«Պիցցա Տաշիր» ՍՊԸ-ի կողմից Սննդամթերքի անվտանգության տեսչական մարմին ներկայացված դիմումի համաձայն՝ այս պահին վերահսկողություն է իրականացվում այդ կազմակերպությանը պատկանող 30 հանրային սննդի կետերում: 

 ՍԱՏՄ սննդամթերքի անվտանգության վարչության տեսուչների կողմից «Պիցցա Տաշիր» ՍՊԸ-ի Երևանի Իսահակյան 22 հասցեում գործող մասնաճյուղում իրականացվող վերահսկողության ընթացքում հայտնաբերվել են իրավական ակտերով սահմանված սանիտարահիգիենիկ նորմերի կոպիտ խախտումներ:

Մասնավորապես՝

հանրային սննդի կետի պատերը չեն ունեցել հարթ մակերես, պատրաստված չեն եղել անջրանցիկ, չներծծող, լվացվող, ախտահանվող և ոչ թունավոր նյութերից,

առաստաղները կառուցված չեն եղել այնպես, որ կանխարգելվի կամ նվազեցվի կեղտի կուտակումը, գոլորշու խտացումը և մասնիկների թափվելու հնարավորությունը,

սննդամթերքի պատրաստման, մշակման կամ վերամշակման համար նախատեսված սննդի կառույցների հատակի մի մասը չի ունեցել հարթ-նորոգ մակերես:

 Մասնաճյուղի արտադրական գործունեությունը կասեցվել է, սահմանվել է ժամկետ խախտումները վերացնելու համար:

Ավելի ուշ ՍԱՏՄ-ն տեղեկացրել է, որ կասեցվել  է «ՊԻՑՑԱ ՏԱՇԻՐ» սահմանափակ պատասխանատվությամբ ընկերության՝ ք. Երևան, Տերյան 69 հասցեում գործող հանրային սննդի օբյեկտի արտադրական գործունեությունը մինչև հայտնաբերված խախտումները վերացնելը: 

Արցախի Հանրապետության Ազգային ժողովի խմբակցությունները հայտարարություն են տարածել.

«2025թ. մայիսի 21-ին լրացել է Արցախի Հանրապետության նախագահի պաշտոնավարման ժամկետը՝ Սահմանադրության 88-րդ և 168.1-րդ հոդվածների համաձայն։ 

Հանրապետության նախագահի թեկնածուի առաջադրում և ընտրություն առայժմ չեն կայացել՝ պայմանավորված հետևյալ հանգամանքներով.

• Ադրբեջանի կողմից իրականացված ագրեսիան, Արցախի օկուպացիան և Արցախի ժողովրդի բռնի տեղահանության հետևանքով ստեղծված իրավիճակը,
• Հայաստանի իշխանությունների որդեգրած դիրքորոշումները՝ արցախյան հակամարտության կարգավորման և Արցախի պետական ինստիտուտների գործունեության, ինչպես նաև Հայաստանի ներքաղաքական իրավիճակը,
• Տարածաշրջանում առկա անվտանգային միջավայրը և դրանից բխող մարտահրավերներն ու սպառնալիքները։

ԱՀ Սահմանադրության 100-րդ հոդվածի համաձայն` Հանրապետության նախագահի պաշտոնը թափուր մնալու դեպքում մինչև նորընտիր նախագահի կողմից պաշտոնի ստանձնումը Հանրապետության նախագահի լիազորություններն իրականացնում է Ազգային ժողովի նախագահը: 

«Ազատ Հայրենիք-ՔՄԴ» խմբակցություն

«Միասնական հայրենիք» խմբակցություն

«Արդարություն» խմբակցություն

«ՀՅ Դաշնակցություն» խմբակցություն

«Արցախի ժողովրդավարական կուսակցություն» խմբակցություն»:

Իլհամ Ալիեւը հնչեցրել է պայման, որը բնավ նոր չէ, բայց կարեւոր է Բաքվի տեսանկյունից՝ ընդունել հարյուր հազարավոր ադրբեջանցիների։ Այս պահանջի ներկայացման ձեւը արժանի է հատուկ ուշադրության։

«Հայաստանը պետք է հարգի ադրբեջանցիների՝ իրենց բուն հողերը վերադառնալու իրավունքը։ Սա կարեւոր պայման է տարածաշրջանում խաղաղության, հաշտեցման եւ մարդու իրավունքների ապահովման համար»,- նշել է Report-ը՝ մեջբերելով նախագահ Իլհամ Ալիեւի ուղերձը Բաքվում կայացած Օմբուդսմենների միջազգային սիմպոզիումի մասնակիցներին։

Այսինքն՝ Ալիեւը մի կրակոցով երկու նապաստակ է խփում՝ պահանջում է «վերադարձ» եւ ազդարարում է համարյա թե ողջ Հայաստանի «բուն ադրբեջանական» տարածքների մասին։

Կիեւի Սոլոմենսկի շրջանում փրկարարները ռուսական հարվածի հետեւանքով մասամբ ավերված ինը հարկանի շենքի փլատակների տակ հայտնաբերել են եւս յոթ զոհվածի մարմին, հայտնել է Ուկրաինայի արտակարգ իրավիճակների պետական ծառայությունը: Ընդհանուր առմամբ, հունիսի 18-ի առավոտվա դրությամբ շենքին հասցված հարվածի հետեւանքով զոհվել է 18 մարդ: Կիեւում զոհվածների ընդհանուր թիվը հասել է 23-ի, եւս 134-ը վիրավորվել է:

Հունիսի 17-ի գիշերը ռուսական զորքերը գրոհել են Ուկրաինան 440 անօդաչու թռչող սարքերով, 20 թեւավոր հրթիռներով, երկու բալիստիկ հրթիռներով եւ ինը կառավարվող հրթիռներով, ավելի վաղ հայտնել էր Ուկրաինայի զինված ուժերի գլխավոր շտաբը։ Հարձակման հիմնական ուղղությունը Կիեւն էր, որը, ըստ տեղի ռազմական վարչակազմի ղեկավար Թիմուր Տկաչենկոյի, գրոհի է ենթարկվել 175 անօդաչու թռչող սարքերով, ավելի քան 14 թեւավոր հրթիռներով։

Զելենսկին Կիեւին հասցված այս հարվածն անվանել է «ամենաահավորներից մեկը»՝ նշելով, որ քաղաքի ութ թաղամասերում վնասվել են բնակելի շենքեր։ «Նման հարձակումներն իսկական ահաբեկչություն են։ Եվ ամբողջ աշխարհը, Միացյալ Նահանգները եւ Եվրոպան վերջապես պետք է արձագանքեն այնպես, ինչպես քաղաքակիրթ հասարակությունն է արձագանքում ահաբեկիչներին», ընդգծել է Զելենսկին։

Կիեւից բացի, հունիսի 17-ի գիշերը գրոհի են ենթարկվել նաեւ Օդեսայի, Զապորոժիեի, Չեռնիգովի, Ժիտոմիրի, Կիրովոգրադի, Նիկոլաեւի եւ Կիեւի մարզերը։ Օդեսայում բնակելի շենքին հասցված հարվածի հետեւանքով մեկ մարդ զոհվել է, եւս 17-ը՝ վիրավորվել։

ՌԴ ՊՆ-ն, մեկնաբանելով հարձակումը, հայտնել է «բարձր ճշգրտության զենքերով խմբային հարվածի» մասին, որը ենթադրաբար ուղղված է «ուկրաինական ռազմարդյունաբերական համալիրի՝ Կիեւի մարզում եւ Զապորոժիեում գտնվող օբյեկտների» դեմ։

Վարչապետ Նիկոլ Փաշինյանը պնդում է՝ Մայր Աթոռին պատերազմ չի հայտարարել։

«Ես դա չէի կարող ու չեմ հայտարարել, պատերազմ հայտարարել են այն մարդիկ, ովքեր խախտել են Հայ առաքելական եկեղեցու կանոնակարգը, կուսակրոնության ուխտը, խախտում են մեր ավանդույթները։ Իմ խնդիրը, որպես Հայ եկեղեցու հավատավոր հոտի համավատարիմ ներկայացուցիչ, եկեղեցին վերադարձնելն է հոգևոր արժեքներին ու հոգևոր արմատներին»,- նշեց նա լրագրողների հետ զրույցում ասաց նա՝ ի պատասխան դիտարկմանը, որ տարածաշջանում պատերազմ է, իսկ ինքը պատերազմ է հայտարարել Հայոց եկեղեցուն։

Փաշինյանն ասաց, որ տարածաշրջանում, այո՛, իրադրությունը շատ բարդ է, ինքը մի քանի օր ներքաղաքական հարցերի չէր անդրադառնում։

«Բայց դա չի նշանակում, որ մյուսները այդ պասիվությունը պետք է օգտագործեին լկտի հարձակումներ անելու համար, այդ հարձակումները համարժեք պատասխան կստանա, հույս ունեմ՝ արդեն համոզվել եք»,- հավելեց նա։

Իրան-իսրայելական հակամարտության եւ Հայաստանում աճող լարվածության ֆոնին, որը պայմանավորված է կառավարության պաշտոնյաների կողմից Ամենայն Հայոց կաթողիկոս Գարեգին II-ի եւ ՀԱԵ այլ հոգեւորականների դեմ հարձակումներով, «Զանգեզուրի միջանցքը» բացելու պահանջները նոր թափ են հավաքում:

Վերջին նման պահանջը ներկայացրել է ԵԱՀԿ ԽՎ գլխավոր քարտուղար Ասաֆ Հաջիեւը:

«Զանգեզուրի միջանցքը պետք է բացվի, այլընտրանք չկա»,- մեջբերում է կատարել APA-ն։

Նա նշել է, որ «Զանգեզուրի միջանցքը Սեւծովյան տարածաշրջանի մաս է կազմում»։ «Գլխավոր սկզբունքը համագործակցությունն է։ Ի՞նչ համագործակցություն կլինի առանց «Զանգեզուրի միջանցքի»։ Համագործակցության մի քանի ճանապարհ կա։ Օրինակ՝ Իրանի միջով։ Բայց այսօր տնտեսությունում բոլորը փնտրում են էժան ճանապարհներ, եւ ամենաէժան ճանապարհն անցնում է «Զանգեզուրի միջանցքով»։

Այսօր «Զանգեզուրի միջանցքը» առաջին հերթին անհրաժեշտ է Հայաստանին, քանի որ Ադրբեջանն արդեն լուծել է իր հարցերը։ Հետեւաբար, կարծում եմ, որ նրանք նույնպես խելքի կգան, եւ «Զանգեզուրի միջանցքը» կբացվի։ «Զանգեզուրի միջանցքը» պետք է բացվի, այլընտրանք չկա։ Աշխարհում կան նման օրինակներ։ Ռուսաստանից Կալինինգրադ գնացքն անցնում է Լիտվայով, բայց այն չի ստուգվում։ Ինչպե՞ս կարող են ինձ ստուգել, երբ ես իմ երկրի մի շրջանից մյուսն եմ գնում։ Ադրբեջանի քաղաքացիների անցումը պետք է լինի առանց ստուգման»։

Իսրայելի Arrow հրթիռների պաշարները, որոնք անհրաժեշտ են իրանական բալիստիկ հրթիռային հարվածներից պաշտպանվելու համար, սպառվում են հակամարտության խորացմանը զուգընթաց։ Դրանք կարող են սպառվել «մոտ ապագայում»։ Այս մասին հաղորդել է The Wall Street Journal թերթը (WSJ)՝ հղում կատարելով ԱՄՆ պաշտպանության նախարարության աղբյուրներին։

Իսրայելա-ամերիկյան համատեղ Arrow հրթիռները բալիստիկ հրթիռները որսալու հիմնական միջոցներից են, եւ եթե դրանց պաշարները սպառվեն, իրանական հարձակումները հետ մղելու Իսրայելի կարողությունը զգալիորեն կխաթարվի։ Պարբերականի տվյալներով՝ Իսրայելի պաշտպանության բանակի (ՑԱԽԱԼ) ղեկավարությունը խիստ մտահոգված է այս հարցով՝ հաշվի առնելով իրանական կողմի հրթիռակոծության ինտենսիվությունը։

Թերթը նշել է, որ Միացյալ Նահանգները գարնանն օգնություն է ցուցաբերել հրեական պետությանը՝ լրացուցիչ հակահրթիռային եւ հակաօդային պաշտպանության համակարգերով։ Բայց եթե մարտական գործողությունները շարունակվեն, Arrow-ի պաշարների սպառումը անխուսափելի կլինի, քանի որ բալիստիկ հրթիռների հարվածները երկար ժամանակով հետ մղել անհնար է։ Այս իմաստով Իսրայելի պաշտպանության բանակը պետք է արագացնի իր սեփական գործողությունը: Իսրայելի բանակի մամուլի ծառայությունից WSJ-ին հայտնել են, որ պատրաստվում են ցանկացած զարգացման, բայց չեն կարող մեկնաբանել զինամթերքի հետ կապված իրավիճակը:

Իսրայելը հունիսի 13-ի գիշերը սկսեց «Առյուծի վերելք» գործողությունը՝ ուղղված Իրանի միջուկային ծրագրի եմ։ Մեկ օր անց իսլամական հանրապետությունը հակահարձակում սկսեց։ Հաջորդ օրերին Իսրայելն ու Իրանը կրկին հարվածներ են փոխանակել։ Երկու կողմերն էլ հայտնել են հարձակումների հետեւանքով զոհերի մասին՝ ընդունելով, որ իրենց տարածքում գտնվող որոշ թիրախներ հարվածի են ենթարկվել, սակայն նշել են, որ վնասը սահմանափակ է եղել։

Արմեն Աբազյանը իմ վարչապետության օրոք ամենաերկարն է եղել ԱԱԾ տնօրենի պաշտոնում և աշխատել է ամենաբարդ շրջանում՝ 2020–ի նոյեմբերից։ Այս մասին այսօր՝ հունիսի 18–ին, ԱԺ–ում լրագրողների հետ զրույցում նշեց ՀՀ վարչապետ Նիկոլ Փաշինյանը՝ անդրադառնալով հարցին, թե ինչ պատճառով է աշխատանքից ազատվել ԱԱԾ տնօրեն Արմեն Աբազյանը։

«Նրա պաշտոնավարման ողջ ընթացքը եղել է չափազանց բարդ։ Ես կարծում եմ՝ նա արժանացել է նրան, որ մի քիչ հանգստանա, որովհետեւ այս 5 տարի լարված պայմաններում աշխատել է ԱԱԾ տնօրենի պաշտոնում։ Կարծում եմ՝ հեշտ չի»,–ասաց նա։

Հարցին՝ արդյոք դա կապ ունի երեկ գործարար Սամվել Կարապետյանի տան շուրջ տեղի ունեցածի հետ, Փաշինյանը պատասխանեց. «Ձեր նշած հանգամանքների հետ... ուղղակի կապ ունի իմ նշած հանգամանքների հետ։ Իսկ ընդհանրապես ԱԱԾ տնօրենի աշխատանքը առնչվում է գրեթե ամեն ինչի հետ, հատկապես այն, ինչ վերաբերում է ազգային անվտանգությանը, այդ թվում հիբրիդային անվտանգությանը»։

Ինչ վերաբերում է հարցին,  թե Աբազյանը հրաժարվել է որեւէ հանձնարարություն կատարե՞լ, վարչապետն ասաց. «Չէր կարող ԱԱԾ տնօրենը հրաժարվել իմ որեւէ հանձնարարություն կատարել»։

Վարչապետ Նիկոլ Փաշինյանը պնդում է՝ գործարար, բարերար Սամվել Կարապետյանի հայտարարությունը ոչ թե եկեղեցու մասին էր, այլ՝ Հայաստանի մասին էր։

«Փորձ էր արվում տպավորություն ստեղծել, թե Հայաստանում կարող են գալ ինչ-որ մարդիկ ինչ-որ տեղերից ու իրենց ձևերով ինչ-որ բան անել»,–ասաց նա ԱԺ–ում լրագրողների հետ զրույցում։

«Հայաստանն ունի արձագանքի կոնկրետ լծակներ ու ես չեմ հանդուրժի, որ որևէ մեկի լեզուն պտտվի այդպիսի բան ասի»,- ասաց նա։

Փաշինյանի խոսքով՝  Հայաստանը ժողովրդավարական երկիր է ու Հայաստանում  յուրաքանչյուրն ունի կարծիք արտահայտելու, հավաքներ անցկացնելու իրավունք, բայց Հայաստանին սպառնալ որևէ մեկը չի կարող. «Ինչքան էլ ժողովրդավարություն է, ես ամենակոշտ ու ամենակոպիտ միջոցները կձեռնարկեմ ցանկացած նման դեպքում»,- ասաց նա՝ հիշեցնելով, որ Սամվել Կարապետյանն ասել է՝ եթե քաղաքական գործիչներին չհաջողվի, մենք մեր ձեւերով կմիջմտենք։

«Դա արժանացելէ  եւ արժանանալու է կոնկրետ համարժեք գնահատականի։

ՀՀ ժողովուրդն էլ մեզ մեղադրում է, և ոմանք մեր երկրում ժողովրդավարությունը փորձում են նույնացնել թուլության հետ։ Ես ասում եմ՝ նրանք, ովքեր կշփոթվեն ժողովրդավարությունը շփոթել թուլությանհետ, պետությանհամը կմնա  նրանց բերաններում։ Նրանք, ովքեր կասեն՝ եթե քաղաքական գործիչները եւ ճանապարհները չաշխատեն, մենք մեր ձեւերով մկիջամտենք, արժանանալու են համարժեք պատասխանի»։

Անվտանգության խորհրդի նիստ պարբերաբար է հրավիրում. օրինակ, վերջին երեք շաբաթվա կամ մեկ ամսվա ընթացքում, երևի չորս, հինգ, վեց անգամ հրավիրվել են, բայց հաղորդագրություններ չեն լինում։ Այս մասին այսօր՝ հունիսի 18–ին, ԱԺ–ում լրագրողների հետ զրույցում նշեց ՀՀ վարչապետ Նիկոլ Փաշինյանը՝ անդրադառնալով հարցին, թե Իրան–Իսրայել հակամարտության ֆոնին ինչու Հայաստանն անվտանգության խորհրդի նիստ չի հրավիրել եւ քննարկել առկա մարտահրավերները։

«Բայց այդ նիստերը նրա համար չեն, որ Սյունիքի հետ կապված վտանգ կա։ Ես այդ հայտարարությունները համարում եմ սադրիչ, պրովոկատիվ, չհիմնավորված  և Հայաստանի քաղաքացիների շրջանում անհանգստություն, խուճապ և անորոշություններ գեներացնելու համար։

Հայաստանի Հանրապետությունը և Ադրբեջանի Հանրապետությունը համաձայնեցրել են խաղաղության և միջպետական հարաբերությունների հաստատման մասին համաձայնագրի նախագիծը, և ինչպես ասել եմ՝ Հայաստանի և Ադրբեջանի միջև նոր պատերազմ չի լինելու, լինելու է խաղաղություն»,–ասաց նա։

Դիտարկմանը՝ Ադրբեջանը շարունակում է կրակել Սյունքի գյուղերի վրա և չի արձագանքել Փաշինյանի առաջարկին ստորագրելու օրվա և տեղիօ հետ կապված, Փաշինյանն ասաց. «Մենք ասել ենք՝ հավատարիմ ենք մնալու խաղաղության օրակարգին, և մենք շարունակում ենք խորհրդակցությունները, բանակցություններն Ադրբեջանի հետ խաղաղության համաձայնագրի ստորագրման ժամկետների շուրջ և փորձում ենք ստեղծել այն միջավայրն ու պայմանները, որ դա հնարավոր լինի: Այո՛, ՀՀ շուրջ կան սպառնալիքներ, այդ սպառնալիքները եղել են միշտ, բայց նորությունն այն է, որ ՀՀ համար ստեղծվել են աննախադեպ հնարավորություններ, որոնք նախկինում երբեք չեն եղել: Հիմա ՀՀ-ն սպառնալիքները կառավարելու և հնարավորություններն օգտագործելու ավելի մեծ կարողություններ ունի»:

Անդրադառնալով գերիների հարցին, Փաշինյանն ասաց, որ գերիների և ընդհանրապես բոլոր հարցերով իրենք աշխատում են ամենօրյա ռեժիմով՝ նայած այդ օրն ինչ նոր հնարավորություններ ու մարտահրավերներ են ի հայտ գալիս, այդ բոլոր հարցերը չեն կարող օրակարգից դուրս լինել: