ՌԴ–ում ԱՄՆ դեսպան Լին Թրեյսին շուտով կավարտի իր դիվանագիտական առաքելությունը։ Այս մասին տեղեկացնում է ամերիկյան դիվանագիտական առաքելության Telegram–յան ալիքը։
«Միացեք մեր հատուկ ուղիղ եթերին` հրաժեշտ տալու դեսպան Լին Թրեյսիին, որը շուտով կավարտի իր առաքելությունը ՌԴ–ում ԱՄՆ դեսպանատանը», – ասվում է հայտարարության մեջ։
Հիշեցնենք` 2022 թվականի դեկտեմբերին Լին Թրեյսին դարձավ ԱՄՆ–ի առաջին կին դեսպանը Ռուսաստանում։
Մինչ այդ նա գլխավորում էր Հայաստանում ԱՄՆ դիվանագիտական ներկայացուցչությունը։
Հայաստանի իշխանություններն աննախադեպ հարձակում են սկսել հոգևորականության վրա: Թեմային անդրադարձել է Известия-ն։
Ըստ հոդվածի՝ ներկայիս հակամարտության համար կան մի քանի պատճառներ: Մի կողմից՝ Հայ եկեղեցին, ըստ էության, մնում է միակ պետական ինստիտուտը, որն անկախ է Փաշինյանից և նրա թիմից: Ավելին՝ կրոնական կառույցը բազմիցս արտահայտվել է հայրենասիրական դիրքերից՝ դառնալով բողոքի տրամադրությունների հենարան: Անցյալ գարնանը ՀԱԵ-ի հոգևորականներն էին, որ դեմ արտահայտվեցին Տավուշի մարզում Ադրբեջանի հետ սահմանազատմանը:
«Անցյալ տարի բողոքի շարժումը, ի վերջո, մարեց, բայց Հայ եկեղեցու սկզբունքային դիրքորոշումը չի վերացել։
Փաշինյանի թիմն անընդհատ խոսում է Ադրբեջանի հետ խաղաղության ցանկության մասին, բայց կրոնական գործիչները չեն մոռանում Ղարաբաղի մասին: Մայիսի վերջին Շվեյցարիայում Գարեգին II-ի նախաձեռնությամբ տեղի է ունեցել միջազգային համաժողով, որտեղ քննարկվել են կորուսյալ տարածաշրջանում հայկական հոգևոր և մշակութային ժառանգության պահպանման հարցերը: Կաթողիկոսն ինքը միջոցառման ժամանակ հայտարարել է, որ Ղարաբաղում տեղի է ունեցել ցեղասպանության և էթնիկ զտման ակտ, որի արդյունքում՝ տարածաշրջանը օկուպացվել է, իսկ բնիկ բնակչությունը՝ վտարվել: Այս ամենը բացարձակապես անհավանական թեզեր են ներկայիս Հայաստանի ղեկավարության համար, քանի որ Նիկոլ Փաշինյանը և նրա թիմի ներկայացուցիչներն ամբողջ ուժով փորձում են հաշտվել Բաքվի հետ:
Դրա համար նրանք պատրաստ են գնալ տարբեր զիջումների, այդ թվում՝ Սահմանադրության փոփոխության։
Բացի այդ՝ մոտ մեկ տարի անց Հայաստանում պետք է անցկացվեն ամենակարևոր խորհրդարանական ընտրություններ, իսկ իշխող կուսակցությունը նախընտրական քարոզարշավին մոտենում է դժվարին իրավիճակում․ գարնանը իշխող կուսակցության ներկայացուցիչները կորցրել են միանգամից երկու կարևոր պաշտոն՝ պարտվելով Շիրակի և Փարաքարի քաղաքապետի ընտրություններում:
Հարցումների համաձայն՝ «Քաղաքացիական պայմանագրի» վարկանիշը կազմում է ընդամենը 11%։
Միևնույն ժամանակ՝ եկեղեցին մեծ վստահություն է վայելում բնակչության շրջանում։ Հնարավոր է, որ այն աջակցի իշխող կուսակցության հակառակորդներին՝ այդպիսով մեծացնելով նրանց հաղթանակի հնարավորությունները։ Հնարավոր է՝ նման սցենարը կանխելու համար սկսվել է հոգևորականությանը վարկաբեկելու արշավ։ Բացի այդ՝ իշխանությունները կարող են ցանկանալ հիմա որոշակի բողոքի ցույցեր հրահրել, որպեսզի ընտրությունների օրը դրանք արդեն մարած լինեն։ Վերջապես, Հայաստանի ներկայիս իշխանությունները շատ բան են անում հայ ազգային ինքնությունը վերաձևակերպելու համար։ Երևանը կարծում է, որ դա կօգնի բարելավել հարաբերությունները Ադրբեջանի և Թուրքիայի հետ։ Հնարավոր է, որ նրանք այժմ որոշել են քանդել Հայ ազգային եկեղեցին», – գրել է թերթը։
ՀՀԿ ԳՄ անդամ Մարգարիտ Եսայանի ֆեյսբուքյան գրառումը․ «Քանզի ինքս, բարեբախտաբար, ԱԺ պատգամավոր չեմ և չեմ հանդիսանում «Պատիվ ունեմ» խմբակցության անդամ, երեկ, երբ տարածվեց «Հայաստան» դաշինքի ղեկավարի «հպարտ» հայտարարություն-գրառումը, թե իրենց 28 պատգամավորները ստորագրեցին վարչապետին անվստահություն հայտնելու ձևաթուղթը, սրտանց ուրախացա, իրոք, ականատեսներ կան, երեխայի պես ուրախացա և շտապեցի ողջունել այդ քայլը։ Ուրախացա, որ իմ որոշ ընկեր-բարեկամների հարցում չեմ սխալվել, երբ կարծել եմ, որ կարևոր-ճակատագրական պահին նրանք կանեն ճիշտ և հայրենանպաստ քայլ։
Բայց, ուրախությունս կարճ տևեց, որովհետև անմիջապես պարզվեց, ավելի ճիշտ՝ հայտնի դարձավ, որ, այն, ինչ պարոն գեներալը ներկայացրել և, ապա, իրենց պատգամավորները հպարտորեն տիրաժավորել են, դեռ՝ հոխորտալով, իմպիչմենտի նախաձեռնողների հասցեին մատ թափ տալով, թե, ահա, ստորագրություն էիք ուզո՞ւմ, ստացեք, ոչ այլ ինչ է, եթե ոչ ամենասովորական, էժանագին և՝ տխուր բլեֆ, այլ բառով՝ սուտ։ Որովհետև ստորագրությունների այն թերթիկը, որը ներկայացվեց և անգամ իրենց շարքերին մոլորության մեջ գցեց, առհասարակ ոչ մի կապ չունի անվստահության գործընթացի հետ, դա սովորական մի թերթիկ է, որը, հավանաբար, ինչպես բացահայտեցին պատգամավորները
«Պատիվ ունեմ» խմբակցությունից, ՍԴ-ին ժամանակին ուղղված ստորագրությունների թերթիկ է, որը, ընդորում, ներկայացվել է ոչ ամբողջությամբ, քանզի նման թերթիկ-գրառումներում, ուղղված ՍԴ-ին, եղել են նաև «Պատիվ ունեմ» խմբակցության պատգամավորների ստորագրությունները, և այդ հատվածը, հասկանալի պատճառներով, տվյալ դեպքում չի ներկայացվել։ Ցավով արձանագրեցի, որ «գեղցիական շյուստրիությունը» միայն նիկոլին չէ հատուկ։
Ինչո՞ւ եմ սա գրում, պարզ է, չէ՞, որ կարող էի փոփ-կորն առնել և դիտել այս տրագիկոմեդիան, բայց սիրտս ցավում է, այս ֆարսը անձամբ ես ընդունում եմ նաև որպես անձնական վիրավորանք, որովհետև իմ շատ ընկերներ, շարքային դաշնակցականներ եւ այլք, նույնպես ազնիվ մոլորության մեջ են, ինչպես ես էի երեկ-երեկոյան տվյալ «ստորագրությունները» հրապարակվելուց անմիջապես հետո։ Այո, քաղաքականությունը կարող է լինել նաև՝ անազնիվ, սա հենց այդ դեպքն է։ Մի՞թե մտածում էիք, որ այս էժանագին բլեֆը չի բացահայտվելու, թե՞ մտածում էիք, մենք կշարունակենք պարկեշտ գտնվել և չխոսել այս մասին։ Մենք, որ 2018-ից հետո անգամ, ձեզ հետ կողք-կողքի կռվել, ծեծվել, բանտ ենք նստել։ Ուրեմն, իրոք, 2018-ի թելերը ձեզ դեռ կապկպված են պահում։
Այս ամբողջ խայտառակ ֆարսի միակ ամոթն այն է, որ մի խուլ անկյունում նստած «գող փիսոն» քմծիծաղում և ատամներն է կրճտացնում։
Հ․Գ․ Մի արեք, պարզապես մի արեք, քաղաքը փոքր է, մի օր իրար երեսի ենք նայելու, երեսատեղ թողեք»
Իրանի զինված ուժերը պատրաստ են ցանկացած սցենարի, այդ թվում՝ պատերազմի, հայտարարել է Իսլամական հեղափոխության պահապանների կորպուսի (ԻՀՊԿ՝ Իրանի զինված ուժերի մաս) հրամանատար Հոսեյն Սալամին՝ Իրանին հնարավոր հարվածի մասին հաղորդագրությունների ֆոնին։ «Թշնամին երբեմն մեզ սպառնում է ռազմական սցենարով։ Մենք միշտ ասել ենք և այսօր էլ կրկնում ենք՝ մենք բացարձակապես պատրաստ ենք ցանկացած սցենարի», - Սալամիի խոսքերն է մեջբերում SNN-ը։
«Թշնամուն զգուշացնում ենք սխալներ չգործել և ուշադիր մտածել իրենց գործողությունների հետևանքների մասին», - նշել է Սալամին։
Հիշեցնենք, CBS-ը, հղում անելով ԱՄՆ պաշտոնյաներին, հայտնել էր, որ Իսրայելը պատրասստ է Իրանի դեմ ռազմական գործողությունների։ Նախագահ Թրամփը «վտանգավոր վայր» էր անվանել Մերձավոր Արևելքը։
|
NDTV-ն հայտնում է, որ 242 ուղևոր տեղափոխող ինքնաթիռ է վթարի ենթարկվել Հնդկաստանի արևմտյան Ահմադաբադ քաղաքի օդանավակայանի մոտակայքում։ Սոցիալական ցանցերում տարածվում են, ենթադրաբար, դեպքի վայրից կադրեր։ «Air India ավիաընկերության ուղևորատար ինքնաթիռի վթարից հետո կան ողջ մնացածներ»,- հայտնում է հեռուստաալիքը։ Նախնական տեղեկությունների համաձայն՝ Air India-ի Airbus A320-ը, որը Ահմադաբադից մեկնում էր Դելի, չի կարողացել բարձրություն հավաքել և վթարի է ենթարկվել բնակելի թաղամասում։ Մանրամասները ճշտվում են։ |
Մեծ տարածաշրջանում իրավիճակն այս պահին առնվազն քաղաքական և քարոզչական հարթություններում տեսանելիորեն շիկանում է։ Այս մասին Facebook–ի իր էջում գրել է տարածաշրջանային հարցերով փորձագետ Արմեն Պետրոսյանը։
Նա, մասնավորապես, նշել է. «Ընթացիկ շաբաթվա ավարտին նախանշված ԱՄՆ-Իրան բանակցությունների հերթական շրջափուլին ընդառաջ՝ կողմերը կիրառում են քաղաքական, քարոզչական, հոգեբանական ճնշման լայն գործիքակազմ։
Վերջին օրերի ընթացքում ԱՄՆ-ից ամենաբարձր՝ նախագահի մակարդակով հայտարարվում է թերահավատություն հնարավոր գործարքի հաջողման հարցում։ Պաշտպանական ոլորտի պատասխանատուները քննարկում են խնդրի լուծման հնարավոր ռազմական սցենարներ, ամերիկյան մեդիայում պարբերաբար հրապարակվող տարաբնույթ «ներքին» տեղեկություններն ավելի են մեծացնում լարվածությունը։
Բնականաբար իրանական կողմն էլ պատասխանում է համարժեք՝ նախագահ, ԱԳՆ, ՊՆ և այլ մակարդակներով՝ հռետորոբանության հարթությունում առաջ մղելով սեփական պաշտոնական դիրքորոշումն «ուրանը սահմանափակ հարստացնելու» իրավունքի վերաբերյալ, քարոզչական տեսանկյունից՝ ի ցույց դնելով նոր հեռահար զինատեսակների փորձարկման բովանդակություն, սեփական անվտանգությունն ապահովելու և թշնամիներին թիրախավորելու հին և նոր հնարավորությունները։ Ի դեպ, Իսրայելի միջուկային կարողություններն առնչվող գաղտնի տեղեկատվության ստացման վերաբերյալ վերջին հրապարակումներն էլ հստակ ուղերձ են հրեական պետությանն առ այն, որ ի պատասխան Իրանի դեմ թիրախային գործողությունների՝ Թեհրանն ընդունակ է համարժեք պատասխանելու։
Ներկա իրավիճակային գնահատականի համատեքստում, իհարկե, այս պահին մեծ պատերազմի սցենարը շարունակում է զիջել դիվանագիտության հնարավորություններին, և ներկայում հենց դիվանագիտական հարթությունում դիրքերի ամրապնդման նպատակով կողմերը փորձում են կիրառել ողջ օժանդակ զինանոցը, ռազմաքաղաքական մանևրները։
Բայցևայնպես, հերթական անգամ հիշեցման կարգով՝ շատ մեծ է հավանականությունը, որ Իրանի դեմ ռազմական սցենարի կիրառման դեպքում Հարավային Կովկասն Ադրբեջանի ձեռամբ (որը տևական ժամանակ պատրաստվում է տարածաշրջանային պատերազմին) ևս ներքաշվելու է հնարավոր ռազմական գործողությունների մեջ։
Նոր մանրամասներ են հայտնի դարձել նախօրեին՝ հունիսի 11–ին, Երեւանի Միսաք Մեծարենցի անվան 146 հիմնական դպրոցի տարածքում տեղի ունեցած դանակահարության դեպքից։
Դպրոցից հայտնում են, որ միջադեպը եղել է երկու 14 տարեկան պատանիների միջեւ։ Դանակահարվածը սովորում է այդ դպրոցում, իսկ մյուս տղան մեկ այլ դպրոցի աշակերտ է։
Դանակահարվածը սովորում է 9–րդ դասարանում եւ երեկ դասարանցիների հետ եկել էր դպրոց քննությունների հետ կապված լրացուցիչ ինֆորմացիա ստանալու համար, քանի որ այսօր քննության էին։
Դեպքը տեղի է ունեցել դպրոցի հետնամասում։ Երեխային իրենք նկատել են այն ժամանակ, երբ վազելով եկել եւ մտել է դպրոցի շենք։ Առաջին օգնությունը ցուցաբերել են ուսուցիչները, այդ թվում ֆիզկուլտուրայի ուսուցիչը։ Այնուհետեւ ժամանել է Շտապօգնություն, ոստիկաններ։
Դպրոցից հայտնեցին նաեւ, որ տուժած աշակերտը հայտարարել է, որ չի ճանաչում դանակահարողին։
Տղան վնասվածքը ստացել է դաստակի հատվածում, վիրահատության է ենթարկվել։ Ամեն ինչ նորմալ է այս պահին, կյանքին վտանգ չի սպառնում։
Դեպքի առթիվ 2025 թվականի հունիսի 11-ին Աջափնյակ և Դավթաշեն վարչական շրջանների քննչական բաժնում՝ ՀՀ քրեական օրենսգրքի 167-րդ հոդվածի 2-րդ մասի 4-րդ և 8-րդ կետերի հատկանիշներով նախաձեռնվել է քրեական վարույթ:
Կա 1 տուժող: Նախաքննության ընթացքում նշանակվել է դատաբժշկական-դատահետքաբանական համալիր փորձաքննություն:
ԱՄՆ-ի եւ Իրանի միջեւ միջուկային թղթապանակի շուրջ բանակցությունների վեցերորդ փուլը կկայանա Մասկատում կիրակի՝ հունիսի 15-ին։
Այս մասին հայտնել է բանակցային գործընթացում միջնորդ հանդիսացող Օմանի արտգործնախարար Բադր ալ-Բուսաիդին։
«Ուրախ եմ հաստատել, որ Իրանի եւ ԱՄՆ-ի միջեւ բանակցությունների վեցերորդ փուլը կկայանա այս կիրակի Մասկատում»,- գրել է նախարարը X սոցցանցի իր էջում։
Այսօր՝ հունիսի 12-ին, ավտովթար է տեղի ունեցել Երևանում։ Ինչպես հայտնում է Shamshyan.com-ը, ժամը 03։00-ի սահմաններում Պուշկին և Աբովյան փողոցների խաչմերուկում բախվել են «Mercedes G» մակնիշի և «BMW» մակնիշի ավտոմեքենաները, ինչի հետևանքով վերջինը մասամբ հայտնվել է հետիոտնի համար նախատեսված մայթին։
Վթարի հետևանքով, ըստ նախնական տեղեկությունների, տուժածներ չկան։
Վթարի փաստով ՊԾ Երևան քաղաքի գնդի 2-րդ գումարտակում փաստաթղթեր են ձևակերպվում, որտեղ էլ պարզվում են վարորդների ինքնությունը։
«Ալկոհոլային արտադրանքի անվտանգության մասին» ՏԿ-ն ուժի մեջ է մտնում 2026թ․-ի հունվարի 1-ից:
«Հիշեցնում ենք, որ 2018 թվականին հաստատված Եվրասիական տնտեսական միության «Ալկոհոլային արտադրանքի անվտանգության մասին» 047 տեխնիկական կանոնակարգի ուժի մեջ մտնելու ժամկետը հետաձգվել է. ԵԱՏՄ 2025թ․ փետրվարի 21-ի թիվ 21 որոշման համաձայն՝ այն 2025 թվականի հուլիսի 1-ի փոխարեն ուժի մեջ է մտնելու 2026թ․ հունվարի 1-ից»,- նշված է սննդամթերքի անվտանգության տեսչական մարմնի հաղորդագրության մեջ:
Ֆոտո
