ԱՄՆ դոլարի փոխարժեքն այսօր՝ ապրիլի 25-ին, կազմել է 390.33  դրամ՝ նախորդ օրվա համեմատ աճել է 0.77 դրամով: Այդ մասին տեղեկանում ենք Կենտրոնական բանկի պաշտոնական կայքից։

Եվրոյի փոխարժեքը կազմել է 444.14 դրամ (նվազել  է 1.00 դրամով), բրիտանական ֆունտի փոխարժեքը կազմել է  519.57 դրամ (աճել է 1.42 դրամով), իսկ ռուսական ռուբլու փոխարժեքը կազմել է 4.73 դրամ (աճել է 0.02 դրամով):

Հայաստանյան բանկերում դոլարը գնվում է 386-388 դրամով, վաճառվում է 391.5-392.5 դրամով:

Եվրոն բանկերում գնվում է 432-438 դրամով, վաճառվում է 444-451 դրամով:

Ռուբլին բանկերում գնվում է 4.45-4.64 դրամով, վաճառվում է 4.77-4.95 դրամով: Փոխանակման կետերում իրավիճակը հետևյալն է.

դոլարը գնվում է 387-388 դրամով, վաճառվում՝ 392.5-392 դրամով:

Եվրոն գնվում է 437-438 դրամով, վաճառվում է 444-445 դրամով:

Ռուբլին գնվում է 4.58 դրամով, վաճառվում է 4.70 դրամով:

ՀՀԿ ԳՄ անդամ Արտակ Զաքարյանի ֆեյսբուքյան գրառումը․ «Առաջարկում եմ նայեք այս ռեպորտաժը և հիշեք, թե ինչ կայացած ու ամուր պետականություն եք ունեցել ընդամենը 10 տարի առաջ:

Նայեք ու վերհիշեք, թե Հայաստան-Արցախ-Սփյուռք եռամիասնությունը, նախագահ Սերժ Սարգսյանի գլխավորությամբ, 100-րդ տարելիցի կապակցությամբ ինչպես էր մոբիլիզացրել ամբողջ աշխարհին՝ Հայոց Ցեղասպանությունը կրկին դատապարտելու և ճանաչելու պահանջով:

Նայեք ու վերհիշեք, թե ինչպիսի պետության քաղաքացի էիք դուք ու ընդամենը յոթ տարում ինչպես եք կորցրել ձեր դիրքերն աշխարհում: Հիշեք, թե այս յոթ տարում ինչպես եք կորցրել ձեր հայրենիքի ամենաուժեղ հատվածը, ձեր լավագույն սերնդի մի մասին, ձեր պատմական հիշողությունների և ինքնության հետ կապը, ձեր անվտանգությունն ու ապագանն: Նայեք ու վերհիշեք, թե ինչպես էր Հայաստանն իր քաղաքական օրակարգերով ամրացրել դիրքերն աշխարհում ու համեմատեք տեսեք, թե ինչ ողբերգական ու ստորացած վիճակում է հայտնվել այսօր:

Նայեք ու համոզվեք, որ ուղիղ յոթ տարի առաջ, 2018թ. ապրիլի 23-ին, ոչ թե Սերժին ու ՀՀԿ-ին եք մերժել՝ այլ ինքներդ ձեզ, ձեր պապերին ու հայրերին, ձեր զավակներին ու թոռներին եք մերժել: Ձեր իրական անկախությունն ու անվտանգությունն եք մերժել, ձեր Արցախն եք մերժել, ձեր Սրբադասված 1,5 միլիոն Զոհերի հիշատակն եք մերժել: Ձեր հայկական ինքնությունն ու արժանապատվությունն եք մերժել, ձեր հաղթանակած բանակի մարտական ուղին եք մերժել: Եվ վերջապես ձեր բանականությունը, տրամաբանությունն ու ներազգային համերաշխությունն եք մերժել:

Լրանում է Հայոց Ցեղասպանության 110-րդ տարելիցը: Դարձել ենք առանց Արցախի, առանց երաշխավորված անվտանգության, առանց համազգային համերաշխության, առանց ազգային արժանապատվության՝ պարտված ու քաղաքականապես կողոպտված պետություն:

Ի՞նչ ունեք աշխարհին ասելու...

Ունե՞ք աշխարհին ասելիք, թե Արցախը պաշտոնապես հանձնելուց հետո եկել է Հայոց Ցեղասպանության միջազգային ճանաչման հարցը պաշտոնապես ուրանալու ժամանակը»:

«Հրապարակ» թերթը գրում է. «Արցախցիների իրավունքների պաշտպանության խորհուրդն այսօր նախատեսում է միջոցառում կազմակերպել Ազատության հրապարակում՝ Հայոց ցեղասպանության 110-րդ տարելիցի կապակցությամբ, որից հետո երթ կանեն ու կմիանան Հանրապետության հրապարակից սկիզբ առնող ավանդական ջահերով երթին, որի կազմակերպիչը ՀՅԴ երիտթեւն է։

Տեղեկություններ կան, որ քաղաքական այլ շրջանակներ եւս պատրաստվում են միանալ ջահերով երթին։ Իշխանական կուլիսներում երեկ անհանգիստ էին այս միջոցառումներից, կասկածներ ունեին, որ դրանք կարող են հակաիշխանական ցույցի վերածվել՝ թույլ չտալով, որ ապրիլի 24-ի առավոտյան իշխանությունն այցելի Ծիծեռնակաբերդի հուշահամալիր։

Ի դեպ, 2018-ի ապրիլի 23-ին Սերժ Սարգսյանը հրաժարական ներկայացրեց հենց այդ հաշվարկով, որ ապրիլի 24-ին խայտառակ չլինի, եւ աշխարհը չտեսնի, որ հայ ժողովուրդը թույլ չի տվել իր պետության ղեկավարին՝ այցելելու զոհերի հուշահամալիր»:

Փոխվարչապետ Մհեր Գրիգորյանն ընդունել է Հայաստանի Հանրապետությունում Ամերիկայի Միացյալ Նահանգների արտակարգ և լիազոր դեսպան Քրիստինա Քվինին: Հայտնում են ՀՀ կառավարությունից։

Զրուցակիցները հանդիպման ընթացքում քննարկել են Հայաստան-ԱՄՆ երկկողմ հարաբերությունների օրակարգային հարցերը, ինչպես նաև համագործակցության ընդլայնման հնարավորությունները: Անդրադարձ է կատարվել տարածաշրջանային զարգացումներին, մասնավորապես՝ մտքեր են փոխանակվել տարածաշրջանում հարատև կայունության և խաղաղության հաստատման ուղղությամբ հայկական կողմի ջանքերի վերաբերյալ: Այս համատեքստում փոխվարչապետը կարևորել է «Խաղաղության խաչմերուկ» նախաձեռնության իրականացումը:

«Ժողովուրդ» օրաթերթը գրում է. ««Ժողովուրդ» օրաթերթի՝ Կառավարությանը մոտ կանգնած աղբյուրները փոխանցում են, որ հայրենի իշխանությունները նպատակ ունեն ՀՀ-ում գոյություն ունեցող բոլոր տեսչական մարմինները միավորելու:

Ըստ մեր աղբյուրների՝ իշխանությունները Նիկոլ Փաշինյանի գլխավորությամբ «դաբրո» են տվել այդ նախագծին: Այսինքն՝ առաջիկայում բունտ է հասունանալու, քանի որ տեսչական մարմինների միավորմամբ շատ աշխատակիցներ են կրճատվելու, ու ընդամենը մի փոքր տեսչական կոմիտե է ստեղծվելու:

Կառավարության մեր աղբյուրները փոխանցում են, որ այս ամենի հետեւում ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանն է կանգնած, որի կարծիքով՝ տեսչություններ ունենալը անիմաստ է, ու պետք է փակել տեսչական մարմինները:

Այսինքն, տարիներ շարունակ իշխանությունները հայտարարել են, թե անկախ կառույցներ ունեն, որոնք վերահսկում են տարբեր գերատեսչություններ, հիմա ստացվում է՝ դա անիմաստ գործ է եղել, չհաշված, որ այդքան քաղաքացիներ մնալու են առանց աշխատանքի:

Մեր տեղեկություններով՝ առաջիկա ամիսներին կլուծարեն տեսչությունները, ու կոմիտեն զրոյից կգործարկեն: Թե առաջիկայում ինչ իրավիճակ կստեղծվի այդ կառույցներում, ցույց կտա ժամանակը»։

ԱՄՆ նախագահի Մերձավոր Արևելքի հարցերով հատուկ բանագնաց Սթիվ Ուիթքոֆը նախատեսում է այցելել Մոսկվա։ Այդ մասին հայտարարել է Ռուսաստանի Դաշնության նախագահի օգնական Յուրի Ուշակովը, հաղորդում է «Ինտերֆաքս»-ը։

Լրագրողների հարցին՝ արդյոք սպասվում է Ուիթքոֆի ժամանումը, Ուշակովը կարճ պատասխանել է. «Սպասում ենք»։

Հրապարակը գրում է.

Հայաստանում թմրանյութերի շրջանառությունը տագնապեցնող չափերի է հասել:

Իրավիճակն այնքան է դուրս եկել վերահսկողությունից ու դարձել կրիտիկական, որ նախորդ տարվա դեկտեմբերին ՀՀ կառավարությունը առաջարկությամբ հանդես եկավ` դպրոցականների շրջանում թմրամիջոցների գործածման կամավոր թեստավորման մեխանիզմ ներդնելու մասին։

Թմրամիջոցների գործածման և ապօրինի շրջանառության դեմ պայքարի ռազմավարության նախագծի համաձայն, այդ մեխանիզմը թույլ կտա պարբերական ստուգումների միջոցով անչափահասների շրջանում առավել վաղ փուլերում հայտնաբերել նման դեպքերը։ 
Հայաստանում տարեցտարի աճում է թե թմրամիջոցների հետ կապված հանցագործությունների և թե թմրանյութեր օգտագործող անձանց թիվը։

Պաշտոնական տվյալներով՝ եթե 2018-ին գրանցվել էր 877 դեպք, ապա 2023-ին այդ թիվը հնգապատկվել է՝ անցնելով 5000-ից։ Իսկ նախորդ տարի` 2024-ին` մեկ տարվա ընթացքում 10 անչափահասի գործ է ուղարկվել դատարան՝ թմրանյութերի ապօրինի շրջանառության մեղադրանքներով: 

Մասնագետները պնդում են, որ առավել վտանգավոր է այն, որ անչափահասների շրջանում թմրանյութերի իրացման թիվը բավականին մեծ է, սակայն պաշտոնական վիճակագրությունը չի արտացոլում ողջ իրական պատկերը, քանի որ շատ դեպքեր պարզապես չեն արձանագրվում:

Երևանի Նիկոլ Աղբալյանի անվան թիվ 19 դպրոցի ծնողներից մեկը դիմել էր «Հրապարակի» խմբագրություն եւ պատմում էր, որ իր որդուն դպրոցում ոստիկանները խուզարկել են եւ ծնողի խոսքով` 7-րդ դասարանի բոլոր երեխաների գրպանները, պայուսակները, մինչև անգամ գրքերի և տերերի արանքներն են ոստիկանները ստուգել` բացատրելով, որ կոնֆետանման թմրամիջոցներ են փնտրում: Մեզ ահազանգած քաղաքացին պնդում է, որ այս հանգամանքը որոշ ծնողների խիստ մտահոգել է: 

«Հրապարակը» փորձեց հասկանալ, թե ինչ է տեղի ունեցել դպրոցում օրեր առաջ, ինչո՞ւ են ոստիկանները, ծնողների խոսքով` խուզարկել երեխաներին: Աղբալյանի անվան թիվ 19 դպրոցի տնօրենի հետ փորձեցինք զրուցել, սակայն նա տեղում չէր, նրա փոխարեն մեր հարցերին պատասխանեց փոխտնօրեն Մանուկյանը, որը հավաստիացրեց, որ որևէ խուզարկություն տեղի չի ունեցել դպրոցում` ոչ օրեր առաջ, ոչ էլ անգամ շաբաթներ առաջ. «Ես չգիտեմ, թե խոսքն ինչի մասին է: Իրականում ոչ մի խուզարկություն էլ տեղի չի ունեցել: Չարախոսում են: Ոստիկանները ժամանակ առ ժամանակ գալիս են դպրոց, զրույց-դասեր անցկացնում երեխաների հետ, ինչո՞ւմն է խնդիրը», - ասում է փոխտնօրենը: 

Հակառակ դպրոցի փոխտնօրենի պնդումների Ներքին գործերի նախարարությունից «Հրապարակին» հայտնեցին. «Ոստիկանների կողմից նշված դպրոցում ստուգում է եղել, սակայն ոչ խուզարկություն, զուտ ստուգումներ են անցկացվել: Թմրանյութերի ուղղությամբ է եղել ստուգումը, սակայն ոչ մի բան չի հայտնաբերվել», - նշեց ՆԳՆ խոսնակը և հավելեց, որ Երևանի մյուս դպրոցներում էլ են պարբերաբար նման ստուգումներ իրականացվում: Այս դպրոցում է սովորում Երևանի փոխքաղաքապետ Լևոն Հովհաննիսյանի քենու որդին է:

Ըստ շրջանառվող լուրերի` հենց Հովհաննիսյանի քենու որդին է մանկավարժների մոտ նման կասկած հարուցել, ինչից հետո ուսուսցիչները դիմել են ոստիկաններին` պրոֆիլակտիկ աշխատանքներ կատարելու խնդրանքով: Հիշեցնենք, որ նախորդ տարվա հոկտեմբերին էլ այդ տղան գազային նյութ էր պայթեցրել դպրոցում և խաթարել դասապրոցեսը:

Ֆրանսիական կողմը Փարիզում Ռուսաստանի դեսպանատան դիվանագետներին չի հրավիրել Հաղթանակի օրվա տոնակատարությանը: Այդ մասին «ՌԻԱ Նովոստի» գործակալությանը հայտնել է Ֆրանսիայում Ռուսաստանի Դաշնության դեսպան Ալեքսեյ Մեշկովը։

«Խորհրդային Միությունն իր վրա ընդունեց վճռական հարվածը ֆաշիզմի դեմ պայքարում. Հայրենական մեծ պատերազմում զոհվել է 27 միլիոն մարդ: Չնայած դրան, Ռուսաստանի ներկայացուցիչներն արդեն առաջին տարին չէ, որ չեն հրավիրվել Ֆրանսիայում հիշատակի պաշտոնական միջոցառումներին, որոնք նվիրված են ֆաշիզմի նկատմամբ տարած հաղթանակին», – ասել է դիվանագետը:

Ամենայն Հայոց Կաթողիկոս Ն.Ս.Օ.Տ.Տ. Գարեգին Բ-ն կմասնակցի Հռոմի պապ Ֆրանցիսկոսի հուղարկավորության արարողությանը։

Այս մասին լրատվամիջոցներին հայտնել է Տեր Եսայի քահանա Աթենյանը։ 

Հուղարկավորության արարողությունը կկայանա շաբաթ օրը՝ ապրիլի 26-ին, Վատիկանում։ 

ԱՄՆ-ի 100-ից ավելի համալսարաններ և քոլեջներ ապրիլի 22-ին համատեղ նամակ են հրապարակել՝ քննադատելով նախագահ Դոնալդ Թրամփի «քաղաքական միջամտությունը» կրթական համակարգին։ Այս մասին հաղորդում է AFP գործակալությունը։ 

«Մենք միաձայն դեմ ենք արտահայտվում կառավարության աննախադեպ չափն անցնելուն և քաղաքական միջամտությանը, որն այժմ վտանգում է ամերիկյան բարձրագույն կրթությունը», – ասված է նամակում։

«Մենք պատրաստ ենք կառուցողական բարեփոխումների և դեմ չենք կառավարության օրինական վերահսկողությանը: Այնուամենայնիվ, մենք պետք է դեմ կանգնենք կառավարության անտեղի ներխուժմանը», – նամակից հատված է մեջբերում գործակալությունը։

AFP-ն նշում է, որ Թրամփը փորձել է վերահսկողություն սահմանել մի շարք հեղինակավոր բուհերի նկատմամբ այն պնդումների պատճառով, թե նրանք համալսարանում հանդուրժում են հակասեմականությունը։ ԱՄՆ վարչակազմը սպառնացել է կրճատել նրանց բյուջեները, զրկել հարկերից ազատված լինելու կարգավիճակից և թույլ չտալ օտարերկրյա ուսանողների ընդունել:

Նամակում ասվում է, որ համալսարաններն ու քոլեջները հանդիսանում են կենտրոններ, որտեղ «դասախոսական կազմը, ուսանողները և անձնակազմը ազատ են մտքեր և կարծիքներ փոխանակելու» մի շարք հարցերի շուրջ՝ չվախենալով «հատուցումից, գրաքննությունից կամ արտաքսումից»:

Նամակի հրապարակումից առաջ Հարվարդի համալսարանը դատական հայց էր ներկայացրել Թրամփի վարչակազմի դեմ, որը սպառնացել էր կրճատել ֆինանսավորումը և արտաքին քաղաքական վերահսկողություն սահմանել համալսարանի նկատմամբ։