Ռուսաստանի և Իրանի միջև համապարփակ ռազմավարական գործընկերության մասին պայմանագիրը չի ներառում փոխադարձ ռազմական օգնության մասին դրույթ։ Բացի այդ, Թեհրանը Մոսկվայից նման օգնություն չի խնդրել, РБК-ին տված հարցազրույցում ասել է Ռուսաստանի նախագահի մամուլի քարտուղար Դմիտրի Պեսկովը։

«Նախագահ Պուտինը, լրատվական գործակալությունների ղեկավարների հետ զրույցում, պատասխանելով այն հարցին, թե արդյոք Ռուսաստանը կօգնի Իրանին ռազմական առումով, ասել է, որ ռազմական առումով, նախ, Իրանը մեզանից օգնություն չի խնդրել, և երկրորդ, նույնիսկ Իրանի հետ մեր ունեցած համաձայնագրի համատեքստում նման իրավիճակներում ռազմական փոխօգնության մասին որևէ դրույթ չկա։ Նման դրույթ գոյություն չունի», - ընդգծել է Կրեմլի ներկայացուցիչը։

Սակայն ընդհանուր առմամբ, Ռուսաստանի աջակցությունն ակնհայտ է, նշել է Պեսկովը։

«Երբ սկսվեց այս հակամարտությունը, հրապարակվել Արտաքին գործերի նախարարության հայտարարությունը, որը դատապարտում էր Իսրայելի  գործողությունը, հարվածներ և արտահայտում մեր հստակ դիրքորոշումն առ այն, որ անհրաժեշտ է դադարեցնել հարվածները և անցնել բանակցությունների խաղաղ ընթացքի», - ընդգծել է Ռուսաստանի նախագահի մամուլի քարտուղարը։

Պեսկովը նաև նշել է, որ Մոսկվան հայտարարել է իր պատրաստակամության մասին, անհրաժեշտության դեպքում, միջնորդական ծառայություններ մատուցել իրանա-իսրայելական հակամարտության կարգավորման գործում։

«Սա նախագահ Պուտինը նաև ասել է իր ամերիկացի գործընկերոջը՝  Թրամփին, և դա քննարկվել է նաև Պուտինի կողմից օրեր առաջ ունեցած հեռախոսազրույցներում՝ թե՛ վարչապետ Բենիամին Նեթանյահուի, թե՛ նախագահ Մասուդ Փեզեշքիանի հետ», - պարզաբանել է մամուլի քարտուղարը։

ՀՀ կառավարության կողմից կայացված որոշման հիման վրա ավարտին է հասցվել Բրյուսելում Հայաստանի Հանրապետության դեսպանության նոր շենքի գնման գործընթացը։ Այս մասին հայտնում են ԱԳՆ-ից:

Դեսպանության նոր շենքն առանձնանում է առաջնակարգ դիրքով և պատմական ճարտարապետությամբ: Այն կառուցվել է 1866-1870 թվականներին և գտնվում է Եվրոպական հանձնաժողովի, Եվրոպական խորհրդարանին, մի շարք այլ եվրոպական հաստատությունների և դիվանագիտական ներկայացուցչությունների հարևանությամբ:

Նոր շենքի ձեռքբերումը զգալիորեն կբարելավի Բրյուսելում ՀՀ դիվանագիտական ներկայացուցչության աշխատանքային միջավայրն ու պայմանները՝ լրացուցիչ խթանելով Հայաստանի արտաքին քաղաքական առաջնահերթությունների արդյունավետ իրագործումը ԵՄ քաղաքական կենտրոնում: 

Շենքի գնման գործարքի արժեքը կազմել է 4,3 միլիոն եվրո։

Թուրքիայի ազգային պաշտպանության նախարար Յաշար Գյուլերը ընդունել է Ադրբեջանի արտաքին հետախուզության ղեկավար Օրհան Սուլթանովին։ Այս մասին ասվում է Ազգային պաշտպանության նախարարության կողմից սոցիալական ցանցում հրապարակված հաղորդագրության մեջ։

Հանդիպմանը քննարկված թեմաների վերաբերյալ մանրամասներ չեն հրապարակվել:

Telegram մեսենջերի 40-ամյա հիմնադիր Պավել Դուրովը հայտարարել է, որ վերջերս կտակ է կազմել՝ իր աշխատանքի հետ կապված ռիսկերի պատճառով։ Այս մասին գործարարը պատմել է Le Point-ին տված հարցազրույցում։ 

«Ազատությունների պաշտպանության պատճառով ի հայտ են գալիս բազմաթիվ թշնամիներ, այդ թվում՝ հզոր պետություններում։ Ես ուզում եմ պաշտպանել իմ երեխաներին, ինչպես նաև իմ հիմնադրած Telegram ընկերությունը։ Ես ուզում եմ, որ Telegram-ը հավերժ հավատարիմ մնա այն արժեքներին, որոնք ես պաշտպանում եմ», - ասել է Դուրովը։

Գործարարի խոսքով՝ «իր անհետացման» դեպքում ընկերության կառավարումը կստանձնի ոչ առևտրային հիմնադրամը: Դուրովի փոխանցմամբ՝ իր նպատակն է «ապահովել հարթակի շարունակականությունը»:

«Ես ուզում եմ, որ այն շարունակի գոյություն ունենալ անկախ՝ հարգելով անձնական կյանքը և խոսքի ազատությունը», - ընդգծել է միլիարդատերը։

Դուրովը նշել է, որ կտակը կազմվել է բոլորովին վերջերս, և, ըստ փաստաթղթի, երեխաները ժառանգությանը հասանելիություն չեն ստանա «մինչև 2025-ից սկսվող 30-ամյա ժամկետի լրանալը». այսինքն՝ միլիարդատիրոջ երեխաները հոր թողած ժառանգությունը կկարողանան ստանալ միայն 30 տարի անց։

Նա իր որոշումը բացատրել է այսպես. ցանկանում է, որ երեխաները «ապրեն ինչպես սովորական մարդիկ», սովորեն վստահել միմյանց և կառուցել իրենց սեփական կյանքը, և որպեսզի նրանք «կարողանան ստեղծել և կախված չլինեն բանկային հաշվից»։

«Ուզում եմ պարզաբանել, որ ես տարբերություն չեմ դնում իմ երեխաների միջև. կան երեխաներ, որոնք բեղմնավորվել են բնական ճանապարհով, և այնպիսիք, որոնք ծնվել են սերմի դոնորության արդյունքում: Բայց նրանք բոլորն իմ երեխաներն են, և բոլորը կունենան նույն իրավունքները։ Ես չեմ ուզում, որ նրանք միմյանց «պատառոտեն» իմ մահից հետո», - ընդգծել է Դուրովը։

Ձեռնարկատիրոջ խոսքով՝ ինքը 3 զուգընկերուհիներից ունի 6 երեխա, իսկ սերմի դոնորության արդյունքում 12 երկրներում ծնվել է ավելի քան 100 երեխա։

Դուրովը նշել է, որ ինքը մնում է Telegram-ի միակ բաժնետերը և ընկերության 100%-ի սեփականատերը։ Նրա խոսքով՝ սա «Telegram-ի լիակատար անկախությունը երաշխավորելու միակ միջոցն է»։

«Ես դաս քաղեցի VKontakte-ի պատմությունից։ Հենց որ կիսում ես վերահսկողությունը գործընկերոջ հետ, կորցնում ես ազատությունը», - բացատրել է նա։

Forbes-ը Դուրովի կարողությունը գնահատում է 17,1 միլիարդ դոլար, նա մոլորակի ամենահարուստ մարդկանց ցանկում 134-րդն է և ռուսաստանցի գործարարների շարքում ութերորդը: 

Իրանի արտաքին գործերի նախարար Աբբաս Արաղչին հայտարարել է, որ Թեհրանը պատրաստ է Իսրայելի հետ հակամարտությունը կարգավորել դիվանագիտական ​​միջոցներով, բայց կշարունակի Իսրայելին հարվածներ հասցնել ինքնապաշտպանության նպատակներով։ Այս մասին նա գրել է X սոցիալական հարթակում:

«Իրանը կշարունակի ինքնապաշտպանության իր իրավունքն իրականացնել հպարտությամբ ու քաջությամբ, և մենք կստիպենք ագրեսորին զղջալ ու վճարել իր լուրջ սխալի համար», – գրել է Արաղչին։Դրա հետ մեկտեղ նա ընդգծել է, որ Թեհրանն առաջվա պես «հավատարիմ է դիվանագիտությանը»՝ հավելելով, որ «ինչպես նախկինում, մենք լուրջ ենք նայում նաև ապագային»։

Արաղչին մեղադրել է Իսրայելի վարչապետ Բենիամին Նեթանյահուին «այս պատերազմը սանձազերծելու մեջ՝ դիվանագիտությունը ոչնչացնելու նպատակով», և աշխարհին նախազգուշացրել է, որ Իսրայելը փորձում է ընդլայնել հակամարտությունը։Նա ընդգծել է, որ մինչ այժմ Իրանը սահմանափակվել է բացառապես Իսրայելին հարվածելով, թեև գիտի այն երկրների մասին, որոնք օգնություն են ցուցաբերում նրան։

Ինչպես հունիսի 19-ին գրել է The Wall Street Journal-ը, վկայակոչելով աղբյուրների, ԱՄՆ նախագահ Դոնալդ Թրամփը հավանություն է տվել Իրանի վրա հարձակման պլանին, բայց դեռ համապատասխան հրաման չի տվել։ The Wall Street Journal-ի տվյալներով՝ Թրամփը քննարկում է Իրանի միջուկային խնդրի լուծման զանազան տարբերակներ, այդ թվում՝ ուժի կիրառումը։

Ռուսաստանը պատրաստ է ապահովել Իրանի շահերը խաղաղ ատոմի բնագավառում՝ ընդ որում, վերացնելով անվտանգության առումով Իսրայելի մտահոգությունները: Ինչպես տեղեկանում ենք ՏԱՍՍ գործակալությունից, այդ մասին հայտարարել է Ռուսաստանի նախագահ Վլադիմիր Պուտինն աշխարհի առաջատար լրատվական գործակալությունների ղեկավարների հետ հանդիպմանը:

«Ընդհանրապես, ինձ թվում է, որ նկատի առնելով խաղաղ ատոմի օգտագործումը, զարգացումը շարունակելու Իրանի ծրագրերը՝ նկատի է առնվում է նաև դրա կիրառումը գյուղատնտեսության, բժշկության և այլ բնագավառներում, բայց  դա ատոմային էներգետիկա չէ, և մենք կարող ենք Իրանի հետ աշխատել ատոմային էներգետիկայի բնագավառում: Ինչո՞ւ եմ ես այդպես կարծում: Որովհետև վստահության մակարդակը բավականին բարձր է մեր երկրների միջև: Մենք շատ լավ հարաբերություններ ունենք Իրանի հետ: Մենք կարող ենք  շարունակել այդ աշխատանքը և ապահովել նրանց շահերն այդ ոլորտում», – ասել է նա:

«Ես այժմ չեմ մտնի մանրամասնությունների մեջ։ Դրանք շատ են։ Եվ այդ բոլոր մանրամասնությունները մենք քննարկել ենք ինչպես  իսրայելական, այնպես էլ ամերիկյան կողմի հետ։ Այդպես մենք նաև որոշակի ազդանշաններ ենք ուղարկել մեր իրանցի բարեկամերին։ Եվ ընդհանրապես հնարավոր է ապահովել Իրանի շահերը խաղաղ ատոմային էներգետիկիայի բնագավառում և միևնույն ժամանակ  վերացնել Իսրայելի մտահոգություններն իր անվտանգության վերաբերյալ», – հավելել է Պուտինը։ 

Նախագահի խոսքով՝ ինքն առաջարկել է իրանական հարցի շուրջ «իրադրությունից հնարավոր ելք», բայց որոշումն Իրանի և Իսրայելի քաղաքական ղեկավարությանն է։ «Նման տարբերակներ, իմ կարծիքով, կան։ Մենք դրանք շարադրել ենք, կրկնում եմ, մեր բոլոր գործընկերներին՝ թե՛ Միացյալ Նահանգներին, թե՛ Իսրայելին և թե՛ Իրանին հայտնել ենք։ Մենք ոչ մեկին ոչինչ չենք պարտադրում։ Մենք պարզապես խոսում ենք այն մասին, թե ինչպես ենք տեսնում իրավիճակից դուրս գալու հնարավոր ելքը։ Բայց որոշումն, իհարկե, կախված է այդ բոլոր երկրների, առաջին հերթին՝ Իրանի և Իսրայելի քաղաքական ղեկավարությունից», – նշել է Ռուսաստանի ղեկավարը։  

Բացի այդ, Պուտինը հիշեցրել է, որ Ռուսաստանը ժամանակին Իրանում ավարտել է Բուշերի ԱԷԿ-ի կառուցումը, որի նախագիծն սկզբնապես իրականացվել է գերմանական ընկերությունների կողմից։

«Մենք պայմանագիր ենք կնքել ևս երկու բլոկի կառուցման համար։ Աշխատանքներն ընթանում են, և մեր մասնագետներն այնտեղ են։ Ավելի քան երկու հարյուր մարդ։ Եվ մենք համաձայնության ենք եկել Իսրայելի ղեկավարության հետ, որ կապահովվի անվտանգությունը», – վստահեցրել է Ռուսաստանի նախագահը:

Լիբանանյան «Հեզբոլլահ» շարժումը նախազգուշացրել է, որ Իրանի գերագույն առաջնորդի սպանությունը կունենա «աղետալի հետևանքներ»։ Ինչպես գրում է Times of Israel-ը, տարածված հայտարարության մեջ «Հեզբոլլահ»-ն աջակցություն է հայտնել Իրանի գերագույն առաջնորդ այաթոլլահ Ալի Խամենեիին՝ ի պատասխան Իսրայելի և ԱՄՆ առաջնորդների կողմից հնչեցված սպառնալիքների, որ նա կարող է սպանվել։

«(Խամենեիի) Սպանության սպառնալիքները հիմարություն են և անխոհեմ, և կունենան աղետալի հետևանքներ… Դրանք արդեն իսկ արտաբերելը վիրավորանք է հարյուր միլիոնավոր հավատացյալների և իսլամի հետ կապվածների համար, և դա միանգամայն դատապարտելի է: Այսօր մենք ավելի վճռական ենք և միավորված նրա շուրջ», - ասվում է հայտարարության մեջ:

Հիշեցնենք, որ Ռուսաստանի  Դաշնության նախագահ Վլադիմիր Պուտինը հայտարարել է, որ նույնիսկ չի ցանկանում քննարկել Իսրայելի կողմից Իրանի գերագույն առաջնորդ այաթոլլա Ալի Խամենեիին սպանելու հնարավորությունը։ 

«Եթե թույլ կտաք, հուսով եմ, որ սա կլինի Ձեր հարցի ամենաճիշտ պատասխանը. «Ես նույնիսկ չեմ ուզում քննարկել նման հնարավորությունը»», - ասել է նա՝ պատասխանելով այն հարցին, թե ինչպիսին կլինի Ռուսաստանի արձագանքը, եթե Իսրայելը սպանի այաթոլլահին։

AFP Europe-ի խմբագիր Քարիմ Թալբին նշել է, որ նման հնարավորությունը «արդեն բացահայտորեն քննարկվում է» ԱՄՆ նախագահ Դոնալդ Թրամփի և Իսրայելի վարչապետ Բենիամին Նեթանյահուի կողմից։

«Ես լսել եմ այս ամենը, բայց նույնիսկ չեմ ուզում քննարկել դա», - պատասխանել է Պուտինը։

Իսրայելը հունիսի 13-ի գիշերը ռազմական գործողություն է սկսել Իրանի դեմ։ Մեկ օր անց Իսլամական Հանրապետությունը պատասխան հարձակում է իրականացրել։ Հաջորդ օրերին երկրները կրկին փոխանակվել են հարվածներով։ Երկու կողմերն էլ հայտնել են այդ հարձակումների հետևանքով զոհերի և վիրավորների մասին։ Փոխադարձ հարվածները շարունակվում են։

Ուկրաինան պետք է հասկանա, որ իրավիճակը փոխվել է հատուկ ռազմական գործողության մեկնարկից հետո և ընդունել ներկա իրողությունները։ Այս մասին ասել է ՌԴ նախագահի մամուլի քարտուղար Դմիտրի Պեսկովը SPIEF-2025-ի շրջանակում, փոխանցում է РИА Новости-ն։

«Ուկրաինան, անշուշտ, պետք է հասկանա, որ իրավիճակը փոխվել է երեք տարի առաջվա համեմատությամբ: Ուկրաինան պետք է հասկանա իրողությունները և ընդունի դրանք»,- ասել է Կրեմլի ներկայացուցիչը:

Իրանի Բուշերի ատոմակայանի վրա հարվածը կարող է հանգեցնել Չեռնոբիլի նման աղետի, ասել է «Ռոսատոմ»-ի գլխավոր տնօրեն Լիխաչևը։

Նա ընդգծել է, որ որոշ ռուս մասնագետներ արդեն տարհանվել են ատոմակայանից, մինչդեռ պետական ​​կորպորացիան հնարավոր է համարում որոշներին լքել։

«Ռոսատոմ»-ը կոչ է անում Իսրայելի իշխանություններին, որ Բուշերին հարվածելու մասին նույնիսկ ակնարկ չպետք է լինի, հավելել է Լիխաչևը։

Ռուսաստանի քաղաքացիները կարող են ցամաքային ճանապարհով Իրանից դուրս գալ Հայաստանի տարածքով: Տեղեկացրել է Երևանում ՌԴ դեսպանատունը, գրում է ՏԱՍՍ-ը: 

«Հայտնում ենք իրանա-հայկական սահմանի «Նորդուզ» կամ «Ագարակ» սահմանային անցումով ցամաքային ճանապարհով Իրանից Հայաստան Ռուսաստանի քաղաքացիների մեկնելու լրացուցիչ տարբերակների մասին», - ասված է հաղորդագրության մեջ:

Դեսպանատանը հավելել են, որ Իրանի և Հայաստանի միջև սահմանը Ռուսաստանի քաղաքացիների համար բաց է, անցումն ազատ է վավեր արտասահմանյան կամ ներքին անձնագրերով, նախնական ծանուցումներ չեն պահանջվում: