Իսրայելը նոր գործողություն է պատրաստել Իրանի դեմ, ամերիկյան Merit Street հեռուստաալիքին ասել է ԱՄՆ-ում Իսրայելի դեսպան Եչիել Լեյթերը։

«Մենք մի քանի անակնկալ ենք պատրաստել: Երբ փոշին նստի, հինգշաբթի և ուրբաթ օրերին կտեսնեք որոշ անակնկալներ, որոնց համեմատ (Լիբանանում «Հեզբոլլահ»-ի դեմ) փեյջերի գործողությունը գրեթե դատարկ բան կթվա», – ասել է Լեյթերը։

2024 թվականի սեպտեմբերի 17-ին և 18-ին Լիբանանի տարբեր մասերում տեղի ունեցան կապի սարքերի, հիմնականում՝ փեյջերների և ռատիոների բազմաթիվ պայթյուններ։ Հանրապետության իշխանությունների տվյալներով՝ զոհվել է 37 մարդ, վիրավորվել՝ ավելի քան 3,000-ը։

«Հեզբոլլահը» պայթյունների համար մեղադրել էր Իսրայելին։ Իսրայելի պաշտոնյաները հետագայում հաստատել են, որ գործողությունը կազմակերպվել էր երկրի հետախուզական ծառայությունների կողմից։

Իսրայելի ռազմական հետախուզության վարչության ղեկավար գեներալ-մայոր Շլոմի Բինդերը հայտարարել է, որ իր ենթակաները շուտով ստիպված կլինեն ավելի խոշոր մասշտաբով գործել Իրանի տարածքում։

Այս մասին հաղորդում է The Times of Israel-ը։

«Դուք տվյալներ ձեռք բերեցիք, որոնք ճանապարհ հարթեցին դեպի Թեհրան և թույլ տվեցին հարված հասցնել Իրանի բարձրագույն հրամանատարությանը։

Շուտով դուք կսկսեք գործել նաև այլ շրջաններում։ Դուք ապացուցել եք, որ կարող եք ճեղքել սահմանները և հասնել ցանկացած նպատակի», – ասել է Բինդերը հետախուզության սպաներին։

Բինդերը խոստացել է, որ Իսրայելը մոտ ապագայում հարվածներ կհասցնի Իրանի ավելի զգայուն թիրախների։

Նա հավելել է, որ, այնուամենայնիվ, հետախուզությունը չպետք է մոռանա պայքարը միանգամից մի քանի ճակատներում մղելու անհրաժեշտության մասին, այդ թվում՝ Գազայի հատվածում՝ այնտեղ մնացած պատանդներին ազատելու համար։

Իսրայելի և Իրանի միջև փոխադարձ հարվածները շարունակվում են արդեն հինգերորդ օրը։

Իրանի իշխանությունները հայտնել են իսրայելական հարվածներից 220-ից ավելի զոհի մասին, որոնց մեծ մասը քաղաքացիական անձինք են։ Իսրայելը հայտնել է իրանական պատասխան հարվածներից 24 զոհի մասին։

Հեզբոլլահը նույնպես ներգրավվե՞լ է հակամարտության մեջ։

Հրեական լրատվամիջոցները հաղորդում են. Գոլանի բարձունքներում մի քանի րոպե առաջ հարձակում է իրականացվել, ինչը կարող է վկայել, որ լիբանանյան Հեզբոլլահը ներգրավվել է հակամարտության մեջ։

Այսօր առավոտյան Իրանի զինված ուժերի կողմից հասցված հրթիռային հարվածի հետևանքով խոցվել է Հերզլիա շրջանում գտնվող Մոսադի շենքը։

Իրանական Տելեգրամ ալիքը տեսանյութ է հրապարակել։

Իրանական հրթիռները հարվածել են նշանակետին։ Հաղորդում է ԻՀՊԿ տելեգրամ ալիքը։

Իսրայելական լրատվամիջոցների հաղորդմամբ՝ մի քանի հրթիռներ հարվածել են Թել Ավիվի Հերզլիա շրջանին, սարսափելի պայթյուններ են լսվել Թել Ավիվի մոտ գտնվող Ռամաթ Հաշարոնից։

Իսրայելում՝ Հայֆայից մինչև Թել Ավիվ տագնապի ազդանշաններ են հնչել:

Իրանի Իսլամական հեղափոխության պահապանների կորպուսը հայտարարել է Իսրայելի վրա նոր հարձակման մասին։

УВБ-76 ռադիոկայանը, որը հայտնի է որպես «Ահեղ դատաստան» ռադիոկայան» եւ «բզզացող», այսօր նորից եթեր է դուրս եկել։ Տեղեկությունը հրապարակվել է նրա թելեգրամ-ալիքում։

Սա արդեն երրորդ հաղորդումն է այսօրվա ընթացքում. հնչել է «НЖТИ 96560 ДИАЛЕКТИЗМ 9064 6939» կոմբինացիան։

Իրանին հասցված իսրայելական հարվածի նախօրեին УВБ-76 ռադիոկայանը  նաեւ հաղորդել է հետեւյալ հաղորդագրությունը. եթերում հնչել է տառերի եւ թվերի հավաքածու. «НЖТИ 22345 ТКАЧОСАП 8394 7873»։ Այս հաղորդագրության նշանակությունն անհայտ է մնացել։

Մինչ այդ «Ահեղ դատաստան» ռադիոկայանը» եթեր էր արձակել «իբոբազա» բառը Ստամբուլում բանակցություններից հետո։  Երկրորդ տեղեկությունը՝ «արապոբլից», հնչել է ավելի ուշ։

«Կողմերի միջև համաձայնագիր է ստորագրվել։ Նախատեսում էինք հունիսի 20-ից հետո գործարկել չինական Սիանից Երևան առաջին կոնտեյներային գնացքը։ Սակայն իրանա-իսրայելական հակամարտության սրացման ֆոնին առաքումը չեղարկվեց, քանի որ բեռը չի կարող հատել Իրանի տարածքը», - ասաց Իվանովը։

Նա նշեց, որ այս երթուղին մուլտիմոդալ է, այն իր մեջ ներառում է բեռների փոխադրումը կոնտեյներային նավով և բեռնատարով:

Երթուղու բացման նախաձեռնողը հայկական կողմն է, օպերատորը՝ Ղազախստանը։ Այսպես, Չինաստանից կոնտեյներային գնացքը Ղազախստանով և Թուրքմենստանով տարանցմամբ կհասնի իրանական «Ջուլֆա» կայարան-տերմինալ։ Բեռնարկղերը բեռնաթափելուց հետո ապրանքներն այնտեղից բեռնատարներով կտեղափոխվեն Երևան։

Տվյալ ճանապարհով ապրանքները Չինաստանից Հայաստան կհասցվեն 25 օրում։ Այս երթուղին ավելի թանկ է, քան ծովային փոխադրումները (դրանք համարվում են ամենաէժանը – խմբ.), սակայն ավելի էժան է, քան ավտոմոբիլային փոխադրումները։

Ռուսական զորքերը գիշերը հարվածել են Կիևին՝ կիրառելով 175 անօդաչու թռչող սարք և ավելի քան 15 թևավոր հրթիռ, որոնցից առնվազն երկուսը՝ բալիստիկ, հայտարարել է Կիևի քաղաքային ռազմական վարչության ղեկավար Թիմուր Տկաչենկոն։

«Այս գիշեր Կիևում և դրա արվարձաններում թշնամին օգտագործել է 175 անօդաչու թռչող սարք, ավելի քան 14 թևավոր հրթիռ և առնվազն երկու բալիստիկ հրթիռ», - գրել է նա։

Ընդհանուր առմամբ, Կիևի 27 վայր ենթարկվել է ռուսական հարձակման, որի հետևանքով զոհվել է 14 և վիրավորվել 44 մարդ։

Տկաչենկոյի խոսքով՝ բնակելի շենքերի անմիջական թիրախավորում է եղել։ Հրթիռները՝ վերին հարկերից մինչև նկուղ։

ԱՄՆ նախագահի Մերձավոր Արևելքի հարցերով հատուկ ներկայացուցիչ Սթիվ Ուիտկոֆը և ԱՄՆ փոխնախագահ Ջ.Դ. Վենսը կարող են այս շաբաթ քննարկել միջուկային համաձայնագիրը իրանցիների հետ, հաղորդում են The New York Times-ը և Axios-ը։

NYT-ի անանուն աղբյուրի համաձայն, ԱՄՆ նախագահ Դոնալդ Թրամփը Ուիտկոֆին և Վենսին առաջարկել է հանդիպում Իրանի հետ։

Պարբերականը նշում է, որ եթե Վենսը և Ուիտկոֆը հանդիպեն իրանցիների հետ, նրանց զրուցակիցը, ամենայն հավանականությամբ, կլինի Իրանի արտաքին գործերի նախարար Աբբաս Արաղչին։

Հենց Արաղչին է կարևոր դեր խաղացել Բարաք Օբամայի վարչակազմի հետ 2015 թվականին միջուկային համաձայնագրի կնքման գործում և գիտի Իրանի հսկայական միջուկային համալիրի բոլոր մանրամասները։ Իրանի արտաքին գործերի նախարարն արդեն իսկ ցույց է տվել իր բաց լինելը միջուկային համաձայնագրի հարցում։

Իր հերթին, Axios-ը, հղում անելով անանուն ամերիկացի պաշտոնյայի, գրում է, որ միայն Ուիտկոֆը կարող է հանդիպել Արաղչիի հետ այս շաբաթ։ Հանդիպման նպատակն է քննարկել միջուկային համաձայնագրի և Իսրայելի ու Իրանի միջև պատերազմի ավարտի վերաբերյալ դիվանագիտական ​​նախաձեռնությունը։

Պաշտոնյայի խոսքով՝ ԱՄՆ-ում Ֆորդոյում գտնվող Իրանի ստորգետնյա միջուկային օբյեկտը ոչնչացնելու ունակ ռումբերի առկայությունը Իրանի վրա ճնշման հիմնական լծակն է։

«Նրանք իսկապես ուզում են բանակցել։ Բայց մենք չգիտենք՝ արդյոք նրանք լիովին ծնկի են եկել՝ հասկանալու համար, որ երկիրը փրկելու համար նրանք պետք է բանակցեն։ Եվ եթե նրանք հասնեն այդ կետին, արդյո՞ք կա հարստացման այնպիսի մակարդակ, որը դուք թույլ կտաք նրանց անել», - հավելել է Axios-ի աղբյուրը։