Ժողովրդի 80 տոկոսը աղքատության մեջ է, ի՞նչ դեմոկրատիայից եք խոսում. Եթե մեկը իշխանության մեջ դուրս գա, ասի, որ այս քաղաքականությանը դեմ է, իսկույն գործից ազատելու են: Ի՞նչ դեմոկրատիա, փակեք այդ թեման, ձեզ վրա ծիծաղում են: Այս մասին NEWS.am-ի հետ զրույցում նշեց Արցախի նախկին պետնախարար Սամվել Բաբայանը:
Անդրադառնալով արցախցիների բնակարանային խնդիրների լուծմանը, նա ասաց. «Ես համարում եմ, որ արցախցիներին պետք է տներով ապահովեն: Հայաստանը 2000-ից իր վրա պարտավորություն է վերցրել, որ Արցախի երաշխավորն է: Հետո պարտվել են, Արցախի երաշխավորը փոխվել է 2020-ի նոյեմբերի 9-ի փաստաթղթով, դարձել է Ռուսաստանը, էն էլ 2023-ին ոչինչ չի արել, Ղարաբաղը վերջացել է: Արցախցիներին դուք պետք է տնով ապահովեք, երաշխավորներ Հայաստան, Ռուսաստան:
Այսօր Հայաստանում, Երեւանում շենքեր են սարքում: Ես ասում եմ՝ այդ 3-4 մլն դոլարը, որ պետք է հատկացնեք ժողովրդին, դրեք էդ շենքերը կառուցեք, հիփոթեքով ձեւակերպեք էդ ժողովուրդը մտնի այդտեղ ապրի: Սա Ստեփանակերտցիների մասով:
Մնացածի մասով էլ, բնակեցրեց, ասենք, Սյունիքի մարզում: Արեւմուտքը 2,6 մլրդ եվրո է հատկացնում: Ես առաջարկում եմ այդ գումարները դրեք մի մարզ ունեցեք ինքնաբավ եւ այդտեղ ընդգրկեք արցախցիներին: Այդ տարածքում եռապատկեք բնակչության թիվը: Բայց դրա փոխարեն այս իշխանությունները գտան ձեւ, թե ոնց անեն, որ ղարաբաղիցիները ընդհանրապես չլինեն: Ոչ մի քաղաքական գործիչ իրավունք չուներ նման որոշում կայացնել, ասելով՝ 3 մլն փող եմ տալիս, քոչեք ստեղից: Դուք ստիպում եք, որ արցախցիները մի մարդու նման դուրս գան հրապարակ, ու սկսեն հայաստանցի-ղարաբաղցի խաղալ: Մի արեք տենց բաներ: Նրանք ձեր հայրենակիցներն են, առաջնագծում են եղել, ձեր սահմանները պահել են»,- ասաց Սամվել Բաբայանը:
0Comments