Փոխվարչապետ Մհեր Գրիգորյանի որոշմամբ՝ առողջապահության նախարար Անահիտ Ավանեսյանը 15 աշխատանքային օրով արձակուրդ է մեկնել։

«Ղեկավարվելով «Հանրային ծառայության մասին» օրենքի 9-րդ հոդվածի 16-րդ մասով, «Կառավարչական իրավահարաբերությունների կարգավորման մասին» օրենքի 10-րդ հոդվածի 13-րդ մասով և «Կառավարության կառուցվածքի և գործունեության մասին» օրենքի 18-րդ հոդվածի 1-ին և 4-րդ մասերով՝

1. Հայաստանի Հանրապետության առողջապահության նախարար Անահիտ Ավանեսյանին տրամադրել 2023-2024 թվականների աշխատանքային տարվա ամենամյա արձակուրդի մասը՝ 15 աշխատանքային օր տևողությամբ՝ 2025 թվականի օգոստոսի 4-22-ը ներառյալ:

2. Անահիտ Ավանեսյանի արձակուրդում գտնվելու ընթացքում վերջինիս 2025 թվականի օգոստոսի 4-10-ը ներառյալ կփոխարինի Հայաստանի Հանրապետության առողջապահության նախարարի տեղակալ Արտակ Ջումայանը, օգոստոսի 11-17-ը ներառյալ՝ Հայաստանի Հանրապետության առողջապահության նախարարի առաջին տեղակալ Լենա Նանուշյանը, իսկ օգոստոսի 18-22-ը ներառյալ՝ Հայաստանի Հանրապետության առողջապահության նախարարի տեղակալ Արմեն Գասպարյանը»,- գրված է փոխվարչապետի համապատասխան որոշման մեջ:

«Միլանն» Ավստրալիայում ընկերական հանդիպում անցկացրեց «Պերտի» հետ։ Իտալական թիմն առավելության հասավ 9:0 հաշվով (տեսանյութ)։

Դուբլի հեղինակ դարձան շվեյցարացի հարձակվող Նոա Օկաֆորն ու պորտուգալացի հարձակվող Ռաֆայել Լեաուն։ Աչքի ընկան նաեւ իտալացի կիսապաշտպաններ Ֆիլիպո Տերաչանոն, Կրիստիան Կոմոտոն, Սամուելե Ռիչին, նիգերիացի հարձակվող Սամու Չուկվեզեն, ամերիկացի կիսապաշտպան Յունուս Մուսան։

Հաջորդ ընկերական հանդիպումը «Միլանը» կանցկացնի օգոստոսի 9-ին անգլիական «Լիդսի» դեմ։

Կառավարությունը հուլիսի 31-ի նիստում հաստատել է Հայաստանի Հանրապետության արտահանման խթանման 2025-2030 թթ. ռազմավարական ծրագիրը և դրա կատարումն ապահովող գործողությունների ծրագիրը հաստատելու մասին որոշումը:

«Արմենպրես»-ի փոխանցմամբ՝ Էկոնոմիկայի նախարար Գևորգ Պապոյանը նշել է, որ որոշումն  ունենալու է առանցքային նշանակություն երկրի տնտեսական զարգացման երկարաժամկետ տեսլականի իրագործման համար: Ըստ նախարարի՝  ռազմավարությամբ  քայլեր է ձեռնարկվում  կայուն աճ ապահովող արտահանման կառուցվածք ձևավորելու համար, որն հիմնված կլինի բարձր ավելացված արժեքի, տեխնոլոգիական առաջընթացի, որակի և ապրանքների և ծառայությունների մրցունակության բարձրացման վրա: Գևորգ Պապոյանը նկատել է, որ վերջին տարիներին արձանագրվել է արտահանման զգալի աճ, որը, սակայն, հիմնականում պայմանավորված է արտաքին, հաճախ նաև ժամանակավոր գործոններով և չի արտացոլում Հայաստանի տնտեսության արտահանման ամբողջական ներուժը:

Միաժամանակ, արտահանման շուկաների կենտրոնացվածության բարձր աստիճանը շարունակում է մնալ էական մարտահրավեր մեր տնտեսության համար՝ սահմանափակելով ՀՀ-ի հնարավորությունները համաշխարհային շուկաներում դիրքավորվելու առումով:

«Ռազմավարությունը պատասխանում է նաև այդ հիմնախնդիրներին, որոնց բախվում են մեր տեղական արտադրողները արտահանման շղթայի տարբեր փուլերում՝ սկսած շուկայի հասանելիությունից մինչև որակի ենթակառուցվածքների հաճախ ոչ բավարար կամ անբավարար լինելը: Մեր նպատակն է ձևավորել քաղաքականություն, որը կստեղծի կանխատեսելի և աջակցող միջավայր արտահանման գործընթացների անխոչընդոտ և մեծ ծավալներով կազմակերպման համար»,-ասել է նախարարը՝ հավելելով, որ ռազմավարության հիմքում ընկած է համապարփակ վերլուծական աշխատանք:

Ռազմավարությունը բաղկացած է 5 ռազմավարական հենասյուներից և դրանց իրականացմանն ուղղված 50-ից ավելի միջոցառումներից: Ռազմավարական նպատակներ են՝ արտահանմանը նպաստող և մրցունակ միջավայրի ապահովում, ենթակառուցվածքների զարգացում և լոգիստիկ հասանելիության ապահովում, արտահանողների և նրանց կարողությունների զարգացում, արտահանման շուկաների ընդլայնում, արտահանման խթանում և ֆինանսավորում:

Ռազմավարական նպատակներն ապահովող միջոցառումներն իրենց հերթին բաժանվում են երկու խմբի՝ ընդհանուր և ապրանքային միտվածության: Ըստ Գևորգ Պապոյանի՝ ընդհանուր միջոցառումները վերաբերում են բոլոր ապրանք և ծառայություններ արտահանողներին, իսկ ապրանքային միտվածության միջոցառումները՝ համապարփակ և բազմաշերտ հետազոտության արդյունքում ընտրված ուղենշային 25 ապրանքային խմբերի արտահանմանը:

Նախարարի խոսքով՝ ծրագրի իրականացման արդյունքում նախատեսվում է ունենալ տեղական արտահանման աճ մոտ 1.7 անգամ. թվային, դոլարային արտահայտմամբ՝ 16.9 մլրդ ամերիկյան դոլար, որտեղ ծառայությունների արտահանումը կանխատեսվում է հասցնել 10.3-ի, իսկ ապրանքների և տեղական արտահանումը՝ տարեկան 6.6 միլիարդի:

Ծրագրի իրականացման համար նախատեսվում է ծախսել շուրջ 98 մլրդ ՀՀ դրամ կամ այսօրվա փոխարժեքով՝ ավելի քան 250 մլն ԱՄՆ դոլար: «Համոզված ենք, որ ռազմավարության իրականացումն էապես կխթանի արտահանման կայուն զարգացումը, կնպաստի տնտեսության արտադրողականության բարձրացմանը, կստեղծի նոր աշխատատեղեր, կդարձնի ՀՀ-ն ավելի հուսալի և մրցունակ գործընկեր միջազգային շուկաներում»,- ասել է Էկոնոմիկայի նախարարը:

Փոխվարչապետ Մհեր Գրիգորյանը կարևորել է ընդունված որոշումը և այդ համատեքստում ընդգծել գործարար համայնքի հետ համագործակցության անհրաժեշտությունը՝ ռազմավարությամբ  սահմանված թիրախներին հասնելու համար:

Լիտվայի Հանրապետության վարչապետ Գինտաուտաս Պալուցկասը, ում երկրի նախագահը կոռուպցիոն սկանդալից հետո երկու շաբաթ էր տվել քաղաքական ապագայի վերաբերյալ որոշում կայացնելու համար, հրաժարական է տվել։

Այս մասին հայտարարել է Լիտվայի նախագահ Գիտանաս Նաուսեդան։Պալուցկասը որոշում է կայացրել հեռանալ ինչպես վարչապետի, այնպես էլ Լիտվայի սոցիալ-դեմոկրատական կուսակցության ղեկավարի պաշտոնից։ 

Լրատվամիջոցներն ավելի վաղ պարզել էին, որ վարչապետի պաշտոնը ստանձնելուց առաջ Պալուցկասը բանկից արտահերթ վարկ է ստացել մի ընկերության համար, որի գլխավոր բաժնետերն էր։ 2012 թվականին, երբ աշխատում էր որպես մայրաքաղաքի վարչակազմում, նա դատարանի առաջ է կանգնել պաշտոնեական դիրքի չարաշահման՝ կոմունալ ծառայությունների պայմանագրով հովանավորություն ցուցաբերելու համար։ Պալուցկասը ստացել էր երկու տարվա պայմանական ազատազրկում և պարտավորվել վճարել 16,5 հազար եվրո։շ

Վճարումը պետք է կատարվեր մեկ տարվա ընթացքում, սակայն վարչապետը վերջին վճարումները կատարել է միայն 2025 թվականի հուլիսին։ 

Մոտ 10 տարի առաջ նրան հաջողվել է պետական անտառում գրանցել հողամաս, որտեղ նա պլանավորում էր շինարարություն իրականացնել։ Դա կասեցվել է դատախազության կողմից, և հողը վերադարձվել է պետությանը։ Վարչապետի օգնությամբ նրա հարազատներին պատկանող ընկերությունը ստացել էր եվրոպական դրամաշնորհ։

Լիբանանի կառավարությունը պետք է իրականացնի ոչ կառավարական կազմավորումների զինաթափումը ՝ լիբանանյան հողում պատերազմներին և արյունահեղությանը մեկընդմիշտ վերջ դնելու համար: Ինչպես տեղեկանում ենք ՏԱՍՍ գործակալությունից, այդ մասին հայտարարել է հանրապետության նախագահ Ջոզեֆ Աունը՝ երկրի զինված ուժերի ստեղծման 80-ամյակի առիթով հանդես գալով ուղերձով: 

