Այսօր shamshyan.com–ը գրել էր, որ սեպտեմբերի 29–ին ուսուցչի դիտողությունից հետո երեխաները դուրս են եկել դասասենյակից, ու քանի որ պահակը նրանց թույլ չի տվել դպրոցից դուրս գալ, նրանք «դասից փախել են» 2-րդ հարկի պատուհանից։ Դրա հետևանքով երեխաներից մեկը մեջքի հատվածում սուր ցավերով տեղափոխվել է հիվանդանոց։

«9-րդ դասարանից մի քանի տղա և 2 աղջիկ իջել են ներքև, պահակը թույլ չի տվել, որպեսզի իրենք դասից փախչեն։ Բարձրացել են 2-րդ հարկ, 2-րդ հարկից թռել են։ Այդ բոլոր երեխաները, այդ թվում այդ աղջիկը, գնացել են տուն, օրվա ընթացքում շրջել են Քանաքեռով, երեկոյան ժամը 6–ի կողմերը ծնողները աղջկան տարել են հիվանդանոց։ Պարզվել է, որ երեխայի կողոսկրը կոտրվել է»,– ասաց տնօրենը։

Նրա խոսքով ` աղջկա կյանքին վտանգ չի սպառնում։ Դասղեկը այցելել է երեխային, ամեն ինչ նորմալ է, երեխան ցանկանում է շուտափույթ վերադառնալ դպրոց։

Սոթքի հատվածում մեր կողմն անցած ադրբեջանական բոլոր ոչխարներին հայկական կողմը վերադարձրել է, հայտնեց Sputnik Armenia-ի աղբյուրը։

Նախկինում հայկական կողմից` տարբեր սահմանային հատվածներից կենդանիներ են անցել ադրբեջանական կողմ, որոնք հիմնականում չեն վերադարձվել։ Օրինակ` 2022–ին նույն Գեղարքունիքի մարզի Կութ գյուղի 5 ընտանիքներին պատկանող կովերին ադրբեջանցիները գողացել էին, ստիպված ՀՀ կառավարությունն էր գյուղացիներին փոխհատուցում տվել։

Հիշեցնենք, որ ադրբեջանցիների ոչխարները Սոթքի հատվածում անցել են ՀՀ տարածք։

Փարաքարի սպանություններով պայմանավորված՝ այսօր պաշտոնանկ է եղել Ազգային անվտանգության ծառայության Արմավիրի մարզային վարչության պետ Գարիկ Բարսեղյանը: Այս մասին հայտնում է լրագրող Լիա Սարգսյանը։

«ԱԱԾ լրատվական վարչությունից Բարսեղյանի պաշտոնանկության մասին լուրը հաստատեցին:

ԱԱԾ պետ Անդրանիկ Սիմոնյանի հրամանով ԱԱԾ Արմավիրի մարզային վարչության պետ է նշանակվել Հակոբ Պետրոսյանը:

Արմավիրի մարզի Մերձավան բնակավայրում սեպտեմբերի 23-ին սպանվեցին Փարաքարի համայնքապետ Վալոդյա Գրիգորյանը և նրա ընկերը՝ քրեական ոստիկանության աշխատակից Կարեն Աբրահամյանը: Այդ դեպքից հետո արդեն պաշտոնանկ էին արվել Քննչական կոմիտեի Արմավիրի մարզային քննչական վարչության պետ Հրաչյա Ղազարյանու, Քրեական ոստիկանության Արմավիրի մարզային վարչության պետ Արթուր Բդոյանը, Արմավիրի մարզի դատախազ Վահան Սարգսյանը»:

Պաշտոնանկ է արվել ԱԱԾ Արմավիրի մարզային վարչության պետ Գարիկ Բարսեղյանը։ Այս մասին հայտնում են ԱԱԾ մամուլի ծառայությունից։

ԱԱԾ Արմավիրի մարզային վարչության պետ է նշանակվել Հակոբ Պետրոսյանը: 

Ֆրանսիայի նախագահ Էմանուել Մակրոնը շնորհավորել է Հայաստանի և Ադրբեջանի առաջնորդներին խաղաղության գործընթացում առաջընթացի կապակցությամբ:

Այս մասին Մակրոնը ասել է Կոպենհագենում Եվրոպական քաղաքական համայնքի գագաթնաժողովի շրջանակներում անցկացվող պանելային քննարկման ժամանակ:

«Ես շնորհավորում եմ Հայաստանի և Ադրբեջանի երկու առաջնորդներ Նիկոլ Փաշինյանին և Իլհամ Ալիևին երկու երկրների միջև խաղաղության հասնելու կապակցությամբ: Հայաստանի և Ադրբեջանի միջև խաղաղության մասին հռչակագրի ստորագրումը նշանակալի ձեռքբերում է»,-ասել է Մակրոնը:

Ալբանիայի վարչապետ Էդի Ռաման Կոպենհագենում Եվրոպական քաղաքական համայնքի 7-րդ գագաթնաժողովի շրջանակներում կատակել է Ֆրանսիայի նախագահ Էմանուել Մակրոնի հետ ԱՄՆ նախագահ Դոնալդ Թրամփի լեզվի սայթաքման հետ կապված, երբ նա սխալմամբ հիշատակել է Ալբանիան և Ադրբեջանը՝ խոսելով Հայաստանի և Ադրբեջանի միջև խաղաղության մասին։

Ալբանիայի վարչապետը, հաշվի առնելով Թրամփի կողմից «Ալբանիայի և Ադրբեջանի միջև հակամարտության» սխալ հիշատակումը, կատակով ասել Է Մակրոնին:

«Դուք չեք շնորհավորել Իլհամ Ալիևին և ինձ, Թրամփը վերջ դրեց մեր միջև հակամարտությանը: Դուք նույնպես պետք է շնորհավորեք Ադրբեջանին և Ալբանիային»,-ասել է Ալբանիայի վարչապետը:

Հիշեցնենք, որ Թրամփն իր հարցազրույցներից մեկում ասել էր. «Ես վերջ տվեցի Ալբանիայի և Ադրբեջանի միջև հակամարտությանը»:

Կոպենհագենում՝ Եվրոպական քաղաքական համայնքի 7-րդ գագաթնաժողովի շրջանակներում, տեղի է ունեցել Հայաստանի Հանրապետության վարչապետ Նիկոլ Փաշինյանի հանդիպումը Ֆրանսիայի Հանրապետության նախագահ Էմանուել Մակրոնի հետ։

Հանդիպման ընթացքում վարչապետ Փաշինյանը և նախագահ Մակրոնը քննարկել են Հայաստան-Ֆրանսիա բազմաոլորտ համագործակցության ընթացքն ու զարգացման հեռանկարները։ Կողմերը վերահաստատել են Հայաստանի և Ֆրանսիայի միջև ձևավորված առանձնաշնորհյալ հարաբերությունների բարձր մակարդակը և ընդգծել համատեղ նոր նախաձեռնությունների իրականացման կարևորությունը։ 

Քննարկվել են նաև տարածաշրջանային զարգացումներին, Վաշինգտոնի խաղաղության գագաթնաժողովում ձեռք բերված պայմանավորվածությունների և «TRIPP» նախագծի իրականացմանը վերաբերող հարցեր։

Ֆրանսիայի նախագահը վերահաստատել է իր երկրի շարունակական աջակցությունը Հայաստանի անկախությանն ու ինքնիշխանությանը, ինչպես նաև ժողովրդավարական բարեփոխումների օրակարգին։ Վարչապետ Փաշինյանը շնորհակալություն է հայտնել Ֆրանսիային Հայաստանի համար այս կարևոր փուլում ցուցաբերած համակողմանի աջակցության համար։

Կողմերը պայմանավորվել են շարունակել սերտ շփումները երկկողմ և բազմակողմ հարթակներում։

Հոկտեմբերի 2-ին պաշտոնապես ուժի մեջ է մտել Ռուսաստանի և Իրանի միջև Համապարփակ ռազմավարական գործընկերության մասին պայմանագիրը, որը երկու երկրների նախագահներն ստորագրել էին այս տարվա հունվարին, Մոսկվայում: «Արմենպրես»-ի փոխանցմամբ՝ այդ մասին հաղորդել են ՌԴ արտաքին գործերի նախարարությունում։ 

«Այս իրադարձությունը կարևոր ուղենիշ է ռուս-իրանական միջպետական ​​հարաբերությունների պատմության մեջ, որոնք հասել են համապարփակ ռազմավարական գործընկերության որակապես նոր մակարդակի։ Փաստաթուղթն առաջադրում է հանգուցային կողմնորոշիչներ երկարաժամկետ հեռանկարում երկկողմ համագործակցության բոլոր առաջնահերթ ուղղություններում», - ասվում է արտաքին քաղաքական գերատեսչության հաղորդագրության մեջ։

Ինչպես նշել են ՌԴ ԱԳՆ-ում, պայմանագիրը «նախատեսում է միջազգային ասպարեզում փոխգործակցության ամրապնդում բազմաբևեռ աշխարհակարգի ձևավորման պայմաններում, ներառյալ սերտ համակարգումը առաջատար բազմակողմ միավորումների շրջանակներում, համատեղ ջանքերը տարածաշրջանում կայունության և անվտանգության ամրապնդման համար, հակահարվածն ընդհանուր մարտահրավերներին և սպառնալիքներին»։  

«Պայմանագիրն արտացոլում է Ռուսաստանի և Իրանի բարձրագույն քաղաքական ղեկավարության ռազմավարական ընտրությունը՝ ի նպաստ բարեկամական, բարիդրացիական հարաբերությունների հետագա բազմակողմանի ամրապնդման, ինչը համապատասխանում է երկու պետությունների ժողովուրդների հիմնարար շահերին», - նշել են ԱԳ նախարարությունում։

Հոկտեմբերի 3-ին Հայաստանում սպասվում է առանց տեղումների եղանակ: Քամին արևմտյան է՝ 2-5 մ/վրկ արագությամբ: Առաջիկա հինգ օրերի ընթացքում ջերմաստիճանը աստիճանաբար կբարձրանա 8-10 աստիճանով: Ինչպես հայտնում են Հայպետհիդրոմետից՝ Երևանում տեղումներ չեն սպասվում: Մայրաքաղաքում գիշերը ջերմաստիճանը կհասնի +9-ից +11 աստիճանի, իսկ վաղը ցերեկը՝ +20-ից +22 աստիճանի: 

Օդի ջերմաստիճանը մարզերում՝

Շիրակ՝ +3-ից +8°C գիշերը, +15-ից +19°C ցերեկը

Կոտայքի լեռներ՝ +3-ից +7°C գիշերը, +15-ից +18°C ցերեկը

Կոտայքի նախալեռներ՝ +8-ից +11°C գիշերը, +16-ից +19°C ցերեկը

Սևանա լճի ավազան՝ +2-ից +7°C գիշերը, +11-ից +14°C ցերեկը

Լոռի՝ +4-ից +8°C գիշերը, +11-ից +15°C ցերեկը

Տավուշ՝ +9-ից +12°C գիշերը, +13-ից +16°C ցերեկը

Արագածոտնի լեռներ՝ +2-ից +7°C գիշերը, +13-ից +16°C ցերեկը

Արագածոտնի նախալեռներ՝ +7-ից +12°C գիշերը, +16-ից +20°C ցերեկը

Արարարատ՝ +9-ից +12°C գիշերը, +20-ից +23°C ցերեկը

Արմավիր՝ +8+11, +20+23 ցերեկը

Վայոց ձորի լեռներ՝ +2+6 գիշերը, +13+16 ցերեկը

Վայոց ձորի նախալեռներ՝ +8+12 գիշերը, +20+23 ցերեկը

Սյունիքի հովիտներ՝ +9+12 գիշերը, +19+22 ցերեկը

Սյունիքի նախալեռներ՝ +5+8 գիշերը, +13+16 ցերեկը

ԱԺ «Քաղաքացիական պայմանագիր» խմբակցությունը արտահերթ նիստի օրակարգ է բերել ԱԺ հայտարարության նախագիծ՝ Հայաստանի և Ադրբեջանի միջև խաղաղության հաստատման վերաբերյալ։
Նախագծի քննարկմանը ընդդիմադիր խմբակցությունները հրաժարվել են մասնակցել՝ այն որակելով հակահայկական։
Հայտարարության մեջ ասված է․ «ՀՀ Ազգային ժողովը.

- Պաշտպանելով Հայաստանի Հանրապետության ինքնիշխանությունը եւ տարածքային ամբողջականությունը,

- Գիտակցելով միմյանց տարածքային ամբողջականության, ինքնիշխանության, միջազգայնորեն ճանաչված սահմանների անխախտելիության, քաղաքական անկախության ճանաչման հիման վրա բոլոր հարեւանների հետ խաղաղ համակեցության նշանակությունը տարածաշրջանի տնտեսական բարգավաճման եւ առաջընթացի համար,

- Ընդգծելով խաղաղության հաստատման կարեւորությունը Հայաստանի Հանրապետության զարգացման եւ հարատեւության համար,

- Հենվելով անցյալի հակամարտությանը վերջ դնելու եւ ժողովուրդների միջեւ բարիդրացիական հարաբերություններ հաստատելու անհրաժեշտության գիտակցության վրա՝

1. աջակցություն է հայտնում 2025 թվականի օգոստոսի 8-ին ԱՄՆ մայրաքաղաք Վաշինգտոնում Ամերիկայի Միացյալ Նահանգների նախագահ Դոնալդ Թրամփի, Հայաստանի Հանրապետության վարչապետ Նիկոլ Փաշինյանի եւ Ադրբեջանի Հանրապետության նախագահ Իլհամ Ալիեւի եռակողմ հանդիպման արդյունքում՝ Հայաստանի Հանրապետության վարչապետի եւ Ադրբեջանի Հանրապետության նախագահի համատեղ Հռչակագրին,

2. ողջունում է 2025 թվականի օգոստոսի 8-ին Ամերիկայի Միացյալ Նահանգների մայրաքաղաք Վաշինգտոնում «Հայաստանի Հանրապետության եւ Ադրբեջանի Հանրապետության միջեւ խաղաղության եւ միջպետական հարաբերությունների հաստատման մասին» համաձայնագրի նախաստորագրումը եւ ստորագրմանն ուղղված ջանքերը,

3. կարեւորում է ձեռք բերված համաձայնությունը առ այն, որ Հայաստանի Հանրապետության եւ Ադրբեջանի Հանրապետության միջեւ հաղորդակցությունների բացումը տեղի կունենա պետությունների ինքնիշխանության, տարածքային ամբողջականության եւ իրավազորության հարգման հիման վրա, տարածաշրջանում ու նրա հարեւանությամբ խաղաղությունը, կայունությունն ու բարգավաճումը խթանելու նպատակով: Այս ջանքերը կներառեն Ադրբեջանի Հանրապետության հիմնական մասի եւ Նախիջեւանի Ինքնավար Հանրապետության միջեւ Հայաստանի Հանրապետության տարածքով անխոչընդոտ հաղորդակցությունը, Հայաստանի Հանրապետության համար միջազգային ու ներպետական հաղորդակցության փոխադարձ առավելություններով,

4. առանցքային է համարում, որ Հայաստանի Հանրապետությունն աշխատելու է Ամերիկայի Միացյալ Նահանգների եւ փոխադարձաբար համաձայնեցված երրորդ կողմերի հետ՝ Հայաստանի Հանրապետության տարածքում «Թրամփի ուղի՝ հանուն միջազգային խաղաղության եւ բարգավաճման» («Trump Route for International Peace and Prosperity» (TRIPP)) հաղորդակցության ծրագրի իրականացման շրջանակը սահմանելու նպատակով,

5. քաջալերում է անցյալի հակամարտությամբ չկանխորոշված, Միավորված ազգերի կազմակերպության կանոնադրությանն ու 1991 թվականի Ալմա-Աթայի հռչակագրին համապատասխան պայծառ ապագայի ուղի նախանշելու՝ 2025 թվականի օգոստոսի 8-ի Հռչակագրով Հայաստանի եւ Ադրբեջանի միջեւ մեկնարկած գործընթացը,

6. վերահաստատում է, որ մարդկային անասելի տառապանքներ պատճառած հակամարտությունից հետո Հայաստանի եւ Ադրբեջանի ժողովուրդների համար ստեղծվել են բարիդրացիական հարաբերություններ սկսելու պայմաններ՝ հիմնված միջազգային սահմանների անքակտելիության եւ տարածքներ ձեռք բերելու նպատակով ուժի կիրառման անթույլատրելիության սկզբունքների վրա,

7. երախտագիտություն է հայտնում ԱՄՆ նախագահ Դոնալդ Թրամփին Հայաստանի եւ Ադրբեջանի միջեւ խաղաղության հաստատման գործում իր անուրանալի ներդրման համար,

8. ընդգծում է, որ Հայաստանի եւ Ադրբեջանի միջեւ խաղաղության հաստատումը նոր հնարավորություններ է բացում տնտեսական բարգավաճման եւ առաջընթացի համար, որ խաղաղության ինստիտուցիոնալ կայացումը բխում է Հայաստանի Հանրապետության կենսական շահերից եւ որ անհրաժեշտ է ջանքեր գործադրել հաստատված խաղաղության հետագա ամրապնդման ուղղությամբ,

9. կոչ է անում Հայաստանի Հանրապետության եւ Ադրբեջանի Հանրապետության հանրային, քաղաքական, փորձագիտական, գիտական, մշակութային շրջանակներին՝ ձեռնպահ մնալ կոնֆլիկտը խորհրդանշող եւ/կամ այն վերաձեւակերպելուն կամ բորբոքելուն ուղղված խոսույթներից եւ գործողություններից, հաստատված խաղաղության հարատեւությունն ու հուսալիությունը հանուն Հարավային Կովկասի բարգավաճման երաշխավորելու համար:

ՆԱԽԱԳԾԻ ԸՆԴՈՒՆՄԱՆ ՀԻՄՆԱՎՈՐՈՒՄ

2025 թվականի օգոստոսի 8-ին Ամերիկայի Միացյալ Նահանգների մայրաքաղաք Վաշինգտոնում Ամերիկայի Միացյալ Նահանգների նախագահ Դոնալդ Թրամփի, Հայաստանի Հանրապետության վարչապետ Նիկոլ Փաշինյանի եւ Ադրբեջանի Հանրապետության նախագահ Իլհամ Ալիեւի եռակողմ հանդիպման արդյունքում՝ Հայաստանի Հանրապետության վարչապետը եւ Ադրբեջանի Հանրապետության նախագահը ստորագրել են համատեղ Հռչակագիր (այսուհետ՝ Հռչակագիր), որը միտված է կողմերի միջեւ երկարաժամկետ եւ կայուն խաղաղության հաստատմանը: Հռչակագրով Հայաստանի Հանրապետության եւ Ադրբեջանի Հանրապետության ղեկավարները վերահաստատել են իրենց պատրաստակամությունը՝ խաղաղ հարաբերությունների հաստատման, փոխադարձ տարածքային ամբողջականության ճանաչման եւ հաղորդակցությունների բացման շուրջ ձեռք բերված պայմանավորվածությունները կյանքի կոչելու ուղղությամբ:

Այս համատեքստում, կարեւոր է, որ Հայաստանի Հանրապետության Ազգային ժողովը՝ որպես ժողովրդի կողմից առաջնային մանդատով ընտրված ներկայացուցչական մարմին, հայտարարության միջոցով աջակցություն հայտնի խաղաղության գործընթացին եւ քաջալերի բոլոր շահագրգիռ կողմերին՝ պահպանելու եւ ամրապնդելու ձեռք բերված խաղաղությունը»։