Ռուսաստանի նախագահ Վլադիմիր Պուտինը ստորագրել է օրենք, որը հնարավորություն է տալիս զինվորական ծառայության զորակոչվել ամբողջ օրացուցային տարվա ընթացքում, հաղորդում է ТАСС-ը։

Փոփոխությունները նախատեսում են, որ բժշկական զննումները, մասնագիտական ​​հոգեբանական ստուգումները և զորակոչային հանձնաժողովի նիստերը կանցկացվեն ամբողջ օրացուցային տարվա ընթացքում։

Փաստաթղթում նախատեսվում է նաև, որ զորակոչիկները զինվորական ծառայության կուղարկվեն տարին երկու անգամ՝ ապրիլի 1-ից հուլիսի 15-ը և հոկտեմբերի 1-ից դեկտեմբերի 31-ը։ 

Սահմանվել են նաև զորակոչի հատուկ ժամկետներ որոշակի կատեգորիայի քաղաքացիների համար։ Մասնավորապես, դաշտային աշխատանքներ կատարող գյուղական բնակիչները ծառայության կուղարկվեն հոկտեմբերի 15-ից դեկտեմբերի 31-ը, ուսումնական հաստատությունների աշխատակիցները՝ մայիսի 1-ից հուլիսի 15-ը, իսկ Ծայր Հյուսիսի որոշակի շրջանների բնակիչները՝ մայիսի 1-ից հուլիսի 15-ը կամ նոյեմբերի 1-ից դեկտեմբերի 31-ը։

Ամրագրվել են նաև գործող օրենսդրության մի շարք այլ փոփոխություններ։ Օրինակ, օրենքը սահմանում է, որ էլեկտրոնային կարգով զինվորական կոմիսարիատ ներկայանալու ամսաթիվը չի կարող գերազանցել 30 օրը՝ սկսած գրանցամատյանում դրա տեղադրման օրվանից։

Բացի դրանից, զորակոչային հանձնաժողովը կկարողանա որոշում ընդունել զորակոչից կամ զինվորական ծառայությունից հետաձգումների կամ ազատումների վերաբերյալ՝ առանց զորակոչիկի անձնական ներկայության, իսկ զինվորական կոմիսարիատները իրավունք կունենան քաղաքացիներին տրամադրել զինվորական կոմիսարիատից քաղվածքներ, ներառյալ՝ էլեկտրոնային ձևաչափով։

Ամբողջ օրացուցային տարվա ընթացքում զորակոչի վերաբերյալ կանոնակարգերն ուժի մեջ կմտնեն 2026 թվականի հունվարի 1-ից։