Ռուսաստանի կողմից Կիևի վրա գիշերային հրթիռային հարվածի հետևանքով վնասվել է Ուկրաինայում Իսրայելի դեսպան Միխայիլ Բրոդսկու քարտուղարի բնակարանը, հաղորդում է MigNews-ը։
Նա՝ քարտուղար Նատալյա Գոնկովսկայան, չի տուժել, սակայն նրա գույքը լուրջ վնաս է կրել։ Դեսպան Բրոդսկին վստահեցրել է, որ դեսպանատունը կօգտագործի բոլոր ռեսուրսները՝ իր տունը վերականգնելու համար։

Հուլիսի 31-ի գիշերը Ռուսաստանը զանգվածային հարձակում է սկսել Ուկրաինայի վրա՝ օգտագործելով 317 օդային հարձակման զենք՝ 309 «Շահեդ» գրոհային անօդաչու թռչող սարք և 8 «Իսկանդեր-Կ» թևավոր հրթիռ։ Հիմնական հարվածը հասցվել է Կիևին, հայտնել են Ուկրաինայի ռազմաօդային ուժերը։

Հարձակման հետևանքով վնասվել են Ուկրաինայի մուսուլմանների հոգևոր վարչության (DUMU) «Ումմա» գլխավոր մզկիթը և Իսլամական մշակութային կենտրոնի շենքը։

Ուկրաինայի մայրաքաղաքում զոհերի թիվը կազմել է 11 մարդ։

Ավելի քան 1,2 հազար հայկական բեռնատարներ սպասում են ռուս-վրացական սահմանով անցնելուն Հյուսիսային Օսիայի «Վերին Լարս» անցակետում:

Ընդհանուր առմամբ, ըստ վերջին տվյալների, հերթում գրանցվել է 3102 բեռնատար տարբեր երկրներից, որից 1213- ը՝ Հայաստանից:

Խցանումների պատճառը Ռուսաստանից քաղաքացիների մեծ հոսքն է, որոնք Վրաստան և Հայաստան են ուղևորվում զբոսաշրջային նպատակներով: Սահմանը հատելու գործընթացը որոշ օրերին տևում է մինչև 8 ժամ։

Քաղաքական մեկնաբան Հակոբ Բադալյանի ֆեյսբուքյան գրառումը. «Ռուսաստանի հայերի միության նախագահ Աբրահամյանը հայտարարել է, որ կօգտագործի իր հնարավորությունները 2026 թվականի խորհրդարանի ընտրությանը բոլոր առողջ ուժերին միավորելու համար: Դե, «պաշտոնական բացատրությունն» այն է, որ այդ կերպ նա փորձելու է նպաստել Նիկոլ Փաշինյանի հեռացմանը:

Իսկ դե ֆակտո, միավորելով բոլոր «առողջ ուժերին», ՌՀՄ նախագահ Արա Աբրահամյանը ընդամենը կարող է միայն նպաստել Նիկոլ Փաշինյանի էլեկտորալ խնդիրների լուծմանը:

Որովհետև, ինչպես այլ առիթով ասել եմ, արաաբրահամյանները, մարգարիտսիմոնյանները, սոլովյովները, այլ «յաներն» ու «ովերը» Նիկոլ Փաշինյանի համար խնդիր կարող են ստեղծել երկու դեպքում՝ նվազագույնը, եթե մոռանան նրան, և առավելագույնը՝ եթե անցնեն նրան գովելու:

Իսկ որքան նրանք ակտիվ են Նիկոլ Փաշինյանի «դեմ», այնքան պարզապես նպաստում են Փաշինյանի տեղեկատվա-քարոզչական նարատիվների «հիմնավորմանը»:

Իսկ ես ամենևին այն կարծիքին չեմ, որ Արա Աբրահամյանը, Մարգարիտա Սիմոնյանը, Սոլովյովը կամ որեւէ այլ մեկը հիմար են ու չեն հասկանում իրերի այդ դրությունը»:

Հնդկաստանի պետական նավթավերամշակման գործարանները Թրամփի հայտարարություններից հետո դադարեցրել են ռուսական նավթի գնումը։ Այս մասին գրում է Reuters-ը։

Ռուսական նավթի զեղչերի կրճատման և Մոսկվայի հետ համագործակցող երկրների համար 100% մաքսատուրքեր սահմանելու՝ Թրամփի սպառնալիքների ֆոնին գնումները դադարեցրել են Indian Oil Corp, Hindustan Petroleum, Bharat Petroleum և Mangalore Refinery ընկերությունները:

Փոխարենը գործարանները սկսել են հումք գնել Արևմտյան Աֆրիկայից և Մերձավոր Արևելքից։ Չնայած այն հանգամանքին, որ խոշորագույն գնորդները շարունակում են մնալ Reliance և Nayara մասնավոր ընկերությունները, Հնդկաստանի պետական ընկերություններին է բաժին հասնում երկրի նավթավերամշակման կարողությունների ավելի քան 60% -ը:

ՇՄՆ հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը «Ֆեյսբուք»-ի իր էջում տեսանյութ է հրապարակել և գրել.

«Երևանում ուժեղ շոգ, իսկ Լոռիում ուժեղ տեղատարափ: Ագարակ գյուղ»:

Չինաստանում երեք տարեկան տղան ողջ է մնացել 18-րդ հարկի բնակարանի պատուհանից ընկնելուց հետո։ Տղան նախ ընկել է ծառի վրա, ինչը մեղմացրել է նրա հարվածը, հաղորդում է South China Morning Post-ը։

Ըստ թերթի՝ միջադեպը տեղի է ունեցել Հանչժոու քաղաքում։ Ծնողները փոքրիկին թողել են տատիկի և պապիկի մոտ։ Մտածելով, որ տղան քնած է` նրանք կարճ ժամանակով դուրս են եկել տնից՝ կողպելով բնակարանի դուռը։ Երեխան արթնացել է, մտել լոգարան և ընկել պատուհանից։

Տղային գտել են գետնին ընկած և շտապօօգնություն կանչել։ Երեխայի մոտ ախտորոշել են ձախ ձեռքի կոտրվածք և այլ վնասվածքներ, սակայն գլուխը չի վնասվել։ Նա ապաքինվում է։

Ուկրաինայի նախագահ Վոլոդիմիր Զելենսկին ստորագրել է հակակոռուպցիոն մարմինների անկախությունը վերականգնելու մասին օրենքը, որը հուլիսի 31-ին ավելի վաղ հաստատել էր Գերագույն ռադան: Այս մասին Զելենսկին հայտնել է իր Telegram ալիքում:

Նախագահը շնորհակալություն է հայտնել բոլոր խորհրդարանականներին օրինագծին աջակցելու համար:

«Սրանք հակակոռուպցիոն մարմինների, մեր պետության բոլոր իրավապահ մարմինների բնականոն, անկախ աշխատանքի երաշխիքներն են։ Որոշումը ճիշտ է», – նշել է Զելենսկին:

Գերագույն ռադան օրինագիծը հաստատել էր 331 «կողմ», 0 «դեմ» ձայնով:

Զելենսկին նոր օրինագիծը Գերագույն ռադա էր ուղարկել հուլիսի 24-ին՝ այն բանից հետո, երբ ավելի վաղ հաստատված օրենքը բողոքի ցույցերի և եվրոպական դժգոհության առիթ էր դարձել: Օրենքի քննադատները նշում էին, որ այն խախտում է հակակոռուպցիոն մարմինների անկախությունը:

ԱՄՆ նախագահ Դոնալդ Թրամփը Գազայի հատվածում հումանիտար ճգնաժամի ավարտի պայման է համարել ՀԱՄԱՍ շարժման կապիտուլյացիան և պահվող պատանդների ազատ արձակումը։ Այս մասին նա գրել է իր Truth Social հարթակում:

«Գազայում հումանիտար ճգնաժամերին վերջ դնելու ամենաարագ ճանապարհն այն է, որ ՀԱՄԱՍ-ը հանձնվի և ազատ արձակի պատանդներին», – գրել է Թրամփը։

Հայաստանում ամառային զորակոչը շարունակվում է։ NEWS.am–ն այցելել է Էջմիածնի զինկոմիսարիատ, որտեղ քաղաքացիները եկել են իրենց հարազատներին, որդիներին, թոռներին բանակ ճանապարհելու։ 

Զինկոմիսարիատի դիմաց հնչում է կենդանի երաժշտություն, երիտասարդները պար են բռնել։

«Իմ քրոջ տղան է գնում բանակ, ուզում է, որ բոլորն անփորձանք ծառայեն, հասնեն իրենց ծնողներին։ Աստված տանի, Աստված բերի։ խաղաղություն, հաջողություն, ուրիշ ոչ մի բան։ Շատ լավ տրամադրությամբ քեֆ ենք արել, շատ լավ, ուրախ ճանապարհել ենք, ուզում ենք, որ ուրախ գնա, ուրախ գա»,–ասաց հարազատներից մեկը։

մեկ ուրիշն էլ նշեց. «Ճանապարհում եմ մեր թոռնիկին, բոլորն էլ հիմա մերն են, ովքեր գնում են, մերն են, մենք տարբերություն չենք դնում։ Թող գնան, բարի ծառայություն լինի, խաղաղություն լինի, ծառայեն, հետ վերադառնան իրենց ծնողներին։ Ցանկանում եմ նրանց կանաչ, խաղաղ երկինք, կանաչ ճանապարհ, թող բարով ծառայեն, խելացի լինեն, զգոն լինեն, պաշտպանեն մեր հայրենիքը, իրենց մայրերին, տատիկներին, բոլորին»։