Թրամփը ռազմավարական հարված է հասցրել Իրանի կառավարությանը՝ Հայաստանի և Ադրբեջանի հետ համաձայնագրեր կնքելով, գրում է Fox News-ը։

«Այս ամսվա սկզբին Հայաստանի և Ադրբեջանի միջև ստորագրված համաձայնագիրն ԱՄՆ-ին տրամադրում է Զանգեզուրի միջանցքի՝ նեղ ցամաքային գոտու 99-ամյա վարձակալությունը, որը կդառնա դեպի Եվրոպա կարևորագույն առևտրային և էներգետիկ ուղի:

Այս միջանցքը երկար ժամանակ եղել է Լեռնային Ղարաբաղի հակամարտության կենտրոնում, որը հանգեցրել է տասնյակ հազարավոր մարդկանց տեղահանմանը և երեք տասնամյակ անկայունության պատճառ է դարձել։ Թրամփի միջամտությունը երկու կողմերին բանակցային սեղանի շուրջ է նստեցրել և դիտորդների խոսքով, ստեղծել է նոր կենսական առևտրային և անվտանգության միջանցք, որը Կասպից ծովը կապում է Եվրոպայի հետ՝ ամբողջությամբ շրջանցելով Իրանը։

TRIPP անունով հայտնի համաձայնագիրը, տնտեսական առումով, Վաշինգտոնին անմիջական վերահսկողություն է տրամադրում Կասպից ծովի ածխաջրածինների դեպի Եվրոպա հասցնելու հարցում։ ԱՄՆ-ն կկառավարի այս միջանցքով անցնող երկաթուղային և ավտոմոբիլային ենթակառուցվածքները, հեռահաղորդակցության ցանցերը և էներգետիկ խողովակաշարերը, ինչը ամերիկյան ընկերություններին գերիշխող դիրք կտա տարածաշրջանային նավթի, գազի և ապրանքների տարանցման ոլորտում։ Վերահսկելով այս տրանսպորտային զարկերակը՝ ԱՄՆ-ը ոչ միայն միլիարդավոր դոլարներ կստեղծի ապագայում առևտրի և ներդրումների ոլորտում, այլև Եվրոպային կտրամադրի մատակարարման այլընտրանքային ուղիներ, որոնք կնվազեցնեն կախվածությունը ինչպես Ռուսաստանից, այնպես էլ Իրանից։

Դաշնակիցների համար միջանցքը ապահովում է Կասպից ծովի էներգիային ավելի էժան և անվտանգ հասանելիություն: Թեհրանի համար դա նշանակում է եկամուտների կորուստ, ազդեցության կորուստ, ինչպես նաև Արևելքի և Արևմուտքի միջև առևտրի անփոխարինելի միջնորդի դերում հանդես գալու իր կարողության ավարտ: Համաձայնագիրը կնքվել է ՆԱՏՕ-ի աջակցությամբ, և որոշ դիտորդներ այն արդեն անվանում են պատմական խաղաղության համաձայնագիր», - գրում է Fox News-ը: