ԱՄՆ փոխնախագահ Ջեյ Դի Վենսը հաստատել է, որ Գրենլանդիայի նկատմամբ հետաքրքրությունը կապված է ազգային անվտանգության հետ՝ Newsmax-ին ասելով, որ Միացյալ Նահանգները կպաշտպանի այդ շահերն՝ «անկախ ամեն ինչից»:

Վենսը խոսել է անցյալ շաբաթ Դանիայի ինքնավար տարածք կատարած իր ուղևորության մասին։

«Նախագահի ասածը քննադատում են, բայց դա շատ առողջ բանականություն է: Տեսեք, դա կարևոր է մեր անվտանգության համար, կարևոր է մեր հակահրթիռային պաշտպանության համար, և մենք պատրաստվում ենք պաշտպանել Ամերիկայի շահերն՝ անկախ ամեն ինչից», – ասել է Վենսը:

Վենսը հայտարարել է, որ գրենլանդացիները պարզ հասկացրել են, որ ցանկանում են անկախ լինել Դանիայից:

«Դա մտահոգիչ է։ Ես նկատեցի, որ նրանք Դանիայից մեկ անձի համար տարեկան ստանում են մոտ 60․000 դոլար։ Նախագահն Թրամփն ասել է, որ մենք կարող ենք Գրենլանդիայի ժողովրդին շատ ավելի գումար տալ: Կրկին, քանի որ անվտանգությունը կարևոր է Ամերիկայի Միացյալ Նահանգների համար:

Այո, ես կարծում եմ, որ նրանք ցանկանում են անկախ լինել Դանիայից», – հավելել է նա: