝ երկիր այցի նպատակահարմարությունը։

Հունիսի 27-ին ԱԴԾ աշխատակիցները խուզարկություններ են անցկացրել Եկատերինբուրգում գտնվող՝ ադրբեջանցիների տներում։ Գործողության արդյունքում սպանվել է երկու ադրբեջանցի, կան ձերբակալվածներ։

ՀՀ վարչապետ Նիկոլ Փաշինյանը ֆեյսբուքյան էջում տեսանյութ է հրապարակել՝ կից նշելով․

««Կրթվելը նորաձև է» շարժման շրջանակում պատասխանեցինք «Ազատություն» ռադիոկայանի լրագրողի հարցին, ով միջոցառմանը գրանցվել էր որպես քաղաքացի»։ 

Լրագրողի հարցին ի պատասխան՝ վարչապետը նախ հիշեցրել է, որ շարժման շրջանակում կայացող հանդիպումների ընթացքում փորձում է քաղաքական թեմաների չանդրադառնալ։ Վարչապետին հարց է ուղղվել վերջին օրերին երկրում տեղի ունեցող իրադարձությունների, նաև այն մասին, թե՝ ինչպես են վարչապետին հասու դառնում հոգևորականների մասին անձնական տեղեկություններ։

«Այն մասին, որ ես ունեմ պրոբլեմ հոգևորականների հետ կամ հոգևորականներն ինձ հետ պրոբլեմ ունեն։ Իմ կարծիքով՝ մեր հոգևորականների պրոբլեմը Աստծու հետ է, ինձ հետ ոնց կարող են պրոբլեմ ունենալ։ Կուսակրոն քահանաները կուսակրոնությունը ստանձնելիս ծնկի են գալիս Հիսուս Քրիստոսի իջման վայրում և ուխտում են, ուխտագիր են ստորագրում, որ իրենք չեն ունենալու անձնական կյանք։ Աբսուրդ է «կաթողիկոսի անձնական կյանք» բառակապակցությունը։ Անձը եթե ունի անձնական կյանք, կաթողիկոս չէ»,- ասել է նա։

Մանրամասները՝ տեսանյութում։

2025 թվականի հունիսի 29-ին և 30-ին ԵՄ արտաքին գործերի և անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Կայա Կալասը կայցելի Հայաստան։ Հայաստանում ԵՄ գրասենյակից հայտնում են, որ հունիսի 29-ին ԵՄ բարձր ներկայացուցիչը կհանդիպի Հայաստանի Հանրապետության նախագահ Վահագն Խաչատուրյանի հետ։

Նույն օրը կեսօրից հետո նա կայցելի Եղեգնաձորում տեղակայված Հայաստանում ԵՄ առաքելության կենտրոնակայան։ Հունիսի 30-ին Եմ բարձր ներկայացուցիչը կհանդիպի քաղաքացիական հասարակության կազմակերպությունների ներկայացուցիչներին։

Նույն օրը նա կհանդիպի Հայաստանի Հանրապետության արտաքին գործերի նախարար Արարատ Միրզոյանին։ Հանդիպումից հետո` Հայաստանի ժամանակով ժամը 12:30-ին (UTC+4) տեղի կունենա համատեղ մամուլի ասուլիս։

Օրվա ավարտին՝ ԵՄ բարձր ներկայացուցիչը կհանդիպի ՀՀ վարչապետ Նիկոլ Փաշինյանին, ինչպես նաև Երիտասարդ եվրոպական դեսպանների, Երիտասարդական խորհուրդ նախաձեռնության ներկայացուցիչների և Erasmus+ ծրագրի շրջանավարտների հետ։

Այցի ընթացքում միջոցառումների տեսա-լուսանկարահանումները կհեռարձակվեն EBS և X հարթակներով։

Հունիսի 29-ից 30-ն պաշտոնական այցով Հայաստանում կգտնվի Եվրոպական հանձնաժողովի փոխնախագահ, ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը:

ԱԳՆ–ից հայտնում են, որ հունիսի 30-ին ԱԳՆ-ում կկայանա ՀՀ արտաքին գործերի նախարար Արարատ Միրզոյանի և Կայա Կալասի հանդիպումը, որին կհաջորդի նախարարների համատեղ մամուլի ասուլիսը: