2025 թվականի առաջին կիսամյակում Ռուսաստանի Դաշնությունից հարկադիր արտաքսվել է 26.000 միգրանտ: Այդ մասին ՏԱՍՍ-ին հայտնել են Ռուսաստանի Դատական պրիստավների դաշնային ծառայությունում, որտեղ ամփոփել են տարվա առաջին կիսամյակի  աշխատանքի արդյունքները:

«Ռուսաստանի Դաշնության սահմաններից արտաքսվել է 26.000 օտարերկրյա քաղաքացի և քաղաքացիություն չունեցող անձ, որոնք խախտել են միգրացիոն օրենսդրությունը», – նշել են ծառայությունում:

Ամբողջ 2024 թվականի ընթացքում ավելի քան 87.000 օտարերկրյա քաղաքացի և քաղաքացիություն չունեցող անձ է արտաքսվել 66 օտարերկրյա պետություն, իսկ 2023 թվականին արտաքսվել է 44.000 օտարերկրացի:

Իրանի Իսլամական հեղափոխության պահապանների կորպուսի մամուլի խոսնակ, բրիգադի գեներալ Ալի Մոհամմադ Նայեինին արձագանքել է իսրայելցի պաշտոնյաների սպառնալիքներին՝ զգուշացնելով, որ ագրեսիայի վերսկսման դեպքում Թեհրանի պատասխան գործողությունների աշխարհագրությունը և ռազմադաշտը կարող են փոխվել, հաղորդում է Mehr-ը:

«Իրանի արձագանքը կլինի ավելի կործանարար, քան ավելի վաղ նկատվել է... Մեզ համար պարզ է, որ սիոնիստական ռեժիմի առաջնորդների վերջին հայտարարությունները պայմանավորված են Իրանի ազգային համերաշխության և երկրի հրթիռային հզորության նկատմամբ նրանց վախով», - հայտարարել է Իսլամական հեղափոխության պահապանների կորպուսի (ԻՀՊԿ) խոսնակ բրիգադի գեներալ Ալի Մոհամմադ Նայեինին։

Նա մեկնաբանել է վերջին 12-օրյա պատերազմը՝ ընդգծելով, որ «Իրանի պատասխան գործողություններն այս պատերազմում խաթարել են կյանքը փոքր օկուպացված տարածքում: Սիոնիստական ռեժիմի օրերը հաշված էին»: Նա ընդգծել է, որ «թշնամին պետք է իմանա, որ եթե կրկին Իրանի անվտանգության դեմ որևէ այլ ագրեսիա իրականացնի, օկուպացված տարածքներում կդադարի շնչել»։ 

ԻՀՊԿ խոսնակը հավելել է, որ «ռեժիմը, որն Իրանի ջախջախիչ հրթիռային հարվածների առջև լիակատար հուսահատության մեջ փորձեց դադարեցնել հակամարտությունը բազմաթիվ միջնորդների միջոցով, այժմ ճամարտակում է և սպառնում նոր ագրեսիայով»։

«Եթե սիոնիստական ռեժիմը նոր հարձակում սկսի հզոր Իրանի վրա, մենք ստիպված կլինենք որոշել, թե ինչպես վերջ դնել նոր հակամարտությանը։ Մենք թույլ չենք տա, որ օկուպացված տարածքներում ազդանշանները դադարեն, և թշնամուն հնարավորություն տրվի լքել ապաստարանը: Նրանք ավելի շատ փախուստների և տեղահանությունների կբախվեն, քան ամբողջ 12-օրյա պատերազմի ընթացքում», - ընդգծել է գեներալ Նայեինին։

ԱՄՆ հատուկ բանագնաց Սթիվ Ուիթքոֆը, ինչպես սպասվում է, այսօր կայցելի Իսրայել՝ Գազայի հատվածում մարդասիրական ճգնաժամի լուծմանը նպաստելու համար, NBC News-ին հայտնել է ծրագրին ծանոթ աղբյուրը, ինչպես նաև Սպիտակ տան բարձրաստիճան պաշտոնյան։

Ուիթքոֆը վերահսկում էր Գազայի հակամարտության շուրջ բանակցությունները։

Անցյալ շաբաթ նա առաջընթացի բացակայության պատճառով դադարեցրեց բանակցություններնուև իր բանակցային թիմին Դոհայից ԱՄՆ վերադարձրեց։

Ուիթքոֆի առաջիկա այցն Իսրայել տեղի է ունենում Գազային ուղղված մարդասիրական օգնությունը մեծացնելու կոչերի և ճգնաժամի սրման հետնապատկերում։

Առնվազն 17 երկիր, Եվրամիությունը և Արաբական պետությունների լիգան ընդունել են Սաուդյան Արաբիայի և Ֆրանսիայի կողմից նախաձեռնված Պաղեստինի հարցի կարգավորման վերաբերյալ ՄԱԿ-ի համաժողովի եզրափակիչ փաստաթուղթը, հայտարարել է Սաուդյան Արաբիայի արտաքին գործերի նախարարության ղեկավար, արքայազն Ֆեյսալ բին Ֆարխան ալ Սաուդը։

