Հայաստանի Հանրապետության քաղաքացիների համար կենսաչափական անձնագրեր կպատրաստեն ֆրանսիացիները։ Տեղեկությունը հայտնում է ՀՀ ներքին գործերի նախարարությունը։«ՀՀ-ում կենսաչափական համակարգի ներդրման գործընթացի իրականացման մրցույթում հաղթող ճանաչված «IDEMIA Identity Security France and A.C.I. Technology S.à.r.l.» ֆրանսիական կոնսորցիումը հիմնադրել է «HAYPASS» ՓԲԸ-ն։

Գործադիր տնօրեն Ռեջիս Բուշյեն Անձը հաստատող փաստաթղթերի թողարկման և տրամադրման, անձը հաստատող փաստաթղթեր տրամադրելու համար օգտագործվող միջոցների շահագործման ու սպասարկման վերաբերյալ ՊՄԳ (պետություն–մասնավոր գործընկերություն) պայմանագիր է ստորագրել ՀՀ ՆԳ նախարար Արփինե Սարգսյանի հետ»,– ասված է հաղորդագրությունում։

Նշվում է, որ «HAYPASS» ՓԲԸ-ն մինչև 2026 թ․ երկրորդ կիսամյակը կենսաչափական տվյալների հավաքագրման նոր լուծումներով նոր ենթակառուցվածք կներդնի, ինչպես նաև ժամանակակից գրասենյակներ կլինեն, որոնք վերազինված կլինեն ոլորտի միջազգային ստանդարտներին համապատասխան տեխնիկայով։Ծառայության գլխամասային գրասենյակի շենքային պայմանները, սերվերային տնտեսությունը և տպագրական սարքավորումներն էլ կստանդարտացվեն։Ծրագրի շրջանակում ՀՀ քաղաքացիներին և ՀՀ–ում այլ իրավական կարգավիճակ ունեցող անձանց կտրամադրվեն անվտանգ և բարձրորակ անձը հաստատող փաստաթղթեր։

Անձնագրային գործառույթների բաշխումը կազմակերպված է հետևյալ տրամաբանությամբ՝ կարգավիճակի որոշումը, անձի ինքնության հաստատումը, բնակչության պետական ռեգիստրի տնօրինումն ու վարումը շարունակելու է իրականացնել Միգրացիայի և քաղաքացիության ծառայությունը։ ՆԳՆ–ից նաև հայտնում են, որ կենսաչափական տվյալների հավաքագրումը, փաստաթղթերի տպագրությունն ու մատակարարումը շահառուներին իրականացնելու է մասնավոր գործընկերը։

Պայմանագրի կնքումը կարևոր քայլ է նաև ՀՀ–ԵՄ մուտքի վիզաների ազատականացման երկխոսության համատեքստում։

Հիշեցնենք, որ 2022 թվականի դեկտեմբերին կառավարության որոշմամբ կենսաչափական անձնագրերի տրամադրումը կասեցվեց 2 տարով, միաժամանակ երկարաձգվեց հին նմուշի անձնագրերի տրամադրումը։

Ավելի քան 10 տարի Հայաստանում անձնագրեր և ID-քարտեր է մատակարարել լեհական PWPW ընկերությունը, որի հետ պայմանագիրն ավարտվել է 2017 թվականի հունվարի 1-ին, դրանից հետո նոր մատակարար պաշտոնապես չէր նշանակվել։ Հին նմուշի անձնագրերի տրամադրումը երկարաձգվել է մի քանի անգամ։