Երևանում 10 տղամարդկանց են ձերբակալել, որոնց մոտ հրազեն, սառը զենք և թմրանյութ է հայտնաբերվել։ Այս մասին հայտնում է ՆԳՆ ոստիկանությունը։

Ոստիկանները հոկտեմբերի 3–ին`ժամը 18–ին, նրանց հայտնաբերել են Գարեգին Նժդեհի և Մայիսի 9-ի փողոցների խաչմերուկում։

«Մի քանիսը փորձեցին դիմել փախուստի, ինչը կանխվեց: 10 անձ ձերբակալվեց և «Մերսեդես», «ԲՄՎ» ու 2 «Պոռշ» մակնիշի ավտոմեքենաներով հանդերձ տեղափոխվեց Քրեական ոստիկանության գլխավոր վարչություն։ Ձերբակալվածներից մեկի` 36-ամյա տղամարդու խուզարկությամբ հայտնաբերվեց յոթ փամփուշտով լիցքավորված մարտական ատրճանակ, մեկ այլ 36-ամյա տղամարդու մոտ կար գաղտնի փականով դանակ, նման մի դանակ և կոկաինով երկու փաթեթ էլ հայտնաբերվեց 41-ամյա տղամարդու խուզարկությամբ»,– ասված է հաղորդագրությունում։

Նախաձեռնվել է քրեական վարույթ: 41-ամյա տղամարդու նկատմամբ խափանման միջոց է ընտրվել կալանքը, նա տեղափոխվել է քրեակատարողական հիմնարկ: