ԱՄՆ նախագահի Մերձավոր Արևելքի հարցերով հատուկ բանագնաց Սթիվ Ուիթքոֆը նախատեսում է այցելել Մոսկվա։ Այդ մասին հայտարարել է Ռուսաստանի Դաշնության նախագահի օգնական Յուրի Ուշակովը, հաղորդում է «Ինտերֆաքս»-ը։

Լրագրողների հարցին՝ արդյոք սպասվում է Ուիթքոֆի ժամանումը, Ուշակովը կարճ պատասխանել է. «Սպասում ենք»։

Հրապարակը գրում է.

Հայաստանում թմրանյութերի շրջանառությունը տագնապեցնող չափերի է հասել:

Իրավիճակն այնքան է դուրս եկել վերահսկողությունից ու դարձել կրիտիկական, որ նախորդ տարվա դեկտեմբերին ՀՀ կառավարությունը առաջարկությամբ հանդես եկավ` դպրոցականների շրջանում թմրամիջոցների գործածման կամավոր թեստավորման մեխանիզմ ներդնելու մասին։

Թմրամիջոցների գործածման և ապօրինի շրջանառության դեմ պայքարի ռազմավարության նախագծի համաձայն, այդ մեխանիզմը թույլ կտա պարբերական ստուգումների միջոցով անչափահասների շրջանում առավել վաղ փուլերում հայտնաբերել նման դեպքերը։ 
Հայաստանում տարեցտարի աճում է թե թմրամիջոցների հետ կապված հանցագործությունների և թե թմրանյութեր օգտագործող անձանց թիվը։

Պաշտոնական տվյալներով՝ եթե 2018-ին գրանցվել էր 877 դեպք, ապա 2023-ին այդ թիվը հնգապատկվել է՝ անցնելով 5000-ից։ Իսկ նախորդ տարի` 2024-ին` մեկ տարվա ընթացքում 10 անչափահասի գործ է ուղարկվել դատարան՝ թմրանյութերի ապօրինի շրջանառության մեղադրանքներով: 

Մասնագետները պնդում են, որ առավել վտանգավոր է այն, որ անչափահասների շրջանում թմրանյութերի իրացման թիվը բավականին մեծ է, սակայն պաշտոնական վիճակագրությունը չի արտացոլում ողջ իրական պատկերը, քանի որ շատ դեպքեր պարզապես չեն արձանագրվում:

Երևանի Նիկոլ Աղբալյանի անվան թիվ 19 դպրոցի ծնողներից մեկը դիմել էր «Հրապարակի» խմբագրություն եւ պատմում էր, որ իր որդուն դպրոցում ոստիկանները խուզարկել են եւ ծնողի խոսքով` 7-րդ դասարանի բոլոր երեխաների գրպանները, պայուսակները, մինչև անգամ գրքերի և տերերի արանքներն են ոստիկանները ստուգել` բացատրելով, որ կոնֆետանման թմրամիջոցներ են փնտրում: Մեզ ահազանգած քաղաքացին պնդում է, որ այս հանգամանքը որոշ ծնողների խիստ մտահոգել է: 

«Հրապարակը» փորձեց հասկանալ, թե ինչ է տեղի ունեցել դպրոցում օրեր առաջ, ինչո՞ւ են ոստիկանները, ծնողների խոսքով` խուզարկել երեխաներին: Աղբալյանի անվան թիվ 19 դպրոցի տնօրենի հետ փորձեցինք զրուցել, սակայն նա տեղում չէր, նրա փոխարեն մեր հարցերին պատասխանեց փոխտնօրեն Մանուկյանը, որը հավաստիացրեց, որ որևէ խուզարկություն տեղի չի ունեցել դպրոցում` ոչ օրեր առաջ, ոչ էլ անգամ շաբաթներ առաջ. «Ես չգիտեմ, թե խոսքն ինչի մասին է: Իրականում ոչ մի խուզարկություն էլ տեղի չի ունեցել: Չարախոսում են: Ոստիկանները ժամանակ առ ժամանակ գալիս են դպրոց, զրույց-դասեր անցկացնում երեխաների հետ, ինչո՞ւմն է խնդիրը», - ասում է փոխտնօրենը: 

Հակառակ դպրոցի փոխտնօրենի պնդումների Ներքին գործերի նախարարությունից «Հրապարակին» հայտնեցին. «Ոստիկանների կողմից նշված դպրոցում ստուգում է եղել, սակայն ոչ խուզարկություն, զուտ ստուգումներ են անցկացվել: Թմրանյութերի ուղղությամբ է եղել ստուգումը, սակայն ոչ մի բան չի հայտնաբերվել», - նշեց ՆԳՆ խոսնակը և հավելեց, որ Երևանի մյուս դպրոցներում էլ են պարբերաբար նման ստուգումներ իրականացվում: Այս դպրոցում է սովորում Երևանի փոխքաղաքապետ Լևոն Հովհաննիսյանի քենու որդին է:

Ըստ շրջանառվող լուրերի` հենց Հովհաննիսյանի քենու որդին է մանկավարժների մոտ նման կասկած հարուցել, ինչից հետո ուսուսցիչները դիմել են ոստիկաններին` պրոֆիլակտիկ աշխատանքներ կատարելու խնդրանքով: Հիշեցնենք, որ նախորդ տարվա հոկտեմբերին էլ այդ տղան գազային նյութ էր պայթեցրել դպրոցում և խաթարել դասապրոցեսը:

Ֆրանսիական կողմը Փարիզում Ռուսաստանի դեսպանատան դիվանագետներին չի հրավիրել Հաղթանակի օրվա տոնակատարությանը: Այդ մասին «ՌԻԱ Նովոստի» գործակալությանը հայտնել է Ֆրանսիայում Ռուսաստանի Դաշնության դեսպան Ալեքսեյ Մեշկովը։

«Խորհրդային Միությունն իր վրա ընդունեց վճռական հարվածը ֆաշիզմի դեմ պայքարում. Հայրենական մեծ պատերազմում զոհվել է 27 միլիոն մարդ: Չնայած դրան, Ռուսաստանի ներկայացուցիչներն արդեն առաջին տարին չէ, որ չեն հրավիրվել Ֆրանսիայում հիշատակի պաշտոնական միջոցառումներին, որոնք նվիրված են ֆաշիզմի նկատմամբ տարած հաղթանակին», – ասել է դիվանագետը:

Ամենայն Հայոց Կաթողիկոս Ն.Ս.Օ.Տ.Տ. Գարեգին Բ-ն կմասնակցի Հռոմի պապ Ֆրանցիսկոսի հուղարկավորության արարողությանը։

Այս մասին լրատվամիջոցներին հայտնել է Տեր Եսայի քահանա Աթենյանը։ 

Հուղարկավորության արարողությունը կկայանա շաբաթ օրը՝ ապրիլի 26-ին, Վատիկանում։ 

ԱՄՆ-ի 100-ից ավելի համալսարաններ և քոլեջներ ապրիլի 22-ին համատեղ նամակ են հրապարակել՝ քննադատելով նախագահ Դոնալդ Թրամփի «քաղաքական միջամտությունը» կրթական համակարգին։ Այս մասին հաղորդում է AFP գործակալությունը։ 

«Մենք միաձայն դեմ ենք արտահայտվում կառավարության աննախադեպ չափն անցնելուն և քաղաքական միջամտությանը, որն այժմ վտանգում է ամերիկյան բարձրագույն կրթությունը», – ասված է նամակում։

«Մենք պատրաստ ենք կառուցողական բարեփոխումների և դեմ չենք կառավարության օրինական վերահսկողությանը: Այնուամենայնիվ, մենք պետք է դեմ կանգնենք կառավարության անտեղի ներխուժմանը», – նամակից հատված է մեջբերում գործակալությունը։

AFP-ն նշում է, որ Թրամփը փորձել է վերահսկողություն սահմանել մի շարք հեղինակավոր բուհերի նկատմամբ այն պնդումների պատճառով, թե նրանք համալսարանում հանդուրժում են հակասեմականությունը։ ԱՄՆ վարչակազմը սպառնացել է կրճատել նրանց բյուջեները, զրկել հարկերից ազատված լինելու կարգավիճակից և թույլ չտալ օտարերկրյա ուսանողների ընդունել:

Նամակում ասվում է, որ համալսարաններն ու քոլեջները հանդիսանում են կենտրոններ, որտեղ «դասախոսական կազմը, ուսանողները և անձնակազմը ազատ են մտքեր և կարծիքներ փոխանակելու» մի շարք հարցերի շուրջ՝ չվախենալով «հատուցումից, գրաքննությունից կամ արտաքսումից»:

Նամակի հրապարակումից առաջ Հարվարդի համալսարանը դատական հայց էր ներկայացրել Թրամփի վարչակազմի դեմ, որը սպառնացել էր կրճատել ֆինանսավորումը և արտաքին քաղաքական վերահսկողություն սահմանել համալսարանի նկատմամբ։

Լիբանանյան շիա «Հեզբոլլահ» շարժումը կհամաձայնի քննարկել իր ջոկատների զինաթափման հարցը միայն Իսրայելի կողմից որոշակի պայմանների կատարման և ագրեսիայից տուժած շրջանների վերականգնման դեպքում։ Ինչպես  տեղեկանում է ՏԱՍՍ գործակալությունից, այդ մասին հայտարարել է Լիբանանի «Հավատարմություն դիմադրությանը» խորհրդարանական խմբակցության պատգամավոր Հասան Ֆադլալան։

«Մենք առաջին հերթին պահանջում ենք դադարեցնել հարձակումները Լիբանանի վրա, որոնց ականատեսներն ենք դարձել վերջին օրերին։ Երկրորդ, պետք է դադարեցվի օկուպացիան, և իսրայելական զորքերը պետք է դուրս բերվեն Լիբանանի տարածքից: Երրորդ, մենք սպասում ենք թշնամու կողմից գերեվարված մեր բոլոր գերիների ազատ արձակմանը», – նշել է քաղաքական գործիչը, որի խոսքը մեջբերել Asharq al-Awsat թերթը։

«Հեզբոլլահ»-ը ներկայացնող պատգամավորը որպես չորրորդ պայման նշել է այն բնակավայրերի վերականգնումը, որոնց նյութական վնաս է հասցվել ռազմական գործողությունների ընթացքում։

«Ագրեսիայի ընթացքում ավերված և վնասված բոլոր տները պետք է վերականգնվեն», – ընդգծել է Ֆադլալան։ – Երբ այս ամենը կատարվի, մենք կարող ենք ձեռնամուխ լինել Լիբանանի պաշտպանական դոկտրինի քննարկմանը»:

Ապրիլի 20-ին հանրապետության նախագահ գեներալ Ժոզեֆ Աունը Զատկի տոնի առթիվ իր ուղերձում հայտարարել էր, որ չի  պատրաստվում շտապել «Հեզբոլլահ»-ի զինաթափման հարցում և շարժման վրա ճնշում գործադրել՝ անցանկալի հետևանքների պատճառով։

«Մենք դա կիրականացնենք պաշտպանական դոկտրինի շուրջ երկխոսության շրջանակներում, բայց ստիպված ենք սպասել, մինչև հանգամանքները թույլ տան, – նշել էր Աունը։ – Այժմ ոչ ոք չի խոսում ժամկետների կամ ճնշման մասին»։

Նախագահն ընդգծել էր, որ «ներքին հարցերին պետք է մոտենալ խոհեմությամբ և պատասխանատվությամբ՝ Լիբանանը կործանման չտանելու համար»։

Ապրիլի 18-ին «Հեզբոլլահ»-ի գլխավոր քարտուղար Նաիմ Քասեմը նախազգուշացրել էր, որ թույլ չի տա ուժով զինաթափել շիա մարտիկներին։ Նա նաև նշել էր, որ լիբանանյան բանակի և դիմադրության ջոկատների միջև բախում տեղի չի ունենա:

Շվեյցարիան առաջին անգամ միացել է ռուսական լրատվամիջոցների դեմ եվրոպական պատժամիջոցներին: Այս մասին տեղեկանում ենք «ՌԻԱ Նովոստի» գործակալությունից։

Խոսքն ութ զանգվածային լրատվամիջոցների մասին է՝ EADaily, «Լենտա», News Front, RuBaltic, «Յուժնի Ֆրոնտ», «Ռազմավարական մշակույթի հիմնադրամ», «Կրասնայա զվեզդա» և Fondsk։ Եվրամիությունը դրանք ներառել է փետրվարին հաստատված հակառուսական պատժամիջոցների 16-րդ փաթեթի մեջ։ Նշվում է, որ ըստ Տնտեսական հարցերի պետական ​​քարտուղարության (SECO) հրապարակած փաստաթղթի՝ Շվեյցարիան նույնպես այդ հրատարակությունները ներառել է իր պատժամիջոցների ցանկում։

Այն ուժի մեջ կմտնի ապրիլի 23-ից։

Մինչ այս Շվեյցարիան մամուլի ազատությունը հարգելու նկատառումներով երբեք չի միացել ԶԼՄ-ների դեմ պատժամիջոցներին:

Ռուսական ԶԼՄ-ների հետ կապված իրավիճակն Արևմուտքում վերջին տարիներին գնալով ավելի է բարդանում։ Դեռևս 2016 թ. նոյեմբերին Եվրախորհրդարանը բանաձև ընդունեց, որում ասվում էր ռուսական ԶԼՄ-ներին հակազդելու անհրաժեշտության մասին՝ գլխավոր սպառնալիքը նշելով Sputnik-ն ու RT-ն։ Վերջերս ԵՄ-ն պատժամիջոցներ է սահմանել ռուսական խոշոր մեդիաների դեմ՝ արգելելով դրանց հեռարձակումը ԵՄ-ի տարածքում։ Ընդ որում, այս որոշումն ընդունվել է առանց դատարան կամ ազգային կարգավորող մարմիններին դիմելու, որոնք պատասխանատու են իրենց երկրների մեդիաշուկաների համար։

Բացի այդ, Բրյուսելում ԵՄ-ի կառույցներին առընթեր լրագրողների հավատարմագրման հանձնաժողովը հրաժարվել է երկարաձգել «ՌԻԱ Նովոստի»-ի հավատարմագրումը 2025 թվականի համար՝ պատճառաբանելով պատժամիջոցներից բխող սահմանափակումները. գործակալությունը բողոքարկել է այս որոշումը։ Միևնույն ժամանակ ԵՄ-ն, ավելի վաղ պատժամիջոցներ սահմանելով ռուսական ԶԼՄ-ների դեմ, քանիցս ընդգծել է, որ սահմանափակումները չեն վերաբերում նրանց աշխատակիցների լրագրողական գործունեությանը։

Ռուսաստանի նախագահ Վլադիմիր Պուտինը մտադիր չէ մասնակցել Հռոմի Ֆրանցիսկոս պապի հուղարկավորությանը, որը տեղի կունենա շաբաթ օրը Վատիկանում։ Այս մասին երեքշաբթի օրը հայտարարել է Կրեմլի մամուլի քարտուղար Դմիտրի Պեսկովը։

«Ոչ, նախագահը նման մտադրություն չունի», – մամուլի ասուլիսում ասել է Պեսկովը՝ պատասխանելով այն հարցին, թե արդյոք Պուտինը կմասնակցի պապի հուղարկավորությանը։

Հիշեցնենք՝ Հռոմի պապը մահացել է երկուշաբթի օրը, մահվան պատճառը կաթվածն է, կոման և սրտանոթային անբավարարությունը։

ԱՄՆ նախագահ Դոնալդ Թրամփը՝ կնոջ՝ Մելանիայի հետ, և Ֆրանսիայի նախագահ Էմանուել Մակրոնը հրավիրված են հուղարկավորությանը։ Ըստ արդեն հաստատված լրատվամիջոցների տեղեկությունների՝ հուղարկավորության արարողությանը մտադիր է մասնակցել նաև Ուկրաինայի նախագահ Վլադիմիր Զելենսկին։

Նուբարաշենի հոգեբուժական հիվանդանոցի տնօրեն Սերգեյ Խաչատրյանը 6 տարվա աշխատանքից հետո ազատվել է այդ պաշտոնից. պայմանագրի ժամկետն է լրացել։ Այս մասին ֆեյսբուքյան իր էջում գրում է Սերգեյ Խաչատրյանը։

«Ահա եկավ օրն ու ժամը` թողնելու Նուբարաշենի հոգեբուժական հիվանդանոցի /ՀՀ ԱՆ «Հոգեկան առողջության պահպանման ազգային կենտրոն» ՓԲԸ/ տնօրենի պաշտոնը։ Իմ հետ կնքված պայմանագրի ժամկետը լրացավ, և այն երկարացնելու առաջարկ չստացա։

Անկեղծ ասած, երկուսի համար էլ շնորհակալ եմ։ Այս երկար ու ձիգ 6 տարվա ընթացքում ինձ համար նոր աշխարհ եմ բացահայտել։ Մոռացված և լքված ոլորտ, անբարեկեցիկ և հուսախաբ, ոտնահարված իրավունքներով և անպաշտպան, անմարդկային պայմաններում ապրող պացիենտներ, խարան։ Անվերջ խարան»,- գրել է նա։

Նրա խոսքով՝ այս ոլորտում ծայրահեղաբար շեշտված են մարդկային որակներն ու հարաբերությունները` և՛ լավ, և՛ վատ տեսանկյուններից։ Խաչատրյանի պնդմամբ` 6 տարում կարողացել է իր ներդրումն ունենալ ոլորտի բարելավման գործում։ Նա շնորհակալություն է հայտնել այն թիմին, որի հետ աշխատել է, ինչպես նաև առողջապահության նախարարությանը, բազմաթիվ գործընկերների, պետական և ոչ պետական կառույցներին։

Հռոմի պապ Ֆրանցիսկոսի հուղարկավորությունը տեղի կունենա ապրիլի 26-ին, հայտնում է Վատիկանը։ Արարողությունը տեղի կունենա Սանտա Մարիա Մաջիորեի բազիլիկայում։ Այժմ «Սուրբ Մարթայի» տանը տեղի է ունենում Ֆրանցիսկոսին հրաժեշտին արարողությունը։ Այս մասին գրում է kommersant.ru-ն:

«Շաբաթ օրը՝ 2025 թվականի ապրիլի 26-ին, ժամը 10:00-ին (Երևանի ժամանակով ժամը 12:00-ին), Ֆրանցիսկոս պապի հոգեհանգստի արարողությունը տեղի կունենա Սուրբ Պետրոսի տաճարի առջև, ինչպես սահմանված է Ordo Exsequiarum Romani Pontificis-ով (Հռոմի պոնտիֆիկոսի հուղարկավորման կարգ-Խմբ.): Այնուհետև Հռոմի պապի մարմինը  կտեղափոխվի Սուրբ Պետրոսի տաճար, իսկ այնտեղից՝ Սանտա Մարիա Մաջիորեի բազիլիկա՝ հուղարկավորության համար»,- ասել է Պապական ​​պատարագի արարողությունների ծառայության ղեկավար մոնսինյոր Դիեգո Ռավելլին։

Ֆրանցիսկոսի հուղարկավորությանը մասնակցելու են տարբեր երկրների ղեկավարներ, այդ թվում՝ ԱՄՆ նախագահ Դոնալդ Թրամփը, Ֆրանսիայի նախագահ Էմանուել Մակրոնը, Բրազիլիայի նախագահ Լուլա դա Սիլվան, Ուկրաինայի նախագահ Վլադիմիր Զելենսկին և այլք։ Ռուսաստանը դեռ չի կողմնորոշվել՝ կմասնակցի արդյոք արարողությանը։

88-ամյա Հռոմի Ֆրանցիսկոս պապը մահացել է ապրիլի 21-ի առավոտյան Վատիկանում. մահվան պատճառը կաթվածն է։