«Սաուդյան Արաբիայի Թագավորության, Ֆրանսիայի Հանրապետության և Պաղեստինի հարցի կարգավորման և երկու պետությունների լուծման իրականացման վերաբերյալ միջազգային համաժողովի աշխատանքային խմբերին մասնակցող հիմնական պետությունների՝ Բրազիլիայի Դաշնային Հանրապետության, Կանադայի, Եգիպտոսի Արաբական Հանրապետության, Ինդոնեզիայի Հանրապետության, Իռլանդիայի, Իտալիայի Հանրապետության, Ճապոնիայի, Հորդանանի Հաշիմյան Թագավորության, Մեքսիկայի Միացյալ Նահանգների, Նորվեգիայի Թագավորության, Կատարի Պետության, Սենեգալի Հանրապետության, Իսպանիայի Թագավորության, Թուրքիայի Հանրապետության, Մեծ Բրիտանիայի և Հյուսիսային Իռլանդիայի Միացյալ Թագավորության, ինչպես նաև Եվրամիության և Արաբական պետությունների լիգայի անունից ուրախ եմ հայտարարել համաժողովի եզրափակիչ փաստաթղթի ընդունման մասին», – ասել է նախարարը։

Արքայազնի խոսքով, փաստաթուղթը պարունակում է Պաղեստինի հարցի լուծման համապարփակ առաջարկներ՝ մի շարք քաղաքական, տնտեսական, մարդասիրական և իրավական միջոցառումների իրականացման միջոցով։ Սաուդյան Արաբիայի արտաքին գործերի նախարարության ղեկավարը կոչ է արել մյուս երկրներին աջակցել այս փաստաթղթին մինչև ՄԱԿ-ի Գլխավոր ասամբլեայի 79-րդ նստաշրջանի ավարտը։

ՀՀ ԱԳ նախարարի տեղակալ Վահան Կոստանյանը մասնակցել և ելույթով է հանդես եկել Ֆրանսիայի և Սաուդյան Արաբիայի համանախագահությամբ ՄԱԿ-ի կենտրոնակայանում կազմակերպված Պաղեստինի հարցի խաղաղ կարգավորման և երկու պետություն սկզբունքի իրագործման հարցով միջազգային բարձրաստիճան համաժողովին:

ՀՀ ԱԳ նախարարի տեղակալն իր ելույթում նշել է.

«…Հայաստանը համոզված է, որ միայն երկու անկախ հարևան պետությունների գոյությունն է, որ կարող է երաշխավորել երկարատև կայունություն, անվտանգություն, խաղաղություն և բարօրություն ինչպես Պաղեստինի, այնպես էլ Իսրայելի ժողովուրդների համար, որտեղ բոլորը վայելում են խաղաղ համակեցության բարիքները։ Առաջնորդվելով այս գաղափարով և լինելով երկու պետություն սկզբունքի հետևողական աջակից՝ Հայաստանը 2024 թվականի հունիսին ճանաչել է Պաղեստինի Պետությունը, իսկ այնուհետև՝ ՄԱԿ-ի Գլխավոր ասամբլեայի 79-րդ նստաշրջանի շրջանակում, դիվանագիտական հարաբերություններ հաստատել նրա հետ։

Այս համատեքստում Հայաստանը ողջունում է Ֆրանսիայի նախագահ Էմանուել Մակրոնի՝ Պաղեստինի Պետության ճանաչման և Միացյալ Թագավորության՝ այն ճանաչելու մտադրության վերաբերյալ վերջին հայտարարությունները: Առանձնահատուկ հպարտ ենք, որ Ֆրանսիայի և Պաղեստինի արտաքին գործերի նախարարները հնարավորություն ունեցան հանդիպելու Հայաստանում՝ «Երևանյան երկխոսություն» դիվանագիտական համաժողովի շրջանակում՝ ճանապարհ հարթելով այս պատմական իրադարձության համար:

Հիմնվելով մեր սեփական փորձի վրա՝ Հայաստանը քաջատեղյակ է, թե ինչ է պատերազմական սարսափը։ Չնայած սահմանափակ ռեսուրսներին՝ մենք մշտապես ջանքեր ենք գործադրել Պաղեստինի ժողովրդի կարիքներին աջակցելու հարցում։ Հայաստանի վարչապետի և Եգիպտոսի նախագահի միջև ձեռք բերված պայմանավորվածության հիման վրա մենք մարդասիրական օգնություն ենք ուղարկել Գազա և մենք սատարում ենք ՄԱԿ-ի Մերձավոր Արևելքում Պաղեստինի փախստականների օգնության և աշխատանքների գործակալության (ՄԱՕԱԳ) գործունեությանը: Օգտվելով ընձեռված հնարավորությունից՝ թույլ տվեք նաև հայտարարել, որ համաձայնության ենք եկել Պաղեստինի հետ, ըստ որի՝ Պաղեստինի վտանգված մշակութային ժառանգությունը ժամանակավորապես կհանգրվանի հին ձեռագրերի գիտահետազոտական ինստիտուտ-Մատենադարանում:

Հայաստանը նաև ընդգծում է երկու պետություններում քրիստոնեական համայնքների ապահովության, անվտանգության և ամբողջական իրավունքների պաշտպանության կարևորությունը: Լինելով աշխարհի հնագույն քրիստոնեական ազգերից մեկը՝ մենք հատուկ կարևորություն են տալիս Սուրբ հողում քրիստոնեական ժառանգության պահպանությանը: Հայաստանը լիահույս է, որ Երուսաղեմի սրբավայրերի կառավարման պատմական ստատուս քվոն կպահպանվի և լիովին կհարգվի՝ որպես միջկրոնական համերաշխության և խաղաղ համակեցության անկյունաքար»։

Լոնդոնի օդային տարածքը ժամանակավորապես փակվել ՝է տեխնիկական խափանման պատճառով, հաղորդել է The Telegraph-ը։

«Եվրոպական օդային երթևեկության կառավարման գործակալությունը հայտարարել է, որ Լոնդոնի կառավարման գոտին «ժամանակավորապես անհասանելի է տեխնիկական խնդիրների պատճառով»։ Խնդիրները սկսվել են այսօր կեսօրին», - ասվում է հաղորդագրության մեջ։

Մեծ Բրիտանիայի երկնքի համար պատասխանատու օդային երթևեկության կառավարման Nats ընկերության խոսնակը հաստատել է, որ գոյություն ունի «տեխնիկական խնդիր» և ասել, որ դեռևս հայտնի չէ, թե երբ կլուծվեն խնդիրները։

Ուկրաինան աշխատում է բալիստիկ հրթիռների ստեղծման վրա։ Եվ այն շատ մոտ է սեփական զենք ունենալուն՝ Ռուսաստանի խորքը հարվածելու համար, BBC News Украина-ին տված հարցազրույցում հայտարարել է Ուկրաինայի պաշտպանության նախարար Դենիս Շմիգալը։

Պատասխանելով այն հարցին, թե երբ հնարավոր կլինի տեսնել ուկրաինական բալիստիկ հրթիռներ և դրանց կանոնավոր կիրառումը Ռուսաստանում գտնվող թիրախների դեմ, Շմիգալը նշել է, որ Ուկրաինան շատ մոտ է դրան։

«Ուկրաինայի նախագահն արդեն հայտարարել է, որ Ուկրաինան կունենա իր սեփական բալիստիկան։ Մենք շատ մոտ ենք դրան։ Դա, ըստ էության, այն ամենն է, ինչ ես կարող եմ հրապարակավ հայտարարել տվյալ հարցի վերաբերյալ»,- շեշտել է նա։

Ինչպես հաղորդում է РБК-Украина-ն, այս տարվա մայիսին Ուկրաինայի նախագահ Վլադիմիր Զելենսկին հրամայել է հնարավորինս արագացնել բալիստիկ հրթիռների ստեղծումը։

«Խնդիրն այն է, որ հնարավորինս արագացվի ուկրաինական բալիստիկայի ստեղծումը։ Մեր հեռահար հնարավորությունները Ուկրաինայի անվտանգության հստակ և արդյունավետ երաշխիք են»,- ասել էր նա այն ժամանակ։

Բրիտանական օդային հաղորդակցության կարգավարները չորեքշաբթի հայտնել են տեխնիկական խնդրի մասին, որը խափանել է Լոնդոնի և այլ խոշոր օդանավակայանների չվերթները, չնայած ավելի ուշ նրանք հայտնել են, որ խնդիրը լուծվել է, հաղորդում է Reuters-ը։

«Մեր ինժեներները վերականգնել են այսօր կեսօրին վնասված համակարգը։ Լոնդոնի տարածքում բնականոն գործունեությունը վերսկսելու գործընթացում ենք»,- հայտնել է Մեծ Բրիտանիան։

Հիթրոու օդանավակայանը հայտարարել է, որ բոլոր չվերթները դադարեցվել են, իսկ Գատվիկ օդանավակայանը հայտարարել է, որ խնդիրը ազդել է Մեծ Բրիտանիայից մեկնող բոլոր չվերթների վրա։

«Մինչև իրավիճակի կարգավորումը, Լոնդոնի Գատվիկ օդանավակայանից չվերթներ ներկայում չկան»,- ասված է օդանավակայանի հայտարարության մեջ։

Լոնդոն Սիթի օդանավակայանն էլ X-ում գրել է, որ նույն խնդիրը ազդել է նաև իրենց չվերթների վրա։

Էդինբուրգի օդանավակայանը հայտնել է նաև, որ չվերթները ներկայում հետաձգվում են՝ սպասելով լրացուցիչ տեղեկատվության: