Հոկտեմբերի 5-ին, ժամը 08։31-ին Արարատի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Երևան-Երասխ ավտոճանապարհին՝ Մասիսի կամրջի մոտակայքում, տեղի է ունեցել ՃՏՊ․ կան տուժածներ։  

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական  ջոկատից մեկ մարտական հաշվարկ։ 

Պարզվել է, որ Երևան-Երասխ ավտոճանապարհի 13-րդ կմ-ին բախվել են «KIA», «Mercedes-Benz» և «SKODA» մակնիշների ավտոմեքենաները։ 

Չորս ուղևոր հոսպիտալացվել է բժշկական կենտրոն։ 

Փրկարարները հոսանքազրկել են ավտոմեքենաները, փակել գազի բալոնների փականները և «SKODA» մակնիշի ավտոմեքենայի վարորդին պատգարակով մոտեցրել շտապօգնությանը․ տուժածը հոսպիտալացվել է բժշկական կենտրոն։

Վրաստան-Թուրքիա սահմանային անցակետում հայկական անձնագրեր հայտնաբերվելու մասին լուրը ապատեղեկատվություն է, հայտնեց ՆԳ նախարարի մամուլի քարտուղար Նարեկ Սարգսյանը։  

«Մշտապես կապի մեջ ենք Վրաստանի իրավապահ գործընկերների հետ, որևէ նման դեպք չի արձանագրվել։ Լուրը բացահայտ ապատեղեկատվություն է և իրականության հետ որևէ աղերս չունի»,- ասել է ՆԳՆ խոսնակը։ 

Ավելի վաղ տեղեկություն էր տարածվել, որ Վրաստան-Թուրքիա սահմանային անցակետում մի քանի տասնյակ հազարի հասնող հայկական կեղծ անձնագրեր և փաստաթղթեր են հայտնաբերվել, որոնք պետք է օգտագործվեին ընտրություններում։

Ուկրաինայի հարևան Լեհաստանը Լվովի վրա Ռուսաստանի հարվածների պատճառով կործանիչներ է օդ բարձրացրել՝ լեհական օդային տարածքի անվտանգությունն ապահովելու համար, հաղորդում է BBC News-ը՝ հղում անելով Լեհաստանի բանակին։

Գործի են դրվել նաև ՆԱՏՕ-ի դաշնակից երկրների ինքնաթիռները։ Լվովի մարզի ղեկավար Մաքսիմ Կոզիցկին հայտնել է, որ հարվածների հետևանքով տարածաշրջանում զոհվել է երկու մարդ, ևս երկուսը վիրավորվել են։

Ռուսաստանը կրկին հարվածներ է հասցրել Ուկրաինայի էլեկտրակայաններին։ Դրանցից մեկը վնասվել է Զապորոժյեի վրա գիշերային հարձակման ժամանակ։ Քաղաքապետի վկայությամբ, զոհվել է մեկ մարդ, ավելի քան 73 000 մարդ մնացել է առանց էլեկտրականության։

Ռուսաստանի նախագահ Վլադիմիր Պուտինը հայտարարել է, որ ԱՄՆ նախագահի վարչակազմի՝ Ուկրաինայի բանակին հեռահար Tomahawk հրթիռների մատակարարման հնարավոր որոշումը կբերի Ռուսաստանի և Միացյալ Նահանգների հարաբերությունների փլուզմանը, հաղորդում է «Коммерсантъ»-ը։ 

Հոկտեմբերի 2-ին Սոչիում՝ «Վալդայ» բանավիճային ակումբի լիագումար նիստի ժամանակ, Վլադիմիր Պուտինը նշել է, որ Tomahawk հրթիռների կիրառումը հնարավոր չէ առանց ամերիկացի զինծառայողների անմիջական մասնակցության, և դա կնշանակի էսկալացիայի նոր փուլ, այդ թվում՝ Ռուսաստանի և ԱՄՆ-ի հարաբերություններում։ 

Լիագումար նիստից հետո ВГТРК-ի թղթակից Պավել Զարուբինի հետ հարցազրույցում, նախագահը շարունակել է այդ միտքը. «Հիմա դուք խոսում էիք Միացյալ Նահանգների նախագահի մասին, բայց այնտեղ («Վալդայի» լիագումար նիստի ժամանակ) հարցեր կային, ասենք, նոր զինատեսակների համակարգերի քննարկման վերաբերյալ, այդ թվում՝ բարձր ճշգրտությամբ հեռահար համակարգերի՝ Tomahawk և այլն»։ 

«Ես արդեն ասել եմ, որ դա կբերի մեր հարաբերությունների փլուզմանը։ Ամեն դեպքում՝ այդ հարաբերություններում նշմարվող դրական միտումների։ Այսպիսով, ես ասում եմ այն, ինչ մտածում եմ, իսկ թե ինչպես կդասավորվի, դա կախված է ոչ միայն մեզանից, և ոչ միայն ինձանից», — ասել է Վլադիմիր Պուտինը։ 

Պավել Զարուբինը նախագահի հետ ունեցած զրույցի հատվածները հրապարակել է իր Telegram-ալիքում՝ այսօր՝ հոկտեմբերի 5-ին։

ԿԺԴՀ առաջնորդ Կիմ Չեն Ընը հայտարարել է, որ Հյուսիսային Կորեան տեղակայել է «հատուկ ուժեր և միջոցներ»՝ ի պատասխան Վաշինգտոնի կողմից հարավում զինված ուժերի ավելացման, հաղորդում է ԿԺԴՀ պետական լրատվական գործակալությունը՝ ՑՏԱԿ-ը։ 

ԱՄՆ-ն Հարավային Կորեայում տեղակայել է մոտ 28 500 զինծառայող՝ ԿԺԴՀ-ի կողմից ներկայացվող ռազմական սպառնալիքներին հակազդելու համար։ Վերջին ամսում ԱՄՆ-ն համատեղ ռազմական զորավարժություններ է անցկացրել իր անվտանգության դաշնակիցների՝ Հարավային Կորեայի և Ճապոնիայի հետ։ 

Փհենյանը սովորաբար նման զորավարժությունները որակում է որպես ներխուժման փորձ, մինչդեռ դաշնակիցները պնդում են, որ դրանք պաշտպանական բնույթ ունեն։

«ԱՄՆ-ի և Կորեայի Հանրապետության միջուկային դաշինքը արագ առաջընթաց է գրանցում, և նրանք անցկացնում են տարբեր տեսակի զորավարժություններ՝ վտանգավոր սցենարների մշակման համար, — ասել է Կիմ Չեն Ընը շաբաթ օրը՝ Փհենյանում զինատեսակների ցուցահանդեսի բացման ժամանակ։ — Ուղիղ համեմատական է՝ որքան ԱՄՆ զինված ուժերը ավելացնում են իրենց ներկայությունը Հարավային Կորեայի տարածաշրջանում, այնքան մեր ռազմավարական մտահոգություններն այդ տարածաշրջանի վերաբերյալ աճում են, և համապատասխանաբար մենք ուղղել ենք մեր հատուկ ուժերն ու միջոցները հիմնական թիրախներին»։ 

ԿԺԴՀ առաջնորդը հավելել է, որ «ուշադիր հետևում է» սահմանագծից այն կողմ ռազմական զարգացումներին։

«Թշնամիները... ստիպված կլինեն անհանգստանալ, թե որ ուղղությամբ է շարժվում իրենց անվտանգության համակարգը», — ասել է նա։

Ֆուտբոլի Հայաստանի, Անգլիայի, Իսպանիայի, Իտալիայի, Գերմանիայի եւ Ֆրանսիայի առաջնություններում հոկտեմբերի 5-ին կավարտվեն հերթական տուրերի հանդիպումները։

Հայաստանի առաջնություն, 9-րդ տուր

«Արարատ-Արմենիա» - «Գանձասար»՝ 17:00

«Ուրարտու» - «Նոա»՝ 20:00

Անգլիայի առաջնություն, 7-րդ տուր

 «Աստոն Վիլա» - «Բարնլի»՝ 17:00 (Երեւանի ժամանակ)

«Էվերտոն» - «Քրիսթալ Փելաս»՝ 17:00

«Նյուքասլ Յունայթեդ» - «Նոթինգեմ Ֆորեսթ»՝ 17:00

«Վուլվերհեմփթոն» - «Բրայթոն»՝ 17:00

«Բրենթֆորդ» - «Մանչեսթեր Սիթի»՝ 19:30

Իսպանիայի առաջնություն, 8-րդ տուր

«Ալավես» - «Էլչե»՝ 16:00

«Սեւիլիա» - «Բարսելոնա»՝ 18:15

«Էսպանյոլ» - «Բետիս»՝ 20:30

«Ռեալ Սոսիեդադ» - «Ռայո Վալիեկանո»՝ 20:30

«Սելտա» - «Աթլետիկո Մադրիդ»՝ 23:00

Իտալիայի առաջնություն, 6-րդ տուր

«Ուդինեզե» - «Կալյարի»՝ 14:30

«Բոլոնիա» - «Պիզա»՝ 17:00

«Ֆիորենտինա» - «Ռոմա»՝ 17:00

«Նապոլի» - «Ջենոա»՝ 20:00

«Յուվենտուս» - «Միլան»՝ 22:45

Գերմանիայի առաջնություն, 6-րդ տուր

«Շտուտգարտ» - «Հայդենհայմ»՝ 17:30

«Համբուրգ» - «Մայնց»՝ 19:30

«Բորուսիա Մյոնխենգլադբախ» - «Ֆրայբուրգ»՝ 21:30

Ֆրանսիայի առաջնություն, 7-րդ տուր

«Լիոն» - «Թուլուզ»՝ 17:00

«Հավր» - «Ռեն»՝ 19:15

«Մոնակո» - «Նիցա»՝ 19:15

«Ստրասբուրգ» - «Անժե»՝ 19:15

«Լիլ» - ՊՍԺ՝ 22:45

Պետական ապարատի աշխատավարձը վերանայելու նախագիծը մեր սեղանին է, սակայն, վախենում ենք հասարակության արձագանքից։ Այս մասին ՏՏ ոլորտի ներկայացուցիչների հետ հանդիպմանն ասել է վարչապետ Նիկոլ Փաշինյանը։ 

«Ինչի՞ պիտի լավ կադրը գա Կառավարությունում աշխատի, դուք ինչի՞ պիտի գաք 200 հազարով աշխատեք, դե եկեք, բայց ոչ մեկդ չեք գա։ Պետական ապարատի աշխատավարձը վերանայելու որոշումը մենք մեր մեջ կայացրել ենք, բայց չենք բարձրաձայնում, որովհետեւ վախենում ենք, առիթ ենք տալու, որ Հայաստանի ակտիվ հանրության 97 տոկոսը իրենց իմացած բոլոր հայհոյանքներն ուղղեն Կառավարությանը։ Վախենում ենք»,– ասաց Փաշինյանը։

Իսրայելի պաշտպանության բանակը ՀԱՄԱՍ-ի ստորգետնյա թունելներ է հայտնաբերել Գազայի երկու հիվանդանոցների տակ։ Հորդանանի հիվանդանոցին հարող թունելի երկարությունը մոտ մեկուկես կիլոմետր է։

Ներսում հայտնաբերվել են զենքի արտադրության արհեստանոց եւ մի քանի շինություններ, որտեղ, հետախուզության տվյալներով, պատսպարվել են ՀԱՄԱՍ-ի վաշտի եւ դասակի հրամանատարները:

ԱՄՆ նախագահ Դոնալդ Թրամփը հայտնել է, որ Իսրայելը համաձայնել է զորքերի դուրսբերմանը Գազայի հատվածից։

«Բանակցություններից հետո Իսրայելը համաձայնել է դուրսբերման նախնական գծին, որը մենք ցույց ենք տվել ՀԱՄԱՍ-ին և տեղեկատվություն փոխանցել։ Երբ ՀԱՄԱՍ-ը հաստատի դա, հրադադարը ԱՆՀԱՊԱՂ ուժի մեջ կմտնի, կսկսվի պատանդների և գերիների փոխանակումը, և մենք կստեղծենք պայմաններ զորքերի դուրսբերման հաջորդ փուլի համար, որը մեզ կմոտեցնի այս 3000-ամյա ԱՂԵՏԻ ավարտին», — գրել է նա Truth Social սոցիալական ցանցում։ 

Ավելի վաղ Իսրայելի վարչապետ Բենիամին Նեթանյահուն հայտնել էր, որ իսրայելցի պատանդները «մոտ ժամանակում» կվերադառնան։

Շաբաթ օրը ԱՄՆ նախագահը կոչ է արել Իսրայելին անհապաղ դադարեցնել Գազայի ռմբակոծությունները՝ դա բացատրելով ՀԱՄԱՍ-ի խաղաղության պատրաստակամությամբ։ Թրամփը նաև հրապարակել է պաղեստինյան խմբավորումից ստացված նամակը։

Թբիլիսիի քաղաքապետի ընտրություններում հաղթանակ է տարել Կախա Կալաձեն՝ առաջ անցնելով մրցակիցներից եւ հավաքելով ձայների ավելի քան 71 տոկոսը քվեաթերթիկների 100 տոկոսի հաշվարկի արդյունքում. երկրորդ տեղը զբաղեցրել է «Ուժեղ Վրաստան» և «Գախարիան հանուն Վրաստանի» կուսակցությունների թեկնածու Իրակլի Կուպրաձեն: Նրա օգտին քվեարկել է ընտրողների 12,275 տոկոսը։

Առաջատարների եռյակը եզրափակում է «Գիրչի» կուսակցությունից Յագո Խվիչիան, որը ստացել է ձայների 7,624 տոկոսը:

Հիշեցնենք՝ Վրաստանում ՏԻՄ ընտրությունները ուղեկցվել են զանգվածային ցույցերով։  Քվեարկությունը դեռ չավարտված՝ ցուցարարներն ամբողջությամբ փակել են Ռուսթավելիի պողոտան և հարակից Ազատության հրապարակը: Թբիլիսիում անկարգությունների հետևանքով վիրավորվել է 6 ցուցարար և իրավապահ մարմինների 21 աշխատակից, հաղորդում են Վրաստանի պետական մարմինները։