2025 թվականի հունիսի 24-ին` առավոտյան ժամը 9։00-ից, մեկնարկում է ՀՀ պետական դպրոցներ առաջին դասարանցիների հայտագրման հիմնական փուլը՝ hayt.emis.am կայքի միջոցով։ Այս մասին հայտնում են ԿԳՄՍՆ-ից:
«Խնդրում ենք լինել ուշադիր, քանի որ haytru.emis.am կայքը, որը նախատեսված է ռուսերենով ուսուցման դասարաններում հայտագրման համար, այս փուլում չի գործելու։
Այս փուլում հայտագրվող երեխաների միջին թիվը 15000 է, սակայն նախորդ տարիների փորձը ցույց է տալիս, որ համակարգի գործարկման առաջին վայրկյաններին միաժամանակյա հարցումների թիվը գերազանցում է 45000-ը, ինչը նշանակում է, որ միևնույն երեխային տարբեր սարքերից փորձում են հայտագրել: Դրա արդյունքում համակարգն ունենում է մեծ ծանրաբեռնվածություն, և դժվարանում է երեխային նախընտրած հաստատությունում հայտագրելու գործընթացը:
Նույնիսկ չեմ ցանկանում քննարկել դա. Պուտինը՝ Խամենեիին սպանելու հավանականության մասին
Հունիսի 19, 2025Ռուսաստանի Դաշնության նախագահ Վլադիմիր Պուտինը հայտարարել է, որ նույնիսկ չի ցանկանում քննարկել Իսրայելի կողմից Իրանի գերագույն առաջնորդ այաթոլլա Ալի Խամենեիին սպանելու հնարավորությունը։
«Եթե թույլ կտաք, հուսով եմ, որ սա կլինի Ձեր հարցի ամենաճիշտ պատասխանը. «Ես նույնիսկ չեմ ուզում քննարկել նման հնարավորությունը»», - ասել է նա՝ պատասխանելով այն հարցին, թե ինչպիսին կլինի Ռուսաստանի արձագանքը, եթե Իսրայելը սպանի այաթոլլահին։
AFP Europe-ի խմբագիր Քարիմ Թալբին նշել է, որ նման հնարավորությունը «արդեն բացահայտորեն քննարկվում է» ԱՄՆ նախագահ Դոնալդ Թրամփի և Իսրայելի վարչապետ Բենիամին Նեթանյահուի կողմից։
«Ես լսել եմ այս ամենը, բայց նույնիսկ չեմ ուզում քննարկել դա», - պատասխանել է Պուտինը։
Իսրայելը հունիսի 13-ի գիշերը ռազմական գործողություն սկսեց Իրանի դեմ։ Մեկ օր անց Իսլամական Հանրապետությունը պատասխան հարձակում իրականացրեց։ Հաջորդ օրերին երկրները կրկին փոխանակվեցին հարվածներով։ Երկու կողմերն էլ հայտնեցին այդ հարձակումների հետևանքով զոհերի և վիրավորների մասին և խոստովանեցին մի շարք թիրախների հարվածները։ Փոխադարձ հարվածները շարունակվում են։
Վերսկսվել է հայկական կոնյակով բեռնված բեռնատարների բացթողումը մաքսային պահեստներից․ ՊԵԿ
Հունիսի 19, 2025Պետական եկամուտների կոմիտեն տեղեկացնում է, որ վերջին օրերին Վրաստանի մաքսային մարմիններում կուտակումներով պայմանավորված՝ հայկական բեռնատարների հայ-վրացական սահմանով հատումը ժամանակավորապես դադարեցնելու հետ կապված խնդիրը կարգավորվել է։ Խոսքը, մասնավորապես, վերաբերում էր հայկական շշալցված կոնյակով բեռնված բեռնատարների կուտակմանը։
ՊԵԿ-ը հայտնում է, որ Վրաստանի մաքսային մարմինների թողունակության կարգավորման արդյունքում, հունիսի 18-ից կազմակերպվել է հայկական շշալցված կոնյակով բեռնված բեռնատարների բացթողումը ՀՀ-ի մաքսային պահեստներից ու հունիսի 19-ի դրությամբ արդեն իսկ 33 բեռնատար բաց է թողնվել։
Դուք բանակից մի խոսեք. ո՞ւր է այդ «հայր մերը» չիմացող մարդը, որ մեծ-մեծ փրթում է, գիտի, թե իր փողերն իրեն փրկելո՞ւ են. Ալեն Սիմոնյան (տեսանյութ)
Հունիսի 19, 2025ՀՀ-ում որևէ մեկը եկեղեցու հետ, հավտքի հետ ոչ մի խնդիր չունի և այս խոսակցությունը վերաբերում է ամենակարևոր բանի առողջացմանը, որի մասին տասնամյակներով խոսել են: Այս մասին Աժ-ում արտահերթ ելույթի ժամանակ հայտարարեց ԱԺ նախագահ Ալեն Սիմոնյանը:
Սիմոնյանը նշեց, որ հավասարության նշան դնել Եկեղեցու ու Կտրիճ Ներսիսյանի կամ քեռակնոջ միջև, դրանք անարդար բաներ են: «Եկեղեցում կան շատ պարկեշտ մարդիկ, բայց նրանք գերու կարգավիճակում են: Եկեղեցու դեմ ոչ ոք չի պայքարում, Հայ Առաքելական Սուրբ Եկեղեցին մեր բոլորի Եկեղեցին է և դրա մեջ կասկած չկա, բայց այն մարդիկ, որոնք արատավորում են, պետք է հեռանան, ու ես վստահ եմ, որ հեռանալու են»,- նշեց նա:
Սիմոնյանը նշեց, որ Եկեղեցու վերաբերյալ խոսակցության մեջ հետաքրքիրն այն է, որ եկեղեցու կողքը կանգնած մարդիկ հիմնականում կաթոլիկ են և կաթոլիկ եկեղեցու ներկայացուցիչներ են: «Բայց միևնույն ժամանակ այդ նույն անձնավորությունները, որոնք խոսում էին խմբակներից, հոխորտում էին ՀՀ հասցեին: Պատկերացրեք, որ այն երկրում որ իրենք փող են աշխատում և բնակվում են, օրինակ, ՌԴ-ում կես բերան ասեին՝ այն խմբակը որ այսօր ղեկավարում է, Ռ տառն ասեին, ի՞նչ կլիներ իրենց հետ, քանի՞ վայրկյան կտևեր, բայց Հայաստանում կարելի է ասել չէ՞, հետո կգան, կհավաքվեն դատարանի մոտ և այլն, և այլն»,- ասաց նա:
Այնուհետև Սիմոնյանը հիշեց իր ծառայության տարիները: «2000-2002 թթ-երին ես ծառայել եմ ՀՀ բանակում, այն ժամանակ Ռոբերտ Քոչարյանը նախագահն էր, Սերժ Սարգսյանը պաշտպանության նախարարն էր, Սեյրան Օհանյանն առաջին բանակային կորպուսի հրամանատարն էր: Այսինքն, մի հատ ընդհանուր լավ բուկետ էր»,- ասաց նա:
Սիմոնյանը նշեց, որ ժամերով կարող է պատմել, թե ինչ էր կատարվում մեր բանակում: «Դուք բանակից մի՛ խոսեք: Մի սրիկա ոչնչություն կար, որ կանգնում էր ճաշարանի դռան առջև և ռետինե մահակով 18 տարեկան երեխաներին, որոնք մտնում էին հաց ուտելու, հարվածում էր, ուղղակի հարվածում էր: Ո՞ւր են այդ դոլարավոր միլիոնատերները, թող գան ինձ պատասխան տան, ինչի՞ էր մեր ուտելիքի ամանի մեջ լցրած եռացրած ջուր, կտրատած կաղամբ, կարտոֆիլ ու կիլկի: Եռացնում էին ու տալիս երեխեքին: Հաց տալիս էին 7-10 օրը մեկ, թրջած կտորով: Ո՞ւր են սրանք, ո՞ւր է այդ «հայր մերը» չիմացող մարդը, որ մեծ-մեծ փրթում է, գիտի, թե իր փողերն իրեն փրկելո՞ւ են»,- ասաց նա:
Անդրադառնալով Քրիստինե Վարդանյանի ելույթին՝ ասաց. «Ո՞ր մեկիդ ենք տեղավորել բանտում, որ քաղաքական տեղավորելու լիներ, բանտերում տեղ չէր լինի, հերթով բոլորիդ կտեղավորեինք բանտերում՝ մարդկանց խաբելու, ստելու ու ուրիշների համար աշխատելու համար: Վերջում՝ Լևոն Քոչարյանին ու Իշխան Սաղաթելյանին ասեք՝ թող գան այս դահլիճ, իրենց ոչինչ չի լինի, ի վերջո, կանացով կպաշտպանեք, թող վերադառնան ամոթ է, նիստերն ավարտվում են»:
Իսրայելի պաշտպանության բանակը հարվածներ է հասցրել Իրանի երեք քաղաքներում գտնվող միջուկային օբյեկտներին, հաղորդել են տեղական լրատվամիջոցները և իսրայելական բանակը։ Այս մասին գրում է ՌԻԱ «Նովոստի»-ն:
Առաջին հարվածը հասցվել է երկրի կենտրոնական մասում գտնվող Արաք քաղաքի թիրախներին։ Այնտեղ կա միջուկային համալիր, այդ թվում՝ ծանր ջրի գործարան։ Իսրայելը պնդում է, որ հարձակվել է չգործող միջուկային ռեակտորի վրա։
«Իսրայելի ռազմաօդային ուժերը այսօր առավոտյան ռմբակոծել են «Արաք» ծանր ջրի ռեակտորը, այդ թվում՝ ռեակտորի պաշտպանիչ կառուցվածքը, որը պլուտոնիումի արտադրության հիմնական բաղադրիչն է», - ասվում է Իսրայելի Պաշտպանության բանակի հայտարարության մեջ:
Հարձակման է ենթարկվել նաև Խոնդաբայի ծանր ջրի ռեակտորի տարածքը։ IRIB-ի տվյալներով՝ դրա վրա ընկել է երկու հրթիռ, ևս մի քանիսը խփվել են ՀՕՊ համակարգերի կողմից։ Կառույցը նախապես տարհանվել է, արտահոսքի սպառնալիք չկա։
Ավելի վաղ Իսրայելի պաշտպանության բանակը նաև հայտարարել էր, որ հարված է հասցրել Նաթանզի օբյեկտին, որտեղ ենթադրաբար միջուկային զենք է մշակվել։ Իրանի Ատոմային էներգիայի կազմակերպությունը հաստատել է հարվածների մասին լուրերը և տեղեկացրել Ատոմային էներգիայի միջազգային գործակալությանը։
Գործարար Սամվել Կարապետյանին տարել են Արմավիրի քրեակատարողական հիմնարկ, հայտնում են «Sputnik Արմենիա»-ի իրավապահ մարմինների աղբյուրները։
Հիշեցնենք՝ երեկ դատարանը 2 ամսով կալանավորեց «Տաշիր» ընկերությունների խմբի ղեկավարին՝ իշխանությունը զավթելու հրապարակային կոչ անելու մեղադրանքով։
Համեմատաբար վերջերս կառուցված բանտում պահում են և՛ բանտարկյալներին, և՛ դատապարտյալներին։
Անհետ կորած զինծառայողների հարազատները շարունակում են փակ պահել Բաղրամյան պողոտան, նրանք գիշերել են այնտեղ՝ պահանջելով չեղարկել ԱԱԾ տնօրեն Արմեն Աբազյանի պաշտոնանկության որոշումը:
Այժմ նրանք պահանջում են նաև, որ իրենց հետ հանդիպի ԱԱԾ տնօրենի ժամանակավոր պաշտոնակատար Անդրանիկ Սիմոնյանը:
Իրենց պահանջը փոխանցել են նաև ոստիկանության պետի տեղակալին Վարդան Վարդանյանին, որը եկել էր հանդիպելու նրանց հետ:
Արցախցիները բողոքի ակցիա են կազմակերպել Կառավարության շենքի դիմաց։ Կազմակերպիչներից Անաստաս Իսրայելյանը հայտնել էր պատաճառը՝ գրելով․ «Ինչպես գիտեք, կառավարությունը ամիսներ առաջ խոստացավ բարեփոխումներ անել բնակապահովման ծրագրում։
Սակայն մինչ այսօր արված փոփոխությունները չնչին են։ Այդ ամենին զուգահեռ դադարեցվել է նաև բնակվարձի փոխհատուցման ծրագիրը, ինչի հետևանքով շատերը կրկին կանգնել են փողոցում հայտնվելու վտանգի առաջ։
Սա ուղիղ ճանապարհ է դեպի նոր արտագաղթ։ Իսկ եթե սկսվի այդ գործընթացը, ապա կդադարի նաև մեր հավաքական հետ վերադարձի և մնացած բոլոր հիմնարար իրավունքների պահանջը։
Մենք այլևս ժամանակ ու հավատք չունենք նոր խոստումների կամ երկարաձգվող բանակցությունների համար։ Պետք է վճռական պահանջ ներկայացնենք իշխանություններին՝ շարունակել բնակվարձի փոխհատուցումը այնքան ժամանակ, քանի դեռ բնակապահովման համակարգում իրական, էական փոփոխություններ չեն արվել»։
Հետևելով այս կոչին արցախցիները հավաքվել են՝ բարձրացնելու իրենց ահանջը։
Կասեցվել է «Պիցցա Տաշիր» ՍՊԸ-ին պատկանող հանրային սննդի ևս 4 կետ։ Տեղեկությունը հայտնում է Սննդամթերքի անվտանգության տեսչական մարմինը։
Ավելի վաղ հայտնել էինք, որ տեսչական մարմինը վերահսկողություն է իրականացնում «Պիցցա Տաշիր» ՍՊԸ-ին պատկանող բոլոր 30 հանրային սննդի կետերում:
