Հակոբ Բադալյանը գրում է. «Մոսկվայում ձերբակալվել է Ուրալում ադրբեջանական համայնքի ղեկավար Շախլիսնկին, որը հետախուզվում էր հայտնի իրադարձություններից հետո: Ինչպես հայտնի է, մի քանի օր առաջ ձերբակալել էին նրա որդուն: Առայժմ պարզ չէ, թե ինչ դատավարական կարգավիճակ կունենա ադրբեջանական համայնքի ղեկավարը:

Իհարկե սա նոր «երանգ» կլինի Մոսկվա-Բաքու տակտիկական դիմակայությունում:

Սակայն այսօր այդ առնչությամբ գուցե տարածվել է այլ մի տեղեկություն, որը ուղղակիորեն ոչինչ չի պարունակում Ադրբեջանի մասին, սակայն այդուհանդերձ տողատակում պետք չէ բացառել Բաքվի «առկայությունը»:ՌԻԱ Նովոստին այսօր տեղեկություն է տարածել՝ հղում անելով ի դեպ թուրքական աղբյուրներին, որ Ռուսաստանն ու Թուրքիան ինտենսիվորեն ինֆորմացիայի փոխանակում են կատարում նախորդ տարի մարտին Կրոկուս համերգասրահում տեղի ունեցածծ խոշոր ահաբեկության քննության առնչությամբ: Ինչպես հայտնի է, Կրոկուսի ահաբեկիչները ըստ տեղեկությունների «մարզվել» էին Թուրքիայի տարածքում: 

Այստեղ սակայն ուշադրությունից պետք չէ թերեւս բաց թողնել այն, որ ահաբեկության առնչությամբ նաեւ քննարկվում էր Կրոկուսի անվտանգության ծառայության աշխատանքի թերացումների հարցը: Իսկ Կրոկուսը, ինչպես հայտնի է, պատկանում է ծագումով ադրբեջանցի միլիարդատեր Աղալարովին, որի որդին՝ Էմինը, Իլհամ Ալեւի նախկին փեսան է եւ ներկայումս էլ խոշոր ներդրումային ծրագրեր է իրականացնում Բաքվում, դրանք պարբերաբար ներկայացնելով Ալիեւին:

Կարո՞ղ է արդյոք Կրոկուսի քննության տվյալների հարցով Մոսկվա-Անկարա ինֆորմացիայի փոխանակման «առարկաների» շարքում լինել «ադրբեջանական գործոնի» հետ կապված որեւէ բովանդակություն: Իհարկե չունենք միարժեք այդպիսի եզրակացության հիմք, սակայն բոլոր դեպքերում ուշագրավ է, որ ռուս-թուրքական ինֆորմացիայի ինտենսիվ փոխանակման մասին տեղեկությունը ՌԻԱ Նովոստին հայտնում է ներկայիս ռուս-ադրբեջանական լարվածության ֆոնին, այն էլ հղում անելով թուրքական աղբյուրին:

Ես ուզում եմ հիշեցնել, որ լարվածության ներկայիս փուլի բռնկման շրջանում Թուրքիայի նախագահ Էրդողանը բավականին ուշագրավ «խաղաղարար» դիրքորոշում էր արտահայտում, պահելով ընդգծված չեզոքություն, չփորձելով որեւէ կերպ «թեքվել» Ադրբեջանի կողմը, գոնե հրապարակավ»