ԱՄՆ նախագահ Դոնալդ Թրամփը պահանջել է չեղարկել ԱՄՆ դրոշով ռազմական և քաղաքացիական նավերի՝ Պանամայի և Սուեզի ջրանցքներով անցման տուրքերը։ Նա այս մասին գրել է TruthSocial սոցիալական ցանցում։

«Ամերիկյան նավերին՝ և՛ ռազմական, և՛ առևտրային, պետք է թույլատրվի անցնել Պանամայի և Սուեզի ջրանցքներով առանց վճարի: Այս ջրանցքները չէին լինի առանց Միացյալ Նահանգների: Ես խնդրել եմ պետքարտուղար Մարկո Ռուբիոյին անհապաղ ուսումնասիրել իրավիճակը»,- գրել է Թրամփը:

Քաղաքական մեկնաբան Հակոբ Բադալյանի գրառումը․

«Բոլորովին մտադիր չեմ դավադրապաշտական ֆոն կառուցել Իրանի նավահանգստում պայթյունի առնչությամբ, բայց այդ ողբերգության առումով կա իսկապես շատ ուշագրավ մի «կնիք»:

Օրեր առաջ մի հոդված-մեկնաբանություն էի գրել, որտեղ խոսում էի այն մասին, որ Ադրբբեջանի հետ շփումներում Իրանի նախագահի անվտանգության հարցը թերեւս պետք է լինի առանձնահատուկ հոգածության առարկա, հաշվի առնելով նախորդ տարվա ողբերգական փաստը՝ Ադրբեջանի հետ սահմանին նախագահների մակարդակով հանդիպումից եւ միջոցառումից վերադարձին եղավ Իրանի նախագահ Ռեյիսիին եւ արտգործնախարար Աբդոլահիանին տեղափոխող ուղղաթիռի ողբերգական վթարը, որի հետեւանքով նախագահն ու ԱԳ նախարարը զոհվեցին:

Իհարկե Իրանը ամիսներ անց հրապարակեց պաշտոնական հետաքննության արդյունքները եւ հայտարարեց, որ չի եղել որեւէ արտաքին միջամտություն եւ ուղղաթիռը աղետի է ենթարկվել եղանակային վատ պայմանների պատճառով, սակայն առ այսօր շատերի մոտ է առկա հարցը, թե ինչպես երեք ուղղաթիռներից աղետի ենթարկվեց հենց նախագահին տեղափոխողը, երբ մյուս երկուսը բարեհաջող վայրէջք էին կատարել նախատեսված վայրում:

Իսկ շրջանառվող կասկածները նաեւ պարունակում էին հնարավոր վարկածներ, որ ուղղաթիռը կարող էր ռադիոէլեկտրոնային ներգործության ենթարկվել աղետի վայրից ոչ շաատ հեռու գտնվող ադրբեջանական տարածքից, որտեղ կան տեղակայված իսրայելական հենակետեր:

Բոլոր դեպքերում, համենայն դեպս, Իրանի նավահանգստում ուժգին պայթյուն է տեղի ունենում այդ երկրի նախագահի Ադրբեջան կատարելիք այցից առաջ: Ընդ որում, ըստ վարկածների, պայթել է նավահանգստի պահեստում նյութը, որն օգտագործվում է հրթիռային վառելիքի համար»:

Իրավիճակը լարվել է նաև սահմանին։ Հաղորդվում է, որ արդեն մի քանի օր է՝ երկու երկրների սահմանին փոխհրաձգություններ են տեղի ունենում։

Ռուսաստանի Դաշնության նախագահ Վլադիմիր Պուտինը հրամայել է շտապ Իրան ուղարկել արտակարգ իրավիճակների նախարարության մի քանի ինքնաթիռ՝ օգնելու մարել նախօրեին Շահիդ Ռաջաի նավահանգստում բռնկված հրդեհը։ Այս մասին կիրակի՝ ապրիլի 27-ին, հայտնել են ՌԴ դեսպանատան ներկայացուցիչները, գրում է kp.ru-ն։

Հիշեցնենք, որ Իրանի հարավում գտնվող Բանդար Աբբաս քաղաքի Շահիդ Ռաջաի նավահանգստում շաբաթ տեղի ունեցած հզոր պայթյունի և բռնկված հրդեհի հետևանքով զոհերի թիվը հասել է 28-ի, հայտնել է Իրանի Կարմիր մահիկի ընկերության ղեկավար Փիր Հոսեյն Կոլիվանդը։ Այս մասին գրում է ՏԱՍՍ-ը: Մինչդեռ տուժածների թիվը 1,139 է:

«Միջադեպը տեղի է ունեցել Շահիդ Ռաջաի նավահանգստի տարածքում պահվող մի քանի բեռնարկղերի պայթյունի հետևանքով: Ներկայումս մենք տարհանում և վիրավորներին տեղափոխում ենք բժշկական կենտրոններ», - BBC-ի փոխանցմամբ՝ պետական ​​հեռուստատեսությանը հայտնել է ճգնաժամային կառավարման տեղական պաշտոնյան:

Իրանի Առողջապահության նախարարությունը Հորմոզգան նահանգում արտակարգ դրություն է հայտարարել՝ մարդկանց խնդրելով մնալ տանը, փակ պահել պատուհանները և կրել դիմակներ։

Պաշտոնապես երկրի իշխանությունները չեն ասում, թե կոնկրետ ինչ է եղել պայթած բեռնարկղերում։ Սակայն New York Times-ի՝ Իրանի Իսլամական հեղափոխության պահապանների կորպուսի հետ կապ ունեցող աղբյուրը հայտնել է, որ նավահանգստում նատրիումի պերքլորատով բեռնարկղեր են պայթել: Այս նյութն օգտագործվում է պինդ հրթիռային վառելիք արտադրելու համար։

Ներկայացնում ենք տարադրամի փոխարժեքները՝ ըստ rate.am-ի:

ԱՄՆ դոլարի առքի առավելագույն արժեքն է 387.50 դրամ, վաճառքի նվազագույն արժեքը՝ 391.5 դրամ:

Եվրոյի առքի առավելագույն արժեքն է 438 դրամ, վաճառքի նվազագույն արժեքը՝ 444 դրամ: 

Ռուսական ռուբլու առքի առավելագույն արժեքն է 4.62 դրամ, վաճառքի նվազագույն արժեքը՝ 4.77 դրամ:

Ռուսաստանի նախագահ Վլադիմիր Պուտինը ցավակցություն է հայտնել Իրանի նախագահ Մասուդ Փեզեշքիանին՝ Բանդար Աբաս քաղաքի Շահիդ Ռաջայի նավահանգստում տեղի ունեցած ողբերգության կապակցությամբ։ Նախագահի ցավակցական ուղերձը տարածել է Կրեմլի մամուլի ծառայությունը։

«Ընդունեք խորին ցավակցությունս մարդկային զոհերի և մասշտաբային ավերածությունների կապակցությամբ, որոնք առաջացել են Շահիդ Ռաջայի նավահանգստում տեղի ունեցած պայթյունի հետևանքով»,- ասված է Պուտինի հեռագրում։

ՌԴ նախագահը նաև պատրաստակամություն հայտնել աջակցել աղետի հետևանքների վերացման գործում։

Նշենք, որ վերջին տվյալներով՝ տեղի ունեցած պայթյունի հետևանքով առնվազն 25 մարդ է մահացել, ավելի քան 1100 մարդ՝ տուժել։

Հիշեցնենք, որ Բենդեր Աբասում ապրիլի 26-ին հզոր պայթյուն է որոտացել։ ԶԼՄ–ների տեղեկություններով` պայթյունը եղել է նավամատույցում` վառելիքի ջրամբարի բռնկման հետևանքով։ Ինչպես հաղորդում է Fars–ը, պայթյունն այնքան հզոր է եղել, որ լսվել է Քեշմ կղզում, որը գտնվում է Պարսից ծոցի Բենդեր Աբաս նավահանգստային քաղաքից առնվազն 20 կմ հեռավորության վրա։ Պայթյունի հետևանքով մի քանի կիլոմետր շառավղով պատուհաններ են կոտրվել։

Հավելենք, որ Իրանի հարավային Հորմոզգան նահանգի ղեկավար Մոհամմադ Աշուրին եռօրյա սուգ է հայտարարել տարածաշրջանում։

ՀՀ Էկոնոմիկայի նախարարությունը հայտնում է․ «Տեղեկացնում ենք, որ 2025 թվականի ապրիլի 27-ից ուժի մեջ է մտել «Առևտրի և ծառայությունների մասին» օրենքում կատարված փոփոխությունը, որը սահմանում է կաթնամթերքի վաճառքի նոր կարգ։

Այսուհետ՝

?Կանաչ դարակաշարերում տեղադրվելու է կաթնամթերք՝ առանց կաթնային յուղի (կաթնային ճարպի) փոխարինիչի
? Նարնջագույն դարակաշարերում՝ կաթնամթերք, որը պարունակում է կաթնային յուղի (կաթնային ճարպի) փոխարինիչ

Դարակաշարերի վրա նշումները պարտադիր կլինեն
«Առանց կաթնային յուղի փոխարինիչի» և «Պարունակում է կաթնային յուղի փոխարինիչ» անվանումով տեղեկատվական պիտակներով։

Կաթնամթերք գնելիս ուշադրություն դարձրե՛ք դարակաշարերի գույներին։

Տնտեսվարողների համար, որոնք չեն ապահովի կաթնամթերքի պատշաճ տեղադրումն ըստ սահմանված կարգի, սահմանված է վարչական տույժ»։

Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանի ֆեյսբուքյան գրառումը. «Համաշխարհային օդերևութաբանական կազմակերպությունը (ՀՕԿ) թարմացրել է 2025 թվականի մայիս-հունիս-հուլիս ամիսների գլոբալ սեզոնային կանխատեսումը։
Հունվար-մարտ 2025թ. - Օվկիանոսի մակերևույթի ջերմաստիճանները շրջանների մեծ մասում պահպանվել են նորմայից բարձր՝ բացառությամբ Խաղաղ օվկիանոսի հասարակածային կենտրոնական հատվածի:
Մայիս-հուլիս 2025թ. - Սպասվում է, որ ծովի մակերևույթի ջերմաստիճանը կլինի միջինին մոտ։ Էլ-Նինյո–Հարավային տատանումը (ԷՆՍՕ) կլինի չեզոք փուլում։
Ատլանտյան օվկիանոսի հասարակածային հատվածում ջրի մակերևույթի ջերմաստիճանը կշարունակի մնալ նորմայից մի փոքր բարձր՝ հյուսիսային և հարավային շրջաններում։
Օդի ջերմաստիճան
Հաշվի առնելով սպասվող օվկիանոսի շարունակվող տաքացումը (բացառությամբ Խաղաղ օվկիանոսի որոշ շրջանների), կանխատեսվում են նորմայից բարձր ջերմաստիճաններ գրեթե բոլոր մայրցամաքային տարածքներում։
Ամենահավանական բարձր ջերմաստիճանների շրջաններ՝
▪️ Հյուսիսային Աֆրիկա
▪️ Մադագասկար
▪️ Ասիա (բացառությամբ Հնդկական ենթացամաքի)
▪️ Հարավային Ամերիկա
▪️ Կարիբյան ավազան
▪️ Կենտրոնական Ամերիկա
▪️ Հյուսիսային Ամերիկա
▪️ Ավստրալիա
▪️ Նոր Զելանդիա
▪️ Եվրոպա
Տեղումներ
Խաղաղ օվկիանոսի հասարակածային հատվածում տեղումների բաշխումը նմանեցվում է թույլ Լա Նինյա պայմաններին՝ չնայած Նինյո ինդեքսների չեզոք կանխատեսմանը։
Տեղումների պակասի հավանականություն՝
▪️ Արևելյան Եվրոպա
▪️ Կենտրոնական Ասիայի արևմտյան շրջաններ
Տեղումների նորմայից բարձր քանակի հավանականություն՝
▪️ Հնդկական ենթացամաք
▪️ Արևելյան Ասիա
▪️ Հարավային Ամերիկայի հյուսիս-արևմուտք։

Աղբյուրը` Լևոն Ազիզյան