ԱՄՆ նախագահ Դոնալդ Թրամփը հայտարարել է, որ հեռախոսով խոսել է Ռուսաստանի առաջնորդ Վլադիմիր Պուտինի հետ՝ փորձելով բանակցել Ուկրաինայում պատերազմի ավարտի շուրջ։ Russian Mirror-ի փոխանցմամբ՝ այս մասին նա հայտարարել է ուրբաթ օրը The New York Post-ին տված բացառիկ հարցազրույցում նախագահական Air Force One ինքնաթիռում։
«Ես կգերադասեի չասել»,- ասել է Թրամփը՝ պատասխանելով այն հարցին, թե քանի անգամ են երկու առաջնորդները խոսել։
Սակայն, ըստ ԱՄՆ նախագահի, Վլադիմիր Պուտինին «իրոք հուզում են մարտի դաշտում սպանությունները»։
«Նա ցանկանում է, որ մարդիկ այլևս չմահանան,- ասել է Թրամփը։- Այս բոլոր մահացածները երիտասարդ, գեղեցիկ մարդիկ են: Նրանք ձեր երեխաների նման են, նրանք երկու միլիոն են, և առանց որևէ պատճառի»:
Թրամփը նաև ասել է, որ եռամյա պատերազմը «երբեք չէր լինի», եթե նա նախագահ դառնար 2022 թվականին։
«Ես միշտ լավ հարաբերություններ եմ ունեցել Պուտինի հետ,- ասել է նա։- Բայդենը խայտառակություն էր մեր երկրի համար։ Կատարյալ խայտառակություն».
Թրամփը հայտարարել է, որ պատերազմի դադարեցման կոնկրետ ծրագիր ունի։ «Հուսով եմ, որ դա արագ տեղի կունենա։ Ամեն օր մարդիկ են զոհվում։ Այդքան սարսափելի է Ուկրաինայում այս պատերազմը։ Ես ուզում եմ վերջ տալ այս անիծյալ վիճակին»,- ասել է ԱՄՆ նախագահը։
Դիմելով ազգային անվտանգության խորհրդական Մայք Ուոլցին, որը միացել էր նրան ինքնաթիռի նրա առանձնասենյակում, ԱՄՆ նախագահն ասել է. «Եկեք անցկացնենք այդ հանդիպումները։ Նրանք ցանկանում են հանդիպել: Ամեն օր մարդիկ են զոհվում։ Երիտասարդ, գեղեցիկ զինվորներ։ Երիտասարդ տղամարդիկ՝ իմ որդիների նման։ Երկու կողմից։ Ամբողջ ռազմաճակատում»։
ԱՄՆ նախագահ Դոնալդ Թրամփը հայտարարել է, որ պատրաստ է գործարք կնքել Իրանի հետ՝ նրա դեմ պատերազմ մղելու փոխարեն։
Ավելի վաղ Թրամփն ասել էր, որ ցանկանում է Իրանի հետ կնքել «ստուգված» միջուկային խաղաղության համաձայնագիր, որը թույլ կտա Իրանին զարգանալ և բարգավաճել խաղաղ ճանապարհով, և կոչ էր արել անհապաղ սկսել աշխատանքները:
«Ես կցանկանայի ոչ միջուկային գործարք կնքել Իրանի հետ: Ես կգերադասեի դա անել, քան ռմբակոծել նրանց... Ես նրանց կասեի, որ գործարք կկնքեմ», - ուրբաթ օրը «New York Post»-ին ասել է Թրամփը:
Միաժամանակ Թրամփը հրաժարվել է բացահայտել Իրանի հետ հնարավոր բանակցությունների մանրամասները։
«Ես նրանց չեմ ռմբակոծի»,- ասել է Թրամփը՝ պատասխանելով այն հարցին, թե ինչ կարող է առաջարկել Իրանին գործարքի դիմաց:
2024 թվականին Վրաստանից արտաքսվել է 363 օտարերկրյա քաղաքացի, ինչը 91%-ով ավելի է նախորդ տարվա համեմատ։ 2023 թվականին երկրից արտաքսվել էր 190 օտարերկրյա քաղաքացի։ Այս մասին է վկայում ՆԳՆ վիճակագրությունը, փոխանցում է Jnews-ը։
Մասնավորապես, 2024 թվականի տվյալների համաձայն՝ Վրաստանից արտաքսվել են.
Ադրբեջան – 71 քաղաքացի,
Իրան – 54 քաղաքացի,
Հնդկաստան – 33 քաղաքացի,
Թուրքիա – 31 քաղաքացի,
Նիգերիա – 31 քաղաքացի,
Իրաք – 21 քաղաքացի,
Ռուսաստան – 20 քաղաքացի,
Եգիպտոս – 18 քաղաքացի,
Չինաստան – 15 քաղաքացի,
Հորդանան – 15 քաղաքացի։
Նաև անցյալ տարի Վրաստանից վտարվել են Թուրքմենստանի և Պակիստանի 10 քաղաքացիներ, Լիբիայի և Շրի Լանկայի 4-ական քաղաքացի, Բանգլադեշի 3 քաղաքացի։ Բացի այդ, իրավապահներն արտաքսել են Ավստրալիայի, Սաուդյան Արաբիայի, ԱՄՆ-ի, Հայաստանի և այլ քաղաքացիների։
Նույն տվյալներով՝ 2023 թվականին Վրաստանից արտաքսվել է 190 օտարերկրյա քաղաքացի։ Նրանցից ամենաշատը` 41 քաղաքացի, եղել են Ադրբեջանից, 32-ը` Իրանից, 27-ը` Հնդկաստանից, 13-ը` Ռուսաստանից, 9-ը` Նիգերիայից, 9-ը` Եգիպտոսից, 8-ը` Չինաստանից, 8-ը` Թուրքիայից և այլն:
Իսրայելի վարչապետ Բենիամին Նաթանյահուն պաղեստինցիներին առաջարկել է սեփական պետությունը ստեղծել ոչ թե իրենց հայրենիքում, այլ Սաուդյան Արաբիայում։
«Սաուդցիները կարող են Սաուդյան Արաբիայում պաղեստինյան պետություն ստեղծել։ Նրանք շատ հող ունեն», - հայտարարել է Նաթանյահուն հինգշաբթի օրը իսրայելական 14-րդ հեռուստաալիքին տված հարցազրույցում։
Նաթանյահուն նաև հայտարարել է Սաուդյան Արաբիայի հետ հարաբերությունների հնարավոր կարգավորման մասին՝ կանխատեսելով, որ շուտով համաձայնություն ձեռք կբերվի։
«Կարծում եմ, որ Իսրայելի և Սաուդյան Արաբիայի միջև խաղաղությունը ոչ միայն հնարավոր է, ըստ իս, դա տեղի կունենա»,- ասել է նա։
Քաղաքական գործիչ Նաիրա Զոհրաբյանը ֆեյսբուքյան իր էջում հրապարակել է 24-ին տված հարցազրույցից մի հատված՝ գրելով․ «Ալլո, առողջապահության նախարար, մեկ շաբաթում թոքաբորբով հոսպիտալացվել է 578 հիվանդ, մեծ մասը՝ երեխաներ, կուրսի՞ եք»։
Նա ահազանգում է, որ դպրոցներում բժշկի տեղեկանը չի անցնում, երեխայի բացակայությունը հանում են թույլատրելի ժամերից։
«Մեկ շաբաթով դպրոցները փակեք, երեխաները ստիպված հիվանդ վիճակում դասի են գալիս, որ բացակա չստանան, ձեր նման իդիոտ բնության մեջ չի եղել»,- ասում է Զոհրաբյանը։
Ռուսաստանը որոշել է ԱՄՆ-ում նոր դեսպանի թեկնածությունը, РИА Новости-ին տված հարցազրույցում հայտարարել է ԱԳՆ պաշտոնական ներկայացուցիչ Մարիա Զախարովան։
«Ինչ վերաբերում է Ռուսաստանի դեսպանին, կարող եմ ձեզ միանգամայն հստակ ասել. թեկնածու կա, բայց նրա ագրեմանը դեռ չի ստացվել»,- ասել է նա։
Ավելի վաղ փոխարտգործնախարար Սերգեյ Ռյաբկովը հայտարարել էր, որ Մոսկվան կարծում է, որ ԱՄՆ-ում Ռուսաստանի նոր դեսպանին ագրեման տրամադրելու հետ կապված իրավիճակի շուրջ ավելորդ աղմուկը հակաարդյունավետ է։
Արտաքին գործերի նախարար Սերգեյ Լավրովն ավելի վաղ հայտարարել էր, որ Միացյալ Նահանգները ողջունել է Վաշինգտոնում ՌԴ դեսպանի պաշտոնում Մոսկվայի ներկայացրած թեկնածությունը։
«Կոմերսանտ» թերթը, վկայակոչելով աղբյուրների, գրել է, որ այս պաշտոնի ամենահավանական թեկնածուն արտաքին գործերի նախարարության հյուսիսամերիկյան դեպարտամենտի տնօրեն, Կանադայում նախկին դեսպան Ալեքսանդր Դարչիևն է։
ԱՄՆ-ում Ռուսաստանի նախկին դեսպան Անատոլի Անտոնովը պաշտոնը լքել էր անցյալ տարվա հոկտեմբերին՝ իր առաքելության ժամկետի ավարտի պատճառով։
Հանրապետության տարածքում փետրվարի 9-ին առանձին շրջաններում սպասվում է թույլ ձյուն։ Փետրվարի 10-13-ին սպասվում է առանց տեղումների եղանակ: Քամին արավարևելյան 2-5մ/վ։
Օդի ջերմաստիճանը փետրվարի 9-13-ին հատկապես գիշերային ժամերին աստիճանաբար կնվազի 5-8 աստիճանով։
Երևան քաղաքում փետրվարի 9-ի ցերեկը, 10-13-ին սպասվում է առանց տեղումների եղանակ: Փետրվարի 9-ի գիշերը քաղաքի բարձրադիր հատվածներում հնարավոր է թույլ ձյուն։
Իրանի արտաքին գործերի նախարար Աբբաս Արաղչին զգուշացրել է չվստահել ԱՄՆ-ին՝ հայտարարելով, որ Թեհրանը չի բանակցի ճնշման տակ, գրում է Mehr-ը։
Արաղչին ընդգծել է, որ բանակցությունները պետք է ընթանան խելամտորեն՝ զգուշացնելով, որ Իրանը թույլ չի տա կրկնել ԱՄՆ-ի կողմից JCPOA-ի (Համատեղ համապարփակ գործողությունների ծրագիր) չկատարումը:
Իրանի արտգործնախարարն ընդգծել է ներկայիս աշխարհաքաղաքական լանդշաֆտի հստակ ըմբռնման անհրաժեշտությունը:
«Մեր ժողովրդի նկատմամբ կիրառվող անարդար պատժամիջոցները լուրջ խոչընդոտ են հանդիսանում Իրանի տնտեսական զարգացման համար»,- ասել է Արաղչին։
Նա ներկայացրել է այս պատժամիջոցների դեմ պայքարի երկու հիմնական ռազմավարություն, այն է՝ բանակցությունների անցկացում և փոխգործակցում միջազգային գործընկերների հետ՝ դրանք վերացնելու նպատակով և դրանց ազդեցությունը չեզոքացնելու համար՝ սեփական ուժերին և ներքին նախաձեռնություններին ապավինելը, որը նա համարում է ամենաառաջնայինը:
Արաղչին ընդգծել է, որ Իրանը պետք է հիասթափեցնի պատժամիջոցներ կիրառող կողմերին՝ պատժամիջոցների չեզոքացումն անվանելով ազգային պարտականություն։
Իրանի արտգործնախարարն ասել է, որ պատժամիջոցների վերացումը պահանջում է բանակցություններ, սակայն ոչ առավելագույն ճնշման քաղաքականություն։
«Թույլ դիրքերից բանակցելը իրական բանակցություն չէ, դա կապիտուլյացիա է։ Մենք երբեք նման պայմաններում չենք բանակցի»,- շեշտել է նա։
Արաղչին կրկնել է, որ Իրանը երբեք չի հրաժարվել բանակցություններից, սակայն JCPOA-ի փորձն ապացուցել է, որ ԱՄՆ-ին չի կարելի վստահել՝ հավելելով, որ Իրանը չի բանակցի մի երկրի հետ, որը նոր պատժամիջոցներ է սահմանում բանակցությունների սեղանի շուրջ նստած։
Ավելի վաղ ԱՄՆ նախագահ Դոնալդ Թրամփը The New York Post-ին տված հարցազրույցում ասել էր, որ կգերադասեր Իրանի հետ միջուկային համաձայնագիրը «դժոխային ռմբակոծություններից»։
Սակայն մինչ այդ նա որոշել էր վերսկսել Իրանի նկատմամբ «առավելագույն ճնշման քաղաքականությունը»։
«Անորա»-ն, որտեղ խաղում են հայ դերասաններ Կարեն Կարագուլյանն ու Վաչե Թովմասյանը, պաշտոնապես «Օսկար» մրցանակաբաշխության «Լավագույն ֆիլմ» տիտղոսի առաջատար ֆավորիտն է՝ Ամերիկայի ռեժիսորների գիլդիայի եւ Ամերիկայի պրոդյուսերների գիլդիայի մրցանակների արժանանալուց հետո, գրում է Armenian Film Society-ն։
DGA եւ PGA մրցանակները համարվում են «Օսկար» մրցանակաբաշխության ուժեղ նախադրյալներ, որտեղ «Անորան» առաջադրված է վեց անվանակարգում՝ ներառյալ «Լավագույն ֆիլմ», «Լավագույն ռեժիսոր», «Լավագույն օրիգինալ սցենար», «Լավագույն դերասանուհի» (Մայքի Մեդիսոն), «Երկրորդ պլանի լավագույն դերասան» (Յուրի Բորիսով) եւ «Լավագույն մոնտաժ»: Ֆիլմը նաեւ արժանացել է «Critics Choice Awards»-ի «Լավագույն ֆիլմ» մրցանակին:
Եթե «Անորա»-ն արժանանա «Օսկար»-ի «Լավագույն ֆիլմ» մրցանակիբ, ապա այն կդառնա հայկական երկխոսություններով առաջին ֆիլմը, որը կհաղթի այդ անվանակարգում:
2024 թվականի մայիսին «Անորան» արժանացավ Կաննի կինոփառատոնի հեղինակավոր «Ոսկե արմավենու ճյուղին»։
«Օսկար» մրցանակաբաշխությունը տեղի կունենա 2025 թվականի մարտի 2-ին՝ Լոս Անջելեսի Dolby Theatre-ում։
Ստեփանավանի Աշոտաբերդ թաղամասի հրդեհի ժամանակ տատ ու թոռ են նետվել պատուհանից: Այս մասին NEWS.am-ի հետ զրույցում ասաց հրդեհից տուժած բնակիչներից Սամվել Մարգարյանը:
«Հրդեհի ժամանակ ես տանը չեմ եղել, զինվորական եմ, թույլատրությունով եկել եմ, հասել ընտանիքիս: Տանը եղել են հայրս, մայրս, կինս ու շունս, փասռք Աստծո ընտանիքիս անդամները կարողացել են դուրս գալ: Էդ պահին որ հասել եմ, հրդեհը դեռ էս հատված չէր հասել, կարողացել ենք անհրաժեշտ հագուստ, փաստաթղթերը դուրս բերել ու էլ ոչինչ չենք հասցրել: Էդ ժամանակ մարդիկ արդեն կիսամերկ, բոբիկ դուրս են եկել: Ես իմացա, որ այն կողմից մի մասը պատուհանից են փորձել դուրս գալ, երկու հոգի՝ տատիկը իր թոռնիկի հետ իրենց դուրս են գցել պատուհանից, տատիկը ծայրահեղ ծանր վիճակում է, թոռնիկի վիճակը լավ է»,- ասաց նա:
Անդրադառնալով հրդեհի բռնկման վարկածներին, նա նշեց, որ ամենայն հավանականությամբ էլեկտրականության խնդիր է եղել:
Նա նշեց, որ նման դեպքեր տարիների ընթացքում էլի են տեղի ունեցել, հիմա էլ ծրագիր կա, որ փայտե շենքերի բնակիչներին պետք է տեղափոխեն նոր կառուցված շենք:
Ավելի վաղ հայտնել էինք, որ փետրվարի 8-ին, ժամը 04։42-ին Լոռու մարզային փրկարարական վարչության ճգնաժամային կառավարման կենտրոն ահազանգ է ստացվել, որ հրդեհ է բռնկվել Ստեփանավան քաղաքի Աշոտաբերդ թաղամասի շենքերից մեկում։ Պարզվել է, որ հրդեհը բռնկվել է փայտե շենքի 2-րդ հարկում և տանիքում (մոտ 450 քմ)։ Հայտարարվել է հրդեհի բարդության «Թիվ 2» աստիճան․ դեպքի վայր են մեկնել ՆԳՆ ՓԾ մարզային փրկարարական վարչության օպերատիվ խումբը և հրշեջ-փրկարարական ջոկատներից երկու մարտական հաշվարկ․ այնուհետև դեպքի վայր օգնության է մեկնել ևս չորս մարտական հաշվարկ՝ որպես ջրատար։ Փրկարարները շենքից տարհանել են 27 բնակչի։ Նրանք տեղավորվել են հյուրանոցում, որոշ մասն էլ բարեկամների տներում:
Հրդեհի հետեւանքով կա 1 զոհ, 8 վիրավոր:
Ֆոտո
