Վերջին տարիներին Կովկասյան տարածաշրջանը դարձել է բազմաթիվ իրադարձությունների վկա՝ ներառյալ ղարաբաղյան պատերազմները և Հայաստանի ու Ադրբեջանի միջև վերջերս կնքված խաղաղության համաձայնագրերը, գրում է Mehr-ը՝ վկայակոչելով Հայաստանի անվտանգության խորհրդի քարտուղար Արմեն Գրիգորյանի և Իրանի բարձրաստիճան պաշտոնյաների միջև երեկ կայացած հանդիպումը։ 

«Իրանը, որպես անմիջական հարևան, ակտիվ դեր է խաղում միջնորդության գործում և ընդգծում է միջազգային սկզբունքները, ինչպիսիք են սահմանների անխախտելիությունը։ Թեհրանի հիմնական մտահոգությունն են այն նախաձեռնությունները, ինչպիսին է Սյունիքի միջանցքը, որը կարող է ապահովել Ադրբեջանի մուտքը դեպի Նախիջևան՝ առանց Իրանի վերահսկողության, և հանգեցնել Իրանի մեկուսացման տարանցիկ ուղիներից», — ընդգծում է իրանական ԶԼՄ-ն։ 

Փորձագետները կարծում են, որ Իրանը պետք է որդեգրի երկակի ռազմավարություն՝ ամրապնդել հարաբերությունները Հայաստանի հետ՝ Սև ծովին հասանելիությունը պահպանելու նպատակով, և միաժամանակ կարգավորել հարաբերությունները Ադրբեջանի հետ՝ լարվածությունը կանխելու համար։ 

«Միևնույն ժամանակ, տարածաշրջանում այնպիսի գերտերությունների, ինչպիսին են Միացյալ Նահանգները, ներգրավվածությունը դրդել է Իրանին ավելի ակտիվ դիվանագիտության։ Երեկվա հանդիպումները կարելի է դիտարկել որպես պատասխան այդ մարտահրավերներին և Իրանի հանձնառության արտահայտում՝ տարածաշրջանային կայունության ապահովմանն առանց օտարերկրյա ուժերից կախվածության։

Ի վերջո, շաբաթ օրը կայացած հանդիպումները ոչ միայն ամրապնդում են երկկողմ հարաբերությունները, այլև, Իրանի հարևանության քաղաքականության շրջանակում, կարող են նպաստել Կովկասում կայուն խաղաղության հաստատմանը։

Իրանի Իսլամական Հանրապետությունը, հիմնվելով հեղափոխական սկզբունքների և ազգային շահերի վրա, պատրաստ է ընդլայնել ռազմավարական համագործակցությունը հարևանների հետ՝ տարածաշրջանային անվտանգության և բարօրության ապահովման նպատակով», — նշում է իրանական ԶԼՄ-ն։