Ստամբուլում տեղական ժամանակով ժամը 10:00-ին (Երևանի  ժամանակով 11։00-ին) սկսվել է Ռուսաստանի և ԱՄՆ-ի պատվիրակությունների խորհրդակցությունների երկրորդ փուլը։ Դրանք տեղի են ունենում Ռուսաստանի Դաշնության գլխավոր հյուպատոսության շենքում: Այդ մասին հաղորդել է ՏԱՍՍ-ի թղթակիցը։

Խորհրդակցություններում ռուսական պատվիրակությունը գլխավորում է Վաշինգտոնում դեսպան Ալեքսանդր Դարչիևը, իսկ ամերիկյան պատվիրակությունը՝ Եվրոպայի և Եվրասիայի հարցերով պետքարտուղարի օգնականի տեղակալ Սոնատա Քոուլթերը։

ԱՄՆ պետքարտուղարությունում հայտարարել էին, որ հանդիպմանը նախատեսվում է քննարկել երկու երկրների դիվանագիտական ​​ներկայացուցչությունների աշխատանքը, իսկ քաղաքականության, անվտանգության և Ուկրաինայի շուրջ իրադրության հարցերը խորհրդակցությունների օրակարգում ներառված չեն։

Ռուս-ամերիկյան նախորդ խորհրդակցությունները տեղի են ունեցել Ստամբուլում փետրվարի 27-ին ԱՄՆ գլխավոր հյուպատոսի նստավայրում. դրանք տևել են ավելի քան վեց ժամ։

Ինչպես նշվել է հանդիպման արդյունքների վերաբերյալ ՌԴ ԱԳՆ հաղորդագրության մեջ, «քննարկումներն անցել են բովանդակալից ու գործարար մթնոլորտում»։

Շրջակա միջավայրի նախարարությունը պարզաբանել է, թե ինչն էր երեկվա «ցեխային անձրևների» պատճառը․

«Երեկ հանրապետության տարածքում գործող ցիկլոնը դուրս գալով Միջերկրական ծովից, տեղափոխվեց Իրաք, այնտեղից՝ դեպի Կովկաս:

Մթնոլորտի նման շրջանառության արդյունքում, հարավային հոսանքները Իրաքի անապատներից դեպի մեր երկիր տեղափոխեցին փոշու մեծ կոնցենտրացիա ունեցող օդ, ինչի արդյունքում շրջանների մեծ մասում տեղացին այսպես կոչված «ցեխային անձրևներ»:

Տարվա այս ժամանակահատվածում, գրեթե ամեն տարի նման երևույթները կրկնվում են մեր երկրի տարածքում, ինչը պայմանավորված է հարավային ցիկլոնների ներթափանցմամբ»:

ԼՂ–ից բռնի տեղահանված կարիքավոր ընտանիքներն աջակցություն կստանան մինչև դեկտեմբեր, որոշումն ընդունվեց ՀՀ կառավարության նիստի ժամանակ։

Նախագծով կարիքավոր ընտանիքներ են դիտարկվում այն ընտանիքները, որոնց մեկ անդամի հաշվարկով ամսական եկամտի չափը ցածր է 55,000 դրամից: 

Նախատեսվող ամսական աջակցությունը կկազմի ընտանիքի առաջին բռնի տեղահանված անդամի համար՝ 40,000 դրամ, սկսած ընտանիքի բռնի տեղահանված երկրորդ անդամից՝ ընտանիքի յուրաքանչյուր բռնի տեղահանված անդամի համար՝ 10, 000 դրամ:

Ադրբեջանի փոխվարչապետ Շահին Մուստաֆաևը և Իրանի ճանապարհների և քաղաքաշինության նախարար Ֆարզանա Սադեղն այցելել են օկուպացված Արցախ՝ Կովսական, հայտնում են ադրբեջանական լրատվամիջոցները:

Նրանք կստուգեն ընթացիկ համատեղ ենթակառուցվածքային նախագծերը, այդ թվում՝ Աղբենդի կամրջի և Հորադիզ-Աղբենդ երկաթուղու շինարարությունը: Այս ենթակառուցվածքային նախագծերն իրականացվում են  Իրանի տարածքով Ադրբեջանը Նախիջևանի հետ կապելու համար։

«Դեպի նոր աշխարհակարգ» թեմայով միջազգային ֆորումի ժամանակ իր ելույթում Ադրբեջանի նախագահ Իլհամ Ալիևը հայտարարել է, թե Ադրբեջանի և Իրանի միջև քննարկվող նախագծերից մեկը Հայաստանը շրջանցող տրանսպորտային կապի կառուցումն է, որը Նախիջևանը Իրանի տարածքով կկապի Ադրբեջանի հիմնական տարածքին։

«Շրջանցող ավտոճանապարհն արդեն կառուցվում է, մենք հիմա կամուրջ ենք կառուցում, իսկ շրջանցիկ երկաթուղու կառուցումն Իրանի և Ադրբեջանի համաձայնությունն է պահանջում, քանի որ Հայաստանն արգելափակում է մեր մուտքը Նախիջևան։

Մենք չենք կարող նստել և սպասել։ Ուստի, պայմանավորվել ենք, որ կկառուցենք շրջանցիկ ճանապարհ, իսկ Հայաստանը կշարունակի փակուղու մեջ մնալ տարածաշրջանում», – ասել է նա:

Հայաստանի արտգործնախարար Արարատ Միրզոյանն ու Թուրքիայի հետ հարաբերությունների կարգավորման հարցերով հատուկ ներկայացուցիչ, խորհրդարանի փոխխոսնակ Ռուբեն Ռուբինյանն ընդգրկվել են Անթալիայում կայանալիք դիվանագիտական համաժողովի մասնակիցների ցանկում:

Թուրքիայում ամենամյա համաժողովն այս տարի կանցկացվի ապրիլի 11-13-ը:

Ուշագրավ է, որ ո՛չ արտգործնախարարը, ո՛չ Ռուբինյանը դեռ չեն հաստատել իրենց մասնակցությունը։

ՀՀ ԱԳՆ մամուլի խոսնակը հաստատեց, որ ապրիլի 11-12-ին ՀՀ արտաքին գործերի նախարար Արարատ Միրզոյանը կմասնակցի Անթալիայի դիվանագիտական ֆորումին:

«Աշխատանքային այցի շրջանակներում ծրագրված են նաև երկկողմ հանդիպումներ»,- նշված է հաղորդագրությունում։

ՀՀ ԱԳՆ մամուլի խոսնակ

ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանի ֆեյսբուքյան գրառումը․ «Հրապարակ օրաթերթում տպագրված լուրը, թե ՔՊ-ն առաջարկել է Մարտուն Գրիգորյանին ընտրել Գյումրու համայնքապետ, իսկ Մարտուն Գրիգորյանն էլ մերժել է, բացարձակ սուտ է։

Նման առաջարկ ՔՊ-ին արել է Մարտուն Գրիգորյանի դաշինքի մաս կազմող կուսակցություններից մեկի նախագահը՝ Հանրային հեռուստաընկերության եթերում՝ հարյուր հազարավոր հեռուստադիտողների աչքի առաջ և նույնքան մարդու առաջ էլ ստացել պատասխան։

ՔՊ-ն Գյումրու ՏԻՄ-ում համամասնական ընտրությունների մեխանիզմի ներդրումից հետո միակ կուսակցությունն է, որ հավաքել է 17 000 քվե և մենք առավել քան պատասխանատու ենք մեզ վստահված յուրաքանչյուր քվեի համար։

Իհարկե, ընդդիմադիր մամուլը մեր օրերում դարձել է մի յուրատեսակ ստի կայսրություն, բայց, հարգելի գործընկերներ, սուտն էլ պիտի չափ ունենա, սահման ունենա»։

Վահագն Ալեքսանյան

ԱՄՆ նախագահ Դոնալդ Թրամփը մտադիր է ներգաղթյալներին արտաքսման որոշումից հետո օրական տուգանել 998 դոլարով, եթե նրանք չլքեն երկիրը։ Այս մասին հայտնում է Reuters-ը՝ հղում անելով իր տեսած փաստաթղթերին։ Ովքեր չեն վճարի գումարը, նրանց ունեցվածքը կբռնագրավվի։

Ըստ բարձրաստիճան աղբյուրի, որը ցանկացել է անանուն մնալ, Թրամփի վարչակազմը նախատեսում է հետին թվով նման տուգանքներ կիրառել մինչև հինգ տարի ժամկետով: Դա կարող է հանգեցնել ավելի քան մեկ միլիոն դոլարի տուգանքների գոյացմանը: Հրատարակության զրուցակիցները նշել են, որ օրենքը ավելի հավանական է՝ անհրաժեշտ է ներգաղթյալներին վախեցնելու համար։

Սահմանափակումները բխում են 1996թ. ընդունված օրենքից: Թրամփն օրենքն օգտագործել է 2018-ին իր առաջին պաշտոնավարման ընթացքում՝ հարյուր հազարավոր դոլարների տուգանքներ սահմանելու համար 9 ներգաղթյալի նկատմամբ, որոնք ապաստան էին գտել եկեղեցիներում: Հաջորդ նախագահ Ջո Բայդենը վերջ էր դրել այս քաղաքականությանը։

ՌԴ հակաօդային պաշտպանության համակարգերը Ռուսաստանի 11 մարզերի, ինչպես նաև Ազովի և Սև ծովերի օդային տարածքներում ոչնչացրել են 158 ուկրաինական անօդաչու թռչող սարք, հայտնում է kommersant.ru-ն՝ ՌԴ ՊՆ մամուլի ծառայությանը հղումով։

Անօդաչու թռչող սարքերի մեծ մասը խոցվել է Կրասնոդարի երկրամասում՝ 67-ը:

Ռազմական գերատեսչության հաղորդագրությունների համաձայն՝ ապրիլի 8-ի ժամը 20:00-ից ապրիլի 9-ի ժամը 06:00-ն ընկած ժամանակահատվածում ոչնչացվել է նաև.

• 29 ԱԹՍ՝ Ռոստովի մարզում
• 15 ԱԹՍ՝ Հյուսիսային Օսիայում
• 11 ԱԹՍ՝ Վորոնեժի մարզում
• 10 ԱԹՍ՝ Կուրսկի մարզում
• 7 ԱԹՍ՝ Ազովի ծովի օդային տարածքում
• 6 ԱԹՍ՝ Սև ծովի օդային տարածքում 
• 5 ԱԹՍ՝ Բելգորոդի մարզում 
• 3 ԱԹՍ՝ Ղրիմում
• 2 ԱԹՍ՝ Պենզայի մարզում
• 1-ական ԱԹՍ՝ Սարատովի, Օրյոլի, Ստավրոպոլի մարզերում: