Ադրբեջանական կողմի նպատակը հենց խուճապ և անհանգստություն առաջացնելն է, և իհարկե, երբ գյուղի մոտ կրակում են, դա անհանգստացնում է բոլոր գյուղացիներին։ Այս մասին, այսօր՝ մայիսի 29–ին, ԱԺ–ում լրագրողների հետ զրույցում նշեց ԱԺ ՔՊ խմբակցության պատգամավոր Արմեն Խաչատրյանը՝ անդրադառնալով նրան, որ այս գիշեր Ադրբեջանի զինուժը կրակել է Խոզնավար գյուղի ուղղությամբ՝ վնասել տներից մեկը։

«Եթե տեսնում են, քր երբեմն էլ գնդակները կպչում են իրենց տանիքներին կամ տարբեր շինություններին, իհարկե դա անհանգստացնում է։ Իհարկե, վտանգ կա, առաջին անգամը չէ, մի քանի անգամ նման դեպք եղել է։ Ցավոք սրտի կրկնվում են այդպիսի դեպքերը, դատաձգաբանական, բալիստիկ մի շարք փորձաքննություններ են նշանակված, հարուցված են քրեական գործեր, որպեսզի պարզենք այդ գնդակների ուղղությունը որտեղից են եղել, ուղիղ նշանառությամբ եղել, թե գուցե պատահական, թե գուցե այլ հանգամանքներում։ Քրեական գործերի քննությունից արդեն այդ մտադրություններն էլ ավելի կպարզեցվեն»,–ասաց նա։

Անդրադառնալով ԱՄՆ–ից եւ ՌԴ–ից հնչող հայտարարություններին, որ Սյունիքում էսլակացիայի վտանգ կա, մինչդեռ Նիկոլ Փաշինյանը հայտարարել է, որ խաղաղություն է լինելու, պատերազմ չի լինելու, ՔՊ–ական պատգամավորն ասաց. «Բոլոր գերտերությունները իրենց շահերը ունեն, իսկ ՀՀ իշխանությունը ասում է այն, ինչը որ կա և դրա համար պատասխան է տալիս։։ Իսկ որևէ գերտերության հայտարարություն չես կարող ասել ինչ հիմքեր ունի և ինչպիսի։

Ադրբեջանը ամեն ինչ անում է, որպեսզի անհանգստություն ստեղծի սահմանային հատվածում։ Այդուհանդերձ, մեր գյուղերում խուճապ չկա, չի էլ կարող լինել, գյուղացիները վաղուց արդեն սովոր են դրան և գիտեն այդ ամենը։ Բայց իհարկե անհանգստացնող է, և օր առաջ պետք է խաղաղության պայմանագիրը կնքելուց հետո այդ խնդիրներին լուծում տալ:

Եթե կնքվի խաղաղության պայմանագիրը, ես վստահ եմ, որ չեն կրակի, որովհետև եթե կնքվի, արդեն զորքերը չեն սահմանապահ գործառույթ իրականացնելու, այլ սահմանապահ զորքերը, երկուստեք, իսկ նման պայմաններում մենք տեսնում ենք, որ այդպիսի դեպքեր չեն գրանցվում»։

Հարցին՝ եթե հայկական կողմից համարժեք պատասխան լինի, արդյո՞ք ադրբեջանական կողմը կշարունակի կրակել, նա պատասխանեց. «Իհարկե կգնա էսկալացիա, և չես կարող ասել այդ էսկալացիան որտեղ կկանգնի։ Այնպես չի, որ հայկական կողմը այդ հնարավորությունները չունի պատասխան համարժեք գործողությունների դիմելու, բայց Հայաստանի կառավարության դիրքորոշումը նա է, որ ամեն կերպ պետք է հասնել խաղաղության պայմանագրին և էսկալացիոն գործողություններ չի կարելի թույլ տալ։ Մեր զինված ուժերը բավականին ադեկվատ և հավասարակշռված գործողություններ են իրականացնում և որևէ էսկալացիոն գործողություն ՀՀ–ից հնարավոր չէ սպասել։

Պատգամավորը նաև նշեց, որ այս կրակոցները ռազմական էսկալացիայի նախերգանք չի համարում։

«Խաղաղությունը այլընտրանք չունի, խաղաղության պայմանագիրը լինելու է, դելիմիտացիա լինելու է, սահմանից զորքերը հեռացվելու են, սահմանապահներն են հսկելու սահմանային հատվածները»,–ասաց Արմեն Խաչատրյանը։