Իրանի գերագույն առաջնորդ Ալի Խամենեին, մեկնաբանելով Իսրայելի հետ հակամարտությունը և դրան Միացյալ Նահանգների հնարավոր մասնակցությունը, ասել է, որ Թեհրանը կհաղթի, և Միացյալ Նահանգներին հասցված վնասը կլինի ավելի մեծ, քան Իրանի կրածը։

«Ամենակարող Աստված անպայման կհաղթի, որպեսզի Իրանի ժողովուրդը իսկապես հաղթի», - նրա խոսքերն է մեջբերում մամուլի ծառայությունը։

Իրանի գերագույն առաջնորդը հայտարարել է, որ Միացյալ Նահանգները զգալիորեն ավելի մեծ վնաս կստանա, քան Իրանը, և նաև ասել է, որ Թեհրանն այժմ վրեժ է լուծում Իսրայելից Իրանի վրա հարձակման համար, որը իսրայելական կողմը կատարել է Թեհրանի և Վաշինգտոնի միջև բանակցությունների ժամանակ, երբ իրանական կողմից կտրուկ ռազմական շարժումներ չեն եղել։

Եթե այդ ահազանգը կա, դա արդեն հաղորդում է հանցագործության մասին և իրավապահները դրանով կզբաղվեն՝ համոզված եմ։ Այս մասին այսօր՝ հունիսի 18–ին, ԱԺ–ում կառավարության հետ հարցուպատասխանի ժամանակ նշեց ՀՀ վարչապետ Նիկոլ Փաշինյանը՝ անդրադառնալով լուրերին, որ հաջակցություն Սամվել Կարապետյանի դատարանի մոտ ստիպողաբար բերում են ՀԷՑ–ի աշխատակիցներին։

«Ես ժամանակին Զանգեզուրի պղնձամոլիբդենային կոմբինատի որոշ շրջանակների զգուշացնում էի, որ շուտով կառավարությունը ԶՊՄԿ–ում ունենալու է փայաբաժին եւ բոլոր էն մարդիկ, որոնք ստիպողաբար տանում էին ցույցերի, բոլորն ազատվելու են աշխատանքից։ Դա ես ասել եմ 2021–ի հունիսին եւ սեպտեմբերին բոլոր այդ մարդիկ ազատված էին աշխատանքից։ Շատերը աղերսագրերով, մեղայագրերով գալիս են կառավարություն, ասում են՝ խնդրում ենք, մեզ հետ ընդունեք, սխալվել ենք։

Հեսա շատ արագ ՀԷՑ–ը լինելու է պետական սեփականություն։ ՀԷՑ–ի էն աշխատողները, մենք դա կֆիքսենք, որոնք մարդկանց ստիպողաբար ցույցի են բերում, բոլորն ազատվելու են աշխատանքից։ Հետո չասեն՝ վայ, բա գիտեք, սենց չի։ ԶՊՄԿ–ի «ուժեղ» տղերքի նման էլի ծնկաչոք գալու են մեր դռների դեմը կանգնեն։ Ոչ մեկին ներում չի լինելու։

Երկրորդը, էն աշխատողները, որոնք կհրաժարվեն եւ կահազանգեն, կհամագործակցեն իրավապահ մարմինների հետ եւ կոնկրետ ցուցմունքներ կտան, ոչ մեկը չի ազատվի։ Մենք բավարար լծակներ ունենք էդ մարդկանց պաշտպանելու համար։ Իսկ ովքեր իրավապահ մարմինների հետ կհամագործակցեն, մյուսները կդատվեն, իսկ համագործակցողները կխրախուսվեն։ Նրանք, որոնք կհրաժարվեն մասնակցել որեւէ հավաքի, նրանց հետ որեւէ բան տեղի չի ունենա, մենք կկարողանանք նրանց պաշտպանել։ Պետականացումից հետո նրանք կշարունակեն հանգիստ աշխատել։

Իսկ նրանք, որոնք այդ ապօրինությունների մեջ փութաջանություն են ցուցաբերել, հետո չգիտեմ, «Տաշիր պիցցա»–ում կկարողանան աշխատել, թե չեն կարողանա։ Վստահ չեմ, որ գոնե այդտեղ կարող են որեւէ բան աշխատել»,–ասաց Փաշինյանը։

Ադրբեջանի նախագահ Իլհամ Ալիևը հունիսի 19-ին կայցելի Թուրքիա, ինչի մասին հայտնել է Թուրքիայի նախագահի աշխատակազմի հաղորդակցության բաժնի ղեկավար Ֆահրեթթին Ալթունը:

Նրա խոսքով՝ այցի ընթացքում երկու երկրների նախագահների մասնակցությամբ տեղի կունենա «Ադրբեջանական թաղամաս» համալիրի բացումը, որը 2023 թվականի ավերիչ երկրաշարժից հետո Քահրամանմարաշում կառուցվել է Թուրքիայի և Ադրբեջանի կողմից։

Ալթունը նշել է, որ այցի ընթացքում նախատեսվում է մտքերի փոխանակում տարածաշրջանային ներկա գործընթացների վերաբերյալ։

Ֆրանսիայի նախագահ Էմանուել Մակրոնի՝ Կանադայում կայանալիք G7 գագաթնաժողովին մասնակցելու ճանապարհին Գրենլանդիայում «խորհրդանշական կանգառ» կատարելու որոշումը զայրացրել է ԱՄՆ նախագահ Դոնալդ Թրամփին և նպաստել Կանադան վաղաժամ լքելու նրա որոշմանը, հաղորդում է Financial Times-ը՝ հղում անելով գագաթնաժողովին մասնակցած երեք պաշտոնյաների։ 

Թրամփը մեկ օր շուտ լքեց G7 գագաթնաժողովը։ Պատասխանելով Մակրոնի այն ենթադրությանը, որ իր հեռանալը կապված էր Իսրայելի և Իրանի միջև զինադադարի շուրջ աշխատանքների հետ, ԱՄՆ նախագահն ասաց. «Սխալվում է։ Նա պատկերացում չունի, թե ինչու եմ ես հիմա գնում Վաշինգտոն, բայց խոսքը զինադադարի մասին չէ։ Շատ ավելի կարևոր է։ Միտումնավոր թե ոչ, Էմանուելը միշտ ամեն ինչ խառնում է»։

Նշենք, որ նախագահ դառնալուց հետո Թրամփը բազմիցս հայտարարել է, որ ցանկանում է ԱՄՆ վերահսկողության տակ առնել Գրենլանդիան:

ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչություն ստացված հաղորդման հիման վրա ՀՀ քրեական օրենսգրքի 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Ս.Կ.-ն զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ Սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ: Այս մասին Tert.am-ին տեղեկացրեց Քննչական կոմիտեի մամուլի խոսնակ Կիմա Ավդալյանը:

«2025 թվականի հունիսի 18-ին միջնորդություն է ներկայացվել քրեական վարույթի օրինականության նկատմամբ հսկողություն իրականացնող դատախազին՝ հանրային քրեական հետապնդում հարուցելու մասին, որի կապակցությամբ վերջինիս կողմից նույն օրը որոշում է կայացվել Ս.Կ.-ի նկատմամբ ՀՀ քրեական օրենսգրքի 422-րդ հոդվածի 2-րդ մասով հանրային քրեական հետապնդում հարուցելու մասին։ 2025 թվականի հունիսի 18-ին Ս.Կ.-ն ձերբակալվել և ներկայացվել է վարույթն իրականացնող մարմին։ Միջնորդություն է ներկայացվել դատարան՝ վերջինիս նկատմամբ կալանքը որպես խափանման միջոց կիրառելու վերաբերյալ»,-ասաց Ավդալյանը:

Այսօր՝ հունիսի 18-ին, վաղ առավոտից Shamshyan.com–ը բազաթիվ ահազանգեր է ստանում Լարսի անցակետում մնացած հայ վարորդներից, ովքեր արդարացիորեն իրենց զայրույթն են հայտնում ռուսական կողմի փնթի, ինչու չէ՝ նաև մտածված աշխատանքից:

