Ռուսաստանից Հայաստան և հակառակ ուղղությամբ ԵԱՏՄ ապրանքների տեղափոխման համար նավիգացիոն կապարակնիքների կիրառումը կարող է որոշակի խնդիրներ առաջացնել Վրաստանի տարածքով տարանցման ժամանակ: Sputnik Արմենիայի հետ զրույցում այս տեսակետը հայտնեց Վրաստանի տրանսպորտային միջանցքների հետազոտման կենտրոնի տնօրեն Պաատա Ցագարեիշվիլին։

ԵԱՏՄ ապրանքների համար նավիգացիոն կապարակնիքների կիրառման փորձարկումը պետք է սկսվի 2025 թվականի հուլիսի 1-ից մինչև հոկտեմբերի 31-ն ընկած ժամանակահատվածում:

«Վրացական կողմն ապրանքները բացելու և ստուգելու հնարավորություն չի ունենա, եթե իր տարածքով տարանցման ժամանակ նման անհրաժեշտություն առաջանա։ Ըստ այդմ` հայկական կողմն այդ հարցը դեռ պետք է կարգավորի վրացի գործընկերների հետ», - ասաց Ցագարեիշվիլին։

Նա մատնանշեց վերջին տարիներին Վրաստանից Հայաստան բեռնափոխադրումների անկումը։ Եթե 2011 թվականին փոխադրվող բեռների ծավալը կազմել է 1,4 մլն տոննա, ապա 2024 թվականին կրճատվել է 48%-ով՝ կազմելով 710 հազար տոննա։ Ընդ որում` 37%-ով կրճատվել են նաև երկաթուղով բեռնափոխադրումները։ Վերջին 6 տարիներին 65%-ով ավելացել են Վրաստանի տարածքով Ռուսաստանից Հայաստան ցամաքային բեռնափոխադրումները, իսկ հակառակ ուղղությամբ այդ ցուցանիշները մնացել են անփոփոխ:

Փորձագետն անդրադարձավ նաև այն հնարավորություններին, որոնք Երևանի և Թբիլիսիի համար բացվում են տարածաշրջանում տրանսպորտային հաղորդակցությունների ապաշրջափակման դեպքում: Ըստ նրա` հայկական կողմը կարող է պայմանավորվել, որ իր բեռները Բաքու-Թբիլիսի-Կարս երկաթուղով ազատ անցնեն կա՛մ «Մարաբդա-Թուրքիայի սահման» տեղամասով, կա՛մ Վրաստանի տարածքով։

Այս երթուղու բարդ ռելիեֆի պատճառով բեռների փոխադրումն ավելի թանկ է։ Թուրքիայից Հայաստանի տարածքով Ադրբեջան երկաթուղային գծի հաստատման դեպքում ԲԹԿ-ն կկորցնի շահութաբերությունը։