Անվտանգության երաշխիքներ պետք է լինեն և՛ Ռուսաստանի, և՛ Ուկրաինայի համար։ Այս մասին հայտարարել է Ռուսաստանի նախագահ Վլադիմիր Պուտինը, հաղորդում է ՌԻԱ Նովոստին։

Նրա խոսքով՝ դեռևս ոչ ոք լուրջ մակարդակով չի քննարկել անվտանգության երաշխիքները Ռուսաստանի հետ։

Նա հավելել է, որ կայուն խաղաղության մասին համաձայնագրից հետո Ուկրաինայում օտարերկրյա զորքերի ներկայությունն իմաստ չունի։ 

Ռուսաստանը Ուկրաինայի տարածքում գտնվող ցանկացած զորք կդիտարկի որպես ոչնչացման օրինական թիրախ, ընդգծել է Պուտինը։

Նա հավելել է, որ պատրաստ է շփումների ուկրաինական կողմի հետ, բայց իմաստ չի տեսնում, քանի որ «գործնականում անհնար կլինի համաձայնության գալ ուկրաինական կողմի հետ հիմնական հարցերի շուրջ»։

«Կիևը վերջերս բացառեց Ռուսաստանի հետ շփումների հնարավորությունը, և հիմա նրանք խնդրում են նման շփումներ։ Կիևը, հավանաբար, քաղաքական կամք չունի համաձայնության գալու համար», - նշել է Պուտինը։

Միևնույն ժամանակ, ըստ նրա, Ռուսաստանը երբեք չի առարկել եվրոպական ուղղությամբ Ուկրաինայի ինտեգրացիոն նախաձեռնություններին։