Վարորդների խոսքով թե՛ Բագրատաշենի անցակետում, թե՛ վրացական անցակետում ոչ մի խնդիր չեն ունեցել, առանց խոչընդոտի հատել են սահմանները, արհեստական ու միտումնավոր խոչընդոտները ստեղծում է միան ռուսական կողմը և արդեն մի քանի օր է՝ Ռուսաստանի մաքսավորների ստեղծած խոչընդոտների հետևանքով բազմաթիվ բեռնատարներում եղած տոննաներով միրգը փչանում է: 

Ֆոտոլրագրողի հետ զրույցում վարորդները նշում են. «Ռուսները ծիրանը հետ են ուղարկում Հայաստան, մեզ օրերով պահում են այստեղ: Մեքենաների դիզվառելիքը վերջացել ա, չեն թողնում մեքենա գա՝ «սալյառկա» լցնի: Անորոշ վիճակ ա: Ասում են՝ հետվերադարձ պիտի արվի, բայց թղթերն էլ չեն տալիս, որ ավտոները հետ գան: Անտեր, անորոշ վճակով կանգնած ենք, մարդ էլ չկա, որ դիմենք»:

 Անգամ մեքենաներ կան, որոնց դիզվառելիքը վերջացել է, իսկ այդ դեպքում բեռնատարների սառցախցիկները չեն աշխատում:

Վարորդները նշում էին նաև, որ պահանջում են, որպեսզի ՀՀ արտաքին գործերի նախարարությունը միջամտի ու ռուսական կողմին պարտավորեցնի, որպեսզի արհեստական խոչընդոտներ չստեղծեն:

Ըստ ահազանգած վարորդների՝ մեքենաների թիվն անցնում է 200-ը։

Հայաստանի տարածքային կառավարման և ենթակառուցվածքների նախարար Դավիթ Խուդաթյանը գրել է, որ Երևանից և մարզերից ՀԷՑ-ի անձնակազմին ուղղորդում են Երևան՝ մասնակցելու ի աջակցություն գործարար Սամվել Կարապետյանի անցկացվող հավաքներին։  

«Մենք տեղեկություններ ենք ստանում, և ինչպես որ կարելի էր կանխատեսել, Երևանից ու մարզերից ՀԷՑ֊ի անձնակազմին ուղղորդում են Երևան մասնակցելու ոմանց աջակցության հավաքի։

Բռնությամբ կամ սպառնալիքով հավաքներին մասնակցելու պարտադրելը քրեորեն պատժելի է: Որևէ մեկը չի կարող սպառնալիքով բերման ենթարկել ՀԷՑ-ի աշխատակիցներին հանրահավաքի: Որևէ մեկը հրաժարվելու դեպքում չի կորցնի աշխատանքը»,- գրել է Խուդաթյանը:

Իրանի ժողովուրդը կդիմադրի թե՛ պարտադրված պատերազմին, թե՛ պարտադրված խաղաղության դեմ և չի հանձնվելու որևէ մեկին. այս մասին ասել է Իրանի գերագույն առաջնորդ այաթոլլահ Ալի Խամենեին:

Նրա խոսքով՝ ԱՄՆ-ն կկրի հսկայական վնաս, եթե ռազմական հակամարտության մեջ մտնի Իրանի հետ:

Հիշեցնենք, որ նախօրեին ԱՄՆ նախագահ Դոնալդ Թրամփը Truth Social սոցցանցում գրել էր.«Մենք ճշգրիտ գիտենք, թե որտեղ է թաքնվում այսպես կոչված «Գերագույն առաջնորդը»։ Նա հեշտ թիրախ է, բայց այնտեղ անվտանգ է։ Մենք չենք պատրաստվում նրան ոչնչացնել (սպանել), գոնե առայժմ։ Բայց մենք չենք ուզում, որ հրթիռներ արձակվեն քաղաքացիական անձանց կամ ամերիկացի զինվորների վրա։ Մեր համբերությունը սպառվում է»։

2025 թվականի հունիսի 18-ին կայացած նիստում Հանրային ծառայությունները կարգավորող հանձնաժողովը 10 միլիոն դրամ գումարի չափով տուգանել է «Հայաստանի էլեկտրական ցանցեր» ընկերությանը՝ արձանագրված տեխնիկական և առևտրային խախտումների համար։ Այս մասին տեղեկացնում է ՀԾԿՀ-ն:

«Հանձնաժողովը 2025 թվականի փետրվարի 3-14-ը իրականացրել է կարճաժամկետ մոնիթորինգ ընկերության երեք մասնաճյուղերում՝ ուսումնասիրելով սպառողներին առաքված և հաշվիչներով գրանցված էլեկտրաէներգիայի քանակն ու որակը։ Մոնիթորինգի արդյունքում արձանագրվել են մի շարք թերություններ՝ կապված հաշվիչների և դրանց արկղերի տեխնիկական վիճակի, հաշվառման ճշգրտության և սպառողների իրավունքների խախտման հետ։

Մասնավորապես՝

2025 թվականի հունվարի 22-ի դրությամբ ինդուկցիոն (մեխանիկական, ոչ էլեկտրոնային) եռաֆազ առևտրային բոլոր հաշվիչները պետք է փոխարինված լինեին էլեկտրոնային (ավտոմատ գրանցմամբ) հաշվիչներով, որոնք ապահովում են նաև էլեկտրաէներգիայի ռեակտիվ բաղադրիչի հաշվառումը ( ԷԲՑ կանոնների 241-րդ կետ)։

Հաշվիչները 30 րոպեանոց միջակայքում պետք է գրանցեն լարման մակարդակը և հզորության գործակիցը (cos.), (ԷԲՑ կանոնների 247-րդ կետի 1-ին ենթակետ):

Էլեկտրաէներգիայի նախորդող ամսվա ծախսը պետք է գրանցվի էլեկտրոնային հաշվիչի լուսատախտակի վրա արտածվող ցուցմունքով ավտոմատացված ռեժիմում (պետք է բացառվի տեսուչի կողմից ամսվա սկզբի և վերջի ցուցմունքների տարբերությամբ ծախսի հաշվարկումը), (ԷՄԱ կանոնների 75-րդ կետ): 

Ընկերությունը ներկայացրել է իր պարզաբանումները՝ չհերքելով արձանագրված խախտումները։ Արդյունքում՝ Հանձնաժողովը տուգանել է ընկերությանը՝ 10 միլիոն դրամ գումարի չափով, որը պետք է փոխանցվի պետական բյուջե մեկամսյա ժամկետում։

Բացի այդ, Հանձնաժողովը պարտավորեցրել է ընկերությանը մինչև 2025 թվականի դեկտեմբերի 31-ը իր սպասարկման ամբողջ տարածքում վերացնել նմանատիպ բոլոր խախտումները, համապատասխան դեպքերում վճարել տույժ՝ սպառողների իրավունքների խախտման համար և մեկամսյա ժամկետում Հանձնաժողովին ներկայացնել տեղեկատվություն»,- ասված է հաղորդագրության մեջ։

ՀՀ քննչական կոմիտեն հաղորդագրություն է տարածել կապված «Տաշիր գրուպ»–ի սեփականատեր Սամվել Կարապետյանին առաջադրված մեղադրանքի հետ։

Հաղորդագրությունում ասվում է. «ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչություն ստացված հաղորդման հիման վրա ՀՀ քրեական օրենսգրքի 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Ս.Կ.-ն զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ:

2025 թվականի հունիսի 18-ին միջնորդություն է ներկայացվել քրեական վարույթի օրինականության նկատմամբ հսկողություն իրականացնող դատախազին՝ հանրային քրեական հետապնդում հարուցելու մասին, որի կապակցությամբ վերջինիս կողմից նույն օրը որոշում է կայացվել Ս.Կ.-ի նկատմամբ ՀՀ քրեական օրենսգրքի 422-րդ հոդվածի 2-րդ մասով հանրային քրեական հետապնդում հարուցելու մասին։

2025 թվականի հունիսի 18-ին Ս.Կ.-ն ձերբակալվել և ներկայացվել է վարույթն իրականացնող մարմին։

Միջնորդություն է ներկայացվել դատարան՝ վերջինիս նկատմամբ կալանքը որպես խափանման միջոց կիրառելու վերաբերյալ։