ԵՄ-ն կշարունակի նոր մաքսատուրքերի մշակումն ԱՄՆ-ի դեմ, բայց դրանք սառեցնում է 90 օրով՝ «բանակցություններին հնարավորություն տալու» համար։ Այս մասին X սոցիալական հարթակում գրել է Եվրահանձնաժողովի նախագահ Ուրսուլա ֆոն դեր Լայենը։

«Մենք ի գիտություն ենք ընդունել նախագահ Թրամփի հայտարարությունը: Մենք ցանկանում ենք հնարավորություն տալ բանակցություններին: Մենք շարունակում ենք վերջնականացնել ԵՄ-ի պատասխան քայլերը, որոնք ստացել են մեր անդամ երկրների վճռական աջակցությունը, բայց 90 օրով սառեցնում ենք դրանք: Եթե բանակցությունները բավարար արդյունք չտան, մեր հակամիջոցները կգործարկվեն», – գրել է նա:

Ֆոն դեր Լեյենը նաև հաստատել է, որ ԵՄ-ն մշակում է լրացուցիչ հակաքայլեր ԱՄՆ-ի մաքսատուրքերի դեմ։

«Ինչպես ասել եմ նախկինում, բոլոր տարբերակները քննարկվում են», – եզրափակել է Ուրսուլա ֆոն դեր Լայենը։

Իսկ Եվրահանձնաժողովի գլխավոր խոսնակի տեղակալ Ստեֆան դե Կեերսմաքերը Բրյուսելում կայացած ճեպազրույցում նշել է, որ ԱՄՆ-ն սառեցրել է միայն եվրոպական ապրանքների հիմնական զանգվածի նկատմամբ մաքսատուրքերը, բայց առայժմ ուժի մեջ են մնում մաքսատուրքերը Եվրոպայից  պողպատի, ալյումինի և ավտոմեքենաների համար։

Ապրիլի 9-ին ԵՄ երկրները հաստատել են Միացյալ Նահանգներից լայն շրջանակի գյուղատնտեսական և արդյունաբերական ապրանքների համար 25% մաքսատուրքերի առաջին փաթեթի սահմանումը։ Մաքսատուրքերի երկրորդ փաթեթը պետք է գործարկվեր մայիսի 15-ին, և այնուհետև Բրյուսելը մտադիր էր նոր մաքսատուրքեր սահմանել մինչև դեկտեմբերի 1-ը: Այժմ այդ ամբողջ գործընթացը դադարեցված է:

Ապրիլի 9-ին ԱՄՆ նախագահ Դոնալդ Թրամփը հայտարարել է, որ 90 օրով դադարեցնում է մաքսատուրքերի բարձրացումն այն երկրների նկատմամբ, որոնք բանակցություններ վարելու պատրաստակամություն են ցուցաբերել։ Դրանց նկատմամբ կգործեն ներմուծման 10%-ի չափով մաքսատուրքեր։ Միևնույն ժամանակ ԱՄՆ ղեկավարը Չինաստանից ներմուծվող արտադրանքի նկատմամբ մաքսատուրքերը բարձրացրել է մինչև 125%:

Գերմանիայի Պահպանողական ՔԴՄ/ՔՍՄ դաշինքը՝ Ֆրիդրիխ Մերցի գլխավորությամբ, ապրիլի 9-ին կոալիցիա կազմելու համաձայնություն է ձեռք բերել Գերմանիայի Սոցիալ-դեմոկրատական ​​կուսակցության (ԳՍԴԿ) հետ՝ նպատակ սահմանելով վերականգնել երկրի տնտեսությունը և պայքարել անօրինական միգրացիայի դեմ։

Deutsche Welle-ի ռուսական ծառայությունը, վկայակոչելով կոալիցիոն համաձայնագիրը, նշում է, որ կառավարական նոր կոալիցիան պլանավորում է վերացնել երկրում երեք տարի բնակվելուց հետո արագացված կարգով քաղաքացիություն ստանալու իրավունքը:

Միևնույն ժամանակ, նախորդ կառավարության կողմից քաղաքացիության մասին օրենքում կատարված մյուս փոփոխությունները, ներառյալ հինգ տարի անց հպատակագրվելու իրավունքը և երկքաղաքացիություն ունենալու հնարավորությունը, ուժի մեջ կմնան։

Կառավարական կոալիցիայի գործընկերներն իրենց համաձայնագրում մեծ ուշադրություն են դարձրել Գերմանիայի տարածքում անօրինական միգրացիայի խնդիրներին։ Կուսակցություններին հաջողվել է պայմանավորվել Գերմանիա մուտք գործողներին սահմանին կանգնեցնելու շուրջ, նույնիսկ եթե նրանք ապաստան տրամադրելու խնդրագիր են ներկայացրել։ Երկու տարով կդադարեցվի ընտանիքների վերամիավորումը, կդադարեցվեն փախստականներին կամավոր ընդունելու ծրագրերը, իսկ արտաքսման համար անվտանգ երկրների ցուցակը կընդլայնվի։ Բացի այդ, հնարավոր կդառնա հանցագործների արտաքսումն Աֆղանստան և Սիրիա։ Կուժեղացվի վերահսկողությունը Գերմանիայի սահմաններին:

Գերմանիայի հաջորդ հավանական կանցլեր, ՔԴՄ-ի նախագահ Ֆրիդրիխ Մերցն ապրիլի 9-ին Բունդեսթագում կայացած մամուլի ասուլիսում իր ելույթի մի մասը նույնպես նվիրել է միգրացիային։ Նա խոստացել է «զգալի չափով վերջ դնել անօրինական միգրացիային»՝ հաստատելով խիստ սահմանային հսկողություն և այն անձանց հայրենադարձելու արշավ, որոնք երկրում են գտնվում առանց օրինական հիմքերի:

Իսկ ԳՍԴԿ-ի ղեկավար Լարս Կլինբայլը հայտարարել է, որ «ապաստանի հիմնարար իրավունքը մնում է անձեռնմխելի», իսկ Գերմանիան «մնում է ներգաղթի երկիր»։ Միաժամանակ, նրա խոսքով, նոր կառավարությունը մտադիր է կարգուկանոն հաստատել և ուժեղացնել վերահսկողությունն այս ոլորտում։

Ուկրաինայի կառավարության կողմից 113 մլն գրիվենի (2,7 մլն դոլար) հատկացումը խորհրդատուներին՝ ԱՄՆ-ի հետ օգտակար հանածոների վերաբերյալ գործարքի նախապատրաստման համար, գողություն է: Այս մասին Telegram-ալիքում հայտարարել է Գերագույն Ռադայի պատգամավոր Ալեքսանդր Դուբինսկին, գրում է Gazeta-ն

Նա նշել է, որ Ուկրաինայի արդարադատության նախարարության և ԱԳՆ-ի կազմում կան միջազգային իրավական հարաբերությունների և պայմանագրերի վարչություններ, որոնց պարտականությունների մեջ է մտնում նման փաստաթղթերի պատրաստումը:

«Այսինքն՝ առկա է իրավաբանների միջոցով պետական միջոցների հափշտակման սխեմա, ինչպես նաև ԱՄՆ-ի հետ բանակցությունները ձգձգելու գործիք։ Զելենսկին կրկին փորձում է «քցել» Թրամփին և ևս մի քանի միլիոն դոլար վաստակել», - ասվում է հաղորդագրության մեջ:

ՀՀ առաջին նախագահ Լևոն Տեր-Պետրոսյանը բուժզննման է ենթարկվել: Տեղեկությունը հայտնում է նախագահի մամուլի խոսնակ Արման Մուսինյանը։

«ՀՀ առաջին նախագահն այսօր այցելել է «Բեսթ լայֆ» բժշկական կենտրոն՝ պլանային հետազոտության»,– գրել է նա ֆեյսբուքյան էջում:

Հիշեցնենք` Մուսինյանը 2024 թվականի նոյեմբերին հայտնել էր, որ Տեր–Պետրոսյանը թեթև վիրահատական միջամտությունից հետո դուրս է գրվել կլինիկայից։

Հայաստանի Կառավարությունը հրաժարվում է պետական բյուջեից աջակցություն հատկացնել Արցախից բռնի տեղահանված այն ընտանիքներին, որոնք Արցախում իրենց տները կորցնելուց հետո եկել և ապաստան են գտել պետական կամ համայնքային սեփականություն հանդիսացող տարածքներում կամ պետական աջակցությամբ հյուրանոցներում և հյուրատներում։

Գործադիրն ընդունել է որոշում մինչև 2025 թվականի դեկտեմբեր ամիսն Արցախից բռնի տեղահանված ընտանիքների աջակցությունը շարունակելու մասին։

Սակայն այդ ծրագրի շահառու չեն կարող դառնալ համայնքային սեփականություն հանդիսացող տարածքներում ապաստանած ընտանիքները։

Ազգային անվտանգության ծառայությունից այս որոշման վերաբերյալ ընդգծել են, որ նման կացարաններում, որպես կանոն, բնակվում են սոցիալապես ամենաանապահով խմբերին պատկանող ընտանիքները։

Ըստ ԱԱԾ-ի՝ սոցիալական աջակցության միջոցառումներն անհրաժեշտ է կիրառել նաև նշված խմբի անձանց համար՝ կեցության և մյուս սոցիալական խնդիրներն ինքնուրույն հաղթահարելու հնարավորություն ստեղծելու նպատակով:

Աշխատանքի և սոցիալական հարցերի նախարարությունից, սակայն, մնացել են անդրդվելի և այդ մարդկանց չեն դարձրել այս ծրագրի շահառու։

Նշենք, որ պետական բյուջեից մինչև դեկտեմբեր արցախցիներին տրամադրվող աջակցությունները շարունակելու համար կհատկացվի 1.8 մլրդ դրամ։

Մոսկվան չի հրաժարվի Արևմուտքում սառեցված իր ակտիվների հանդեպ իրավունքներից և չի դադարի դրանք պաշտպանելուց։ Ինչպես տեղեկանում ենք ՏԱՍՍ գործակալությունից, այդ  մասին ճեպազրույցում հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Ռուսաստանը երբեք չի հրաժարվի իր սեփական ակտիվների նկատմամբ իրավունքներից և չի հրաժարվի այդ իրավունքների պաշտպանությունից», – ասել է Կրեմլի ներկայացուցիչը:

Եվրամիությունը, Կանադան, ԱՄՆ-ն ու Ճապոնիան Ուկրաինայում Ռուսաստանի ռազմական գործողությունների ծավալումից հետո սառեցրել են ՌԴ-ի շուրջ 300 միլիարդ դոլարի չափով ակտիվները։

Դրանցից մոտավորապես 5-6 միլիարդ դոլարը գտնվում է Միացյալ Նահանգներում, իսկ մեծ մասը՝ Եվրոպայում, այդ թվում՝ Բելգիայի միջազգային Euroclear հարթակում, որտեղ պահվում է 210 միլիարդ դոլար։ 

ԱՄՆ-ն չի բացառում Եվրոպայում տեղակայված զորքերի թիվը կրճատելու հարցը։ Այս մասին Սպիտակ տանը լրագրողների հետ զրույցում հայտնել է ԱՄՆ նախագահ Դոնալդ Թրամփը։

ԱՄՆ նախագահին հարց են ուղղել՝ արդյոք նա պլանավորում է կրճատել ամերիկյան զորքերի թիվը Եվրոպայում։

«Հնարավոր է: Այսինքն, դա կախված է (խմբ.՝ իրավիճակից): Մենք վճարում ենք Եվրոպայում զինվորականների համար: Մենք մեծ փոխհատուցում չենք ստանում։ Նույնն է Հարավային Կորեայի դեպքում: Այնպես որ, դա կլինի այն թեմաներից մեկը, որը մենք կքննարկենք: Դա առևտրի հետ կապված չէ, բայց ես կարծում եմ, որ մենք այն կդարձնենք դրա (խմբ.՝ առևտրային բանակցությունների) մաս, քանի որ դա տրամաբանական է։ Վատ չէր լինի այդ ամենը ամբողջացնել յուրաքանչյուր երկրի համար մեկ փաթեթում», – ասել է նա հրամանագրերի ստորագրման արարողության ժամանակ, որը հեռարձակել է Forbes Breaking News-ը։

Թրամփը հավելել է, որ այս հարցի շուրջ բանակցություններում կներգրավվեն ամերիկյան իրավաբանական ընկերությունները, որոնց հետ ԱՄՆ իշխանությունները պայմանագրեր են կնքել, և որոնք ԱՄՆ-ն կներկայացնեն շատ ու շատ երկրների հետ հարաբերություններում: 

Պենտագոնն ապրիլի 9-ին հայտնել էր, որ Միացյալ Նահանգները դեռ որոշում չի կայացրել Եվրոպայում ամերիկյան հետագա ռազմական ներկայության մակարդակի վերաբերյալ։

Ավելի վաղ NBC News-ը՝ վկայակոչելով ամերիկացի և եվրոպացի պաշտոնյաներին, հայտնել էր, որ Պենտագոնը դիտարկում է Արևելյան Եվրոպայից՝ Ռումինիայից և Լեհաստանից մինչև 10 000 զինվորականի դուրս բերելու հնարավորությունը։

Ստամբուլում ավարտվել են ռուսական և ամերիկյան կողմերի միջև խորհրդակցությունները, որոնք թեման դեսպանատների աշխատանքի կարգավորումն էր: Խորհրդակցությունները տևել են 5,5 ժամ, փոխանցում է ՏԱՍՍ-ը։

Հոդվածում ասվում է, որ բանակցություններն ավարտվել են առանց մամուլի համար հայտարարությունների։

Քաջատեղյակ աղբյուրը հայտնել է, որ պատվիրակությունների բանակցություններն ընթացել են հանգիստ և կառուցողական հունով։ Նա նշել է, որ խորհրդակցությունները սկսվել են Մոսկվայի ժամանակով ժամը 10:00-ին։ Ռուսաստանի շահերը ներկայացրել է ԱՄՆ-ում դեսպան Ալեքսանդր Դարչիևը, իսկ Վաշինգտոնինը` պետքարտուղարի՝ Եվրոպայի և Եվրասիայի հարցերով օգնականի տեղակալ Սոնատա Կուլտերը:

Ռուսաստանն ու ԱՄՆ-ն Աբու Դաբիում բանտարկյալների փոխանակում են իրականացրել: Այս մասին հայտնում է The Wall Street Journal-ը՝ վկայակոչելով Կենտրոնական հետախուզական վարչությaն ներկայացուցչին:

Մոսկվան ազատ է արձակել ԱՄՆ-ի և Ռուսաստանի քաղաքացի Քսենիա Կարելինային, ով դատապարտվել է 12 տարվա ազատազրկման պետական դավաճանության գործով:

ԱՄՆ-ն ազատ է արձակել Արթուր Պետրովին, ով բացի ռուսականից ունի նաև Գերմանիայի քաղաքացիություն: Նրան մեղադրել են ամերիկյան արտադրության միկրոէլեկտրոնիկա Ռուսաստանին մատակարարելու մեջ՝ շրջանցելով պատժամիջոցները։ 

Հայաստանի վարչապետ Նիկոլ Փաշինյանը հայտարարություն է տարածել Հանրային խորհրդի կազմավորման մասին։

Վարչապետի հայտարարությունը հրապարակվել է ՀՀ կառավարության կայքում։ Վարչապետը հայտնել է, որ սահմանված կարգով ընտրված Հանրային խորհրդի 45 անդամների կազմից Հանրային խորհրդի նախագահի թեկնածությունը ներկայացրել էր ՀՀ կառավարության քննարկմանը։ 

«Կառավարության 2025 թվականի ապրիլի 9-ի N 389-Ա որոշմամբ Հանրային խորհրդի նախագահ է նշանակվել Արայիկ Խզմալյանը։ 2025 թվականի ապրիլի 10-ից Հանրային խորհուրդը համարվում է կազմավորված»,- ասված է վարչապետի հայտարարության մեջ։