Իրանը հայտնել է Իսրայելի Բեն Գուրիոն օդանավակայանին հրթիռային հարված հասցնելու մասին։

Ինչպես հաղորդում է Mehr-ը, իրանական ուժերը ճշգրիտ խոցել են օդանավակայանը։

Իրանական լրատվամիջոցը նաև հրապարակել է հրթիռային հարվածի կադրերը։

Վերջին 48 ժամվա ընթացքում Իսրայելը դիմել է ԱՄՆ նախագահ Դոնալդ Թրամփի վարչակազմին՝ խնդրելով միանալ Իրանի դեմ պատերազմին՝ նրա միջուկային ծրագիրը ոչնչացնելու համար, գրում է Axios-ը՝ վկայակոչելով երկու իսրայելցի պաշտոնյաների։

Իրանի՝ լեռներում և խորը գետնի տակ գտնվող Ֆորդոյի ուրանի հարստացման գործարանը ոչնչացնելու համար Իսրայելին չեն բավարարում բունկերները ոչնչացնող ռումբերն ու խոշոր ռմբակոծիչները։ ԱՄՆ-ն ունի թե՛ մեկը, թե՛ մյուսը՝ Իրանից թռիչքի հասանելիության սահմաններում։

Սակայն Թրամփի վարչակազմը մինչև այժմ իրեն հեռու է պահել Իսրայելի գործողությունից և պնդել, որ Իրանի համար անօրինական կլիներ պատասխան հարված հասցնել ԱՄՆ օբյեկտներին։ Իրանի վրա ուղիղ հարձակումը, նույնիսկ եթե ԱՄՆ-ի մասնակցությունը սահմանափակվի մեկ օբյեկտի ռմբակոծմամբ, ԱՄՆ-ին ուղղակիորեն կներքաշի պատերազմի մեջ։

Իրանի զինված ուժերի կապի կենտրոնի ներկայացուցիչ, գնդապետ Ռեզա Սայադը կոչ է արել Իսրայելի բնակիչներին լքել երկրի «կենսականորեն կարևոր շրջանների» շրջակայքը, հաղորդում է IRIB-ը։

«Նախազգուշացումներ առաջիկա օրերի համար.շ

Լքե՛ք օկուպացված տարածքները, քանի որ ապագայում դրանք, անկասկած, բնակության համար պիտանի չեն լինի

• Վերջին գիշերներին, արդեն որերորդ անգամ, մենք հաջողությամբ խոցել ենք զգայուն և կարևոր թիրախներ, այդ թվում՝ ռազմական և ուժային կենտրոններ, ռեժիմի որոշումների կայացման կենտրոններ և զինվորական հրամանատարների ու գիտնականների նստավայրերը ձեր օկուպացված տարածքներում։ Այժմ մենք ունենք ձեր բոլոր կենսականորեն կարևոր, զգայուն վայրերի և կետերի վերաբերյալ տեղեկատվության ամբողջական բազա։ Ուստի մենք ընդգծում ենք, որ դուք չպետք է թույլ տաք, որ հանցավոր ռեժիմը ձեզ օգտագործի որպես կենդանի վահան։
• Խուսափե՛ք վերոնշյալ վայրերի մոտակայքում բնակվելուց կամ ճանապարհորդելուց և իմացե՛ք, որ ստորգետնյա ապաստարաններում գտնվելը ձեզ անվտանգություն չի ապահովի։
• Հանցավոր սիոնիստական ռեժիմը, հատկապես նրա հանցագործ վարչապետը, հանցագործություն է սկսել հանուն սեփական և իր ընտանիքի շահի՝ վտանգի ենթարկելով բնակիչների անվտանգությունն ու կյանքը, ինչը, բացի ձախողումից ու ափսոսանքից, այլ բանի չի հանգեցնի։
• Վերոնշյալ նախազգուշացումներն անտեսելը զգալիորեն կբարդացնի ձեր կյանքը»,- ասվում է Սայադիի հայտարարության մեջ։

Տուժել են Շիրազը, Սպահանը և Մաշհադի օդանավակայանը։ Իսրայելը հարձակվել է Իրանի արևմտյան Քերմանշահի Իմամ Հասան ռազմաբազայի վրա։

Իսրայելի բանակը զենքի արտադրության օբյեկտների մոտ բնակվող իրանցիներին կոչ է արել տարհանվել։ Թեհրանի բնակիչները փորձում են լքել քաղաքն ապահովության համար՝ Իրանի մայրաքաղաքի վրա մշտական ​​հարձակումների ֆոնին:

Իրանում բոլոր ուսումնական հաստատությունները փակվել են մինչև հաջորդ ծանուցումը, Իսրայելն էլ երկարացրել է արտակարգ դրությունը և սահմանափակումները մինչև հունիսի 30-ը։

Իրանի առողջապահության նախարարությունը հայտնել է, որ առնվազն 128 մարդ է զոհվել, ավելի քան 900-ը՝ վիրավորվել Իրանի վրա Իսրայելի հարձակումների հետևանքով։

Իրանի իշխանությունները հայտնել են իսրայելական «Մոսադ» հետախուզական ծառայության գործակալների ակտիվության մասին (երկուսը ձերբակալվել են Իրանի հյուսիսում)։

Թեհրանի հրետակոծության հետևանքով վնասվել է հայկական «Ալիք» թերթի խմբագրությունը, կոտրվել են ապակիները, հայտնում է «Փաստինֆոն»։ Մինչև վերանորոգումը թերթը կտպագրվի միայն առցանց։

Գիտնականները բուծել են երեք գայլ՝ սպիտակ մազով և ուժեղ ծնոտներով: Դրանք նման են ավելի քան 10.000 տարի առաջ անհետացած սարհաս գայլերին:

Այս գայլերը, որոնք 3-6 ամսական են, ապրում են ԱՄՆ-ում՝ գաղտնի վայրում. ըստ Առաջին լրատվականի՝ APnews-ի փոխանցմամբ, հայտնում է Colossal Biosciences ընկերությունը, որը աշխատում է անհետացած տեսակները վերականգնելու վրա:

Ձագերն արդեն կշռում են 36 կգ և, ըստ գիտնականների, կհասնեն 63 կգ-ի:

Սարհաս գայլերը, որոնք անհետացել են ավելի քան 10.000 տարի առաջ, շատ ավելի խոշոր էին, քան ներկայիս գորշ գայլերը՝ նրանց ամենամոտ կենդանի ազգակիցները:

Անկախ փորձագետները կարծում են, որ սա դեռ չի նշանակում սարհաս գայլերի վերադարձ: «Կարելի է միայն արտաքին նմանություն ստեղծել, ոչ թե լիովին վերակենդանացնել»,- ասել է կենսաբան Վինսենթ Լինչը:

Colossal-ի թիմը սարհաս գայլերի մասին տեղեկություններ է հավաքել՝ ուսումնասիրելով 13.000 տարվա ատամ և 72.000 տարվա գանգի կտոր:

Գերմանիայի չեմպիոն Մյունխենի «Բավարիան» հաղթանակով մեկնարկեց ԱՄՆ-ում անցկացվող աշխարհի ակումբային առաջնությունում։

Բելգիացի Վենսան Կոմպանիի գլխավորած թիմը Ցինցինատիում մրցեց Նոր Զելանդիայի «Օքլենդի» հետ եւ հաղթեց 10:0 հաշվով։

Հեթ-տրիկի հեղինակ դարձավ գերմանացի կիսապաշտպան Ջամալ Մուսիալան, երկուական գոլ խփեցին ֆրանսիացի հարձակվող Քինգսլի Քոմանը, գերմանացի հարձակվող Թոմաս Մյուլերը, ֆրանսիացի կիսապաշտպան Մայքլ Օլիսեն։ Աչքի ընկավ նաեւ ֆրանսիացի պաշտպան Սաշա Բոեն։

C խմբում ընդգրկված են նաեւ պորտուգալական «Բենֆիկան» եւ արգենտինական «Բոկա Խունիորսը»։ Երկրորդ տուրում «Բավարիան» հունիսի 21-ին կխաղա «Բոկա Խունիորսի» հետ։

Կարիբյան ծովի հատակին հայտնաբերվել է խորտակված նավ, որում գտել են ոսկու, արծաթի և գոհարների շտեմարան՝ 16 միլիարդ ֆունտ ստեռլինգ (21 միլիարդ դոլար) արժողությամբ։ Այս մասին հաղորդում է The Telegraph պարբերականը։

Իսպանական «Սան Խոսե» նավի գանձերը, թվում էր, մեկընդմիշտ կորել էին 1708 թվականին նավի խորտակումից հետո:

Բրիտանական թագավորական նավատորմի սպա Չարլզ Վեյջերի կողմից ղեկավարվող ջոկատը կանգնեցրել էր գանձերով լի նավը Կոլումբիայի Կարտախենա քաղաքից ոչ հեռու գտնվող Բարու կղզու մոտ և հարձակում սկսել, սակայն պայթյունների պատճառով նավն ընկղմվել էր ծովի հատակը: 

Գանձը Պերուից տեղափոխվում էր Իսպանիա՝ ֆինանսավորելու իսպանական ժառանգության համար պատերազմը Բրիտանիայի և նրա դաշնակիցների դեմ:

«Սան Խոսե»-ում հայտնաբերված, ներկայիս փոխարժեքով 16 միլիարդ ֆունտ ստեռլինգ գնահատվող գանձերը ներառում են ոսկե և արծաթե մետաղադրամներ, մարգարիտներ, զմրուխտներ և այլ թանկարժեք քարեր։

Բարու կղզու մոտ՝ ծովի հատակին, նավը հայտնաբերվել է 2015 թվականին։ Ըստ Կոլումբիայի մասնագետների՝ այն հենց «Սան Խոսե»-ն է։ Ստորջրյա դրոնների միջոցով նրանք լուսանկարել են նավի վրա և դրա շուրջը գտնվող բեռը։

Պատկերների վերլուծությամբ պարզվել է, որ նավում կան արծաթե մետաղադրամներ, որոնք հատվել են 1707 թվականին, Լիմայի դրամահատարանի հարգադրոշմով։ Մյուս գտածոները ներառում են չինական ճենապակյա իրեր՝ Կանսի կայսեր ղեկավարման ժամանակաշրջանից (1662-1722 թթ.) և թնդանոթների վրա արված գրություններ, որոնք թվագրվում էին 1665 թվականին։

Նավի բեկորների սեփականության պահանջներ են ներկայացրել Կոլումբիան, Իսպանիան, Պերուն, տարածքի բնիկները, Glocca Morra գանձեր որոնող ընկերությունը, որը պնդում է, որ հայտնաբերել է խորտակված նավը դեռևս 1981 թվականին:

Իրանի զինված ուժերը Իսրայելի ռազմական օբյեկտների դեմ հրթիռակոծության նոր ալիք են իրականացրել:

Mehr-ը տեղեկացնում է, որ իսրայելական ԶԼՄ-ները հայտնել են, որ Իսրայելի տարբեր քաղաքներում շչակներ են միացվել Իրանից հրթիռների արձակումից հետո: Իրանական հրթիռակոծությունների նոր ալիքի ընթացքում թիրախավորվել են Իսրայելի Թել Ավիվ, Աշկելոն և Հայֆա քաղաքները:

Նշվում է նաև, որ իսրայելական ԶԼՄ-ները նաև հայտնել են, որ իրանական հրթիռները հարվածել են Հայֆային և Տիբերիային: Իսրայելի 12-րդ ալիքը նաև հայտնել է Ալ Քուդսում (Արևելյան Երուսաղեմ) մի քանի պայթյունների մասին։

Թուրքիայի նախագահ Էրդողանը և ԱՄՆ նախագահ Թրամփը հեռախոսով քննարկել են Իսրայել-Իրան հակամարտությունը, երկկողմ հարաբերությունները և տարածաշրջանային խնդիրները։ 

Ինչպես հայտնում է Անադոլու գործակալությունը, Թուրքիայի նախագահը ողջունել է Թրամփի վերջին հայտարարությունները Իսրայել-Իրան հակամարտությունը դադարեցնելու վերաբերյալ՝ ընդգծելով հրատապ գործողությունների անհրաժեշտությունը՝ կանխելու աղետը, որը կարող է մեծանալ տարածաշրջանում։

Նա նշել է, որ Իսրայելի հարձակումները Իրանի վրա հանգեցրել են «անդառնալի տնտեսական և քաղաքացիական վնասների» երկու կողմերի համար, և շեշտել, որ պետք է դադարեցնել այս վտանգավոր էսկալացիան։