Իրանագետ Վարդան Ոսկանյանը գրում է․ «Հայաստանի հետ հարաբերությունների «կարգավորման» հարցով Թուրքիայի հատուկ բանագնաց Սերդար Քըլըչը նույնիսկ Հայաստան այցից անմիջապես առաջ հարկ չի համարել օգտագործել Հայաստանի Հանրապետության օրենսդրությամբ ամրագրված Սյունիք տեղանունը։

Իգդիրում տված հարցազրույցում վերջինս թեև խուսափել է «միջանցք» տխրահռչակ բառից, բայց, այսուհանդերձ, Սյունիքով անցնելիք ճանապարհը կոչել է «Զանգեզուրյան գիծ»՝ նշելով որ դրա գործարկումը շատ կարևոր է Միջին Ասիայի և թյուրքական հանրապետությունների հետ Թուրքիայի կապն ապահովելու առումով։

Ուշագրավ է նաև, որ թուրք բանագնացի կողմից ոչ միայն չի կիրառվել Հայաստանի պաշտոնական տեղանունը, այլ նաև նույնիսկ վաշինգտոնյան փաստաթղթերում արձանագրված «Թրամփի ուղի» («TRIPP») ձևը, իսկ այդ ամենը համեմվել է նաև միջինասիական հանրապետությունների թյուրքական լինելու հանգամանքի շեշտադրմամբ, ինչի «փայլփլուն» փաթեթավորման թիկունքում երևում են Էրդողանական վարչախմբի կողմից առաջ մղվող համաթյուրքականության պատրանքի ականջները»։

Ուկրաինայի նախագահ Վլադիմիր Զելենսկին հայտարարել է, որ Սումիի մարզում ռուսական հարձակողական գործողությունը ամբողջությամբ ձախողվել է ուկրաինական ուժերի հակազդեցության շնորհիվ, և մարտերը շարունակվում են սահմանային գոտում, հաղորդում է «Украинская правда»-ն։ 

«Սումիի ուղղությամբ ռուսական խմբավորումը կորցրել է իր հարձակողական կարողությունները կրած կորուստների հետևանքով։ Մենք միաժամանակ շարունակում ենք ակտիվորեն հակազդել Ռուսաստանի հարձակողական ակտիվությանը Դոնեցկի մարզում և Զապորոժիեում»,- նշել է նա։

«Հրապարակ» թերթը գրում է. «Հոկտեմբերի 3-ին, ժամը 16։00-ին կառավարության նիստերի դահլիճում դատավորների ընդհանուր ժողով է տեղի ունենալու։ Ընդհանուր ժողովը հրավիրել է Վճռաբեկ դատարանի նախագահ Լիլիթ Թադեւոսյանը: Այս պահի դրությամբ օրակարգում մեկ հարց է՝ ուսումնական հարցերի հանձնաժողովի անդամի ընտրությունը։

Դատական համակարգի մեր աղբյուրին հարցրինք՝ հնարավո՞ր է դատավորները բարձրացնեն դատական համակարգի խնդիրների, դատավորների նկատմամբ իշխանական ճնշումների, վերջին աղմկոտ կալանավորումների վերաբերյալ հարցեր, մտահոգություններ հայտնեն:

Ասաց՝ քիչ հավանական է համարում, օրակարգը քննարկելու են` ընտրեն եւ վերջ։ Ի դեպ, դատավորների ընդհանուր ժողովը գրեթե միշտ դռնփակ է տեղի ունեցել:

Մինչ ժողովի մեկնարկը, քվեարկում են՝ դռնբաց անե՞լ, թե՞ ոչ, միայն մի քանի դատավոր է լինում, որ կողմ է քվեարկում դռնբաց քննարկմանը, որին կարող են նաեւ լրագրողներ մասնակցել ու լուսաբանել։ Բարձրագույն դատական խորհրդից փորձեցինք պարզել՝ բացի այդ մեկ հարցը, ուրիշ ի՞նչ է քննարկվելու։ Պատասխանեցին, որ օրակարգին դեռեւս ծանոթ չեն»։

Մանրամասն՝ թերթի այսօրվա համարում։

«Հրապարակ» թերթը գրում է. «Չնայած տարեսկզբին հայտարարվեց, որ հայ-ադրբեջանական սահմանազատումը կշարունակվի Տավուշից, սակայն, մեր տեղեկություններով, ադրբեջանական կողմը պնդում է, որ այն շարունակեն Սյունիքից։ Վաշինգտոնյան համաձայնագրից հետո Ադրբեջանը շտապում է կյանքի կոչել, Ալիեւի բնորոշմամբ, «Զանգեզուրի միջանցքը», ու թերեւս այս նպատակով ակտիվություն է նկատվում նաեւ սահմանազատման հանձնաժողովների շփումներում։

Օրերս հայտնի դարձավ, որ սեպտեմբերի 5-ին Հայաստանի փոխվարչապետ Մհեր Գրիգորյանի եւ Ադրբեջանի փոխվարչապետ Շահին Մուստաֆաեւի ղեկավարությամբ կայացել են «փոխադարձ այցելություններ Հայաստանի Հանրապետության տարածք, Ադրբեջանի Հանրապետության տարածք»։

ՀՀ ԱԳՆ-ից նաեւ հայտնեցին․ «2025թ. օգոստոսի 8-ին Վաշինգտոնում ձեռք բերված պայմանավորվածությունների համաձայն՝ կողմերը քննարկել են սահմանագծի համապատասխան հատվածների /հատվածամասերի սահմանազատման, ականազերծման, ինչպես նաեւ անհրաժեշտ ենթակառուցվածքների վերականգնման ու կառուցման եւ դրանց իրականացման ժամկետների հետ կապված հարցեր՝ հաղորդակցությունների ստեղծման ոլորտում գործողությունների սինխրոնիզացման նպատակով»։ Մհեր Գրիգորյանի գրասենյակից էլ հավելյալ պարզաբանեցին՝ հանդիպումը կայացել է Սյունիքի մարզի եւ Զանգելանի շրջանի հարավային մասերում։

Մեր տեղեկություններով՝ կողմերն ուղղաթիռով նախ Մեղրիում են հանդիպել, ապա, որպես «ԱդրբեջանիՀանրապետության տարածք», այցելել են Արցախ: Մեզ պատմեցին, որ աննկարագրելի զգացում է պատել հանդիպման մասնակիցներին, սակայն որեւէ մեկը որեւէ բառով չի արտահայտել դա։ Ադրբեջանական կողմի պահանջով, որոշել են սահմանազատումը շարունակել Սյունիքում: Ընդ որում, Որոտան-Շուռնուխ ճանապարհը վերադարձնելու հարցը քննարկելիս ադրբեջանցիները հայտարարել են, թե դրա անհրաժեշտությունը չկա, քանի որ հայկական կողմը դրա այլընտրանքն արդեն կառուցել է:

Վերջնական համաձայնություն այս հարցում դեռ չկա, սակայն, ասում են, խնդիրը միայն ճանապարհը չէ, այլ տարածքների հարցում էլ Ադրբեջանը նկրտումներ ունի։ Շատ պահանջում է, որ մի քիչ պակասի վրա համաձայնության գա»։

Մանրամասն՝ թերթի այսօրվա համարում։

ԱՄՆ-ում ձերբակալվել է անձ, որը համարվում է պահպանողական ակտիվիստ Չարլի Քըրքի սպանության գլխավոր կասկածյալը։ Այդ մասին Fox News-ին տված հարցազրույցում հայտնել է նախագահ Դոնալդ Թրամփը՝ ընդգծելով, որ «մեծ վստահությամբ կարելի է ասել, որ կասկածյալը գտնվում է կալանքի տակ»։

Նրա խոսքով՝ ոստիկանությանը օգնություն է ցուցաբերել ենթադրյալ հանցագործի մերձավորներից մեկը։

Չարլի Քըրքը, որը համարվում էր Թրամփի ամենաակտիվ կողմնակիցներից և վարում էր հայտնի Charlie Kirk Show փոդքասթը, գնդակահարվել էր Յուտա նահանգում հանրային ելույթի ժամանակ։ Նրա սպանությունը մեծ արձագանք է գտել ԱՄՆ-ում և նրա սահմաններից դուրս։

Լեհաստանը չի պատրաստվում խզել դիվանագիտական հարաբերությունները Ռուսաստանի հետ։ Այս մասին Կիև կատարած այցի ընթացքում հայտարարել է Լեհաստանի արտգործնախարար Ռադոսլավ Սիկորսկին:

«Դիվանագիտության մեջ կապերը պահպանվում են ոչ միայն ընկերների, այլև մրցակիցների հետ։ Այդ պատճառով ես առայժմ դիվանագիտական հարաբերությունների խզման հիմքեր չեմ տեսնում», – հայտարարել է նա։

Ուկրաինան չի պատրաստվում որևէ տարածքային զիջման գնալ՝ Ռուսաստանի հետ պատերազմը դադարեցնելու նպատակով։ «Արմենպրես»-ի հաղորդմամբ՝ այս մասին հայտարարել է Ուկրաինայի նախագահ Վլադիմիր Զելենսկին՝ ելույթ ունենալով Yes 2025 ամենամյա համաժողովում։

Զելենսկին ընդգծել է, որ նման քայլը ոչ միայն չի կանգնեցնի Ռուսաստանի նախագահ Վլադիմիր Պուտինին, այլև կվտանգի ամբողջ Եվրոպայի անվտանգությունը։

«Երբ մենք խոսում ենք Ուկրաինայում մեզ համար անվտանգության երաշխիքների մասին, իրականում դրանք անվտանգության երաշխիքներ են ամբողջ Եվրոպայի համար։ Սա արդեն ակնհայտ է։ Հիմա նույնիսկ սովորական է»,– նշել է Զելենսկին։

Նա նաև ընդգծել է Չինաստանի դերի կարևորությունը և կոչ արել գտնել ազդեցության մեխանիզմներ Պեկինի վրա, որպեսզի վերջինս օգտագործի իր հնարավորությունները Ռուսաստանի նկատմամբ։

«Մենք պետք է միջոց գտնենք Չինաստանի վրա ազդելու համար, որպեսզի նրանք կիրառեն իրենց ազդեցությունը Ռուսաստանի վրա՝ հանուն պատերազմի ավարտի»,– հավելել է Ուկրաինայի նախագահը։

Հայաստանը ՄԱԿ-ի Գլխավոր ասամբլեայում քվեարկության ընթացքում սատարել է պաղեստինյան հարցի խաղաղ կարգավորման եւ հակամարտության երկպետական լուծման վերաբերյալ Նյու Յորքի հռչակագրին հավանություն տվող բանաձեւին։

Բանաձևն ընդունվել է 142 կողմ, 10 դեմ և 12 ձեռնպահ ձայներով: Փաստաթղթին դեմ են քվեարկել ԱՄՆ-ը, Իսրայելը, Հունգարիան, Արգենտինան, Պալաուն, Նաուրուն, Միկրոնեզիան, Պապուա Նոր Գվինեան, Պարագվայը և Տոնգան:

Գերմանիայի ռազմաօդային ուժերն արդեն սկսել են Լեհաստանի օդային տարածքի պարեկությունը ռուսական անօդաչու թռչող սարքերի կողմից Լեհաստանի օդային տարածքը խախտելու միջադեպից հետո: Այս մասին Բեռլինում կայացած ճեպազրույցի ժամանակ հայտարարել է Գերմանիայի պաշտպանության նախարարության ներկայացուցիչը:

«Դա արդեն իրականացվում է: Գերմանիայի ռազմաօդային ուժերը երեկ երեկոյան որոշել են գործողության ընդգրկույթը», – պաշտպանության նախարարության ներկայացուցչի խոսքերն է մեջբերում ՏԱՍՍ-ը:

Իր հերթին, Գերմանիայի նախարարների կաբինետի պաշտոնական ներկայացուցիչ Շտեֆան Կոռնելիուսը, պատասխանելով այն հարցին՝ արդյոք Գերմանիայի կառավարությունը համաձայն է ԱՄՆ նախագահ Դոնալդ Թրամփի կարծիքի հետ, թե Լեհաստանում անօդաչու թռչող սարքերի հետ կապված միջադեպը կարող էր սխալի պատճառ լինել, ասել է, որ «Գերմանիայի կառավարությունը ղեկավարվում է ՆԱՏՕ-ի գնահատումներով»: 

«Այդ վերլուծությունը դեռևս շարունակվում է, – նշել է նա: – Գերմանիայի կառավարությունը և ՆԱՏՕ-ն ներկայում կասկածներ չունեն անօդաչու թռչող սարքերի ռուսական ծագման վերաբերյալ»:

Ռուսաստանի և Բելառուսի զինված ուժերը սկսել են «Запад-2025» համատեղ լայնածավալ ռազմավարական զորավարժությունները: Զորավարժությունների նպատակն է փոխգործակցության մշակումը՝ Միութենական պետության սահմաններին սպառնալիքները չեզոքացնելու և իրավիճակը կայունացնելու համար, РБК-ին հայտնել են կազմակերպիչները:

Զորավարժությունների շրջանակում երկու երկրների զինվորականները կիրականցնեն համատեղ գործողություններ՝ ռազմական անվտանգությունն ապահովելու և խաղաղությունը պահպանելու համար: Գործնական զորավարժությունները կանցկացվեն Բելառուսի և Ռուսաստանի զորավարժարաններում, ինչպես նաև Բալթիկ և Բարենցի ծովերի ջրատարածություններում:

Զորավարժությունները կտևեն սեպտեմբերի 12-16-ը: Դրանց ընթացքում զինծառայողները կվարժեցնեն միջուկային զենքի և ռուսական նոր «Орешник» համակարգերի կիրառման պլանավորումը, որոնք Բելառուսում պետք է տեղակայվեն մինչև 2025 թվականի վերջը:

Նման զորավարժություններ անցկացվում են չորս տարին մեկ՝ 2009 թվականից ի վեր: Ներկայիս զորավարժություններ թեման է «Զորքերի (ուժերի) խմբերի կիրառումը Միութենական պետության ռազմական անվտանգությունն ապահովելու շահերից ելնելով»: Դրանց նպատակն է ստուգել, ​​թե որքանով են Ռուսաստանը և Բելառուսը պատրաստ ապահովելու Միութենական պետության ռազմական անվտանգությունը և ունակ հետ մղելու հնարավոր ագրեսիան։