Երևանում հունիսի 24-ի, 26-ի և 29-ի երեկոյան ժամերին քաղաքի առանձին հատվածներում հնարավոր է կարճատև անձրև և ամպրոպ, սպասվում է նաև քամու ուժգնացում ամպրոպի ժամանակ՝ 16-20մ/վ, երեկոյան ժամերին՝ 11-14մ/վ արագությամբ։ Հունիսի 25-ին, 27- 28-ին սպասվում է առանց տեղումների եղանակ։
Հանրապետության տարածքում հունիսի 24-29-ին կեսօրից հետո առանձին շրջաններում սպասվում է կարճատև անձրև և ամպրոպ։
Քամին՝ հարավ-արևելյան՝ 2-5մ/վ, ամպրոպի ժամանակ սպասվում է քամու ուժգնացում` 18-23մ/վ արագությամբ: Երեկոյան ժամերին Արագածոտնի նախալեռներում, Արմավիրում և Կոտայքում սպասվում է քամու ուժգնացում 17-20մ/վ արագությամբ։
Օդի ջերմաստիճանը հունիսի 26-27-ին աստիճանաբար կնվազի 3-5 աստիճանով։
Մոսկվան մանրամասն կվերլուծի Եվրամիության սահմանած նոր հակառուսական պատժամիջոցները և պատասխան քայլեր կձեռնարկի, ճեպազրույցի ժամանակ ասել է ՌԴ փոխարտգործնախարար Ալեքսանդր Գրուշկոն։
«Նոր հայտարարված այս բոլոր միջոցառումները մանրազնին կվերլուծվեն և պատասխան միջոցներ կձեռնարկվեն»,- ասել է Գրուշկոն։
Ռուսաստանի փոխարտգործնախարարի խոսքով՝ ԵՄ-ն ընտրել է քաղաքական, տնտեսական և ռազմական էսկալացիայի ճանապարհը։
«Ռուսաստանը սահմանափակումների նոր փաթեթի առնչությամբ նույն բանն է մտածում, ինչ նախորդ 13 փաթեթների մասին էր մտածում՝ ԵՄ-ն գնում է քաղաքական, տնտեսական և ռազմական էսկալացիայի ճանապարհով՝ հաշվի չառնելով սեփական տնտեսության , քաղաքացիների բարեկեցության և անվտանգության վրա ունեցած հետևանքները»,- ասել է Գրուշկոն։
Նշենք, որ հունիսի 24-ին Եվրամիությունն ընդունել է Ռուսաստանի Դաշնության դեմ պատժամիջոցների 14-րդ փաթեթը, որը սահմանափակումներ է նախատեսում Ռուսաստանի 116 ֆիզիկական և իրավաբանական անձանց նկատմամբ։ ԵՄ-ն սահմանափակումներ է կիրառել նաև ԵՄ անդամ չհանդիսացող երկրների, այդ թվում՝ Ղազախստանի, Ղրղզստանի, Չինաստանի, ԱՄԷ-ի, Թուրքիայի 61 ընկերությունների նկատմամբ՝ արգելվում է այդ ընկերությունների արտադրած երկակի նշանակության ապրանքների և տեխնոլոգիաների արտահանումը Ռուսաստան։
Փաշինյանի պնդումը, որ իրենց առաջ քաշած օրակարգը համընկնում է ժողովրդի օրակարգի հետ՝ իրականության հետ առնչություն չունի։
Մեր վերջին հարցումները վկայում են, որ միայն 12.8 տոկոսն է պատրաստ քվեարկել «Քաղաքացիական պայմանագիր» կուսակցության օգտին, ինչը ենթադրում է, որ այդ կուսակցության գաղափարներին ու ծրագրերին մեր քաղաքացիներից միայն այդքանն են պատրաստ աջակցել։
Այս մասին «Փաստինֆոյի» հետ զրույցում ասել է «GALLUP International Association»-ի Հայաստանում լիիրավ անդամ Էմ Փի ՋԻ ՍՊԸ տնօրեն Արամ Նավասարդյանը։
Երեկ ՔՊ-ի քաղաքական ժողովի ժամանակ Նիկոլ Փաշինյանը հայտարարել է, թե ընդդիմադիր շարժումները Հայաստանում «տապալվում են», որովհետեւ իրենց առաջ քաշած «Իրական Հայաստանի» գաղափարախոսությունն ընկալելի է ժողովրդի կողմից։
Ա. Նավասարդյանի արձանագրմամբ՝ Փաշինյանի գործունեությունը դրական է գնահատում շուրջ 10 տոկոսը։
«Այստեղ ևս չի կարելի ասել, որ Փաշինյանի գործողությունները ողջունվում են լայն հասարակության կողմից, դրա մասին էր վկայում նաև Սրբազանի առաջնորդած շարժումը։ Մենք տեսնում ենք, որ բավականին լայնածավալ բողոքի ցույցեր էին և չենք տեսնում Նիկոլ Փաշինյանի աջակիցներին փողոցում։ Չեմ բացառում, որ նրանք կան, բայց եթե մենք խոսում ենք 1998-20 թթ. աջակցության մասին, ապա դրանից գրեթե ոչինչ չկա։
Այնպես որ՝ Փաշինյանը կարող է ինչ-որ բաներ խոսել, բայց մենք ականատես ենք եղել, որ նրա խոսույթները հետագայում դարձել են առոչինչ կան սուտ», – նշել է նա։
Դիտարկմանը, թե Փաշինյանն ինքն է զարմացած, որ ինքը դեռ շարունակում է մնալ իշխանության՝ Նավասարդյանն ասել է, որ սա չի նշանակում, որ ընդդիմադիրներն ունեն աջակցություն։
«Այստեղ խոսքն այն մասին է, որ իր դեմ տարվող պայքարը պետք է լինի ավելի համակարգված ու ավելի ճիշտ։ Օրինակ, ինքս Սրբազանի առաջնորդած շարժումը ողջունում եմ, բայց անգամ ես չէի պատկերացնում, որ կլինի մարդ, որը կկարողանա համախմբել և առաջնորդել նման շարժում։
Ցավոք, վերջին ժամանակահատվածում մենք տեսնում ենք, որ շատ են խմբերն ու կուսակցություններ, որոնք խոչընդոտում են որպեսզի շարժումը հաջողվի»,- ասել է նա։
Նավասարդյանի դիտարկմամբ՝ խոսքը ոչ թե իշխանության մասին է, այլ հենց ընդդիմադիր դաշտում գործող կուսակցությունների, որոնք ունեն իրենց օրակարգը, մտայնությունները և գործում են իրենց կուսակցության շահերից ելնելով, ոչ թե՝ երկրի կամ ազգի շահերից ելնելով։
«Ավելին, վերջին շրջանում ես նկատում եմ գզվռտոց ընդդիմադիր ուժերի միջև, որոնք, մեկը մյուսի հանդեպ նախապայմաններ ներկայացնելով, խոսում են այն մասին, որ մասնակցությունը պետք է լինի առանց նախապայմանների։ Սա այն եզակի դեպքերից է, որ չենք կարող մեղադրել Նիկոլ Փաշինյանին, չեմ բացառում, որ իր մասնակցությունն այս պրոցեսներին կա, բայց ոչ մի իշխանություն՝ իշխանությունը սկուտեղի վրա չի հանձնում ընդդիմադիրներին։ Հասկանալի է, որ պետք է պայքարեն իրենց իշխանության համար։
Գործը մնում է ընդդիմադիր դաշտի գործիչներին, թե որքանով նրանք հասուն են, գիտակից, որպեսզի կարողանան նստեն ու որոշակի ժամանակահատված պայմանավորվածություններ ձեռք բերեն, ոչ թե միմյանց հանդեպ նախապայմաններ դնեն, անցյալը հիշեցնեն։ Դա չի նպաստում սրբազանի կողմից առաջնորդած շարժման զարգացմանը»,- հավելել է Նավասարդյանը։
Ռազմական փորձագետ Կարեն Հովհաննիսյանը ֆեյսբուքյան իր էջում գրել է.
«ՌԴ-ում , մասնավորապես Դաղստանում տեղի ունեցած ահաբեկչական գործողությունները դեռ ձնծաղիկներն են։ ՌԴ-ն մեր տարածաշրջանում իր դիրքերը զիջելով Թուրքիային մեծ սխալ է թույլ տվել, ընդորում, այդ սխալը ժամանակ առ ժամանակ թույլ են տալիս, հետոհասկանումևուղղում։
Թուրքիան մեր տարածաշրջանն դեռ ամբողջական իրենով չի արել, անցել է արդեն կանխատեսելի ՌԴ հարավին։ Ինչու եմ ասում Թուրքիա, քանի որ ահաբեկիչները, ըստ տարածված տեղեկատվության, ակտիվ համագործակցում են թուրքական գորշ գայլերի հետ։
Իսկ գորշ գայլերը Էրդողանի ոչ պաշտոնական ուժն է, անտես ձեռքերն են․․․»:
Արցախի ԱԺ-ն հայտարարություն է տարածել. «Հունիսի 21-ին ՀՀ-ում Արցախի Հանրապետության մշտական ներկայացուցչության տարածքում տեղի ունեցած միջադեպը վեր հանեց այն փաստը, որ Հայաստանի գործող իշխանությունները հատել են ինչպես իրավական, այնպես էլ բարոյական արժեքների սահմանը։ Արցախի հանդեպ նմանօրինակ վերաբերմունքը շարունակությունն է օրեր առաջ՝ հունիսի 12-ին իրականացված բռնաճնշումների, ինչը վկայում է, որ հանուն իշխանության պահպանման նրանք պատրաստ են ոտնահարել երկրի Սահմանադրությունը և, անհամաչափ ուժ ու հատուկ միջոցներ կիրառելով սեփական ժողովրդի դեմ, կասկածի տակ դնել Հայաստանի Հանրապետության ժողովրդավարությունը և իրավական պետություն լինելու հանձնառությունը: Մեզ համար անընդունելի ու խստիվ դատապարտելի են այսպիսի երևույթները։
ՀՀ իշխանություններն արդեն տևական ժամանակ է, ինչ ժողովրդավարության քողի տակ թիրախավորում են արցախցիների տարբեր խմբերի ու անհատների, կիրառելով նրանց դեմ բռնաճնշումներ, խտրական վերաբերմունք՝ օգտագործելով «հայաստանցի-ղարաբաղցի» պառակտիչ բառապաշար։
Նման պայմաններում միաժամանակ տեղին ենք համարում երախտագիտության խոսք հղել հազարավոր ՀՀ մեր հայրենակիցներին, ովքեր արհամարհելով արհեստականորեն ստեղծված բաժանարար գծերը, անցած ինը ամիսների ընթացքում՝ մեզ համար դժվարին օրերին, ամեն ինչ արել են մեղմելու արցախահայության բարոյահոգեբանական և ֆիզիկական ցավը։
Վտանգավոր և անընդունելի է ներհանրային համերաշխությունը խարխլող և Արցախի հայության արժանապատվությունը վիրավորող բոլոր այն արարքները, հայտարարություններն ու ելույթները, որոնք դրսևորվում են ոչ միայն սոցիալական ցանցերում լայնորեն տարածված իրական կամ կեղծ օգտատերերի միջոցով, այլև ՀՀ Ազգային ժողովի ամբիոնից՝ իշխող քաղաքական ուժի ներկայացուցիչների կողմից հնչեցված:
Հայրենիքի և ազգային արժանապատվության համար պայքարը յուրաքանչյուր քաղաքացու, բոլոր ժողովուրդների անքակտելի իրավունքն է, ուստի պահանջում ենք ՀՀ իշխանություններից զերծ մնալ բռնություն, ատելություն և թշնամանք սերմանելու նենգ ու վտանգավոր դրսևորումներից:
«Արդարություն» խմբակցություն
«ՀՅ Դաշնակցություն» խմբակցություն
«Արցախի ժողովրդավարական կուսակցություն» խմբակցություն
«Ազատ հայրենիք- ՔՄԴ» խմբակցություն»:
Միացյալ Նահանգների քաղաքային և նահանգային դիվանագիտության հատուկ ներկայացուցիչ Նինա Խաչիկյանն այցելել է Սյունիքի մարզ՝ ծանոթանալու տեղի մշակութային և պատմական գեղատեսիլ վայրերին։
«Արմենպրես»-ի հաղորդմամբ՝ այս մասին նշված է Նինա Խաչիկյանի X-ի միկրոբլոգում կատարված գրառումներում։
«Նախքան տուն վերադառնալը՝ ես հանգստյան օրերն անցկացրի Սյունիքում՝ հարավային Հայաստանում: Այն, իսկապես, անհավանական վայր է. պատմությունը, մշակույթը, հրաշալի մարդիկ և հրաշալի բնական գեղեցկությունը հիացրել են ինձ։ Զարմանալի է Սյունիքի բնական գեղեցկությունը, իսկ շուրջբոլորը հնագույն պատմություն է։ Հայերն այստեղ ապրել են հազարավոր, նույնիսկ տասնյակ հազարավոր տարիներ»,- նշել է Խաչիկյանն իր գրառման մեջ՝ հավելելով, որ ինչպես Հայաստանում ամենուր, այնպես էլ Սյունիքում կան գեղեցիկ հին եկեղեցիներ, քանի որ Հայաստանն առաջին պետությունն է, որն ընդունել է քրիստոնեությունը 301 թվականին:
«Որոշ շինություններ, որոնք մենք տեսանք, թվագրվում են մեր թվարկության 400-ական թվականներին»,- նշված է գրառման մեջ::
ԱՄՆ պետքարտուղարության հատուկ ներկայացուցիչն իր գրառումներում անդրադարձ է կատարել նաև տեղի խոհանոցին՝ նշելով, որ Սյունիքում, ինչպես և ամենուր Հայաստանում, սնունդը թարմ է և համեղ, բայց կան հատուկ մարզային ուտեստներ և մեծ քանակությամբ լեռնային թեյ։ Նա նաև հույս է հայտնել, որ շուտով նորից կվերադառնա Սյունիքի մարզ:
«Մենք թափառեցինք հարյուրավոր տարիներ առաջ կառուցված հին գյուղերում, որտեղ կային մեծ պտղատու ծառեր, ինչպիսիք են թթենին և ընկույզը: Որոշ կացարաններ եղել են քարանձավներ՝ բնական և քարից քանդակված»,- նշած է Նինա Խաչիկյանի գրառումներում։
Իսրայելի վարչապետ Բենիամին Նեթանյահուն հայտարարել է, որ պաղեստինյան ՀԱՄԱՍ արմատական շարժման դեմ պատերազմի «ինտենսիվ փուլը շուտով կավարտվի», և որ զինվորականների ուշադրությունը կկենտրոնանա Լիբանանի հետ Իսրայելի սահմանի վրա, որտեղ վերջին շաբաթներին «Հեզբոլլահ» շարժման դեմ մարտերն ակտիվացել են։ Այս մասին հաղորդում է CNN-ը։
Միևնույն ժամանակ Նեթանյահուն խոստացել է, որ Իսրայելը կշարունակի գործողությունները Գազայի հատվածում, մինչև ՀԱՄԱՍ-ը չոչնչացվի։
«Դա չի նշանակում, որ պատերազմն ավարտվելու է, բայց պատերազմն իր ներկա փուլում ավարտվելու է Ռաֆահում։ Սա ճիշտ է։ Մենք ավելի ուշ կշարունակենք խոտը հնձել», – ասել է Նեթանյահուն Channel 14 հեռուստաընկերության հետ հարցազրույցի ժամանակ։
Իսրայելն, անտեսելով միջազգային հանրության կոչերը, ռազմական գործողություններ էր սկսել Գազայի հատվածի հարավում գտնվող Ռաֆահ քաղաքում, որտեղ ապաստան էր գտել ավելի քան 1 միլիոն մարդ։ Այդ ժամանակից ի վեր շուրջ 800 000 մարդ է տեղահանվել։
Մայիսի սկզբին Իսրայելը գրավել է Եգիպտոսի հետ սահմանին գտնվող Ռաֆահի անցակետը, որն այդ ժամանակից փակ է։
Հարցազրույցում Նեթանյահուն հայտնել է, որ պատրաստ է ՀԱՄԱՍ-ի հետ «մասնակի համաձայնության», որի ընթացքում կվերադարձվեն Գազայում գտնվող որոշ պատանդներ։ Միևնույն ժամանակ Նեթանյահուն կրկնել է, որ պատերազմը կշարունակվի հրադադարից հետո՝ «հասնելու ՀԱՄԱՍ-ին ոչնչացնելու նպատակին»։
Վերջերս ՄԱԿ-ի Անվտանգության խորհուրդն ընդունել էր ԱՄՆ-ի առաջարկած երեք փուլով հրադադարի պլանը․ այն ենթադրում է մարտական գործողությունների մշտական դադարեցում, որի դիմաց ազատ կարձակվեն Գազայում մնացած բոլոր պատանդները, ինչպես նաև Գազայի հատվածից իսրայելական զորքերի ամբողջական դուրսբերում։
ՀԱՄԱՍ-ը հայտարարել է, որ Նեթանյահուի դիրքորոշումը ցույց է տալիս ՄԱԿ-ի Անվտանգության խորհրդի բանաձևի և ԱՄՆ նախագահ Ջո Բանդենի առաջարկի մերժում։
Ինչ վերաբերում է Իսրայելի հյուսիսի վրա ուշադրությունը կենտրոնացնելուն, Նեթանյահուն հայտնել է, որ դա նախ կարվի պաշտպանական նպատակներով և երկրորդ, հնարավորություն կտա, որ Լիբանանի հետ սահմանամերձ շրջանների բնակիչները տուն վերադառնան։
«Եթե դա կարողանանք անել քաղաքական ճանապարհով, հրաշալի կլինի, իսկ եթե ոչ, ապա մենք այլ ձևով դա կանենք, բայց մենք տուն կվերադարձնենք բոլորին՝ թե՛ հյուսիսի, թե՛ հարավի բոլոր բնակիչներին», – ասել է նա։
Գազայի հատվածում պատերազմի ընթացքում «Հեզբոլլահ» շարժումը և Իսրայելն ինտենսիվ հարվածներ են փոխանակում։ Իսրայելի հյուսիսում և Լիբանանի հարավում գտնվող գյուղերի բնակիչները տեղահանվել են։
Գազայի հատվածում պատերազմը սկսվել է հոկտեմբերի 7-ին ՀԱՄԱՍ-ի զինյալների հարձակումից հետո, երբ Իսրայելում շուրջ 1200 մարդ սպանվեց, 250 մարդ՝ գերեվարվեց։ Իսրայելի պատասխան ռազմական գործողությունների հետևանքով Գազայի հատվածում, ըստ տեղի իշխանությունների, զոհերի թիվը հասել է 37 600-ի։
Լրագրող Ոսկան Սարգսյանի ֆեյսբուքյան գրառումը․ «Տավուշի մարզպետարանի ֆեյսբուքյան էջը հայտնում է, որ հունիսի 29-ին Ենոքավանում տեղի կունենա ավանդական դարձած «ՀայԲույս» փառատոնը:
Ենոքավանը Նիկոլ Փաշինյանի պապական գյուղն է։
Մարզպետարանը հայտնում է, որ «ՀայԲույս» Փառատոնի նպատակն է ժողովրդականացնել հայկական բուսականությունը և դրա կիրառությունը կյանքի տարբեր ոլորտներում` կենցաղ, բժշկություն, մշակույթ, արվեստ, ճարտարապետություն և այլն: Փառատոնի ընթացքում մասնակիցները պատրաստելու են խաղաղության ամենամեծ բրդուճը` լավաշից, հայկական բույսերից և պանրի տարբեր տեսակներից:
Նիկոլ Փաշինյանը միակողմանի կերպով, ապօրինաբար Ադրբեջանին է հանձնել ռազմավարական նշանակություն ունեցող, Հայաստան-Վրաստան ավտոճանապարհը վերահսկող սահմանային դիրքերը Կիրանցում, Ներքին Ոսկեպարում (Աշաղի Ասքիպարա), Բաղանիս-Այրումում, իսկ նրա պապական գյուղ Ենոքավանում պատրաստելու են խաղաղության ամենաերկար բրդուճը։
Ադրբեջանի ՊՆ-ն կեղծ հաղորդագրություններ է տարածում Հայաստանի կողմից Ադրբեջանի տարածքի գնդակոծությունների մասին, Իլհամ Ալիևը Հայաստանին նոր պահանջներ է առաջադրում ու սպառնալիքներ հնչեցնում, այդ պայմաններում խաղաղության ամենաերկար բրդուջ սարքելու համար առնվազն բույս՝ քոլ պետք է լինել»
Դե տղա է, թող Բագրատ սրբազանի պես հրապարակը լցնի.
Շարմազանովը՝ Փաշինյանին
Մանրամասները՝ տեսանյութում
ՀՀԿ-ական գործիչ Էդուարդ Շարմազանովը «Նյուզ»-ի եթերում անդրադառնալով ՔՊ Քաղաքական ժողովում վարչապետ Նիկոլ Փաշինյանի հայտարարությանը, ասել է.
«Ինքը լեգիտիմ իրավունք է տալիս Իլհամ Ալիևին՝ հայ ժողովրդի հետ վարվել որպես զոհի ու ցեղասպանել:
Փաշինյանն այս հայտարարությամբ հերթական անգամ փաստացի ցույց է տալիս, որ ինքը պանթուրքիզմի և Ադրբեջանի դեսպանի գործառույթ է ստանձնել, կամ Ալիևի փաստաբանի:
Էս մարդն Ալիևի ձեռքերից մաքրում է արյունը...
Եթե ՀՀ վարչապետը տենց ա ասում, Ադրբեջանն ու Թուրքիան պիտի ասեն՝ լավ ենք արել, մորթել ենք»։
Ֆոտո
