2025 թվականի երկրորդ եռամսյակում շինարարության և հիփոթեքային վարկավորման շուկաներում ակտիվությունը մեր սպասվածից բարձր է եղել, այս մասին օգոստոսի 5-ին լրագրողների հետ հանդիպման ժամանակ ասել է ՀՀ Կենտրոնական բանկի փոխնախագահ Արմեն Նուրբեկյանը։

Նա պարզաբանել է, որ ընդհանուր առմամբ վարկային շուկայում բարձր ակտիվությունը պահպանվել է։ Նուրբեկյանը նշել է, որ սպառողական վարկերի պահանջարկի աճը մասամբ պայմանավորված է շինարարության ոլորտում առկա բարձր տեմպերով։ Նրա խոսքով՝ դա կապված է նրա հետ, որ բնակարան գնելուց հետո քաղաքացիները նաև սպառողական ապրանքներ են ձեռք բերում։

Նա հայտնել է, որ հունիսին կնքվել է 20 հազար առևտրական գործարք, որը նույնպես բարձր ցուցանիշ է նույնիսկ նախորդ տարիների ակտիվության ֆոնին։