Ռուսաստանը և ԱՄԷ-ն օգոստոսի 7-ին համաձայնագիր են կնքել ծառայությունների առևտրի և ներդրումների վերաբերյալ։ Փաստաթուղթը ստորագրվել է ՌԴ նախագահ Վլադիմիր Պուտինի և ԱՄԷ նախագահ Մուհամմադ բեն Զայեդ Ալ Նահյանի հանդիպման շրջանակներում։ Այդ մասին հաղորդում է  «Ինտերֆաքս» գործակալությունը:

«Համաձայնագիրը նոր խթան կհաղորդի ԱՄԷ-ի հետ դրական ու փոխշահավետ փոխգործակցությանը։ Այն կնպաստի ծառայությունների առևտրի ոլորտում երկկողմ առևտրատնտեսական համագործակցության ընդլայնմանը, առևտրային հոսքերի դիվերսիֆիկացմանը, համագործակցային կապերի ընդլայնմանն ու խորացմանը», – լրագրողներին ասել է ՌԴ տնտեսական զարգացման նախարար Մաքսիմ Ռեշետնիկովը, որը ստորագրել է համաձայնագիրը ռուսական կողմից։

Նրա խոսքով՝ ծառայությունների ռուսաստանցի մատակարարներն ու ներդրողները կկարողանան առանց սահմանափակումների իրենց գործունեությունն իրականացնել այնպիսի հատվածներում, ինչպիսիք են համակարգչային ծառայությունները, հետազոտություններն ու մշակումները, տեխնիկական փորձարկումները, տեխնիկական խորհրդատվությունը, նավերի և օդանավերի նորոգումը, կրթական և իրավաբանական ծառայությունները և այլն։

Բացի այդ, ռուսական ընկերություններին երաշխավորվում է ԱՄԷ-ի մասնագիտացված ազատ գոտիներում 100% ռուսական կապիտալով դուստր բանկեր, բժշկական հաստատություններ և լրատվական գործակալություններ բացելու հնարավորություն:

ՌԴ-ի և ԱՄԷ-ի երկկողմ համաձայնագիրը լրացնում է Եվրասիական տնտեսական միության (ԵԱՏՄ) և էմիրությունների միջև ապրանքների ազատ առևտրի շուրջ 2025 թ. հունիսին ստորագրված համաձայնագիրը: