ՌԴ նախագահ Վլադիմիր Պուտինը, Չինաստանի ղեկավար Սի Ծինփինի հրավերով, սեպտեմբերին կմեկնի Պեկին, հայտնել են Կրեմլից:

Նա կմասնակցի Երկրորդ համաշխարհային պատերազմի ավարտի 80-ամյակի տոնակատարությանը: Սակայն մեկնման հստակ ամսաթիվը հայտնի չէ, գրում է ՏԱՍՍ-ը: 

Ավելի վաղ հաղորդվել էր, որ Սի Ծինփինն ընդունել է ՌԴ նախագահի՝ Հայրենական մեծ պատերազմում տարած հաղթանակի 80-ամյակի տոնակատարությանը Մոսկվայում մասնակցելու հրավերը։ Այս մասին, kommersant.ru-ի փոխանցմամբ, հայտարարել էր Չինաստանում ՌԴ դեսպան Իգոր Մորգուլովը։ Չինաստանի իշխանությունները դեռ չեն մեկնաբանել տեղեկությունը։

«Չինաստանի ղեկավար Սի Ծինփինն ընդունել է մայիսի 9-ին Մոսկվայում կայանալիք Հայրենական մեծ պատերազմում հաղթանակի 80-ամյակի տոնակատարություններին մասնակցելու հրավերը և իր հերթին Վլադիմիր Վլադիմիրովիչ Պուտինին հրավիրել է Չինաստան՝ սեպտեմբերի սկզբին նախատեսված տոնակատարություններին»,- ասել էր դիվանագետը «Ռոսիա 24»-ի եթերում։

Վերջին անգամ Սի Ծինփինը Մոսկվա է այցելել 2023 թվականին։ Նրա եռօրյա այցը տեղի է ունեցել մարտին՝ Պուտինի հրավերով։