Սիրիայի նոր իշխանությունները հայտարարություն են տարածել Բաշար Ասադի վարչակարգի տապալումից հետո ռուսական պատվիրակության Դամասկոս առաջին այցից հետո։ Դրանում ասվում է, որ Մոսկվան «հաստատել է իր աջակցությունը արաբական հանրապետությունում ընթացող դրական փոփոխություններին»։ 

Ի պատասխան՝ վարչակազմը հայտարարել է, որ պատրաստ է համագործակցել բոլոր շահագրգիռ կողմերի հետ՝ հանուն երկրի ապագայի, սակայն «հարաբերությունները վերականգնելիս պետք է հաշվի առնել անցյալի սխալները, հարգել սիրիացի ժողովրդի կամքը եւ ծառայել նրանց շահերին»։

Այդ կապակցությամբ հանրապետության իշխանությունները պահանջել են Մոսկվայից, որը նախկինում ռմբակոծում էր սիրիական քաղաքները՝ միաժամանակ օգնելով Ասադին պայքարել ապստամբների դեմ քաղաքացիական պատերազմի ժամանակ, վճարի վնասի համար:

«Ընդգծվել է Ռուսաստանի դերը սիրիացի ժողովրդի հետ վստահությունը վերականգնելու հարցում կոնկրետ միջոցառումների միջոցով, ինչպիսին են փոխհատուցումը, վերակառուցումը եւ վերականգնումը»,- նշվել է հայտարարությունում:

Ռուսական պատվիրակությունը Դամասկոս է ժամանել հունվարի 28-ին։ Ընդգրկված էին նախագահ Վլադիմիր Պուտինի երկու հատուկ ներկայացուցիչները Մերձավոր Արեւելքի եւ Սիրիայի հարցերով: Խոսքը փոխարտգործնախարար Միխայիլ Բոգդանովի եւ Ալեքսանդր Լավրենտեւի մասին է։ Կրեմլը հետաքրքրված է Հմեյմիմում եւ Տարտուսում ռուսական ռազմաբազաների ապագայով։ Սակայն այս հարցի շուրջ բանակցությունները փակուղի են մտել։ Բոգդանովն ասել է, որ Սիրիայում ռուսական բազաների հետ կապված ոչինչ չի փոխվել։ «Այս հարցը լրացուցիչ բանակցություններ է պահանջում։ Մենք պայմանավորվել ենք շարունակել ավելի խոր խորհրդատվությունները մեր համագործակցության յուրաքանչյուր ոլորտում»,- ասել է նա։

Տեղեկությունն այն մասին, որ Ռուսաստանը չի կարողացել պայմանավորվել իր բազաների պահպանման հարցում, հաստատել են Bloomberg-ի աղբյուրները։ Նրանց կարծիքով՝ դրան դեմ է Թուրքիան, որը վերջին հեղափոխության ժամանակ աջակցում էր ապստամբներին, իսկ նոր վարչակազմը հիշում է, որ Պուտինն օգնել է Ասադին չպարտվել «արաբական գարնանից» հետո սկսված պատերազմում։

Անցած դեկտեմբերին վարչակարգի տապալումից եւ իշխանափոխությունից հետո ռուսական գործունեությունը Հմեյմիմ ավիաբազայում սահմանափակվել է, եւ երկու տրանսպորտային նավեր սպասել են մի քանի շաբաթ, մինչեւ նրանց թույլ է տրվել կայանել Տարտուսում՝ ռազմատեխնիկան հեռացնելու համար, ասել է գործակալության աղբյուրը։  

Այնուհետեւ Սիրիան խզել է «Ստրոյտրանսգազ» ընկերության հետ նավահանգստում ներդրումների մասին պայմանագիրը, որը կնքվել էր 49 տարով։ Նույն ժամանակահատվածում վարձակալվել էց Տարտուսի բազան, որը Ռուսաստանին տրամադրում էր միակ ուղիղ ելքը դեպի Միջերկրական ծով եւ ծառայում էր որպես առանցքային կետ Մերձավոր Արեւելքում եւ Աֆրիկայում Կրեմլի ազդեցության տարածման։