Իրանը սպանել է Իսրայելի ​​ռազմաօդային ուժերի հրամանատար, գեներալ-մայոր Թոմեր Բարին։ Այս մասին հայտնում է Իսլամական հեղափոխության պահապանների կորպուսի տելեգրամ ալիքը։

«Իսրայելի ​​ռազմաօդային ուժերի հրամանատար, գեներալ-մայոր Թոմեր Բարին վերացվել է այս գիշեր՝ Իրանի կողմից Իսրայելին հասցված աննախադեպ հրթիռային հարվածների արդյունքում»,-գրում է աղբյուրը։

«Հրապարակ»-ը գրում է. «Թեպետ 4 օր է՝ Նիկոլ Փաշինյանը գրառում չի արել Վեհափառի և եկեղեցու մասին, առավոտյան սաղմոսներ էլ չի տեղադրում էջում, սակայն եկեղեցու դեմ արշավը չի կարելի վերջացած համարել։

Իշխանական աղբյուրների փոխանցմամբ՝ այս լռությունը թվացյալ է, վարչակարգը շարունակում է ծածուկ աշխատել եկեղեցու դեմ․ հավաքում են փաստեր, կոմպրոմատներ, մարտավարություն են մտածում, իսկ այս պասիվությունը պայմանավորված է տարածաշրջանի անկայունությամբ, Իրան-Իսրայել պատերազմով:

Փաշինյանը գիտակցում է, որ եկեղեցու դեմ գրառումները՝ հատկապես այս օրերին, իրեն չեն ներվի, ուստի սպասում են՝ ջրերը հանդարտվեն, որ նոր շարունակեն պատերազմը։ Իսկ եկեղեցին վերցրել է իրեն նետված ձեռնոցը․ երեկ կլոր-սեղան էին կազմակերպել և բարձրաստիճան հոգևորականներ, քաղաքական, հասարակական գործիչներ վերլուծում էին Փաշինյանի գրառումները, կոշտ գնահատականներ տալիս։

Հունիսի 16-22-ն էլ Մայր Աթոռը նշելու է Արարատյան շաբաթվա տոները, որոնց առիթով հավատացյալների երկրպագության համար Սուրբ Էջմիածնի սրբազան մասունքներն են դուրս բերվելու: Շաբաթն ավարտվելու է հունիսի 22-ին մայր տաճարում Սուրբ պատարագով, որի ավարտին կհնչի մաղթանք «Մայր Աթոռ Սուրբ Էջմիածնի անսասանության և հավետ պայծառության համար»։

ԱՄՆ նախագահ Դոնալդ Թրամփն իր վարչակազմին հանձնարարել է հնարավորինս շուտ հանդիպում կազմակերպել իրանցի պաշտոնյաների հետ, հաղորդում է CNN-ը՝ հղում կատարելով իրավիճակին ծանոթ աղբյուրին։

«Թրամփը հայտնել է, որ իրանցիները երկուշաբթի միջնորդների միջոցով կապ են հաստատել իր հետ»,- նշում է հեռուստաալիքը։

Միևնույն ժամանակ, Washington Post-ը գրում է, որ Իրանի ներկայացուցիչները միջնորդներին ասել են, որ պատրաստ են վերսկսել բանակցություններն ԱՄՆ-ի հետ, բայց նախ ցանկանում են, որ Իսրայելը դադարեցնի հարձակումները։

Ըստ լրատվամիջոցի՝ հրադադարի շուրջ բանակցություններ սկսելու ջանքերը գլխավորել են Օմանը և Կատարը։

Հաղորդվում է, որ Թրամփը որոշել էր ժամանակից շուտ լքել Կանադայում տեղի ունեցած G7 գագաթնաժողովը՝ Մերձավոր Արևելքում ստեղծված իրավիճակի պատճառով։

ԱՄՆ նախագահը նաև հրաժարվել էր ստորագրել G7 երկրների համատեղ հայտարարությունը, որով Իսրայելին և Իրանին կոչ էր արվում դադարեցնել փոխադարձ հարձակումները, ինչը վկայում է Թրամփի և այլ առաջնորդների միջև անհամաձայնությունների մասին։

Զինծառայության վերաբերյալ ՔՊ-ական պատգամավոր Հայկ Սարգսյանի օրինագիծը, որով առաջարկվում էր գումարի դիմաց բանակում ավելի քիչ ժամկետով ծառայել, ԱԺ լիագումար նիստում չընդունվեց, ներկա բոլոր պատգամավորները դեմ քվեարկեցին։
Հայկ Սարգսյանը ևս հայտարարեց, որ ինքն էլ դեմ կքվեարկի` խոստանալով հետո էլի աշխատել նախագծի վրա:

Օրինագծով առաջարկվում է 18-32 տարեկան քաղաքացիներին ծառայել 1 ամիս ու վճարել 24 միլիոն դրամ, 4 ամիս ծառայության դեպքում վճարել 18 միլիոն դրամ:

Իսրայելը սպանել է Իրանի Զինված ուժերի նորանշանակ շտաբի պետին՝ բարձրագույն ռազմական հրամանատար Ալի Շադմանիին, հայտնում է Իսրայելի պաշտպանության բանակը:

Այն ճշգրիտ հետախուզական տվյալների հիման վրա գիշերը հարվածել է Թեհրանի սրտում գտնվող հրամանատարական կենտրոնին և սպանել Ալի Շադմանիին, որն Իրանի գերագույն առաջնորդ Ալի Խամենեիին ամենամոտ անձանցից էր:

Շադմանին եղել է և՛ Իսլամական հեղափոխության պահապանների կորպուսի (ԻՀՊԿ), և՛ իրանական բանակի հրամանատար։ Իսրայելի կողմից Իրանի դեմ ռազմական գործողության սկզբում նա նշանակվել էր Իրանի զինված ուժերի հրամանատար, այն բանից հետո, երբ նրա նախորդը՝ Ալաա Ալի Ռաշիդը, սպանվել էր «Առյուծի վերելք» գործողության առաջին հարվածի ժամանակ։

Արտակ Զաքարյանը գրում է. «Իրանի շուրջ իրավիճակն ավելի է լրջանում:

ԱՄՆ նախագահ Դոնալդ Թրամփ.

«Իրանը պետք է ստորագրեր այն համաձայնագիրը, որը ես առաջարկեցի նրանց: Ինչպիսի ամոթ և անհարկի մարդկային կորուստ: Պարզապես ասեմ. ԻՐԱՆԸ ՉԻ ԿԱՐՈՂ ՈՒՆԵՆԱԼ ՄԻՋՈՒԿԱՅԻՆ ԶԵՆՔ: Ես դա կրկնել եմ նորից ու նորից: Բոլորը պետք է անհապաղ տարհանեն Թեհրանը»:

Սպիտակ տունը տարածել է ԱՄՆ նախագահ Դոնալդ Թրամփի հայտարարությունը՝ հատուկ ընդգծելով «Բոլորը պետք է անհապաղ տարհանեն Թեհրանը» արտահայտությունը: 

Սա կարծես թե Իրան-Իսրայել մարտական գործողության ընդլայնման առաջին պաշտոնական նախանշանն է:

Համաձայն Սպիտակ տան՝ Թրամփը վաղաժամ լքել է G7-ի գագաթնաժողովը և վերադառնում է Վաշինգտոն: Նա նաև հրահանգել է Ազգային անվտանգության խորհուրդին պատրաստ լինել Սպիտակ տան «Իրավիճակային սենյակում»:

Իսկ Ֆրանսիայի, Մեծ Բրիտանիայի և Գերմանիայի նախարարներն Իրանի իրենց գործընկերներին ասել են, որ պետք է հնարավորինս շուտ և առանց նախապայմանների վերադառնալ բանակցությունների սեղանի շուրջ»:

Կրիշտիանու Ռոնալդուն հայտնի է իր ակնառու ֆիզիկական պատրաստվածությամբ նույնիսկ 40 տարեկանում, և նա երբեք բաց չի թողնում այն ցուցադրելու հնարավորությունը: Սակայն ոչ բոլորը գիտեն, որ կարծես թե «նմանակ» ունի։ 

Իհարկե, խոսքը իրական երկվորյակի մասին չէ, այլ նրա որդու՝ Կրիշտիանու կրտսերի մասին, որը դառնում է 15 տարեկան: Երիտասարդ ֆուտբոլիստի մկանները դեռևս համեմատելի չեն իր աստղային հոր մարմնակազմության հետ, բայց նա ավելի ու ավելի է նմանվում հորը: Պատահական չէ, որ Ռոնալդուն ինքը վերջերս գրառում է արել X սոցիալական ցանցում. «Ինչպես հայրը»:

