Ավելի վաղ հաղորդվել էր, որ պայմանավորվածություններն ուժի մեջ կմտնեն հունիսի 7-ին: Ռուսաստանի ՊՆ կոնտակտային խումբը ժամանել է սահման՝ բերելով ավելի քան 1200 մարմին, սակայն Ուկրաինայի ներկայացուցիչները փոխանակման չեն ներկայացել։ Ուկրաինական կողմի հետ բանակցություններում ռուսական պատվիրակության ղեկավար Վլադիմիր Մեդինսկու խոսքով՝ հենց այսօր՝ Հոգեգալստյան ծնողական շաբաթ օրը, Ուկրաինան պետք է ընդուներ իր ընկածներին:
Զախարովան նշել է, որ աշխարհում չկա այնպիսի ժողովուրդ կամ ազգ, որը հրաժարվի հողին հանձնել իր զինվորներին:
«Բայց կա Կիևի ռեժիմ, որը մարդատյաց գաղափարախոսություն է դավանում և ցեղասպանություն իրականացնում սեփական ժողովրդի նկատմամբ»,- հայտարարել է նա:
Հիշեցնենք` Ստամբուլում կայացած բանակցություններում Ռուսաստանն ու Ուկրաինան պայմանավորվել են գերիների փոխանակման և զոհված զինվորականների մարմինները Ուկրաինայի զինված ուժերին հանձնելու մասին, սակայն ենթադրյալ փոխանակման վայր է ժամանել միայն ռուսական կողմը:
Ռուսաստանի և Ուկրաինայի միջև բանակցությունների երկրորդ փուլը տեղի է ունեցել հունիսի 2-ին Թուրքիայում: Հանդիպումը տևել է ավելի քան մեկ ժամ, կողմերը հակամարտության կարգավորման վերաբերյալ հուշագրեր են փոխանակել։
Ինչպես բանակցություններից հետո հայտնել է ռուսական պատվիրակության ղեկավար Վլադիմիր Մեդինսկին, Ռուսաստանն ու Ուկրաինան պայմանավորվել են գերիների լայնածավալ փոխանակման մասին: Փոխանակման առավելագույն շեմը կկազմի առնվազն 1000 մարդ: Ռուսական կողմը նաև հայտարարել է, որ միակողմանիորեն Ուկրաինային կփոխանցի 6 հազար զոհվածների մարմինները:
