Հայաստանում այսօր՝ հուլիսի 27-ին, նշվում է  Քրիստոսի Պայծառակերպության տոնը, որը  Հայ առաքելական եկեղեցու հինգ տաղավար տոներից է եւ կոչում է նաեւ Այլակերպության տոն կամ Վարդավառ:

 Վերջինս հին հայկական տոնի անվանումն ունի, որից պահպանվել է նաեւ միմյանց վրա ջուր ցողելու սովորույթը:
Հիսուս Քրիստոսի Պայծառակերպության տոնը Հայ Եկեղեցու հինգ տաղավար տոներից երրորդն է: Մեր Տեր Հիսուս Քրիստոս, համաձայն Ավետարանի, Ս. Պետրոս, Ս. Հակոբոս և Ս. Հովհաննես առաքյալների հետ բարձրանում է Թաբոր լեռն`աղոթելու: 

Աղոթքի պահին Հիսուս նրանց առաջ պայծառակերպվում է. «Դեմքը փայլեց, ինչպես արեգակը. և Նրա զգեստները դարձան սպիտակ` ինչպես լույսը» (Մատթեոս 17:2, Մարկոս 9:2, Ղուկաս 9:29): Աշակերտների ապշած աչքերի առջև Քրիստոս խոսում է շուրջ հազար տարի առաջ վախճանված Մովսեսի և հրեղեն կառքով երկինք համբարձված Ս. Եղիա մարգարեի հետ:

Ս. Ղուկաս ավետարանիչը պատմում է, որ նրանք խոսում էին Քրիստոսի երկրային կյանքի վերջին օրերի դեպքերի մասին, որ պիտի տեղի ունենային Երուսաղեմում (Ղուկաս 9:31): Սքանչելի տեսարանից զմայլված՝ Ս. Պետրոս առաքյալը բացականչում է. «Վարդապետ, լավ է, որ մենք այստեղ մնանք. երեք տաղավարներ շինենք, մեկը`Քեզ, մեկը` Մովսեսի և մյուսը` Եղիայի համար»: 

Մինչ Նա խոսում էր, լուսափայլ մի ամպ հովանի է դառնում նրանց, և ամպից եկող ձայնն ազդարարում է. «Դա է իմ սիրելի Որդին, որին հավանեցի, Դրան լսեցեք»: Հանգստացնելով ու ոտքի կանգնեցնելով գետնամած առաքյալներին` Հիսուս նրանց պատվիրում է ոչ ոքի չհայտնել տեսածի ու լսածի մասին`մինչև Աստծո Որդու փառավորվելը:  

Ս. Հովհան Ոսկեբերանը երեք բացատրություն է տալիս, թե ինչու Տիրոջը հայտնվեցին Ս. Մովսես և Ս. Եղիա մարգարեները. երկուսն էլ ունեցել են Աստծո տեսիլքը՝ Մովսեսը` Սինա (Ելք 24.12-18), իսկ Եղիան` Քորեբ լեռան վրա (Գ Թագավորներ 19:8-18): Նրանք խորհրդաբար ներկայացնում էին կյանքը և մահը: Մովսեսը մահացավ` այդպես էլ չտեսնելով խոստացված երկիրը, իսկ Եղիան կենդանի կերպով երկինք վերացավ հրեղեն կառքով:
Հիսուսի պայծառակերպության ժամանակ Մովսեսի` նախանձահույզ օրենսդրի ու Եղիայի` երկինք տեղափոխված նախանձախնդիր օրինապահի հայտնվելը խորհրդանշում է, որ Քրիստոս է Օրենսդիրը և չի դրժում Աստծո Ուխտը: Նա է Տերը երկրի և երկնքի, ողջերի ու մեռյալների, քանզի Մովսեսին մեռյալների միջից վեր հանեց, իսկ Եղիային`ողջերի: 

Այս տոնը հայտնի է նաև Վարդավառ անունով: Տոնի ժամանակ ժողովրդական սովորույթներից է միմյանց վրա ջուր ցողելն ու աղավնիներ բաց թողնելը, որոնք խորհրդանշում են ջրհեղեղը, Նոյի ընտանիքի փրկությունը, Նոյի աղավնուն: Սովորություն է նաև ծաղիկներով զարդարվելը, ինչն Աստվածորդու փառքի երևման առթիվ մեծ ուրախության արտահայտություն է: 

«Վարդավառ» ժողովրդական անվանումը, հավանաբար, գալիս է վարդաջուր լցնելու սովորությունից:

Ս. Գրիգոր Տաթևացին տոնի «Վարդավառ» անունը բացատրում է Հիսուսին վարդի հետ համեմատելով. ինչպես վարդը մինչև բացվելը թաքնված է իր պատյանի մեջ և բացվելով` երևում է բոլորին, այնպես էլ Հիսուս մինչև այլակերպությունն Իր մեջ կրում էր աստվածային էությունը և պայծառակերպվելով` հայտնեց Իր Աստվածությունը: 

Վարդավառի տոնին նախորդում է շաբաթապահք: Իսկ հաջորդ օրն, ինչպես տաղավար բոլոր տոներից հետո, Մեռելոց է. բոլոր եկեղեցիներում ննջեցյալների հոգիների համար մատուցվում է Ս. Պատարագ և կատարվում հոգեհանգիստ:

Պայծառակերպության տոնով հաստատվեց այն ճշմարտությունը, որ Հիսուս Աստծո Որդին է: Աստծո պատգամն է առաքյալներին և ողջ աշխարհին. «Նրան լսեցեք»:

Ճապոնիայի առողջապահության նախարարության հրապարակած տվյալների համաձայն՝ երկրում կանանց կյանքի միջին տևողությունը 2024 թվականին կազմել է 87.13 տարի, իսկ տղամարդկանցը՝ 81.09 տարի։ 

Այս մասին հայտնում է «ՌԻԱ Նովոստի»-ն՝ հղում կատարելով ճապոնական NHK հեռուստաալիքին։

Այդ տվյալների համաձայն՝ Ճապոնիան, այսպիսով, 40-րդ անգամ սահմանել է կանանց կյանքի տևողության համաշխարհային ռեկորդ։

Տղամարդկանց կյանքի տևողության առումով Ճապոնիան զբաղեցնում է 6-րդ տեղը՝ զիջելով Շվեդիային, Շվեյցարիային և Նորվեգիային։

Աղբյուրի փոխանցմամբ՝ Ճապոնիայի առողջապահության նախարարությունը նշում է, որ ցուցանիշը գրեթե չի փոխվել նախորդ տարվա համեմատ. տղամարդկանց կյանքի տևողության տարբերությունը կազմել է 0.00%, իսկ կանանցը՝ 0.01%։

Գերմանիայի կանցլեր Ֆրիդրիխ Մերցը հեռախոսազրույց է անցկացրել Ֆրանսիայի նախագահ Էմանուել Մակրոնի և Մեծ Բրիտանիայի վարչապետ Քիր Սթարմերի հետ։

Այս մասին նշված է Գերմանիայի կառավարության տարածած հաղորդագրության մեջ, որտեղ ասված է, որ հեռախոսազրույցի ընթացքում կողմերը քննարկել են Մերձավոր Արևելքում տիրող իրավիճակն ու այդ ուղղությամբ իրականացվող քաղաքականությունը։

«Հուլիսի 26-ի առավոտյան ես մանրամասն հեռախոսազրույց եմ ունեցել Ֆրանսիայի նախագահի և Մեծ Բրիտանիայի վարչապետի հետ, որի ընթացքում քննարկել ենք Մերձավոր Արևելքում մեր քաղաքական կուրսը։ Էմանուել Մակրոնի և Քիր Սթարմերի հետ ձեռք է բերվել էական համաձայնություն։ Առաջիկա օրերին մենք հետագա քայլեր կձեռնարկենք շատ սերտ համակարգմամբ»,- Գերմանիայի կանցլերի խոսքերն է մեջբերել Կառավարության մամուլի ծառայությունը։

Հայաստանի արտաքին առևտրաշրջանառության ծավալը 2025 թվականի հունվար-հունիս ամիսներին նախորդ տարվա նույն ժամանակահատվածի համեմատ կրճատվել է 45 տոկոսով՝ կազմելով 9 մլրդ 668.6 մլն դոլար։«Արմենպրես»-ի հաղորդմամբ՝ այս մասին հայտնում է ՀՀ վիճակագրական կոմիտեն։

Հունիսին՝ մայիսի համեմատ, ծավալն աճել է 9.4 տոկոսով, իսկ 2024-ի հունիսի համեմատ՝ 16.6 տոկոսով նվազել է: Ամռան առաջին ամսին արտաքին առևտրաշրջանառության ծավալը կազմել է 1 մլրդ 731.5 մլն դոլար։

Արտահանումն այս տարվա առաջին վեց ամիսներին 52.8 տոկոսով քիչ է եղել 2024-ի նույն ժամանակահատվածի ցուցանիշից՝ կազմելով 3 մլրդ 755.6 մլն դոլար։ Հունիսին՝ մայիսի համեմատ, ծավալն աճել է 23.6, իսկ նախորդ տարվա հունիսի համեմատ՝ կրճատվել է 15.9 տոկոսով։

Հունիսին Հայաստանից արտահանվել է 729.8 մլն դոլարի արտադրանք։ 

Հունվար-հունիսին երկիր է ներմուծվել 38.6 տոկոսով պակաս արտադրանք, քան նախորդ տարվա նույն ժամանակահատվածում:

Առաջին կիսամյակում ներմուծման ծավալը գնահատվել է 5 մլրդ 913 մլն դոլար։ Հունիսին, նախորդ ամսվա համեմատ, ծավալն աճել է 0.9 տոկոսով՝ կազմելով 1 մլրդ 001.7 մլն դոլար։ Նախորդ տարվա հունիսի համեմատ 2025-ի նույն ամսին ներմուծման ծավալը կրճատվել է 17.1 տոկոսով։ԱՄՆ դոլարի նկատմամբ հայկական դրամի փոխարժեքը հունվար-հունիսին եղել է 391.31, իսկ հունիսին՝ 384.22 դրամ։

Թաիլանդը և Կամբոջան համաձայնել են անհապաղ հանդիպել՝ քննարկելու զինադադարը, որից հետո ԱՄՆ-ն կվերսկսի առևտրային բանակցությունները նրանց հետ, ասել է Թրամփը:

Ավելի վաղ ԱՄՆ նախագահը հայտարարել էր, որ ԱՄՆ-ն առևտրային համաձայնագրեր չի կնքի Թաիլանդի և Կամբոջայի հետ, քանի դեռ նրանց միջև զինված հակամարտությունը շարունակվում է։

Թրամփն ասել է, որ խոսել է Կամբոջայի վարչապետի հետ Թաիլանդի հետ հակամարտության դադարեցման մասին։

«Այժմ զանգահարում եմ Թաիլանդի վարչապետի պաշտոնակատարին՝ նույն խնդրանքով՝ հրադադարի և ներկայումս մոլեգնող պատերազմի դադարեցման համար»,- գրել է նա Truth Social սոցցանցում։

Խոսրովի արգելոցում բռնկված հրդեհը մեկուսացվել է, ներգրավվել է ՊՆ ուղղաթիռ. ՆԳՆ

ԱՄՆ պետքարտուղար Մարկ Ռուբիոն հայտարարել է, որ ԱՄՆ-ն պետք է փոխի իր մոտեցումը Գազայի հակամարտության լուծման հարցում բանակցությունների հերթական փուլի ձախողումից հետո, հաղորդում է Axios-ը` հղում անելով իր աղբյուրներին:

Պարբերականի տեղեկություններով՝ պաղեստինյան ՀԱՄԱՍ շարժման կողմից պահվող պատանդների ընտանիքների հետ ուրբաթօրյա հանդիպման ընթացքում Ռուբիոն մի քանի անգամ հայտարարել է, որ ԱՄՆ նախագահ Դոնալդ Թրամփի վարչակազմին անհրաժեշտ է «վերանայել» Գազայի հարցում իր ռազմավարությունը և «նախագահին նոր տարբերակներ առաջարկել»:

Ավելի վաղ ԱՄՆ հատուկ բանագնաց Սթիվ Ուիթքոֆը հայտարարել էր, որ Միացյալ Նահանգները հետ է կանչում իր բանակցային թիմը Դոհայից ՀԱՄԱՍ-ի պատասխանից հետո, որը չի վկայում Գազայի հատվածում հրադադարի հասնելու ձգտման մասին: Նրա խոսքով՝ Նահանգները մտադիր են այլընտրանքային տարբերակներ կիրառել պատանդներին ազատելու համար:

Չինաստանի Պետխորհրդի վարչապետ Լի Ցզյանը հայտնել է ԱԲ ոլորտում համագործակցության միջազգային կազմակերպություն ստեղծելու Չինաստանի նախաձեռնության մասին: Այս մասին հայտնում է Reuters-ը։

Ինչպես նշվում է գործակալության նյութում, ԱԲ-ի ոլորտում իր փորձով կիսվելու Չինաստանի պատրաստակամությունը խոսում է այն մասին, որ Պեկինը «իրեն ներկայացնում է որպես ԱՄՆ-ի այլընտրանք այդ հեղափոխական տեխնոլոգիաների ոլորտում ազդեցության համար պայքարում»:շ

«ԱԲ-ի գլոբալ կառավարումը, որպես ամբողջություն, դեռ մասնատված է: Երկրների միջև կան մեծ տարբերություններ, հատկապես այնպիսի ոլորտներում, ինչպիսիք են կարգավորման հայեցակարգերը և ինստիտուցիոնալ կանոնները», - ասել է նա:

Ռուսաստանի Արմավիր քաղաքի ռազմական օդանավակայանում ոչնչացվել է Սու-27ՈւԲ կործանիչ, հայտնում են ուկրաինական լրատվամիջոցները՝ հղում անելով Ուկրաինայի պաշտպանության նախարարության գլխավոր հետախուզական վարչությանը։