Գումարի դիմաց կարճ ժամկետով զինծառայություն անցնելուն առնչվող նախագծի քննարկումը հետաձգվեց։

Նախագիծը պետք է դեռ լրացուցիչ նորից քննարկվի, որից հետո նոր միայն կքննարկվի ԱԺ պաշտպանության ու անվտանգության հանձնաժողովում։

«Հայաստան» խմբակցության պատգամավոր Գեղամ Մանուկյանի համար անհասկանալի է, թե ինչու որոշվեց այսօր չեղարկել, երբ պաշտպանության նախարարն արդեն ԱԺ էր եկել։

«Հանրային մեծ ընդվզում կա։ Մենք հետամուտ ենք լինելու, որ այս հարցն ընդմիշտ Հայաստանի օրակարգից դուրս բերվի»,- նշեց Մանուկյանը։

ՔՊ-ական պատգամավոր Հայկ Սարգսյանն էլ, ով նախագծի հեղինակն է, ասաց, թե հանրային լայն շրջանակները մեծ սպասում ունեն այս նախագծից։

«Շատերը սպասում են օրենքի նախագծի ընդունմանը, ինչն իր հետ բերելու է ներգաղթ, արտագաղթի կանխում»,- ասաց նա։

ՔՊ-ականը ցավում է, որ նախագծի քննարկումը չեղարկվեց, հույս ունի՝ մինչև առաջիկա զորակոչը օրենքը կընդունվի երկու ընթերցումներով։