Ֆրանսիան իր առողջապահական համակարգը պատրաստում է այն սցենարին, որի դեպքում, ամենայն հավանականությամբ, համակարգը ստիպված կլինի խնամել մարտական ​​գործողություններից վերադարձող զինվորներին, ինչնը առողջապահության նախարար Կատրին Վորթենը սովորական նախազգուշական միջոց է համարում։ 

Հուլիսի 18-ին տարածաշրջանային առողջապահական մարմիններին ուղղված նամակում Ֆրանսիայի առողջապահության նախարարությունն, ըստ հաղորդումների, հանձնարարել է հիվանդանոցներին պատրաստ լինել մինչև 2026 թվականի մարտը հնարավոր «բուժառուների հոսքին»։ 

Գերատեսչությունում հայտարարել են, որ խոշոր հակամարտության դեպքում Ֆրանսիայի հիվանդանոցները պետք է որ տեղյակ լինեն «պատերազմական սահմանափակումների» մասին և կարողանան բուժօգնություն տրամադրել ինչպես ֆրանսիացի, այնպես էլ օտարերկրացի զինվորականներին։

Ըստ ֆրանսիական Le Canard enchaîné երգիծական պարբերականի, որն անցյալ շաբաթ առաջին անգամ անդրադարձել է առողջապահության նախարարության նամակին, հիվանդանոցները պետք է պատրաստ լինեն բուժել 10 հազարից մինչև 15 հազար զինվորի 10-ից 180 օրվա ընթացքում։

Կառավարության ներկայացուցիչը Euronews-ին հայտնել է, որ առողջապահության նախարարության մանդատը ներառում է առողջապահական համակարգի համար հնարավոր սպառնալիքների լայն շրջանակի նախապատրաստում, դրանից թվում՝ համաճարակներ, շրջակա միջավայրի ճգնաժամեր և «չարամիտ ռիսկեր»։ 

Նամակում նշվում է նաև, որ Ֆրանսիան քննարկում է առողջապահական կենտրոններ հիմնելու հնարավորությունը ավտոբուսային և երկաթուղային կայարանների, օդանավակայանների և նավահանգիստների մերձակայքում՝ «օտարերկրացի զինվորներին տուն տեղափոխելու հնարավորությունն ապահովելու համար»։