Թրամփի նշանակած սահմանապահ ծառայության պետ Թոմ Հոմանը պաշտպանել է Լոս Անջելեսում Ազգային գվարդիայի 2000 զինծառայող տեղակայելու նախագահի որոշումը՝ չնայած տեղի առաջնորդների, այդ թվում՝ նահանգապետ Գևին Նյուսոմի դիմադրությանը, և նախազգուշացրել է, որ նահանգապետն ու Լոս Անջելեսի քաղաքապետը կարող են ձերբակալվել։

«Նախագահ Թրամփն ուղարկում է Ազգային գվարդիան, որպեսզի նրանք աջակցեն իրավապահ մարմինների ջանքերին և օգնեն պաշտպանել հանրային անվտանգությունը», - ասել է Հոմանը NBC News-ին տված հարցազրույցում։

Նյուսոմը Թրամփի վարչակազմին մեղադրել է նրանում, որ նա զորքերի տեղակայումն օգտագործել է «տեսարան» ստեղծելու համար։

Ավելի վաղ նա բողոքի ցույցեր առաջացրած ներգաղթյալների ձերբակալություններն անվանել էր քաոս սերմանելու և լարվածություն հրահրելու փորձ։

Հոմանը հերքել է Նյուսոմի պնդումը և կշտամբել նահանգապետին՝ փաստաթղթեր չունեցող ներգաղթյալներին ձերբակալելու և արտաքսելու վարչակազմի ջանքերը քննադատելու համար։ «Կալիֆոռնիայի նահանգապետին և Լոս Անջելեսի քաղաքապետին կարող է ձերբակալություն սպառնալ, եթե նրանք անցնեն սահմանը։ Օգնե՛ք մեզ այս հանցագործներին փողոցներից հեռացնել։ Դադարեցրե՛ք ցուցարարներին ծափահարելը և աջակցե՛ք իրավապահ մարմիններին», - ասել է Հոմանը։

«Նյուսոմը պետք է զանգահարեր և շնորհակալություն հայտներ նախագահ Թրամփին՝ նահանգն ավելի անվտանգ դարձնելու համար», - հավելել է նա։

Թրամփի վարչակազմի պաշտոնյան ավելի վաղ հայտարարել էր, որ ICE-ի (Մաքսային և ներգաղթի ծառայություն) գործողություններին խոչընդոտելու փորձերը կարող են հանգեցնել ձերբակալության։ Նա ասել է, որ ո՛չ Նյուսոմը, ո՛չ էլ Լոս Անջելեսի քաղաքապետ Կարեն Բասը՝ երկուսն էլ դեմոկրատներ, որոնց նա մեղադրել է «հանցագործների համար ապաստարան» ստեղծելու մեջ, բացառություն չեն այս հեռանկարից։

«Ես դա կարող եմ ասել ցանկացածի մասին, - ասել է Հոմանը։- Անօրինական ներգաղթյալին գիտակցաբար թաքցնելը քրեական հանցագործություն է։ Իրավապահ մարմիններին իրենց աշխատանքը կատարելուն խոչընդոտելը քրեական հանցագործություն է»։

Հոմանը հավելել է, որ վերջին երկու օրվա ընթացքում ձերբակալվել է շուրջ 150 անօրինական ներգաղթյալ, քանի որ ներգաղթի և մաքսային ծառայության աշխատակիցները լայնածավալ ստուգում են անցկացրել ամբողջ քաղաքում։