Միացյալ Նահանգները Նորվեգիա են ուղարկել ռազմական ինքնաթիռներ, որոնք ի վիճակի են հետևել սուզանավերին և լրտեսություն իրականացնել։ Դրանք առաքելություններ են իրականացրել Բալթիկ ծովում Ռուսաստանի տարածքի մոտակայքում, գրում է Newsweek-ը։ 

ԱՄՆ ռազմածովային ուժերի P-8 Poseidon պարեկային ինքնաթիռների ներկայությունը Հյուսիսային Եվրոպայում, որոնք նախատեսված են սուզանավների և ռազմանավերի դեմ պայքարի, ինչպես նաև հետախուզական առաքելությունների համար, տեղի է ունենում այն ​​ժամանակ, երբ ՆԱՏՕ-ն ամրապնդում է իր պաշտպանական դիրքերը Բալթյան տարածաշրջանում՝ «ստորջրյա մալուխների և խողովակաշարերի նկատմամբ ռուսական սպառնալիքների, ինչպես նաև Լեհաստանում, Դանիայում և Նորվեգիայում անօդաչու թռչող սարքերի կասկածելի ակտիվության» պայմաններում։ 

ԱՄՆ ռազմական ուժերի շարունակական տեղակայումը ՆԱՏՕ-ին աջակցելու համար, դրանց թվում՝ օգոստոսի վերջին Ռուսաստանի Արկտիկական տարածաշրջանի մոտակայքում գործող ականակիրների, Ռուսաստան-Ուկրաինա հակամարտության հարցում ԱՄՆ նախագահ Դոնալդ Թրամփի դիրքորոշման կտրուկ փոփոխության հետևանք է:

Սրանից հետո ինչքան ասեն «Զանգեզուրի միջանցք», իմացեք, սա Հայաստանի մասին չէ։ Հորադիզ-Զանգելան երկար է, ասում են «Զանգեզուրի միջանցք», թող ասեն, մենք խնդիր չունենք, այս մասին ԱԺ-ում հայտարարեց Նիկոլ Փաշինյանը՝ անդրադառնալով ադրբեջանցի պաշտոնյաների կողմից «Զանգեզուրի միջանցք» արտահայտության կիրառմանը։

«Համաձայնեցված անունը՝ TRIPP ուղին է, Ադրբեջանում ինչ ուզում են, թող ասեն։ Թեման եկեք համարենք փակված»,-ասաց Փաշինյանը։

Երբ 2022 թվականին մենք հասկացանք, որ ՀԱՊԿ-ը չի կատարել, չի կատարում և չի կատարելու մեր նկատմամբ իր պարտավորությունները, մենք անկախացանք, քանի որ հասկացանք, որ պետք է հույսներս դնենք մեզ վրա։ Հոկտեմբերի 1-ին կառավարության ժամի ժամանակ հայտարարել է Նիկոլ Փաշինյանը։

«Մենք հասկացանք, որ նախկին իշխանությունների իբր կառուցված անվտանգության համակարգը փուչիկ դուրս եկավ։ Դա պարզապես գործիք էր մեր պետության կայանալը կանխելու համար։ Մենք այդ ամենը չհասկացանք 2020 թվականին»,- նշել է նա։

Բենզալցակայանների շահութաբերությունը ներկայում բացասական է, և մի շարք անկախ բենզալցակայաններ արդեն փակվում են, ասված է փոխվարչապետ Ալեքսանդր Նովակին ուղղված Ռուսաստանի վառելիքային միության (РТС) նամակում։

Նամակը, որի բովանդակությանը ծանոթացել է «Интерфакс»-ը, ուղարկվել է սեպտեմբերի 30-ին։ 

Ռուսաստանի վառելիքային միությունն ընդգծում է բենզինի ոլորտում առկա երկու հիմնական խնդիր։ Նախ, արտադրության կրճատման և բորսայում վաճառվող բենզինի վաճառքի կրճատման պատճառով մեծածախ գները բարձրացել են՝ հավասարվելով, իսկ որոշ շրջաններում նույնիսկ գերազանցելով մանրածախ գները։ «Հաշվի առնելով շահագործման ծախսերի, Ռուսական երկաթուղիների և բնակարանային ու կոմունալ ծառայությունների սակագների հիպերինֆլյացիոն աճը, ինչպես նաև վարկային և հարկային բեռի աճը, բենզինի մանրածախ շահութաբերությունը խորապես բացասական է դարձել»,- նշված է նամակում։ 

Երկրորդ, վաճառվող բենզինի առաքման ուշացումներն ամենուր են։

Միությունը ուշադրություն է հրավիրում, որ որոշ շրջաններում արդեն իսկ բենզինի մատակարարման երկարատև խափանումներ են նկատվում, և մանրածախ առևտրի բացասական շահութաբերությունը, զուգորդված մատակարարման պակասի հետ, հանգեցրել է որոշ մասնավոր բենզալցակայանների ցանցերի փակմանը։ 

Եթե ​​իրավիճակը շարունակի զարգանալ նույն հունով, անկախ բենզալցակայանների սեփականատերերը, որոնք կազմում են երկրի ընդհանուր ծավալի մոտ 60%-ը, կանգնած են գործունեության դադարեցման սպառնալիքի առաջ։ 

Միևնույն ժամանակ, բենզինի արտահանման լիակատար արգելքի վերաբերյալ իրականացված որոշումները (բացառությամբ ԵԱՏՄ երկրների և միջկառավարական համաձայնագրերի) քիչ բան են փոխել։

Միությունը նշում է, որ դիզելային վառելիքին առնչվող իրավիճակը այնքան էլ կրիտիկական չէ, սակայն բորսայում վաճառվող ապրանքների վաճառքի վերջին անկումը և առաքման ժամկետների երկարացումը հանգեցրել են առաջարկի և պահանջարկի անհավասարակշռության, մեծածախ գների աճի և մանրածախ վաճառքի զրոյական շահութաբերության։ 

Վառելիքի մանրածախ առևտրի ոլորտի կայունությունը պահպանելու համար, որը զգալի ազդեցություն ունի երկրի տարածաշրջաններին շարժիչային վառելիքի մատակարարման վրա, միությունն առաջարկում է քննարկել մի քանի առաջարկներ։ 

Ներքին շուկան ամառային դիզելային վառելիքով հագեցնելու համար Ռուսաստանի վառելիքային միությունը միաժամանակ խնդրում է քննարկել արտադրողների համար դիզելային վառելիքի արտահանման ժամանակավոր արգելքի հարցը, որի վաճառքը, ինչպես սպասվում է, տեղի կունենա ցուրտ եղանակի սկսվելուց անմիջապես առաջ։

Իրանական կողմն ԱՄՆ-ին առաջարկել է ուղիղ բանակցություններ վարել «եվրաեռյակի» նախարարների և ՄԱԳԱՏԷ-ի ներկայացուցիչների ներկայությամբ, սակայն ԱՄՆ նախագահի հատուկ ներկայացուցիչ Սթիվ Ուիտկոֆը չի ներկայացել հանդիպմանը: Այս մասին հայտարարել է Իրանի կառավարության պաշտոնական ներկայացուցիչ Ֆաթեմե Մոհաջերանին։

«Մարդիկ պետք է իմանան, որ Իրանն Ուիտկոֆին առաջարկել էր ուղիղ բանակցություններ վարել եվրոպացի երեք նախարարների, ինչպես նաև ՄԱԳԱՏԷ-ի ներկայացուցիչների ներկայությամբ։ Միակ մարդը, որ չէր ներկայացել Այդ հանդիպմանը, պարոն Ուիտկոֆն էր»,-ասել է Մոհաջերանին։

Նա հավելել է, որ Իրանը «եվրաեռյակին» առաջարկել էր 45 օրով հետաձգել Թեհրանի դեմ միջազգային պատժամիջոցների վերականգնման մեխանիզմի գործարկումը, որը, ըստ Մոհաջերանիի, ի վերջո մերժվեց Իսրայելի ճնշման պատճառով:

Apple-ը ներկայացրել է iOS 26.0.1 շտապ թարմացումը՝ ուղղելով մի շարք վտանգավոր խոցելիություններ և սխալներ, գրում է The Daily Express-ը։ Կիբերանվտանգության փորձագետ Ադամ Բոյնթոնը կոչ է արել օգտատերերին անհապաղ տեղադրել թարմացումը՝ նշելով, որ CVE-2025-43400 բացը կարող էր խափանել iPhone-ի ներքին համակարգերն ու հավելվածները։

Թարմացմամբ շտկվել են նաև մի շարք տեխնիկական խնդիրներ՝ Wi-Fi և Bluetooth-ի անսպասելի անջատումը, բջջային կապի խափանումները, հավելվածների նշանների սխալները, ինչպես նաև ֆոտոխցիկի թերությունը, որի պատճառով iPhone 17, iPhone Air և iPhone 17 Pro մոդելների նկարները պահվում էին արտեֆակտներով։

Մասնագետները շեշտում են, որ թարմացումը հասանելի է 2019-ից սկսած թողարկված iPhone-ների համար և անհրաժեշտ է հնարավորինս արագ տեղադրել այն՝ պաշտպանվելու համար։

2025 թվականի առաջին ութ ամսվա ընթացքում Ռուսաստանում հայտնաբերվել է թունաքիմիկատներով աղտոտված ավելի քան 111 տոննա թեյ, ըստ «Ռոսպոտրեբնադզոր»-ի և «Ռոսսելխոզնադզոր»-ի կողմից անցկացվող ստուգումների միասնական գրանցամատյանի: Այս մասին հաղորդում է «Իզվեստիա» թերթը: 

Թունաքիմիկատները կուլ տալու դեպքում այս քիմիական նյութերը կարող են շնչառական խանգարումներ առաջացնել և վնասել նյարդային համակարգը։

Ցանկում ներառված են շուկայի յոթ առաջատար արտադրողներ՝ Universal Food Technologies, Orimi, RChK-Trading, United Tea Company, Shennong, Symphony և Ryazan Tea Packing Factory: Այս ընկերությունները տիրապետում են հայտնի ապրանքանիշերի, այդ թվում՝ Tess, Greenfield, Zolotaya Chasha, Beseda, Eastford, Tri Druzhnyh Slona, ​​​​Gorod Rossii և Neobychainy։

Թերթը, հղում անելով Ռոսպոտրեբնադզորի տվյալներին, հաղորդում է, որ այս տարվա առաջին կեսին լաբորատորիաներն ավելի քան 57,000 սննդամթերքի նմուշ են ստուգել թունաքիմիկատների առկայության համար, և դրանցից միայն 0.01%-ը չի համապատասխանել սահմանված պահանջներին: «Սահմանված պահանջներին չհամապատասխանող բոլոր ապրանքները հանվել են շրջանառությունից», - հաղորդել է գործակալությունը:

Իսրայելի պաշտպանության բանակը (ՑԱԽԱԼ) գրավել է Գազա քաղաքը պաղեստինյան անկլավի հարավային մասից բաժանող միջանցքը և տեղադրել այն անցակետերը, որոնցով պետք է անցնեն այն բնակիչները, որոնք դեռ չեն լքել քաղաքը, հայտնել է Իսրայելի պաշտպանության նախարար Իսրայել Կացը, փոխանցում է ՌԻԱ «Նովոստին»:

«Իսրայելի պաշտպանության բանակը ավարտել է Գազայի ափ տանող Նեցարիմ միջանցքի գրավումը և Գազայի հատվածը բաժանել է հյուսիսային և հարավային մասերի:

Հետևաբար, Գազա քաղաքի շուրջ շրջափակումը կխստացվի, և քաղաքից հարավ դուրս եկող յուրաքանչյուր ոք ստիպված կլինի անցնել Իսրայելի պաշտպանության բանակի անցակետերով։ Սա վերջին հնարավորությունն է այն Գազայի բնակիչների համար, ովքեր ցանկանում են շարժվել դեպի հարավ և թողնել ՀԱՄԱՍ-ի զինյալներին մեկուսացված Գազա քաղաքում, քանի որ Իսրայելի պաշտպանության բանակի գործողությունը շարունակվում է ամբողջ ուժով», - հայտարարել է Կացը սոցիալական ցանցերում։

Կացը նաև շեշտել է, որ Գազայում մնացածները կհամարվեն զինյալներ և ահաբեկչության կողմնակիցներ։

Մենք ունենք ստորագրած ու նախաստորագրած փաստաթղթեր, և երբ հնչում են արտահայտություններ, որոնք չկան այդ թղթերի մեջ, օրինակ, «Զանգեզուրի միջանցք», մեզ համար հարց է ծագում՝ որտեղի՞ց այդ արտահայտությունը։ Այս մասին, այսօր՝ հոկտեմբերի 1–ին, ԱԺ–ում կառավարության հետ հարցուպատասխանի ժամանակ նշեց վարչապետ Նիկոլ Փաշինյանը։ 

«Երբևէ որեւէ տեղում մենք ունե՞նք ընդունած թուղթ, որտեղ նման արտահայտություն կա։ Չկա նման բան։ Ես պարզ հարց տվեցի և ասացի, որ արժի, որ պարզաբանում հնչի, թե էդ որտեղի՞ մասին է դա։ Եթե Ադրբեջանում այդ կերպ անվանում են, օրինակ, Հորադիզ–Զանգելան ճանապարհը, մենք այդտեղ պետք է մեզ հարց տանք՝ դա մեզ հուզո՞ւմ է, թե՞ չի հուզում։ Հայաստանի պարագայում անուններ որոշողը Հայաստանն է, Ադրբեջանի պարագայում՝ Ադրբեջանը։ Դա արձանագրված է նաև այս թղթում, որովհետեւ մենք միմյանց տարածքային ամբողջականությունը, սահմանների անխախտելիությունը ճանաչել ենք։ Օգոստոսի 8–ից հետո, ենթադրվում է, որ մենք այլ կերպ պետք է մոտենանք հարցերին, այլ կերպ դիտարկենք։ 

Ակնհայտ է, որ այդ արտահայտությունը նյարդ է առաջացնում մեր հանրության շրջանում։ Հիմա հարց է առաջանում՝ ինչո՞ւ է դա օգտագործվում, որ էդ նյարդը առաջանա՞։  Ես ասում եմ՝ Հայաստանի տարածքի վերաբերյալ չեն կարող լինել այլ բնորոշումներ և իմ ասածը լեգիտիմ է»,–ասաց Փաշինյանը։ 

Խոսելով ապաշրջափակման թեմային, նա ընդգծեց, որ օր առաջ դրանք պետք է բացվեն. «Հիմա մենք կարող ենք սկսել գազամուղների, խողովակաշարերի, էլեկտրահաղորդման գծերի, մալուխների նախագծերի նախագծումն ու կառուցում։ Մենք  հիմա երկաթուղու նախագծումը պետք է սկսենք և տեսնենք՝ էլ ինչ ենթակառուցվածքներ կան, որ մենք պետք է վերաբացենք։ 

Ինչո՞ւ ենք բառերի շուրջ վեճ ստեղծում, եկեք գնանք, գետնի վրա իրականացնենք այն, ինչ պայմանավորվել ենք։ Մենք րոպե առաջ դա անելու ենք»,–ասաց նա։

Արդեն 6 ամիս է, որ Գյումրին կառավարում է մի կլան, որի ղեկավարը, կամ շատերն են ճանաչում՝ Վարդանիկը, կամ ըստ մեղադրանքի համայնքային բրուշատկաներ գողացողի հայրը այս ընթացքում այնքան է իրեն արդեն թույլ տվել արտահայտություններ, որ վերջերս հրապարակային կերպով կասկածի տակ դրեց Հայաստանի ինքնիշխանությունը։ Այս մասին, այսօր՝ հոկտեմբերի 1–ին, ԱԺ–ում կառավարության հետ հարցուպատասխանի ժամանակ նշեց ՔՊ–ական պատգամավոր Կարեն Սարուխանյանը։ 

Նրա խոսքով, այս ընթացքում Գյումրիում կատարվել են բազմաթիվ շինարարական աշխատանքներ. «Դրանց մեծամասնությունը կառավարության շնորհիվ է իրականացվել և կա մտավախություն, որ այդ կլանի ղեկավարը և իր թիմը որձելու է անել ամեն ինչ, որ այդ աշխատանքներ վերագրվեն իրեն՝ քաղաքական դիվիդենտներ շահելու նպատակով, և այդ ամենը որպես ծառայություն մատուցելու օտարերկրյա որոշ ուժերի»,–ասաց նա և խնդրեց վարչապետ Նիկոլ Փաշինյանի գնահատականը դրա հետ կապված։ 

Փաշինյանն ի պատասխան ասաց. «Ես հատուկ հանձնարարական եմ տվել ՏԿԵ նախարարին, որ Գյումրիում կառավարությունն իր բոլոր ծրագրերը շարունակելու է։

Ինչ վերաբերում է ձեր նշած շրջանակի կողմից արվող հայտարարություններին, նախ, կարծում եմ՝ առաջին հերթին գյումրեցիները պետք է դրան գնահատական տան։ Երկրորդը, մյուսները նույնպես պիտի գնահատական տան։ Ես կարծում եմ, որ ՀՀ ինքնիշխանության դեմ հայտարարություն անողներին մենք պետք է ուղղակի դուրս շպրտենք քաղաքական ու հանրային դաշտից։ Դա պետք է անենք քաղաքական մեթոդներով և բոլոր այն մեթոդներով, որոնք կարելի է կիրառել ժողովրդավարական երկրում։ Ես համոզված եմ, որ դա տեղի կունենա։ 

Գյումրիում ընտրությունների արդյունքների հետ կապված էլ մենք խնդիր ունենք, մենք գիտենք, որ այնտեղ ընտրակաշառք է բաժանվել։ Մենք պետք է մեխանիզմներ ունենանք հետագայում նման դեպքերը բացառելու համար։ Պետությունն ու ժողովրդավարությունը պետք է իրենք իրենց պաշտպանելու մեխանիզմները կատարելագործեն։ Դա աշխատանք է, որը պետք է անել հանգիստ, հանդարտ և ինստիտուցիոնալ։ Չի կարող հայաստանի թեկուզ ՏԻՄ պաշտոնյա կասկածի տակ դնի Հայաստանի անկախությունը։ Մենք պետք է մեխանիզմներ ունենաք նման դեպքերի համար և փաստ չի, որ չունենք։ Նման երեւույթներին պետք է դասել թյուրիմացությունների շարքը, որոնք հընթացս շտկվում են»։ 

Կարեն Սարուխանյանն էլ հայտարարեց, որ ինքն անձամբ չի համակերպվում, որ Վարդան Ղուկասյանը Գյումրիի ղեկավարն է։