Ռուսաստանի նախագահ Վլադիմիր Պուտինը ուրբաթ օրը նախագահ Դոնալդ Թրամփի հետ գագաթնաժողովի ընթացքում համաձայնել է հնարավոր խաղաղության համաձայնագրի շրջանակներում Ուկրաինային տրամադրել Միացյալ Նահանգների կողմից «անվտանգության հուսալի երաշխիքներ», այսօր CNN-ին հայտնել է ԱՄՆ հատուկ ներկայացուցիչ Սթիվ Ուիթքոֆը։

«Մենք պայմանավորվել ենք անվտանգության հուսալի երաշխիքների շուրջ, որոնք ես կբնութագրեի որպես խաղի կանոնները արմատապես փոխող»,- ասել է Ուիթքոֆը՝ անվտանգության երաշխիքները բնութագրելով որպես ռուսաստանյան հետագա ներխուժումից «Հոդված 5»-ի տիպի պաշտպանություն։

Նա ասել է, որ Պուտինը նաև համաձայնել է, որ Ռուսաստանը հնարավոր խաղաղության համաձայնագրի շրջանակներում «օրենսդրորեն կամրագրի» Ուկրաինայի կամ Եվրոպայի որևէ այլ տարածք մուտք գործելու արգելքը։

Ըստ եվրոպացի պաշտոնյաների, որոնք ծանոթ են իրենց գործընկերների հետ հանդիպման վերաբերյալ Թրամփի հաշվետվություններին, ուրբաթ օրը ԱՄՆ նախագահ Դոնալդ Թրամփի հետ գրեթե երեք ժամ տևած գագաթնաժողովի ընթացքում Պուտինը ներկայացրել է Ուկրաինայի հետ «տարածքների փոխանակման» իր պահանջները՝ այդ թվում պնդելով, որ Ուկրաինան հրաժարվի Դոնբասից։

Պուտինն ասել է, որ դրա դիմաց ինքը պատրաստ կլիներ սառեցնել ճակատի ներկայիս գծերը Ուկրաինայի մնացած տարածքում՝ Խերսոնի և Զապորոժիեի մարզերում, և կհամաձայներ այլևս չհարձակվել Ուկրաինայի կամ եվրոպական այլ երկրների վրա։

Սակայն նա չի հրաժարվել Ուկրաինայում պատերազմի, ինչպես Ռուսաստանն է անվանում, «սկզբնապատճառները» վերացնելու պահանջից՝ կրճատել Ուկրաինայի զինված ուժերի թիվը՝ ապահովելով նրա հրաժարումը ՆԱՏՕ-ին անդամակցելու ձգտումից և չեզոք պետություն դառնալը։