Ի դեպ, Կրիշտիանու կրտսերը վերջերս նորամուտը նշեց Պորտուգալիայի մինչև 15 տարեկանների հավաքականում: Հնարավոր է, որ առաջիկա տարիներին մենք խաղադաշտում տեսնենք երկու Ռոնալդուի՞:

ԱՄՆ-ն դիտարկում է Ֆորդոյի ստորգետնյա հարստացման օբյեկտը ոչնչացնելու համար անհրաժեշտ բունկերային պայթեցնող միջոցներ Իսրայելին փոխանցելու հնարավորությունը, որն ԱՄՆ-ն ունի, բայց Իսրայելը չունի, որպես Իրանին գործարք կնքելուն ստիպելու հիմնական լծակ, հաղորդում է Axios-ը՝ հղում անելով աղբյուրներին։

«Թրամփը դիտարկում է Ֆորդոյի ստորգետնյա հարստացման օբյեկտը ոչնչացնելու համար անհրաժեշտ բունկերային պայթեցնող միջոցները Իսրայելին փոխանցելու հնարավորությունը, որն ԱՄՆ-ն ունի, բայց Իսրայելը չունի, որպես Իրանին գործարք կնքելուն ստիպելու հիմնական լծակ», - ասվում է հրապարակման մեջ։

«Ժողովուրդ» օրաթերթը գրում է. «Չնայած, որ Մերձավոր արեւելքում իրավիճակը կտրուկ գերլարվել է, հարեւան Իրանը մահացու վտանգի առջեւ է, Հայատանի իշխանությունները շատ ակտիվ պատրաստվում են իշխող կուսակցության՝ ՔՊ վարչության՝ սեպտեմբերին կայանալիք ընտրություններին:

Ըստ մեր տեղեկությունների՝ ՔՊ-ականները մինչեւ օգոստոս ամիս առաջադրվելու հնարավորություն ունեն, բայց իրականում առաջադրվում են այն անձինք, ովքեր Նիկոլ Փաշինյանի վստահությունն են վայելում:

«Ժողովուրդ» օրաթերթի տեղեկություններով՝ այս պահին ՔՊ վարչության անդամ դառնալու համար ինքնառաջադրվել են նաեւ ԱԺ ՔՊ խմբակցության կին պատգամավորները` Հասմիկ Հակոբյանը, Հերիքնազ Տիգրանյանը, Ալխաս Ղազարյանը, Արուսյակ Ջուլհակյանը: Մեր աղբյուրները նշում են, որ կանայք այս անգամ ավելի շատ են ներկայացված լինելու կուսակցության վերնախավում, ու հիմա թեժ պայքար է ընթանում: 

ԱԺ պատգամավոր Արփի Դավոյանը, որ այժմ ՔՊ վարչության անդամ է, թիմին ասել է՝ չի առաջադրվելու:

Հիշեցնենք, որ ՔՊ վարչության վերջին ընտրությունները տեղի են ունեցել 2022 թվականի նոյեմեբերի 4-ին, եւ դրանք սկանդալային ավարտ ունեցան, քանի որ ՔՊ-ն ներսում կեղծել էր վարչության ընտրությունների արդյունքները։ Կեղծիքի արդյունքում Հայկ Կոնջորյանը հայտնվել էր ընտրվածների շարքում, ինչի բացահայտումից հետո դուրս մնաց վարչությունից:

ArmLur.am-ը գրել էր, որ ԱԺ ՔՊ խմբակցության պատգամավոր Արսեն Թորոսյանը, որ ի սկզբանե վարչության անդամների կազմում չէր հայտնվել, կուսակցության անդամներից մեկի համակարգչի վրա նկատել էր այն շրջանառվող ցուցակը, որտեղ գրված է եղել՝ ով պետք է անցնի վարչություն, ով՝ ոչ: Նա լուսանկարել էր շրջանառվող այդ ցուցակն ու վերահաշվարկ պահանջել:

Ու միայն վերահաշվարկ իրականացնելիս ՔՊ-ն հրապարակեց իր վարչության 15 նոր անդամների անունները:

1. Փաշինյան Նիկոլ

2. Պապիկյան Սուրեն

3. Ռուբինյան Ռուբեն

4. Ավինյան Տիգրան

5. Պապոյան Գեւորգ

6. Միքայելյան Սասուն

7. Հարությունյան Արայիկ

8. Դավոյան Արփինե

9. Սանոսյան Գնել

10. Ալեքսանյան Վահագն

11. Սիմոնյան Ալեն

12. Հակոբյան Վաղարշակ

13. Փամբուխչյան Արմեն

14. Թորոսյան Արսեն

15. Պետրոսյան Ռոմանոս»։

«Փաստ» օրաթերթը գրում է.

«Դեռևս ապրիլի վերջին, երբ ՍԱՏՄ ղեկավար Արմեն Դանիելյանն ազատվեց պաշտոնից, ապա և «ծառայողական լիազորություններն օգտագործելով առանձնապես խոշոր չափերի գույք հափշտակելու» մեղադրանքով ձերբակալվեց ու կալանավորվեց, իշխանական կուլիսներում խոսակցություններ էին պտտվում, որ այդ պաշտոնին կարող է նշանակվել ՍԱՏՄ ղեկավարի տեղակալ Տիգրան Պետրոսյանը, չնայած որ նա որևէ կապ չունի ոլորտի հետ:

Ըստ մեր աղբյուրների, ինչպես Դանիել յանի դեպքում, Պետրոսյանի համար ևս ակտիվ լոբբինգ է իրականացնում վարչապետի աշխատակազմի ղեկավար Արայիկ Հարությունյանը: Ավելին, կային տեղեկություններ, որ այդ նշանակումը պետք է լինի հունիսի սկզբներին: Սակայն անցել է բավական ժամանակ, իսկ ՍԱՏՄ ղեկավար դեռևս նշանակված չէ, Տիգրան Պետրոսյանն էլ դեռևս «բավարարվում» է ՍԱՏՄ ղեկավարի պարտականությունները կատարողի կարգավիճակով: Այս ընթացքում նա ամեն ինչ անում է, որ ցույց տա, թե ինչքան շատ գործ է անում, թե ինչ արժանի է նշանակվելու, գրեթե ամենօրյա ռեժիմով ստուգումների ու կասեցումների մասին հաղորդագրություններ են տարածվում ՍԱՏՄ անունից: Այդուամենայնիվ, Նիկոլ Փաշինյանը դեռևս չի շտապում նշանակում անել: Բանն այն է, որ, մեր տեղեկություններով, վարչապետին պարբերաբար զեկուցում են, որ բազում խնդիրներ են ծագել այս ընթացքում: Խոսքը վերաբերում է մի քանի հարցի: Նախ, ինչպես արդեն նշել ենք, տնտեսվարողներն իրենց մոտ հայտնաբերված խախտումների մասին տեղեկանում են մամուլի հրապարակումներից: Այսինքն, ՍԱՏՄՆ-ն, նախքան տնտեսվարողներին կարգադրագրեր ուղարկելը, այդ ընկերությունների թույլ տված խախտումների մասին հաղորդագրությունները ԶԼՄ-ներով էր տարածել: Ճիշտ է, ՍԱՏՄ լրատվականը դա փորձեց արդարացնել «տեղեկատվություն տնօրինողի իր պարտականությամբ», սակայն խնդրի էությունը դրանից չի փոխվում: Ռուսաստան արտահանվող ծաղկի արգելքի, Վրաստանի սահմանին տիրող վիճակի, ներկայում ծիրանի արտահանման խնդիրների հետ կապված ևս ՍԱՏՄ, մեղմ ասած, անփույթ աշխատանքի, իսկ ավելի ճիշտ՝ անգործության մեծ մեղավորությունը կա: Վերջապես, հատկապես վերջին շրջանում բրուցելոզն է լուրջ վնասներ հասցնում։ Այս ամենը, մեր աղբյուրի փոխանցմամբ, պատճառ է դարձել, որ ՍԱՏՄ ղեկավար նշանակելու հարցն առայժմ առկախվի, առավել ևս, որ, ինչպես նշեցինք, Պետրոսյանի համար «բարեխոսում» է Արայիկ Հարությունյանը, որի «պրոտեժե» Արմեն Դանիելյանը հիմա կալանավորված է»:

Մանրամասները՝ «Փաստ» օրաթերթի այսօրվա համարում: