Թուրքիայի Սև ծովի ափերի մոտ գրեթե միաժամանակ հրդեհ է բռնկվել ռուսական նավթային երկու լցանավում։ Այս մասին հայտնում են թուրքական լրատվամիջոցները։ 

Հրդեհված առաջին նավը Հնդկաստանից Ռուսաստան ուղևորվող Kairos լցանավն է։ Նշվում է, որ լցանավը պայթել է ծովային ականի վրա՝ գտնվելով Թուրքիայի ափից 28 ծովային մղոն հեռավորության վրա։

Թուրքական ծովագնացության վարչությունը հաստատել է, որ նավում հրդեհ է բռնկվել արտաքին ազդեցության հետևանքով։
Լցանավի անձնակազմի 25 անդամ հաջողությամբ տարհանվել է։ 

Ավելի ուշ հաղորդվել է նաև երկրորդ՝ Virat լցանավի հրդեհի մասին, որը նույնպես ռուսական ուղղությամբ էր շարժվում և գտնվել է Թուրքիայի ափից մոտ 35 ծովային մղոն հեռավորության վրա։ Նրա 20 հոգանոց անձնակազմը ևս տարհանվել է։

Թուրքական կողմը չի հայտնել մանրամասներ երկրորդ պայթյունի և հրդեհի պատճառների վերաբերյալ, սակայն ընդգծել է, որ երկու լցանավերն էլ եղել են դատարկ։