«Ճշմարտության ժամը եկել է, և մենք չենք կարող բաց թողնել Լիբանանը կործանումից փրկելու հնարավորությունը, ուստի բոլոր կուսակցությունները, ներառյալ «Հեզբոլլահ», պետք է իրենց մոտ եղած զենքը հանձնեն լիբանանյան բանակին», – ընդգծել է գեներալ Աունը:

Նրա խոսքով՝ այդ քայլը կնպաստի ազգային ինքնիշխանության վերականգնմանը Լիբանանի ամբողջ տարածքի նկանմամբ:

Նա հայտնել է, որ ԱՄՆ հատուկ ներկայացուցիչ Թոմ Բարաքի հետ վերջերս կայացած բանակցությունների ընթացքում պահանջել է Իսրայելի կողմից ռազմական գործողությունների անհապաղ դադարեցում օդում, ցամաքում և ծովում:

«Մենք կձգտենք հասնել իսրայելական զորքերի հետքաշման՝ մինչև միջազգայնորեն ճանաչված սահմաններ, ինչպես նաև գերիների ազատման», – նշել է նա:

 Աունը հույս է հայտնել, որ բարեկամ պետությունները կշարունակեն աջակցություն ցույց տալ Լիբանանի բանակին, որը տարեկան 1 միլիարդ դոլար գումարի օգնության կարիք ունի։

«Մենք այս աշնանը սպասում ենք դոնորների միջազգային խորհրդաժողովի անցկացմանը, որը նվիրված կլինի Լիբանանի հետպատերազմյան վերականգնմանը», – հայտնել է նա:

Սաուդյան Արաբիայի զբոսայգիներից մեկում «360 աստիճան» կոչվող ատրակցիոնը՝ մարդկանցով լի, շարժման ժամանակ խափանվել է և երկու կես եղել:

Միջադեպի հետևանքով  23 մարդ վիրավորվել է, որոնցից երեքը՝ ծանր վիճակում։ Պատահարի պատճառը դեռևս պարզված չէ։

Կամչատկայի ծննդատան մանկաբարձ-գինեկոլոգ Մհեր Ադամյանը սոցցանցերի հերոս է դարձել այն բանից հետո, երբ Կամչատկայում տեղի ունեցած ուժեղ երկրաշարժի ժամանակ ընդունել է երիտասարդ կնոջ ծննդաբերությունը։

Կամչատկայի երկրամասի առողջապահության նախարարությունը նշել է ծննդատան բժշկական անձնակազմի քաջությունն ու պրոֆեսիոնալիզմը։ Գերատեսչության հաղորդագրության մեջ ասվում է, որ հուլիսի 30-ին երկրամասի թիվ 1 ծննդատանը ցնցումների ժամանակ ծննդաբերող կանանց և նորածիններին արագ տարհանել են անվտանգ գոտի։

«Իրավիճակը հատկապես դժվար էր ծնարանում, որտեղ երկրաշարժի պահին ծննդաբերություն էր տեղի ունենում։ Բժշկական թիմը (մանկաբարձ-գինեկոլոգը, անեսթեզիոլոգը և մանկաբարձուհին) ապահովել է ծննդկանի անվտանգությունը և առողջ երեխայի հաջող ծնունդը՝ չնայած ծայրահեղ պայմաններին... Ուժեղ ցնցումների ավարտից հետո բոլոր ծննդկանները վերադարձվել են հիվանդասենյակներ, ծննդատան աշխատանքն էլ շարունակվել է սովորական ռեժիմով», – պատմել են երկրամասի առողջապահության նախարարությունից։

Երիտասարդ կնոջ ծննդաբերությունն ընդունած բժիշկ Ադամյանը «Իզվեստիա»-ին տված հարցազրույցում ասել է, որ ինքն էլ բոլորի նման վախեցած էր, բայց խուճապ չի եղել։

Բժշկական անձնակազմը սովոր է աշխատել ցնցումների պայմաններում, սակայն այսպիսի ուժգնության երկրաշարժ Ադամյանը չի հիշում։

«Մեր աշխատանքն այդպիսին է... Երեկվանից հետո մենք ամբողջ գիշեր հերթապահել ենք, ամբողջ գիշեր ծննդաբերություններ ու վիրահատություններ են եղել։ Մենք շարունակում ենք աշխատել... Ես ինձ հերոս չեմ զգում», – ասել է բժիշկը։

Ավելի վաղ Shot–ը գրել էր, որ բժիշկները վստահ են գործել. նրանք հանգստացրել են վախեցած ապագա մայրիկին, երբ սկսվել են ցնցումները, օգնել են նրան հաղթահարել կծկումների շրջանը, որը համընկել է երկրաշարժի թեժ պահի հետ։ Ընտանիքը մտադիր է դիմել տեղական իշխանություններին՝ բժիշկներին պետական մրցանակի առաջադրելու համար։