Ըստ ՍԱՏՄ հաղորդագրության` կասեցվել են «Պիցցա Տաշիր» ՍՊԸ-ի Վանաձոր քաղաքի Տիգրան Մեծի 44/6 հասցեում գործող մասնաճյուղի, Երևանի Էրեբունի 14 հասցեում գործող մասնաճյուղի, Երևանի Հյուսիսային պողոտա 18/77 հասցեում գործող մասնաճյուղի և Երևանի Հանրապետության 37 հասցեում գործող մասնաճյուղի արտադրական գործունեությունը։
Տեսչական մարմնի հաղորդագրության համաձայն արձանագրվել են սահմանված սանիտարահիգիենիկ նորմերի անհամապատասխանություններ:
✔️Հանրային սննդի կետի պատերը չեն ունեցել հարթ մակերես, պատրաստված չեն եղել անջրանցիկ, չներծծող, լվացվող, ախտահանվող և ոչ թունավոր նյութերից,
✔️ Առաստաղները կառուցված չեն եղել այնպես, որ կանխարգելվի կամ նվազեցվի կեղտի կուտակումը, գոլորշու խտացումը և մասնիկների թափվելու հնարավորությունը,
✔️ Սննդամթերքի հետ անմիջական շփման մեջ գտնվող աշխատանքային մակերևույթների մի մասը եղել է ոչ նորոգ, պատրաստված չի եղել հարթ, մաքրվող, կոռոզիայի չենթարկվող, ախտահանվող նյութերից։
Մասնաճյուղերի արտադրական գործունեությունը կասեցվել է, սահմանվել է ժամկետ խախտումները վերացնելու համար:
Հիշեցնենք, որ երեկ ևս ՍԱՏՄ կասեցրել է «Պիցցա Տաշիր» ՍՊԸ-ին պատկանող հանրային սննդի 2 կետի և «Տաշիր կաթ» ընկերության արտադրամասը գործունեությունը։
Հիշեցնենք` «Հայաստանի էլեկտրական ցանցեր» ՓԲԸ-ի սեփականատեր, հայտնի գործարար Սամվել Կարապետյանի տանը հունիսի 17-ին խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա:
Կարապետյանի հայտարարությունից հետո ՀՀ վարչապետ Նիկոլ Փաշինյանը Սամվել Կարապետյանին ուղղված վիրավորական և սպառնալի գրառումներ արեց սոցցանցերում։
Երեկ կեսգիշերին Սամվել Կարապետյանին 2 ամսով կալանավորվեցին։
Ռուսաստանի և Իրանի միջև ռազմատեխնիկական համագործակցությունը միշտ եղել է միջազգային չափորոշիչների շրջանակներում։ Այս մասին ՌԴ նախագահ Վլադիմիր Պուտինն ասել է Սանկտ Պետերբուրգի միջազգային տնտեսական ֆորումի շրջանակներում միջազգային լրատվական գործակալությունների ղեկավարների հետ հանդիպման ժամանակ։
«Ինչ վերաբերում է առանձին մատակարարումներին, այո՛, իհարկե, մենք այդ մատակարարումները ժամանակին իրականացրել ենք։ Դա այսօրվա ճգնաժամի հետ որևէ կապ չունի։ Դրանք ռազմատեխնիկական համագործակցության շրջանակում կանոնավոր մատակարարումներ էին։ Իրանը մեզանից երբևէ չի պահանջել այնպիսի բան, որը կխախտեր Ռուսաստանի Դաշնության կողմից ստորագրված հայտնի նորմերը։ Մենք միշտ մնացել ենք միջազգային կարգավորման շրջանակներում», - ասել է ՌԴ առաջնորդը։
Հիշեցնենք` հունիսի 13-ին Իսրայելը լայնածավալ գործողություն է սկսել Իրանի դեմ՝ այդ երկրին մեղադրելով գաղտնի ռազմամիջուկային ծրագիր իրականացնելու մեջ, որն իբր մոտեցել է անդառնալիության կետին: Օդային ռմբակոծությունների և դիվերսիոն խմբերի թիրախներ են դարձել միջուկային օբյեկտները, զինված ուժերի հրամկազմը, միջուկային ֆիզիկոսները, ավիաբազաները, հակաօդային պաշտպանության միջոցները, «երկիր-երկիր» դասի հրթիռները:
Իրանը, որը հերքում է իր միջուկային ծրագրի ռազմական բաղադրիչը, պատասխանում է հրթիռային համազարկերով և հարվածային անօդաչու թռչող սարքերի արձակմամբ: Թեհրանում հարվածների թիրախ են նշում Իսրայելի ռազմական և ռազմարդյունաբերական օբյեկտները։ Երկու կողմից էլ աճում է բնակելի շինություններին ուղղված հարվածների և քաղաքացիական բնակչության շրջանում զոհերի թիվը։
Ֆոտո
