Թուրքիայի և Հայաստանի միջև սահմանը կարող է բացվել։ Այս մասին հայտարարել է Ադրբեջանում Թուրքիայի արտակարգ և լիազոր դեսպան Բիրոլ Աքգյունը:

Աքգյունը նշել է, որ Ադրբեջանի և Հայաստանի, ինչպես նաև Թուրքիայի և Հայաստանի միջև հարաբերությունների կարգավորման գործընթացները պետք է դիտարկել համապարփակ ձևով. «Երկու կարգավորման գործընթացներն էլ զուգահեռ են ընթանում։ 2022 թվականին նշանակվել են Թուրքիայի և Հայաստանի միջև հարաբերությունների կարգավորման գործընթացի հատուկ ներկայացուցիչներ։

Հայտնի է, որ Թուրքիայի և Հայաստանի միջև սահմանը փակ է 1993 թվականից: Հայաստանը ելք չունի դեպի ծով, և դրանից ամենաշատը տուժում է հայ ժողովուրդը։ Այս խաղաղությունից բոլորը կշահեն, բայց ամենաշատը կշահի Հայաստանը։

Մենք ցանկանում ենք արագացնել կարգավորման գործընթացը։ Եթե ստորագրվի կամ նախաստորագրվի կայուն խաղաղության համաձայնագիր և կատարվեն «Զանգեզուրի միջանցքին» վերաբերող պայմանները, ապա թուրք-հայկական սահմանը կարող է բացվել հարմար պահին Անկարայի և Բաքվի միջև խորհրդակցությունների արդյունքում: Դա կախված կլինի նրանից, թե ինչպես կզարգանա կարգավորման գործընթացը»։

Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի հայրապետական տնօրինությամբ կատարվել են եկեղեցականների նոր նշանակումներ:

Արժանապատիվ Տ. Վաչագան քահանա Գյուրջյանը, սույն թվականի օգոստոս 1-ից ազատվելով Մայր Աթոռի Դիվանատանը ստանձնած պարտականություններից, ծառայության է կոչվել Ռումինիայի հայոց թեմում։

Արժանապատիվ Տ. Տիգրան քահանա Բադիրյանը, սույն թվականի օգոստոս 1-ից ազատվելով Կաթողիկոսական գրասենյակում ստանձնած պարտականություններից, ծառայության է նշանակվել Ֆրանսիայի հայոց թեմում։

Ամենամեծ տուժողը այս պատմության որակյալ արտադրանք տվողն է, և մենք պիտի շատ հոգատար լինենք մեր արտադրանքի ռեպուտացիայի նկատմամբ, որովհետև մեկ անորակ խմբաքանակի պատմությունը մամուլում սկսում է շրջանառվել, թափառել և դառնալ գնահատական ընդհանուր արտադրանքի մասին։ Այս մասին այսօր՝ հուլիսի 31–ին, կառավարության նիստում հայտարարեց փոխվարչապետ Մհեր Գրիգորյանը՝ անդրադառնալով արտահանվող կոնյակի որակին։

«Սա անթույլատրելի է ուղղակի։ Այդքան խոսում ենք կոնյակի մասին, բայց ես վստահ եմ, որ 95 և ավել տոկոս արտադրանքը որակյալ արտադրանք է։ Պիտի շատ ուշադիր լինենք, ես տեսել եմ դեպք, երբ հայկական կոնյակ արտադրվել է ոչ Հայաստանում և վաճառվում է։ Բնականաբար, այդ որակի գնահատման ազդեցությունը սկսում է տարածվել մեր արտադրանքի վրա, դա էլ է պրոբլեմ, որը պիտի մեխանիզմ գտնենք՝ ոնց մոնիտորինգ անենք։

Դա գյուղմթերքին էլ է վերաբերվում, ես գիտեմ շուկաներ, որտեղ ոչ հայկական գյուղ մթերքը վաճառվում է որպես հայկական, որովհետև հայկական տվյալ արտադրանքը ունի լավ ռեպուտացիա։ Այստեղ էլ պիտի շատ ուշադիր լինեք»,– ընդգծեց Մհեր Գրիգորյանը։

Կառավարությունն իր այսօրվա՝ հուլիսի 31–ի նիստում սահմանեց Ոստիկանության գվարդիայի սպառազինության մեջ ընդգրկվող հատուկ տեխնիկայի ցանկը։

Մասնավորապես, ոստիկանության գվարդիան կունենա հատուկ տեխնիկա` զրահափոխադրիչ ԲՏՌ-80, զրահափոխադրիչ ԲՌԴՄ-2։ Այս որոշումն ուժի մեջ է մտնում 2025 թվականի նոյեմբերի 1-ից:

Որոշման հիմնավորման մեջ նշվում է, որ համաձայն օրենքի հակաահաբեկչական գործողությունների իրականացմանը մասնակցելիս կամ ռազմական դրություն հայտարարված տարածքում իրականացվող պատերազմական գործողությունների շրջանակներում հատուկ առաջադրանքներ կատարելիս ոստիկանության գվարդիայի ծառայողը ոստիկանության պետի հրամանով իրավասու է օրենքով նախատեսված լիազորությունների պատշաճ իրականացումն ապահովելու համար գործադրելու ոստիկանության գվարդիայի սպառազինության մեջ ընդգրկված հատուկ տեխնիկա, որի ցանկը սահմանում է Կառավարությունը։

Նշվում է, որ այս որոշման ընդունումը բխում է ոստիկանության բարեփոխումների ռազմավարական ծրագրից։

Եթե մեր կարգավորումները հատկապես  IT ծառայությունների մասով նուրբ, համապարփակ, մտածված չլինեն, վիրտուալ տիրույթում ձևավորվող արտադրանքի ֆինիշինգ կոչվածը ուղղակի մենք չենք տեսնի Հայաստանում։ Այս մասին այսօր՝ հուլիսի 31–ին, կառավարության նիստում հայտարարեց փոխվարչալպետ Մհեր Գրիգորյանը։

«Այդ իմաստով, իհարկե, ֆիզիկական ապրանքների շարժը և արտադրությունը մի հարց է, բայց ես համաձայն եմ, որ պիտի շատ ուշադիր լինենք, թե ինչ ռեակցիա է տալիս ծառայություն արտադրողը այս ռազմավարությանը։ Անընդհատ պիտի մոնիտորինգի տակ ունենանք այս հարցը, որպեսզի չունենանք գործողություններ և կարգավորումներ, որ ուղղակի վիրտուալ տիրույթում արտադրության վայրը կփոխվի, և մենք ուղղակի չենք ունենա այդ արտադրանքը և չենք ունենա այդ արտահանելիությունը։ Այս իմաստով, իհարկե, անելիքները շատ են այստեղ»,–ասաց նա։

Փոխվարչապետը նաև դիմեց էկոնոմիկայի նախարար Գևորգ Պապոյանին՝ նշելով. «Պարոն Պապոյան, ուղղակի ուզում եմ ընդգծեմ, մենք որակի ստանդարտ և ստանդարտի սերտիֆիկացման ինստիտուտները, եթե լիարժեք չունենանք, ենթակառուցվածքային զարգացումը ոչ մի արդյունք մեզ չի տալու։ Ես կարծում եմ, դա զուգահեռ գնացող ենթակառուցվածքային լուծման սուրբ անհրաժեշտություն է այսօր։ Այսօր արտահանման հետ կապված պրոբլեմների 99%-ը մենք սովորել ենք ասել, որ լոգիստիկ խնդիրներից է գալիս, բայց ես ավելի շատ հակված եմ ենթադրել, որ գալիս են որակի ստանդարտից։ Ընդ որում, ես չեմ բացառում, որ մենք ունենք շատ որակյալ արտադրանք, բայց չունենք որակը սերտիֆիկացնելու մշակույթ, սերտիֆիկացնելու այն ձևաչափով, որ այլ երկրի սպառողի համար հասկանալի լինի, որ սա որակյալ արտադրանք է»։

Խաղաղ օվկիանոսում՝ Կամչատկայի մոտակայքում հուլիսի 31-ի առավոտյան 6,3 մագնիտուդով երկրաշարժ է գրանցվել:

Այս մասին «Ինտերֆաքս»-ին հայտնել են Ռուսաստանի Գիտությունների ակադեմիայի Միասնական երկրաֆիզիկական ծառայության Կամչատկայի մասնաճյուղում։

«Հինգշաբթի օրը տեղական ժամանակով 11:15-ին գրանցվել է 6,3 մագնիտուդով երկրաշարժ, որի էպիկենտրոնը գտնվում է Պետրոպավլովսկ Կամչատկայից 178 կմ արևելք, ծովի հատակին՝ 39,4 կմ խորության վրա», – ասել է գործակալության զրուցակիցը։

Անցած գիշեր սեյսմոլոգները գրանցել են ավելի քան 200 հետցնցում, որոնցից ամենանկատելին կազմել է 6,5 մագնիտուդ։

Հուլիսի 30-ին Կամչատկայի մերձակայքում տեղի էր ունեցել 1952 թվականից ի վեր ամենաուժեղ երկրաշարժը՝ 8,8 մագնիտուդով:

Նիկոլ Փաշինյանի խոսնակ Նազելի Բաղդասարյանը ֆեյսբուքյան իր էջում գրում է. «Նկատելի է, որ հայաստանյան ԶԼՄ-ներում որոշակի շփոթ կա տարածաշրջանի տրանսպորտային կապուղիների ապաշրջափակման թեմայով ՀՀ դիրքորոշումների վերաբերյալ, եւ լրատվամիջոցները հակասություններ են տեսնում հայաստանյան պաշտոնյաների հայտարարություններում։

Սա ինչ-որ տեղ հասկանալի է, որովհետեւ թեման բազմաթիվ նրբություններ ունի, որոնք երբեմն ավելի են բարդանում որոշակի տերմիններով զուգորդվելու դեպքում՝ վարձակալություն, լիզինգ, կառուցապատման իրավունք, արտապատվիրակում։ Տերմիններից յուրաքանչյուրն, անշուշտ, կարող է տարբեր իմաստ ունենալ՝ կապված այն բանի հետ, թե կոնկրետ ինչին է վերաբերում։

Զանգվածային լրատվամիջոցների հարգելի ներկայացուցիների համար խնդիրը թեթեւացնելու նպատակով ուզում եմ եւս մեկ անգամ ընդգծել, որ Հայաստանի Հանրապետությունը երբեք չի քննարկել, չի քննարկում եւ չի քննարկելու սեփական տարածքով անցնող տրանսպորտային կապուղիների այնպիսի տարբերակներ, որոնք անհամատեղելի են Հայաստանի Հանրապետության տարածքային ամբողջականության, ինքնիշխանության, իրավազորության հետ։Եվ, ընդհակառակը, տարածքային ամբողջականության, ինքնիշխանության, իրավազորության շրջանակներում Հայաստանի Հանրապետությունը ոչ միայն քննարկում է տարածաշրջանի տրանսպորտային կապուղիների շահագործման տարբեր բանաձեւեր, այլեւ շահագրգիռ է բանաձեւերից որեւէ մեկի շուրջ համաձայնության գալու հարցում։ՀՀ այն ներկայացուցիչները, ովքեր ասում են, թե Հայաստանը չի քննարկել, չի քննարկում եւ չի քննարկելու, միանշանակ խոսում են այնպիսի բանաձեւերի մասին, որոնք անհամատեղելի են ՀՀ տարածքային ամբողջականության, ինքնիշխանության, իրավազորության հետ։

ՀՀ այն ներկայացուցիչները, ովքեր խոսում են քննարկումների մասին, նկատի են առնում ՀՀ տարածքային ամբողջականության, ինքնիշխանության, իրավազորության շրջանակում գտնվող բանաձեւեր, կառուցապատման իրավունքներ եւ այլն, որոնց մասին վարչապետ Փաշինյանը խոսել է հուլիսի 16-ի ասուլիսի ընթացքում։

ՀՀ տարածքային ամբողջականությունը, ինքնիշխանությունը, իրավազորությունը, իհարկե, չի կարող արտապատվիրակվել։ Երկաթուղու, խողովակաշարի, էլեկտրահաղորդման գծերի բիզնես-կառավարումը կարող է։

Ի դեպ, ավտոճանապարհների սպասարկումը, կառավարումը Հայաստանում այսօր ու միշտ էլ արտապատվիրակվում է մասնավոր ընկերությունների։ Այլ բան, թե ով ինչ որակով է իրականացնում այդ կառավարումը։ Բայց սա քննարկվող թեմայի հետ կապ չունի»։

Հեղուկ գազի շուկայում չկան գերիշխող դիրք ունեցողներ, իսկ գնի բարձրացումը պայմանավորված է ծախսերի ավելացմամբ և առաջարկ-պահանջարկի գործոններով։ Այս մասին հայտնել է ՀՀ մրցակցության պաշտպանության հանձնաժողովը։

Հայտարարությունում նշված է, որ հանձնաժողովն ուսումնասիրություն է իրականացրել հեղուկ գազի շուկայում՝ հաշվի առնելով վերջին շրջանում հեղուկ գազի գների բարձրացման հանգամանքը։

«Ուսումնասիրության արդյունքում պարզվել է, որ ներկայում Հայաստանի Հանրապետությունում հեղուկ գազ ներմուծում է ավելի քան 170 տնտեսավարող սուբյեկտ, որոնցից ամենախոշոր ներմուծողի ծավալը չի գերազանցում 7 տոկոսը։ Ավելին` ավելի քան 170 սուբյեկտից ներմուծման ծավալներով 3 տոկոս և ավելի կշիռ ունեն ընդամենը 9 տնտեսվարող սուբյեկտ»,– ասված է հայտարարությունում։

Հանձաժողովը պարզել է, որ 2025 թ.–ի հուլիսին հեղուկ գազի գների բարձրացումը մի քանի պատճառ ունի, մանսավորապես` պայմանավորված է հեղուկ գազի ձեռքբերման գնի բարձրացմամբ, Վրաստանում արձանագրված լոգիստիկ խնդիրներով։ Նշվում է, որ սեզոնայնությամբ պայմանավորված` սահմանին խցանումներ են առաջանում և ավելի քիչ բեռնատարներ են կարոանում մուտք գործել Հայաստան։ Դրան գումարվում է այս սեզոնին պահանջարկի ավելացումը։

«Ուսումնասիրությունները ցույց են տվել, որ հեղուկ գազի շուկայում առկա չեն գերիշխող դիրք ունեցող տնտեսավարող սուբյեկտներ, իսկ գնի բարձրացումը պայմանավորված է եղել ինչպես ծախսերի ավելացմամբ, այնպես էլ շուկայում առաջարկ-պահանջարկի գործոններով»,–ընդգծել է մրցակցության պաշտպանության հանձնաժողովը։

Եթե Ռուսաստանի նախկին նախագահի որոշ խոսքեր այդքան նյարդային արձագանք են առաջացնում ԱՄՆ հզոր նախագահի մոտ, դա նշանակում է, որ Ռուսաստանն ամեն ինչում ճիշտ է և կշարունակի գնալ սեփական ճանապարհով. այս մասին թելեգրամյան ալիքում գրել է Ռուսաստանի Դաշնության Անվտանգության խորհրդի փոխնախագահ Դմիտրի Մեդվեդևը՝ արձագանքելով ԱՄՆ նախագահ Դոնալդ Թրամփի կոշտ հայտարարությանն իր հասցեին:

«Ասեք Մեդվեդևին՝ Ռուսաստանի ձախողված նախկին նախագահին, որը շարունակում է իրեն նախագահ կարծել, որ հետևի իր խոսքերին, որովհետև նա մտնում է շատ վտանգավոր տարածք», – գրել էր Թրամփը։

ԱՄՆ նախագահն արձագանքել էր ՌԴ Անվտանգության խորհրդի փոխնախագահի այն հայտարարությանը, որ Թրամփի՝ Մոսկվային վերջնագրեր ներկայացնելու փորձերը սպառնալիք են, որոնք կարող է հանգեցնել ոչ թե Ուկրաինայի հետ հակամարտության սրման, այլ ԱՄՆ-ի հետ ուղղակի բախման։

ԱՄՆ նախկին փոխնախագահ և նախագահի նախկին դեմոկրատ թեկնածու Քամալա Հարիսը չի բացառել նախագահական ընտրություններում իր թեկնածության առաջադրման հնարավորությունը: Այս մասին հաղորդել է The Washington Post (WP) թերթը՝ վկայակոչելով անանուն աղբյուրները:

Առայժմ հայտնի չէ, թե Հարիսը, ըստ նրանց տեղեկությունների, երբ կարող է հայտարարել այդ որոշման մասին: Սակայն նա արդեն հայտարարել է, որ հաջորդ տարի չի մասնակցի Կալիֆոռնիայի նահանգապետի ընտրություններին:

«Լուրջ մտորումներից հետո ես որոշել եմ, որ իմ թեկնածությունը չեմ առաջադրի նահանգապետի պաշտոնում», – ասվում է X-ում հրապարակված հայտարարության մեջ:շ

Մինչև 2021 թվականին ԱՄՆ փոխնախագահ դառնալը, Հարիսը չորս տարի եղել է Կոնգրեսի սենատոր Կալիֆոռնիայից, իսկ 2011-ից մինչև 2017 թվականն զբաղեցրել է նահանգի գլխավոր դատախազի պաշտոնը: